Juan 20 - Dios Iwene

Jesús wobajaletjö tjeachajina wene

¹ Ja̧danö, domingo möle, ajayi möle ötjabi̧ möle dewachena María Magdalena ji̧'yinobe, ina yȩa'oayi, Jesúsnö tjödajabe wobiakobe. 'Ya̧nö jedemi inaba, i̧lȩdo̧ a'o tumawaba pjolatö junawobeda jedinobe.

² Jejenö jo̧be edö ö'öjajinobe Simón Pedro, jelo̧, Jesús ile niebökwe öba̧ja̧di̧ waisacho̧ tjö̧jobekwö, jobadönö yöjawobö. Jobadönö yöjawinobe: —Duluwo̧nö jelobe tje'ewinobe. Wajwidobe— yöjawinobe.

³ Jejenö yöjawiawö̧ Pedrobi, jelo̧ Jesús öba̧ja̧di̧ waisacho̧bi tjejubetjö labebö i̧lȩdo̧be tji̧'yinobe.

⁴ Yelösöda, juluwanö ö'öbakwawö tji̧'yinobe. Ja̧danö, jelo̧ öba̧ja̧di̧ waisacho̧ma jwiinö juluwanö ö'öbakwawö, abönö ichibinobe.

⁵ Jo̧bama ichibö, bȩbachibö edinobe i̧lȩdo̧ okwa. Edemi sawana'wo, Jesúsnö jwatjebina'woda wi̧nobe. Ja̧danö, eda̧löda eda̧linobe, tebachökönö.

⁶ Ikenama Simón Pedro, ökömanö ichibö teachinobe i̧lȩdo̧ okwa. Jobema edinobe jwatjebina'woda wo̧be.

⁷ Ja̧danö, jele'wobi ja'yuwa'wo edinobe, Jesús uunö jwatjebina'woma. Ja'woma wainö, melebö lödawa'woda wi̧nobe.

⁸ Ikenama Jesús öba̧ja̧di̧ waisacho̧ abönö ichibajo̧ma teachinobe. Sawana'wiju wo̧be edö jö̧a̧linobe, Tjeachajinobe, jö̧ba̧lö.

⁹ Jejenö jö̧a̧lijayonö ina omukwatinokobe Dios iwenetjö ajayinö, Jesús wobajaletjö tjeachajakwa̧ tjiwȩyudinama.

¹⁰ Ikenama jobadöma tjȩwa̧jinobe tjejube.

Jesús, wobajaletjö tjeachajina María Magdalenanö öwawachina wene

¹¹ Jobadö tjȩwa̧jijayonö María Magdalena jö̧jibinobe. Jobujuma i̧lȩdo̧ a'o ja̧nö jubudekwabinobe. Budekwö nijakwö bȩbachibö jeda̧linobe i̧lȩdo̧ okwa.

¹² Jedemi ángelesdö du̧ju̧tajanö jedinobe, kamisi dewi̧ 'dubawadönö. Jobadöma Jesúsnö tjödinena tjö̧bajobe jedinobe, bakwo̧ma uukwöchobekwö, jelo̧ma ömasapakwöchobekwö.

¹³ Jobadöma María Magdalenanö edö abebö tja̧ja̧kwinobe: —¿Tajawedö kwubudekwabi?— abebö tja̧ja̧kwioko: —Chuluwo̧nö e'ewö tjödinemima wajwitobetjö̧ chubudekwa— jö̧ja̧linobe.

¹⁴ Jejenö jö̧ba̧lö jalachibö jedemi Jesúsda ö̧jijayonö, Jelo̧kö̧, jö̧ba̧lö, wajwijinobe.

¹⁵ Ikenama Jesúsma abebö a̧ja̧kwinobe: —¿Tajawedö kwubudekwabi? ¿Tinö kwisakwa?— abebö a̧ja̧kwinobe. Ja̧danö Maríama jomukwatinobe, Jo̧bama jenada te'ada̧lo̧kö̧, jö̧ba̧lö. Ja̧danö, jö̧ja̧linobe: —Jesúsnö chisakwa— jö̧ja̧linobe—. Ökwöma ¿jo̧banö jelobe kwe'ewaji̧? ¿Dai kwe'ewaja̧da jo̧banöma? Yöbawitjö, yemidanö baikwö chichejebo— jö̧a̧linobe.

¹⁶ Jejenö jö̧ja̧liökwe: —María— jö̧a̧loko, jalachibö edö jöwaisachibinobe, Jesúsda. jö̧ba̧lö. Ja̧danö, jo̧banö jö̧ja̧linobe: —Rabuni— jö̧ba̧lö. Rabuni, jö̧ba̧löma, hebreo tjiwenenö, Ba̧ja̧dakwawa jojo, jö̧ba̧lö. Ja̧danö, Maríama, ösödö wo̧jatibinobe Jesúsnö.

¹⁷ Wo̧jatibiökwe: —Wo̧katibatjö María, ina Dabe'do ö̧jobekwö ȩwa̧jö katekwachokobetjö̧— jö̧a̧linobe—. Babema chömöledönö yöbawaji, tjöwaiso. Ja̧danö, jobadönö yökawo, Chabe'do ö̧jobekwö chȩwa̧jakobe, ötjö Chabe'dobi ökwödö kwabe'doduwibi ö̧jobekwö. Ja̧danö, ötjö cho̧'wo̧ chöwana̧lökwe Dios, ökwödö kwo̧'wo̧duwi kwöwana̧laduwökwe Dios ö̧jobekwö chȩwa̧jakobe, yökawo— weinobe Jesúsma María Magdalenanö.

¹⁸ Ikenama jobujuma ȩwa̧jö yöjawinobe Jesús öba̧ja̧di̧ waisachadönö, Duluwo̧nö chedatö, jö̧ba̧lö. Ja̧danö, Jesús yöawaja̧ yöjawinobe jobadönö, Jejenö yöawatö ötjönöma, jö̧ba̧lö.

Jesús öba̧ja̧di̧ waisachadönö öwawachina wene

¹⁹ Ikenama ja̧ möle, abönö möle ötjabi̧ möle yi̧bena, Jesús öba̧ja̧di̧ waisachadöma o̧do okwa tjö̧bajinobe. Jeju apjudebiya pje'datakwawibö tjö̧bajinobe, judío jojodönö yebabinö ja̧nö, tjöwaisapji jö̧ba̧lö. Ja̧danö, Jesús omönanö öwawachinobe o̧do okwa. Jobadökwö ja̧nö jö̧a̧linobe: —Kwo̧'wo̧duwi ösöwanö ja̧duwi— jö̧a̧linobe.

²⁰ Jejenö jö̧a̧laja̧ ikena jobadönö i̧sekwinobe ömamijunö bȩtjinabi, ometupanö dotjinabi. Ja̧ edinö waisachibö tjo̧'wo̧ ösöwanö tjösödinobe, Duluwo̧ja, jö̧ba̧lö.

²¹ Ikenama Jesúsma yemidanö jö̧a̧linobe: —Kwo̧'wo̧duwi ösöwanö ja̧duwi— jö̧ba̧lö—. Chabe'do ötjönö weinadanö ökwödönö wetobe, chiwene yökawaduwobö— jö̧ba̧lö weinobe jobadönö.

²² Jejenö jö̧a̧laja̧ ikena, iteda aasapjo jobadönö pjubö jö̧a̧linobe: —Dios O̧'wo̧ Luwo̧ ökwödö kwo̧'wo̧ luwo̧duwinö teachiboböma jo̧be— jö̧a̧linobe—

²³ Ja̧danö, jo̧ba ujulunö, bakwo̧ usuli̧ma söbebö loköbaduwitjö̧ma, Diosma jo̧ba usuli̧ söbebö lobo̧. Ja̧danö, bakwo̧ usuli̧ma söbebö loköbaduwökötjö̧ma, Diosma jo̧ba usuli̧ söbebö lobö̧kö̧— jö̧a̧linobe Jesúsma iteda öba̧ja̧di̧ waisachadönö.

Tomás, Jesús 'yaba̧lo̧nö edöda öwaisina wene, Jesúsda, jö̧ba̧lö

²⁴ Ja̧danö, jobadö Jesús 'da̧batö ujuninawö̧ a̧li̧nösamutjö du̧ju̧tajatjö bakwo̧, Tomás mikwo̧, Morocho, ötjabökwema, deinobe Jesús jobadönö öwawachenama.

²⁵ Ömöledöma jo̧banö, Jesúsnö dedijatö, jö̧ba̧lö, yötjawiökwe: —Ötjöma wajwita. Jo̧ba ömamiju, bȩtjinemida edö, jemi chötö'a 'yutebö cheditjö̧da, Jo̧bada, jö̧ta̧lena. Ja̧danö, ometupa doinemi chömamunö 'dawebö cheditjö̧da, Jo̧bada, jö̧ta̧lena— jö̧a̧linobe Tomásma.

²⁶ Jemi ikenama, jelemutjö wa̧pötakwa möle baibena, Jesús öba̧ja̧di̧ waisachadö yemidanö o̧do okwa tjö̧bajinobe, Tomásbi. Apjudebiyama pje'datakwawijayonö Jesúsma jobeda öjamatinobe jobadö tjö'da̧denö. Jobadökwö tjö̧bajena ja̧nö jö̧a̧linobe: —Kwo̧'wo̧duwi ösöwanö ja̧duwi— jö̧ba̧lö.

²⁷ Ikenama Tomásnö jö̧a̧linobe: —Tomás chömamijunö bȩtjina kwötö'anö 'yutebö edi. Ötjödasa. Ja̧danö, chometupanö dotjinabi 'dawebö edi. Ötjödasa. Ja̧danö, omukwatökönuwi, Jesúsma deobe, ö'wöchinena, jö̧ba̧lö. Jejenöma omukwatökönö, Jesús ina 'yaba̧lo̧, jö̧ba̧lö, jweinö omukwati, Tomás— jö̧a̧linobe Jesúsma Tomásnö.

²⁸ Jejenö jö̧a̧liökwe: —Ökwöma ötjö chuluwo̧ja. Isabenö ötjö cho̧'wo̧ chöwana̧lökwe Diosja— jö̧a̧linobe Tomásma.

²⁹ Ja̧danö, Jesúsma yöawinobe jo̧banö: —Tomás, ökwöma ötjönö kwedobetjö̧ jejenö, Jesúsma 'yaba̧lo̧, jö̧ba̧lö, ötjönö ösödö yöka̧lobe. Jo̧kwaijayonö ju'wedö, ötjönö tjedököjayonö ösödö yötja̧lakobe, Jesúsma 'yaba̧lo̧, jö̧ba̧lö. Jobadöma, jwiinö tjo̧'wo̧ ösöwanö tjö̧jakwedö, tjedököjayinö tjösödobetjö̧— jejenö yöawinobe Jesúsma Tomásnö.

Juan, bi'ye wȩyudina yöawina wene

³⁰ Ja̧danö, ötjö, Juan mikwo̧ma, yötawa, Jesúsma ökwödö, iteda öba̧ja̧di̧ waisachadökwö ja̧nö ju'wi jawabi ju'wi jawabi ujulunö i̧sebijatö ökwödö deda̧lonö. Okobe jwiinö i̧sebinama nöobetjö̧ okobe jwiinö chiwȩyudoböma jwiobe bi'yenöma.

³¹ Biya̧ chiwȩyudi̧ma ökwödönö pjabatö chiwȩyuda, kwöwaisaduwobö, Jesúsma Dios weinökwe jojodö tjö̧jibinö pjabatö, jö̧ba̧lö. Ja̧danö, Jesúsma Dios Itji̧, jö̧ba̧lö, kwöwaisachibaduwobö chiwȩyuda bi'yema. Jejenö waisinö, Jesúsma jojodö dö̧jibinö pjabato̧, jö̧ba̧lö, jo̧banö kwösödaduwobö chiwȩyuda bi'yema. Ja̧danö, Jesúsnö ösödö do̧batö kwemaduwobetjö̧, ba̧kwȩlö̧jatebö ja̧kwawa kwujuna̧laduwobö chiwȩyuda biya̧ jawama.