Juan 10 - Dios Iwene

O̧bȩja̧dönö te'ada̧lo̧nö wanedö yöawina wene, Jesús ökwödönö te'ada̧lo̧, jö̧ba̧lö

^1-2 Jesúsma wanedö yöawinobe jojodönöma: —O̧bȩja̧dönö te'ada̧lo̧ma o̧bȩja̧dö tjabȩko̧ apjudenö tebacho̧, o̧bȩja̧dönö a̧petube öibobö—jö̧a̧linobe—. Jo̧kwaijayonö jelo̧, apjudenö tebachökönö, mönö nöchö tebacho̧ma o̧bȩja̧dönö naukwabo̧. Isabenö yötawa, jo̧bama naukwabikwawa jojo, o̧bȩja̧dönö te'ada̧lo̧bö̧kö̧. Ja̧danö, o̧bȩja̧dönö te'ada̧lo̧ma apjudenöda tebacho̧.

³ Ja̧danö, o̧bȩja̧dönö te'ada̧lo̧ ichena, apjude ja̧nö po̧bebo̧ma apjude po̧ebobe o̧bȩja̧dönö te'ada̧lo̧ teachobö. Ja̧danö, o̧bȩja̧döma idöda a̧dekwanö te'ada̧lo̧ iwenema a̧ja̧kwadö. Ja̧danö, te'ada̧lo̧ma iteda ite'ada̧lawö̧ tjimikwena waiso̧. Ja̧danö, ite'ada̧lawö̧ tjimibiyanö jwöawö̧ma ichadö, te'ada̧lo̧kwö tji̧'yobö.

⁴ Ja̧danö, te'ada̧lo̧ma okobe deinö iteda ite'ada̧lawö̧nö labebajo̧, jobadö tjabönö öbibö 'yo̧. O̧bȩja̧döma te'ada̧lo̧ iwene tja̧ja̧kwobetjö̧, jo̧ba ökömanö 'ya̧dö.

⁵ Wajwitjökwekwöma 'yö̧ködö, jelo̧ iwene wajwitjökwekwöma. Wajwitjökwe ö̧jelöma döbibadö o̧bȩja̧döma— yöawinobe Jesúsma.

⁶ Jejenö, wanedö yöawinobe Jesúsma, Ötjödasa ökwödönö te'ada̧lo̧ma, ju'wedö jelobekwö e'ewadödanömaökö, jö̧ba̧lö. Jejenö yöawijayonö jojodöma tjöwaisachibinokobe wanedö yöawi̧ma.

Jesús, Ötjödasa apjudedanö jo̧, jö̧ba̧lö, wanedö yöawina wene

⁷ Jo̧kwaobetjö̧ Jesúsma yemidanö wanedö yöawinobe jobadönöma: —Isabenö yötawa. Ötjödasa o̧bȩja̧dö tjabȩko̧ apjudema. Ja̧danö, ötjönöda tetjachobö jo̧be—yöawinobe—.

⁸ Ja̧danö, ötjö chichakwa̧ abönö ju'wedö tjichinobe, o̧bȩja̧dönö te'ada̧löködö, jelobekwö yöbawadö. Jobadöma o̧bȩja̧dönö jwöbö tjichinobe, naukwabidödanö. Jo̧kwaijayonö o̧bȩja̧döma tja̧ja̧kwinokobe jobadö jwötji̧ma.

⁹ Ötjödasa apjudedanö jo̧ma. Ja̧danö, ötjönö tebachadönöma tjö̧jibinö pjabato̧sa. Ja̧danö, ötjönö tebachadöma ötjö chite'ada̧lawö̧ o̧bȩja̧dödanöbedö. Ja̧danö, chite'ada̧lawö̧ o̧bȩja̧dödanöbedöma ötjönö tebachöbi tebachadö, labeböbi labebadö. Ja̧danö, ötjö apjudedanö jo̧nö labebajadö meje'ye kwanö otiwanö ja̧dödanö otiwanö ja̧dö— wanedö yöawinobe Jesúsma—.

¹⁰ Ja̧danö, naukwabo̧ma sulabenö ja̧oböda icho̧, o̧bȩja̧dönö önaukwoböbi, kwabö looböbi, jwiinö söbebö looböbi. Jo̧kwaijayonö ötjöma naukwabo̧ sulabenö ja̧oböda ichi̧danöma chichinokobe böjȩnö ju̧kwadö jojodönöma. Jojodö ba̧kwȩlö̧jatebö tjö̧ji̧ chiyobö chichijatö. Ja̧danö, jojodö jwiinö otiwanö tjuju̧kwobö chichijatö ötjöma— yöawinobe Jesúsma.

¹¹ Ina yöawinobe: —Ötjödasa, o̧bȩja̧dönö otiwanö te'ada̧lo̧ma. Ja̧danö chöpöjojodö tjichitjö̧bi kabatibö̧kö̧sa chite'ada̧lawö̧nöma, chöpöjojodö ötjönö kwabö lotjenatjö̧bi. Te'ada̧lo̧sa, kwabö lotjenatjö̧bi.

¹² Jelo̧ o̧bȩja̧dönö ite'ada̧lobö midö weökwema ösödö omukwatinokobe o̧bȩja̧dönöma, jo̧ba a̧jwi̧muböködötjobetjö̧. Jo̧bama otiwanö ite'ada̧lokobe o̧bȩja̧dönöma. Ja̧danö, jo̧bama tebo awili ichobe ediakwawö döbibajo̧, o̧bȩja̧dönö le'dedibö. Ikenama, jo̧ba döibaja okobetjö tebo awilima o̧bȩja̧dö tjö̧jobekwö ichö jobadötjö ju'wedönö yöbö kwo̧. Ja̧danö, ju'wedöma omönanö 'wobekwajadö.

¹³ Ja̧danö, o̧bȩja̧dönö ite'ada̧lobö midö weökwema jo̧ba a̧jwi̧mutjokobetjö̧ o̧'wo̧ tjo̧bö̧kö̧ jobadönöma. Jo̧kwaobetjö̧ tebo awili ichenama le'dedibö döbibajo̧, te'ada̧lökönö—yöawinobe—.

¹⁴ Ja̧danö, ötjöma, jejenömabö̧kö̧sa. Otiwanö te'ada̧lo̧sa. Ötjö cha̧jwi̧munöma chöwaisawö̧. Ja̧danö, cha̧jwi̧muma ötjönö waisadö.

¹⁵ Jejenö ötjökwö, Chabe'dokwö jo̧be. Ötjö Chabe'doma ötjönö öwaisobe, ja̧danö, ötjöma Chabe'donö chöwaisobe. Ja̧danö, ötjöma cha̧jwi̧mu o̧bȩja̧dö tjö̧jibinö ö'wöchö midawö lotakwo̧sa.

¹⁶ Ja̧danö, ju'wedöbi tjö̧jobe, ötjö cha̧jwi̧mu o̧bȩja̧döma, jelobe ju̧kwadö. Jobadönöbi öbibö chichejebobö jo̧be, ötjö chiwene tja̧ja̧kwobö. Ja̧danö, jobadöma chiwene tja̧ja̧kwakwedö. Bidö cha̧jwi̧mukwö, jelobe ju̧kwadö cha̧jwi̧mu chichejebakwawö̧kwö bakwo̧ iteba'odanö tjuju̧kwakwedö, tjajikwo̧ma bakwo̧da, ötjödachobetjö̧— yöawinobe Jesúsma jojodönö.

¹⁷ Ina yöawinobe Jesúsma: —Ja̧danö, ötjöma ö'wöchö chimidawobö jo̧be. Yadakwödanö tjetachajobö ö'wöchö midawö lotakwo̧sa. Ja̧danö, Chabe'doma ötjönöma ile niebobe, jejenö yadakwödanö tjetachajobö ö'wöchö midawö lotakobetjö̧.

¹⁸ Ötjö chö'wöchi̧ma, bakwo̧bi deobe, chö'wöchinö baibanö ja̧bo̧ma. Ötjödasa ö'wöchö midawö lotakwo̧sa. Ötjödasa juluwo̧ma, ö'wöchö midawö lotobö. Ja̧danö, ötjödasa, yadakwödanö tjetachajinö juluwo̧ma. Jejenö batibobö Chabe'do weinökwesa— yöawinobe Jesúsma.

¹⁹ Jejenö yöawawö̧ yemidanö judío jojodöma, bakwainö omukwatökönö, nöinö yötja̧lakwawinobe.

²⁰ Jojodötjö ju'wedö ba̧jekwadöma: —Bitema Awetja ömöayo̧ teachibinökwe. Yelösöda o̧'wo̧ jwibo̧. Da̧ja̧kwökökwe— jö̧tja̧linobe.

²¹ Ja̧danö ju'wedöma jejenö tjomukwatinokobe. Jö̧tja̧linobe: —Awetja ömöayo̧ teachibinökökwe. Awetja ömöayo̧ teachibinökwema jejenö yöba̧lö̧kö̧. Ja̧danö, Awetja ömöayo̧ teachibinökwema ¿öbajale tjewawökwe otiwanö edobö otidö loenaji̧? Jejenö otidö lobö̧kö̧ Awetja ömöayo̧ teachibinökwema— jö̧tja̧linobe judío jojodötjö ju'wedöma.

Jesús pjiesta ji̧ möle yöawina wene, Ötjö, ötjö Chabe'do bakwo̧dabedösa, jö̧ba̧lö

²² Ja̧ mölema, pjiesta ji̧ möle, judío jojodö damötjö, Dios eju otiwanö tjotidina tjomukwati̧ pjiesta. Judío jojodöma, ja̧ pjiesta Jerusalénnö baledö ko̧ko̧kwadö.

²³ Ja̧ pjiestama o̧ba baledena ji̧nobe. Ja̧danö, jobema Jesús kweachinobe Dios eju a̧petubema, löwötedanö jena, Pórtico de Solomón mikwena.

²⁴ Ja̧danö, judío jojodöma, Jesús ö̧jobe 'ya̧wibö atjeba̧linobe: —¿Tajawedö yökawokobeda, Ötjödasa, jö̧ba̧lö, Dios weinökwesa, jö̧ba̧lö? Jweinö yöbawi. ¿Ökwöma Dios weinökweköbiji̧, dö̧jibinö pjakatobö? Döwaiso jweinö yöbawakwawi— atjeba̧lökwe:

²⁵ —Ida̧ökö yötawijayonö ökwödöma öpöjödadöja. Ötjö Chabe'do iminö, jo̧ba ujulunö otidö lobö jweinö chi̧sebijatö, Ötjödasa Dios weinökwema, jö̧ba̧lö.

²⁶ Jo̧kwaijayonö ökwödöma öpöjödadöja. Ökwödöma ötjö cha̧jwi̧muköbaduwokobetjö̧ ötjönö kwöpöjödaduwobe— wanedö yöawinobe—.

²⁷ Ötjö cha̧jwi̧muma ötjö chiwene a̧ja̧kwö waisadö, ja̧danö, jobadönö chöwaisawö̧. Ja̧danö, jobadöma chökömanö ichadö.

²⁸ Jobadönö ba̧kwȩlö̧jatebö ja̧kwawa chiyawö̧. Ja̧danö, tjö'wöchökakwedö, ötjö ba̧kwȩlö̧jatebö ja̧kwawa chiyawö̧ma. Ja̧danö, otiwanö chite'ada̧lobetjö̧ bakwo̧bi deobe jobadönö ötjötjö 'döbebö emibo̧ma.

²⁹ Ötjö Chabe'do iyijatö jobadönö ötjönöma. Jo̧bama böjȩnö ju̧kwadötjöbi, mölejȩbe ju̧kwadötjöbi o̧penönö juluwo̧. Jo̧kwaobetjö̧ bakwo̧bi deobe jobadönö Chabe'dotjö 'döbebö emibo̧ma.

³⁰ Ja̧danö, ötjö, ötjö Chabe'do bakwo̧dabedösa— yöbawijetö Jesúsma.

³¹ Jejenö yöawawö̧ judío jojodöma jwiinö tjölabinobe. Inawiya tjeminobe Jesúsnö tjikwawobö, ö'wöchinö baibanö.

³² Jejenö ja̧tjökwe: —Ötjöma Dabe'do Dios ujulunö i̧sebö otiwanö pjabatö chotidobe kwedaduwijatö. Ötjö otiwanö chotidinama ¿diya̧ kwöpöjödaduwa, ötjönö kwikwawaduwobö jö̧ka̧laduwi̧ma?— abebö a̧ja̧kwawö̧:

³³ —Otiwanö kwotidina jawamaökö. Ökwöma sulabenö yöka̧lobe, Dios jawama. Ökwöma jojoköbijayonö, Ötjödasa Diosma, jö̧ba̧lö, yöka̧lobe. Ja̧ sulabenö yöka̧li̧tjö dikwawobö jö̧da̧la ökwönöma— jö̧tja̧linobe.

³⁴ Jejenö jö̧tja̧lökwe: —Dios iwenetjö, kwö̧jaduwobö weina iwenetjö baikwö laebobe: Ökwödöma jojodö tjuluwedöja, ötjödanö. Ja̧danö, ötjö, Dios, jojodö tjuluwo̧danö ökwödöbi jojodö tjuluwedöja, jö̧ba̧lö laebobe.

³⁵ Ja̧danö, Diosma jweinöda yöbawo̧. Jweinöda yöawinobe, Ökwödöma ötjö jojodö tjuluwedö chö̧ji̧danö ja̧döja, ökwödöbi jojodö tjuluwedö ja̧dököbaduwobetjö̧, jö̧ba̧lö. Jo̧kwaobetjö̧ jejenö Dios iwenetjö laebitjö̧ma, Ökwödöma Diosdanö ja̧döja, jö̧ba̧lö,

³⁶ ¿tajawedö, Ötjöma Dios Itji̧sa, jö̧ba̧lö yöta̧lena jwökeba̧laduwobeda, Ökwöma sulabenö yöka̧la, jö̧ba̧lö? Ötjöma Dabe'do Dios omudawö böjȩkwö weinökwesa, jo̧ba wei̧ otidö chö̧jobö.

³⁷ Chabe'do wei̧ chotidökötjö̧ma kwöpöjödaduwotjö.

³⁸ Jo̧kwaijayonö Chabe'do wei̧ chotiditjö̧ma chotidobe edö kwösödaduwobö jo̧be. Ökwödöma ötjö yötawi̧ a̧ja̧kwö, Wajwita, jweinö yöba̧lö̧kö̧ena, jö̧ba̧lö, kwomukwataduwena. Jo̧kwaijayonö Chabe'do wei̧ chotidobe edö kwöwaisachibaduwinö baibanö kwomukwataduwo, Bite Jesúsma abe'do Dioskwö ja̧nö juluwi̧ jawa i̧sebo̧, jö̧ba̧lö. Ja̧danö, kwomukwataduwo, Diosma Jesúskwö ja̧nö juluwi̧ jawa i̧sebo̧, bakwainöda ja̧nö i̧sebadö, jö̧ba̧lö, kwöwaisachibaduwinö baibanö kwomukwataduwo— yöawinobe Jesúsma judío jojodönöma.

³⁹ Jejenö yöawawö̧ tjölabinobetjö̧ yemidanö do̧tjatobö jö̧tja̧lijayonö, do̧atakwawatjöma döibajinobe.

⁴⁰ Ikenama yemidanö Jordán ojwe pebibö i̧'yinobe Jesúsma öba̧ja̧di̧ waisachadökwö, Juan Ojwenö Bu̧datina ajayinö ubu̧datinemi. Jobeda ö̧jinobe.

⁴¹ Ja̧danö, jojodö ba̧jekwadö tji̧'yinobe jobema. Idöda yötja̧lakwawinobe: —Juanma Dios ujulu i̧sebinokobe. Jo̧kwaijayonö okobe jwiinö Jesúsnö yöawinama jweinö yöawinobe Juanma— idödada yötja̧lakwawinobe.

⁴² Ja̧danö, jobe ja̧nö ba̧jekwadö tjösödinobe Jesúsnö, Bitema isabenö Dios Itji̧, jö̧ba̧lö.