Judas 1 - Dios Iwene

Dokwa jö̧ba̧lö Judas iwȩyudina wene

¹ Ötjö böja wȩyudö webo̧ma, Judassa, Jesucristo ömöayo̧sa, ja̧danö ju'wibi Jacobo öjawo̧sa. Ja̧danö, böjanö wȩyudö wetawö̧ma bidö, Dios jwöinawö̧nö, ju'wibi Dabe'do Dios ösödawö̧nö, ju'wibi Jesucristo tjöbeba̧lö ite'ada̧lawö̧nö.

² Böjatjö jamatö wȩyudö yötawaduwakwö chömöledö, Dios ajayitjö bajalekwönönö ökwödönö lȩlö̧jinö iyobö chösöda, ja̧danö ajayitjö bajalekwönönö kwo̧'wo̧ luwo̧ ösöwachibanö kwö̧jaduwobö Dios pjaatobö chösöda, ja̧danö ajayitjö bajalekwönönö kwömöledönö ösödabikwawö kwö̧jaduwobö Dios pjaatobö chösöda.

Sulabenö yöbawadönö Judas yöawina wene

^3-4 Chömöledö, ökwödö Jesúsnö ösödadöma, okobe deinö bakwainö ji̧badösa, ¿jö̧tö? Jau chömöledö, ökwödö okobe deinö Dios lȩlö̧jinö iyi̧tjö emadösa, ja̧danö ja̧ jawa labebö lobö ökwödönö chiwȩyudobö jö̧ta̧latö. Jo̧kwaijayonö sulabenö yöbawadö yötjawobetjö̧, ja̧ chiwȩyudobö jö̧ta̧li̧ma waekwajabe, ju'wida chiwȩyudobö jo̧be babema. Jau chömöledö, ju'wedöma ju̧kwawö dö'da̧de tetjachajabe, ja̧danö dö'da̧de ja̧nö sulabenö yötjawobe. Jo̧kwajabetjö̧ ju'wida chiwȩyudobö jö̧ta̧lijayonö, ökwödönö kwujuluwaduwachibanö chiwȩyudobö jo̧be, dösödi̧ wene tjöbeba̧lö ölakwabikwawö kwö̧jaduwobö. Jau chömöledö, ja̧ dösödi̧ wenema, bakwöta wene balewachökö wene, ja̧danö bakwötanöda Dios iyina wene, ba̧kwȩlö̧jatebö ja̧ wenenöda dö̧jibobö. Ja̧ wene balewö lobö sulabenö yötjawapji jö̧ba̧lö, tjöbeba̧lö ölakwabikwawö kwö̧jaduwobö kwujuluwaduwachibanö chiwȩyudaduwakwö. Ökwödönö sulabenö yöbawadönö baikwö yötawa: Diosma damötjö jobadönö lȩebakwa̧ omukwatö ujuninobe. Jobadöma isabenö Diosnö ösödöködö chömöledö, ja̧danö sulabenö yöbawö Dios mikwa jwiinö otiwa jawa iyi̧ wene balewö lotjobe, jojodö jwaikwöda sulabenö ja̧bö tjö̧jobö wei̧ wene baibanö. Ja̧danö ju'wibi, Duluwo̧ma bakwo̧dajayonö, Duluwo̧ Jesucristonö öpöjödadö, duluwo̧bö̧kö̧ jö̧ba̧lö.

⁵ Isabenö Duluwo̧ lȩebakwawö̧ jobadönö chömöledö, damötjö sulabedönö lȩebinadanö. Jau chömöledö, ida̧ökö kwöwaisaduwijayonö, yayonö yemidanö kwomukwatibaduwobö yötawaduwakwö damötjö baledina jawa, baikwö: Damötjö Duluwo̧ma okobe deinö Israel jojodönö tjö̧jibinö pjaatinobe, Egipto nijitjö latjebobö, ¿jö̧tö? Ja̧danö, ajayinö Egipto nijitjö latjebobö pjaatinajayonö, jemi ikenama jobadö pjaatinajawö̧tjö yöawi̧ öpöjödadönö söbebö loinobe, ¿jö̧tö?

⁶ Ja̧danö, Dios ömöayedö ángelesdötjö, ju'wedöma Dios tjö̧jobö otidina öpöjödö jelobe latjebinobe. Ja̧danö jejenö labebajadönö Diosma ka̧lena ödinobe, yȩa'wo okwa tjö̧bobö Dios inesö lȩebakwa̧ möle baibenanö kabatö, ¿jö̧tö?

⁷ Ja̧danö Sodoma comunidad ju̧kwadöbi, Gomorra comunidad ju̧kwadöbi, ö'öbö comunidad jobadö ja̧tji̧danö sulabenö 'da̧'da̧bakwawö ja̧badö, ja̧danö tjöpöjödo jö̧tja̧li̧ jawa sulabenö ösödadöma Dios lȩebi̧tjö tjeminobe, ¿jö̧tö? Jau chömöledö, ökwöla tiibokolama jobadönö söbebö loinobe, ja̧danö ja̧ jobadönö baledinama öwaetjöda i̧sebobe, jobadöjayedönö Dios isabenö lȩebakwawö̧ jö̧ba̧lö, ¿jö̧tö?

⁸ Jo̧kwaijayonö sulabedönö isabenö lȩbebo̧ Diosma jö̧ba̧lö öwaetjöda öwawijayonö, bidö sulabenö yöbawadöma yayonö ja̧tji̧danö ja̧badö. Jobadöma yötjawobe, Diosma di̧'wi̧dinö i̧sebajabe, baikwö ja̧bö dö̧jo, jö̧ba̧lö, ja̧danö jejenö yöbawö sulabenö ja̧bö tjö̧jobe, ja̧danö tjuluwedö wetji̧ tjöpöjödobe, ja̧danö ju'wibi tjujuluwököjayonö, Aaa, juluwadösa jö̧ba̧lö omukwatö, yebabökönö sulabenö yöba̧ladö ángelesdö juluwadönöma, idö ángelesdöma, sulabedö lȩtebawö̧ jö̧ba̧lö.

⁹ Mölejȩbe jo̧ inesö juluwo̧ ángelso̧ Miguel mikwo̧ma jobadötjö bajalekwönönö juluwo̧ chömöledö, jo̧kwaijayonö Miguelbi ötjöda lȩtebakwö jö̧ba̧lö Awetjanö yöa̧lobö öpöjödinobe. Jau chömöledö, Miguelma Moisésmine iteba'o emö i̧'yinobe, ja̧danö emö i̧'yenama, Awetjama jo̧banö ölakwabikwawö ö̧jinobe. Jo̧kwaijayonö jejenö ölakwabikwawö ö̧jiökwe, sulabo̧ja, ötjöda lȩtebakwö jö̧ba̧löma yöa̧linokobe Miguelma, wainö yöa̧linobe, Duluwo̧ wei̧ kwöpöjödobetjö̧, jo̧bada lȩebakwo̧ja jö̧ba̧lö waisanö yöa̧linobe Miguelma.

¹⁰ Jejenö waisanö yöa̧linobe Miguelma chömöledö, jo̧kwaijayonö jejenö waisanöma yöba̧löködö ökwödönö sulabenö yöbawadöma. Jobadöma okobe jwiinö wajwitji̧ jawa sulabenö yöba̧ladö. Wanedö yötawa: Tebonö ju̧kwadö omukwatökönö a̧dekwanö tjöwaisi̧ jawada ja̧tji̧danö, jobadö sulabenö yöbawadöma idöda tjösödi̧ jawada omukwatökönö ja̧badö, ja̧danö jejenö ja̧bö, jobadönö söbebö loawa baibobö ja̧badö.

¹¹ ¡Ayö, jobadöwe, isabenö jwiinö Dios lȩebakwawö̧! Jau chömöledö, jobadöma Caín, iteda öjawo̧nö kwabö lobina ja̧bö ö̧jinadanö ja̧bö ju̧kwadö, ja̧danö ju'wibi Balaam sulabenö ja̧inadanö idöda tjemotö jö̧ba̧lö jojodönö omöna yötja̧lobö isakwadö, ja̧danö ju'wibi Coré sulabenö ja̧inadanö Dios yöawi̧ öpöjödö tjöbeba̧lö sulabenö yöbawadö. Jejenö sulabenö ja̧bö tjö̧jiökwe, Diosma isabenö jwiinö labinö lȩebakobe jobadönö chömöledö.

¹² Jobadönö baikwö yötawa: Wamenö otiwadödanö ichejekwö, jobadöma Duluwo̧ Jesúsnö omukwatö pjiesta bakobe ökwödökwö tjujunobe, jo̧kwaijayonö wamenö otiwadödanö tjichejekwijayonö, isabenö suli̧ waedadö tjö̧jobe. Baikwö wanedö yötawa: Ojwe teebe ba̧wa inawa, isowi töbö meajobö suli̧ waedawadanöbedö, jojodönö suli̧ waedö. Jau chömöledö, ökwödökwö pjiesta junö, taba jwiinö idöda tjö̧ji̧ jawada isakwadö, ju'wedönö omukwatökönö. Jojodönö otiwanö pjabatadösa jö̧ba̧lö yötja̧lijayonö, pjabatöködö. Wanedö yötawa: Ojwiyo'wo o̧bo jö̧a̧laja̧ waekwa'wo, o̧bökönö jelobekwö jwa̧lȩ'epjo e'ewa'wodanö ichejekwadö, ja'yubebi pjatjatokobetjö̧. Isabenö mikwawöködö tjö̧jobe, baikwö wanedö yötawa: Towinö wa̧ji̧ emö tjukwobö baibena, towi ina wa̧jökötjö̧ma mikwawokowi, ¿jö̧tö? Jejenö wa̧jokowidanö mikwawöködö, jo̧kwaijayonö jemi bajalekwönönöbi mikwawöködö, baikwö yötawa: Towi babe wa̧jokowi, tupakwö wa̧jitjö̧ma ina mikwawena, ¿jö̧tö? Jo̧kwaijayonö 'yebö töbebö lotjitjö̧ma la'akatjöda mikwawökawowi, ¿jö̧tö? Jejenöbedö ökwödönö sulabenö yöbawadöma chömöledö, dötölatajanö mikwawöködö. Towi wa̧jokowidanö mikwawöködö, ja̧danö jemi bajalekwönönö towi 'yebö töbebö lotjinowidanö bakobenö mikwawöködö.

¹³ Ju'wibi yötawa jobadönö: Jobadöma taba jwiinö jojodö tjöba a'otjö sulabenö ja̧tji̧ tji̧sebobe, baikwö wanedö yötawa: Balawa inawanö loenama, itjei'wo dewinö öwawinö loobe, okobe deinö tjedobö, ¿jö̧tö? Ja̧danö, bidöbi okobe deinö tjöba a'otjö taba jwiinö sulabenö ja̧tjobe, okobe deinö tjedobö. Chömöledö, Dios yöawi̧ yöbawadöma jweinö jojodönö ötjibobö jo̧be, öbibö yötja̧wi̧ a̧ja̧kwö, Dios ösödi̧danö ja̧bö tjö̧jakobetjö̧, ¿jö̧tö? Jo̧kwaijayonö bidöma Dios yöawi̧ yöbawadösa jö̧tja̧lijayonö, Dios ösödi̧danö ja̧bö tjö̧joböma öbiböködö. Ötjibo jö̧tja̧li̧tjö 'da̧bachibö, sulabenö Dios öpöjödi̧danö ja̧bö tjö̧jobö öbibadö. Ja̧danö, jejenö ja̧bö tjö̧jiökwe Diosma omukwatö ujunajabe, inesö yȩa'wo okwa ba̧kwȩlö̧jatebö tjö̧bobö.

¹⁴ Jau chömöledö, isabenö Dios lȩebakwawö̧ jobadönö, jobadönöda badekwachobe damötjö ji̧na Enoc yöawinama. Jau chömöledö, jo̧ba Enocnö kwöwaisaduwökwe, da'dömine Adántjö baikwö jelemutjö du̧ju̧taja jojo, ja̧danö damötjö jo̧ba Enocda baikwö yöawinobe: —A̧ja̧kwaduwi, Duluwo̧ma yelösöda ba̧jekwadö iteda ömöayedö ángelesdökwö ichakobe,

¹⁵ böjȩ jojodönö lȩebobö. Jejenö ichenama, okobe deinö sulabedö Diosnö omukwatökönö sulabenö ja̧tji̧ lȩebakobe, ja̧danö okobe deinö sulabedö jo̧banö sulabenö yötja̧li̧ lȩebakobe— jö̧ba̧lö. Jejenö laebobe Enoc yöawinama, ökwödönö sulabenö yöbawadönö badekwachi̧ma.

¹⁶ Jobadö sulabenö yöbawadönö baikwö yöta̧la: Diosnö sulabenö yöba̧ladö, ja̧danö ju'wibi jojodönö tjo̧'wo̧ sulinö yöba̧ladö, ja̧danö ju'wibi idöda sulabenö tjösödi̧ jawa isakwö ju̧kwadö, ja̧danö ju'wibi otiwo̧sa jö̧ba̧lö labinö yöba̧ladö, ja̧danö ju'wibi idöda tjemotö jö̧ba̧lö jojodö tjösödachibanö yöba̧ladö.

Jwaikwöda Diosnö omukwatö kwö̧jaduwo jö̧ba̧lö Judas yöawina wene

¹⁷ Chösödawö̧ chömöledö, isabenö Duluwo̧ Jesucristo webawedö yötjawina kwomukwatibaduwobö jo̧be.

¹⁸ Baikwö yötjawinobe ökwödönö: 'Dö̧ibaji̧ möle sulabenö obadö tjö̧jakobe, idöda sulabenö tjösödi̧ jawa isakwadöma jö̧ba̧lö yötjawinobe.

¹⁹ Jejenö yötjawinawö̧ma kwö'da̧de ja̧nö ölakwabikwawö kwö̧jaduwobö isakwadö chömöledö. Jobadöma böjȩ jawa isakwadö, ja̧danö Dios O̧'wo̧ Luwo̧ma deobe tjo̧'wo̧ luwo̧nö.

²⁰ Jobadönö a̧ja̧kwökönaduwi chösödawö̧ chömöledö, wainö ja̧bö kwö̧jaduwobö jo̧be chömöledö, baikwö yötawa: Jobadö yötjawi̧ ösödadöma omöna wene ösödadö, jo̧kwaijayonö jejenöböködöja ökwödöma. Ökwödöma omöna wene ösödöködöja, isabenö weneda ösödadöja, isabenö Diosda yöawi̧ kwösödaduwobetjö̧, ¿jö̧tö? Jo̧kwajabetjö̧ jwaikwöda Dios yöawi̧ ösödö kwujuluwaduwachibanö kwö̧jaduwo, ja̧danö Dios O̧'wo̧ Luwo̧kwö dötewanö ja̧nö, Diosnö abebö kwö̧jaduwo.

²¹ Dabe'do Diosma isabenö otiwanö ile niebobe ökwödönö chömöledö, ¿jö̧tö? Ba̧kwȩlö̧jatebö ja̧ Dios ökwödönö ile niebi̧ wene omukwatö kwö̧jaduwo. Ja̧danö, ju'wibi te'ada̧lö kwö̧jaduwo, Duluwo̧ Jesucristoma isabenö lȩlö̧jinö edö ba̧kwȩlö̧jatebö ja̧kwawa iyakwo̧ jö̧ba̧lö.

²² Ja̧danö, ökwödötjö ju'wedö Dios yöawi̧ ösödö ja̧nö tjime'dawachibitjö̧ma, jobadönö kwöpöjödaduwoko, lȩlö̧jinö edö pjakataduwo jobadönö.

²³ Ja̧danö ju'wedönöbi pjakataduwo. Wanedö yötawa: Ökwöla nöola ö'öbö tjö̧ji̧tjö tjö̧jibanö do̧kataduwodönö. Ja̧danö, ju'wedö inesö sulabenö ja̧bö ju̧kwadönöbi lȩlö̧jinö edö pjakataduwo chömöledö, ja̧danö jejenö pjakataduwenama, te'ada̧lönö yebabinö kwö̧jaduwo, sulabenö ja̧tji̧danö ökwödöbi sulabenö ja̧köbaduwapji jö̧ba̧lö. Jau chömöledö, jobadönö lȩlö̧jinö edö kwösödaduwijayonö, ja̧tji̧ma kwösödaduwoko yelösöda, isabenö Dios öpöjödi̧ jawa jö̧ba̧lö.

Judas Diosnö ösödö bajaleapo yöawina wene

²⁴ Okobe deinö Diosnö dösödaduwo chömöledö, jo̧bada meköbaduwapji jö̧ba̧lö pjabato̧ma, ja̧danö jo̧bada iteda inesö dewinö salöinö öba a'o wene jwiinö kwö̧jaduwobö pjabato̧ma, kwo̧'wo̧duwi jwiinö ösödachibanö.

²⁵ Jau chömöledö, Diosma bakwo̧da, jelo̧ma deobe, ja̧danö Duluwo̧ Jesucristonötjö Diosda dö̧jibinö pjaatajabe. Jo̧banöda okobe deinö tjösödo jö̧tja̧lökwema, jo̧bada inesö salöinö dejato̧ma, jo̧bada okobe jwiinö juluwo̧ma, jo̧bada inesö la'aka luwo̧ma, la'akatjö böjȩ otidakwa̧ abönöbi, babebi, ba̧kwȩlö̧jatebö 'dö̧ibajökenanöbi, jejenö otiwa. Biya̧data.