Jueces 1 - Dios Iwene

Judasaso jojodöbi, Simeonsaso jojodöbi Canaan nijinö ju̧kwadönö tjujuluwina jawa

¹ Josue ö'wö baibaja̧ ikenama, israel jojodöma Isabenö Jo̧nö abebö tja̧ja̧kwinobe, —Duluwo̧, ökwödö israel jojodötjö diso jojodö abönö cananeo jojodönö dölakwabikwawobö jo̧beda? —jö̧ba̧lö.

² Atjebökwe, Isabenö Jo̧ma atadinobe, —Judasaso jojodö ju'wedötjö abönö ölakwabikwawö tji̧'yobö jo̧be, ja̧danö jobadönö chiyajabe, cananeo jojodönö tjujuluwobö, ja̧danö tjitebo niji 'dötjebobö, —jö̧ba̧lö.

³ Jejenö atadiawö̧, Juda jojodö tjölakwabikwawöbo tjo̧mukwatinobe, ja̧danö tjömöledö Simeonsaso jojodönö atjebinobe, —Ökwödökwö ichö pjakataduwo, Dios ökwödönö chiyocha jö̧a̧linemi nijibe, cananeo jojodönö ölakwabikwawö ditebo baibanö 'döbebö demobö. Ja̧danö, jejenö pjakataduwitjö̧ma, ökwödöbi ökwödönö pjadatakwedösa, ökwödö kwiteboduwi baibanö Dios chiyocha jö̧a̧linemi nijibi kwiteboduwi baibanö kwemaduwobö, —jö̧ba̧lö. Ja̧danö, jejenö yötja̧lawö̧, Simeonsaso jojodöma Judasaso jojodönö pjabatö tjölakwabikwawobö tji̧'yinobe.

⁴ Jejenö Simeonsaso jojodö pjatjatonö, Judasaso jojodöma tjitea niji tjujuluwobö tji̧'yinobe, ja̧danö Isabenö Jo̧ma otiwanö pjaatinobe, cananeo jojodönöbi, ferezeo jojodönöbi tjujuluwobö. Jejenö pjaatawö̧, Bezec comunidadtjö tjöpöjojodönö diez milbedönö tjujuluwinobe.

⁵ Jobe Bezectjö, Bezec la'aka luwo̧nöbi, ömöayedö cananeo jojodönöbi ferezeo jojodönöbi tjöbadekwajinobe, ja̧danö̧ jobadönö ölawabikwawö tjujuluwinobe.

⁶ Jejenö tjujuluwiökwe, Bezec comunidad la'aka luwo̧ma tjöba a'otjö döibajinobe, jo̧kwaijayonö jo̧banö lubö do̧tja̧tinobe Judasaso jojodöma. Ja̧danö, jo̧banö do̧batajadö, bitenö dujuluwajabe jö̧ba̧lö, ömamu la'akasö'abi, ömasapa la'akasö'abi bulatö lotjinobe.

⁷ Jejenö ötö'iya bulatö lotjökwe, Bezec la'aka luwo̧ma yöa̧linobe, —Jelobetenia tjuluwedö la'aka luwedö setentabedönö, chujuluwajawö̧ jejenö tjötö'iya bulabinö lotijatö, ja̧danö jejenö chujuluwajawö̧, chu̧kwa mesasötetjö tjoduwaja̧ kwawawa tjukwotö jö̧ba̧lö tjisakwinobe. Ja̧danö, babema ötjö jobadönö usula tjemawinö wetinadanö, Diosma bakwainö usula chemawinö weajabe, —jö̧ba̧lö. Ja̧danö Judasaso jojodöma Bezec la'aka luwo̧nö tje'ewinobe Jerusalenbe, ja̧danö jobetjö ö'wö baibinobe.

⁸ Ja̧danö Judasaso jojodöma Jerusalen comunidad jojodönöbi tjölakwabikwawinobe, ja̧danö Jerusalennö ju̧kwadönö tjujuluwinobe. Juluwajadö, Jerusalennö ju̧kwadönö dȩdȩbö kwabö lotjinobe kwölöte'onö, ja̧danö ju'wibi comunidad ökwölanö juwö lotjinobe.

⁹ Jemi ikenama, jobetjö Judasaso jojodöma cananeos jojodönö ölakwabikwawö tji̧'yinobe, mösa'iju jȩmi ju̧kwadönöbi, Neguev nijinö ju̧kwadönöbi, ba̧ba̧lawobe ju̧kwadönöbi.

¹⁰ Hebron comunidad ajayinö Quiriat Arba mikwina comunidadbe 'ya̧nö, tjölakwabikwawinobe, ja̧danö jobetjö la'aka luwedö Sesay mikwo̧nöbi, Ajiman mikwo̧nöbi, Talmay mikwo̧nöbi tjujuluwinobe.

¹¹ Ja̧danö Hebron comunidad juluwajadö, Debir comunidad, ajayinö Quiriat Sefer mikwina comunidadbe 'ya̧nö ölakwabikwawö tji̧'yinobe.

¹² Jobe tjölakwabikwawenama, Calebma yöa̧linobe, —Quiriat Sefer comunidadnö ju̧kwadönö mebibö juluwajo̧nö, chitjiju Acsa mikwujunö wetocha, ilekwo bajibanö, —jö̧ba̧lö.

¹³ Jejenö yöa̧lökwe, Caleb öjawo̧ Quenaz mikwo̧ itji̧ Otoniel mikwo̧ma, Quiriat Sefer comunidad mebibö ujuluwinobe, ja̧danö jejenö ujuluwiökwe, Calebma itjiju Acsanö weinobe, Otoniel ilekwo bajibanö.

¹⁴ Otoniel ilekwo bajibanö Acsanö emenama, Acsama jilekwenö wejinobe, jabe'donö niji aebobö. Aebökwe iyinobe, ja̧danö jemi ikenama jabe'do ö̧jobekwö ji̧'yinobe jajwi bulonö wanö. Ichibö bulo oma'atjö mejibiökwe, jabe'do Calebma abebö a̧ja̧kwinobe, —Chitjiju, taji kwösöda? —jö̧ba̧lö.

¹⁵ Aeboko, —Chabe'do, ju'wibi ötjönö kwiyobö atebakwö, ökwödönö niji kwiyajabe Neguev nijitjö, jo̧kwaijayonö ojwiyo kököobe jobema. Jo̧kwajabetjö̧ ju'wibi ojwese'do jȩmi nijibi kwiyobö atebakwö, otiwanö ojwiyo dujuna̧lobö, —jö̧ba̧lö. Jejenö ajebökwe, Calebma ajebaja̧danö iyinobe, jobe u'dakwöchobe ji̧ ojwese'do jȩmi nijibi, a̧li̧kwö ji̧ ojwese'do jȩmi nijibi iyinobe.

¹⁶ Ja̧danö, quenita jojodö, Moises öjaba Hobab itji̧mu tupadanö jojodöma, jobadöma Judasaso jojodökwö tji̧'yinobe, Juda niji jojodö deobe tjö̧jobö. Jobadöma Jerico, ju'wi imi Öjiya Towi Jȩmi comunidadtjö labebö, juda niji, Neguev ötjabobe tji̧'yinobe, Arad comunidad pjeanö ju̧kwadökwö tjö̧jobö.

¹⁷ Ja̧danö, Simeonsaso Judasaso jojodönö pjatjatinadanö, Judasaso jojodöma Simeonsaso jojodönöbi pjatjatinobe, tjitebo niji tjujuluwobö. Sefat comunidadbe 'ya̧nö, jobe ju̧kwadö cananeo jojodönö tjölakwabikwawinobe, ja̧danö jwiinö söbebö lotjinobe Sefat comunidadma. Jemi tupakwö, ja̧ comunidad Jorma jö̧ba̧lö tjimidinobe, jwiinö söbebö lotjinemi jö̧ba̧lö.

¹⁸ Ju'wibi Juda jojodöma Gaza comunidadbi, ö'öbö pjei̧ comunidadteniabi tjujuluwinobe, ja̧danö Ascalon comunidadbi, ö'öbö pjei̧ comunidadteniabi, ja̧danö Ecron comunidadbi, ö'öbö pjei̧ comunidadteniabi.

Israel jojodö cananeo jojodönö a'dewö lobökönö tjö̧jina jawa

¹⁹ Isabenö Jo̧ma otiwanö pjaatinobe Judasaso jojodö tjöpöjojodönö tjujuluwobö, ja̧danö otiwanö mösa'iju jȩmi niji tjujuluwinobe, ja̧danö idöda tjitebo baibanö jobe tjö̧jobö tjeminobe. Jo̧kwaijayonö ba̧ba̧lawobe ju̧kwadönö ina tjujuluwinokobe ja̧ möle. Jobadönöbi tjujuluwo jö̧tja̧li̧jayonö waekwinobe, jobe ju̧kwadöma 'dii jawatjö otikwa kolukiya tjujuna̧lobetjö̧.

²⁰ Moises ajayinö weinadanö, Juda jojodöma Hebron comunidad tjömöledöso̧ Calebnö tjiyinobe iteda itebo baibanö, ja̧danö jejenö tjiyiökwe, jobe ajayinö ji̧nadö Anac itji̧mu tupadanö jojodö wapösokwa jojodönö a'dewö loinobe.

²¹ Ja̧danö, Benjaminsaso jojodöma jebuseo jojodönö tjitebotjö a'dewö lotjo jö̧tja̧linobe, jo̧kwaijayonö Jerusalennö ju̧kwadö jebuseo jojodönö a'dewö lotjinokobe. Jo̧kwajabetjö̧, babe möle baibanö, jobadö jebuseo jojodöma ina Benjaminsaso jojodö tjö̧'da̧de ju̧kwadö.

²² Ja̧danö Jose itji̧mu tupadanö jojodö Efrainsaso jojodöbi, Manasessaso jojodöbi Betel comunidad tjujuluwobö tji̧'yinobe, ja̧danö Isabenö Jo̧ma otiwanö jobadönö pjaatinobe.

²³ Jobadöma ju'wedönö wetjinobe, Betel comunidad ju̧kwadö wajwitjonö, niji edö kwetjachobö. Ja̧ möle, Betel comunidadma, Luz jö̧ba̧lö mikwina comunidad,

²⁴ ja̧danö niji kwebachö edadöma bakwo̧ comunidadtjö laebobe tjedinobe, ja̧danö tjedenama, jo̧banö atjebinobe, —Luz comunidad teachakwawemi kwi̧sȩbo, wene jwiinö jobe tedachobö. Jejenö kwi̧sȩbitjö̧ma, ökwönö dösölöjinö dedakwedösa, ökwönö kwabö lobökönö, —jö̧ba̧lö.

²⁵ Atjebökwe, teachakwawemi i̧sȩbö öba̧ja̧dinobe, ja̧danö Efrainsaso jojodöbi, Manasessaso jojodöbi jobe tebachö, okobe deinö comunidad ju̧kwadönö dȩdȩbö lotjinobe. Jo̧kwaijayonö ju'wedönö kwabö lotjijayonö, pjabatinanöbi, okobe deinö yöne ömöledönöbi kwabö lotjinokobe, ja̧danö wene jwiinö latjebobö wetjinobe.

²⁶ Jemi ikenama jo̧bama ömöledönö öbibö hitita jojodö tjitebobe i̧'yinobe, ja̧danö jobe comunidad otidinobe. Ja̧ otidaja̧ comunidad ajayinö ö̧jinemi comunidad iminö midö öabinobe, Luz jö̧ba̧lö, ja̧danö babe mölebi baibanö, ina Luz mikwobe otidina comunidadma.

²⁷ Manasessaso jojodöma tjitebo niji ju̧kwadönö a'dewö lotjo jö̧tja̧linobe, jo̧kwaijayonö Betsean comunidad ju̧kwadönöbi, Tanaac comunidad ju̧kwadönöbi, Dor comunidad ju̧kwadönöbi, Ibleam comunidad ju̧kwadönöbi, Meguido comunidad ju̧kwadönöbi a'dewö lotjinokobe. Ja̧ comunidadbiya ju̧kwadönöbi, ö'öbö ji̧ pjei̧ comunidad ju̧kwadönöbi a'dewö lotjinokobe, jo̧kwajabetjö̧ a'dewö lotjo jö̧tja̧lijayonö, cananeos jojodöma ina jobe tjö̧jinobe.

²⁸ Ja'yubenö lekwajabetjö̧ israel jojodöma ajayitjö bajalekwönönö juluwadö batjibenama, jobadönö tjujuluwinobe, tjö̧möayedö batjibanö, ja̧danö 'diinö tjotidobö wetjinobe. Jo̧kwaijayonö, a'dewö lotjo jö̧tja̧lijayonö, a'dewö lotjinokobe deinöma.

²⁹ Efrainsaso jojodöma Guezer comunidadnö ju̧kwadö cananeos jojodönö a'dewö lotjinokobe, jo̧kwajabetjö̧ cananeos jojodöma jobe Efrainsaso jojodö tjö̧'dade tjö̧jinobe.

³⁰ Ja̧danö Zabulonsaso jojodöma Quitron comunidad jojodönöbi, Nalol comunidad jojodönöbi a'dewö lotjinokobe, jo̧kwajabetjö̧ Zabulonsaso jojodö tjö̧'da̧de tjö̧jinobe. Jobadönö tjujuluwijayonö, a'dewö lobökönö, tjömöayedö batjibanö labinö tjotidobö wetjinobe Zabulonssaso jojodöma.

³¹ Ja̧danö Asersaso jojodöma Aco comunidad jojodönöbi, Sidon comunidad jojodönöbi, Ajlab comunidad jojodönöbi, Aczib comunidad jojodönöbi, Jelba comunidad jojodönöbi, Afec comunidad jojodönöbi, Rejob comunidad jojodönöbi a'dewö lotjinokobe.

³² Ja̧danö, jejenö a'dewö lotjinokobetjö̧, Asersaso jojodöma jobadö cananeos jojodö, ajayinö ja̧ niji ju̧kwadö tjö̧'da̧de tjö̧jinobe.

³³ Ja̧danö Neftalisaso jojodöma Bet Semes comunidad jojodönöbi, Bet Anat comunidad jojodönöbi a'dewö lotjinokobe, ja̧danö jobadö ajayinö ja̧ niji ju̧kwinadö cananeos jojodö tjö̧'da̧de tjö̧jinobe. Ja̧danö, Neftalisaso jojodöma Bet Semes comunidadnö ju̧kwadönöbi, Bet Anat comunidadnö ju̧kwadönöbi wetjinobe, tjömöayedö babibö 'diinö tjotidobö.

³⁴ Ja̧danö Dansaso jojodö ba̧ba̧lawobe tji̧'yobö jö̧tja̧lena, jobe ju̧kwadö amorreos jojodöma ölakwabikwawö wetjinokobe, ölakwabikwawö Dansaso jojodö mösa'iju jȩminöda tjö̧jobö tjujuluwinobe amorreos jojodöma.

³⁵ Ja̧danö ju'wibi amorreos jojodöma ina Heres mösa'o comunidadnöbi, Ayalon comunidadnöbi, Salbin comunidadnöbi tjö̧jinobe, jobetjö labebökönö. Jo̧kwijayonö Jose iti̧mu tupadanö jojodö Efrainsaso jojodöbi Manasessaso jojodöbi tjujuluwachibanö juluwadö batjibenama, jobadönö tjujuluwinobe, ja̧danö 'diinö tjotidobö wetjinobe.

³⁶ Jobadö amorreo jojodö tjitebo nijima bi̧ya, Acrabim mösa'o nöchakwawemitjö, Sela comunidadbe baibanö, ja̧danö jobetjö mösa'iju jȩmi niji baibanö.