Josué 9 - Dios Iwene

Gabaonitas jojodö israel jojodönö omöna yötja̧lina jawa

^1-2 Ja̧danö, Jordan ojwetjö jawo̧ meajobekwö ju̧kwadö mösa'iju jȩmi ju̧kwadöbi, Libano mösa'ijutjö a̧li̧kwö jwaibalawa ö'öbö ju̧kwadöbi israel jojodö tjujuluwina wene yetjaibanö tja̧ja̧kwinobe, Jericonö ju̧kwadönöbi, Hainö ju̧kwadönöbi tjujuluwina wenema. Ja̧danö, jejenö a̧ja̧kwö, la'aka tjuluwedöma omukwatö tjujuninobe, bakobe pjabatakwawö, israel jojodönö tjölakwabikwawobö. Jobadö jejenö bakobe pjabatakwawö tjölakwabikwawobö omukwatö ji̧nadöma bidö: Hitita jojodötjö la'aka luwedöbi, amorreo jojodötjö la'aka luwedöbi, cananeo jojodötjö la'aka luwedöbi, ferezeo jojodötjö la'aka luwedöbi, heveo jojodötjö la'aka luwedöbi, jebuseo jojodötjö la'aka luwedöbi. Jobadöma bakobe omukwatö, tjömöayedö ölakwabikwawa jojodönö tjo̧ko̧kodinobe, bakobe ja̧nö Josuekwöbi, ju'wedö israel jojodökwöbi tjölakwabikwawobö.

³ Jo̧kwaijayonö, jobadö jejenö israel jojodökwö tjölakwabikwawobö omukwatö tjö̧jonö, gabaonitas jojodöma wainö ja̧tjobö tjomukwatinobe. Jobadöma Josue Jericonö ju̧kwadönöbi, Hainö ju̧kwadönöbi söbebö loina wene a̧ja̧kwö,

⁴ jobadöma waisanö omukwatö ja̧tjinobe, israel jojodöma jobadökwö dösölö̧jinö ja̧tja̧kwa̧ wene yöbawö tjujunobö. Baikwö ja̧tjinobe, israel jojodö yöne tjö̧ji̧ wene wajwitjobö: Tuda'wiju damösa'wo tjeminobe, ja̧danö ubasobu o̧'dobusa'wiju damösa'wo, ida̧ökö kȩachaja̧ 'dö̧tjina o'wiju tjeminobe, bu̧lu̧dö tjo̧ma'anö tjöwanobö.

⁵ Ja̧danö sapatu damö jawabi, kamiji̧do̧ damösa̧do̧bi israel jojodökwö yötja̧lakwedö 'dutjawobö. Ja̧danö tju̧kwa kwakwawa ida̧ökö kököachibaja̧ jawa tjeminobe, kököachibaja̧ pan öpji̧yama.

⁶ Ikenama, ja̧ jawa emajadö, ju'wedöma Josue ö̧jobekwö tji̧'yinobe Guilgalbe, jobadökwö yötja̧lakwawobö. Jobe ichibajadö, Josuenöbi, ju'wedö israel jojodötjö luwedönöbi yötja̧linobe baikwö: —Ökwödö diteboma, jwiinö ödöobe, ja̧danö ökwödö israel jojodökwö, dösölö̧jinö ölakwabikwawökönö dö̧ja̧kwa̧ wene yöbawö dujunobö dösödobe, ökwödöbi, israel jojodöbi bakobe dösölö̧jinö dö̧jakwa̧ wene yöbawö dujunobö, —jö̧ba̧lö yötja̧linobe.

⁷ Jejenö yötja̧liawö̧, israel jojodöma, —Ökwödöma wajwidawö̧ja. Isabenö ödö ju̧kwadö kwö̧ja̧duwi̧ma wajwida. Dedemi ökwödöma dipjeanö ju̧kwadököbaduwena, ja̧danö dipjeanö ju̧kwadö kwö̧jaduwitjö̧ma, dösölö̧jinö dö̧jakwa̧ wene yöbawö dujunobö jwiobe. Jo̧kwajabetjö̧, ökwödönö wajwidobema, dakwö ökwödökwö dösölö̧jinö dö̧jakwa̧ wene yöbawö dujunobö? —jö̧ba̧lö tjatadinobe.

⁸ Jejenö tjatadawö̧, gabaonita jojodöma Josuenö yötja̧linobe, —Ökwödökwö dösölö̧jinö kwö̧jaduwakwa̧ wene yöbawö kwujunaduwitjö̧ma, isabenö kwömöayedö dö̧jakwedösa, —jö̧ba̧lö. Yötja̧lökwe, Josuema abebö a̧ja̧kwinobe, —Ökwödöma, didö jojodököbaduwa, ja̧danö kwiteboduwima, detjö kwichaduwaja̧da? —jö̧ba̧lö.

⁹ Abebö a̧ja̧kwawö̧, —Ökwödö kwömöayedöma ditebo jwiinö ödöobetjö dichajabe, Kwuluwo̧ Isabenö Jo̧ Dios ujulu da̧ja̧kwinobetjö̧. Jau, jo̧ba ujuluwi̧ wene da̧ja̧kwijatö, okobe jwiinö Egipto nijitjö ja̧ina wenebi,

¹⁰ okobe jwiinö Jordan ojwe bakwachödöbe ju̧kwinadö amorreo jojodötjö la'aka luwedöbinadönö ja̧ina wenebi, Hesbon la'aka luwo̧ Sijon mikwo̧nöbi, Basan la'aka luwo̧ Astarottjö ji̧na Og mikwo̧nöbi ja̧ina wenema.

¹¹ Jo̧kwajabetjö̧, ja̧ wene a̧ja̧kwajadö, ditebo jojodöbi, duluwedöbi, ökwödönö wetjinobe, baikwö jwiinö ödö dichobö wetjinobe, baikwö: –Kwakwawa kwekachaduwonö kwukwaduwakwa̧ jawa ko̧ko̧dibö, israel jojodö tjö̧jobekwö 'ya̧duwi, ja̧danö ichibö, jobadönö akebaduwo, Isabenö kwömöayedösa, jo̧kwajabetjö̧ ökwödö kwömöayedönö dösölö̧jinö kwö̧jaduwakwa̧ wene yöbawö kwujunaduwo, –jö̧ba̧lö adebobö wetjijatö.

¹² Jau duluwo̧, du̧kwa edi, biya̧ panma, ladebina möle i̧yanö dotidaja̧ pan öpji̧yada dejubiyatjö dichejebijatö, jo̧kwaijayonö ida̧ökö kököbachibö so̧so̧achibajabe.

¹³ Ja̧danö ubasobu o̧'do̧busa'wijuma, yayi̧ o'wijuda de'ewinajayonö, edi, damö jawa waekwö kȩachibajabetija. Ja̧danö, da̧do̧ 'dudawa̧do̧ kamiji̧do̧bi, sapatubi ödö dichajabetjö̧ damö jawa waekwajabe, —jö̧ba̧lö tjatadinobe.

¹⁴ Tjatadawö̧, israel luwedötjö ju'wedöma tju̧kwatjö emö, Isabenö damö jawaobe, isabenö ödötjö tjichajabe, jö̧ba̧lö tjomukwatinobe. Jo̧kwaijayonö, Isabenö Jo̧nö abebö tja̧ja̧kwinokobe, isabenö atjebaja̧danö dösölö̧jinö tjö̧jakwa̧ wene yöbawö tjujunojobö, tjujunokojobö, jö̧ba̧lö.

¹⁵ Ja̧danö, isabenö bidöma ödötjö ichajadö jö̧ba̧lö, Josuema jobadökwö dösölö̧jinö tjö̧jakwa̧ wene yöbawö ujuninobe, ja̧danö jobadönö yöbawö ujuninobe, —La'akatjöda ökwödönö kwabö lodökakwedösa, —jö̧ba̧lö. Ja̧danö israel jojodötjö luwedöma jobadönö yöbawö tjujuninobe, —Isabenö ökwödönö kwabö loditjö̧ma, Isabenö Jo̧ ökwödönö lȩebobö ja̧kobe, —jö̧ba̧lö.

¹⁶ Ikenama, gabaonitas jojodö tjewaja̧ ikena, wapötakwa möle baledibajenama, israel jojodöma tjöwaisachibinobe, Jobadöma yöne ju̧kwadötö, jö̧ba̧lö, Ödö ja̧dösa yötja̧linajayonö, bemi nijinöda ju̧kwadötö, jö̧ba̧lö tjöwaisachibinobe.

¹⁷ Jejenö waisachibö, israel jojodöma juluwanö tjitebobe tji̧'yinobe, ja̧danö wapötakwa möle kwebachajadö, gabaonitas jojodö tjitebobe tjichibinobe. Jobadö gabaonitas jojodö tjitebo comunidadbiyama, Gabaon comunidadbi, Cafira comunidadbi, Berot comunidadbi, Quiriat Yearin comunidadbi.

¹⁸ Ja̧danö, tjitebobe tjichibijayonö, israel jojodöma jobadökwö tjölakwabikwawinokobe, israel jojodötjö luwedöma ajayinö jobadönö dösölö̧jinö tjö̧jakwa̧ wene yöbawö tjujuninobetjö̧, —Ökwödönö kwabö loditjö̧ma ökwödö israel jojodö dösödökwö Isabenö Jo̧ Diosma lȩebobö ja̧kobe, —jö̧ba̧lö. Ja̧danö, israel jojodöma tjuluwedönö tjö̧dameakwinobe, —Sulabenö yöbawö juninadö, —jö̧ba̧lö.

^19-20 Ja̧danö, tjö̧damekwiawö̧, luwedöma yötja̧linobe israel jojodönö, —Ida̧ökö dösölö̧jinö dö̧jakwa̧ wene yöbawö dujunajabema, jobadönö kwabö lodoböma jwiobe, Dios lȩebakwa̧tjö demapji jö̧ba̧lö. Jau, israel jojodö dösödökwe Isabenö Jo̧ Dios iminö yöbawö dujunajabetija, –Kwabö loditjö̧ma Isabenö Jo̧ ökwödönö lȩebobö jo̧be, –jö̧ba̧lö. Jo̧kwajabetjö̧ isabenö jobadönö kwabö lodoböma jwiobe, kwabö lodiökwe Isabenö Jo̧ma ökwödönö lȩebapji jö̧ba̧lö.

²¹ Ja̧danö luwedöma yötja̧linobe, —Jobadönö kwabö lobökönö, dömöayedö batjibanö wedodönö, imi paböbi, ojwiyo waböbi otidadö batjibanö, —jö̧ba̧lö yötja̧linobe. Jejenö yöbawö tjujunina wene omukwatö, israel jojodötjö luwedöma gabaonitas jojodönö kwabö lotjoböma wetjinokobe.

²² Ja̧danö, Josuema gabaonitas jojodönö jwöinobe, ö̧jobekwö tjichobö, ja̧danö tjichibiökwe, Josuema jobadönö abebö a̧ja̧kwinobe, —Tajawedö ökwödönö sulabenö omöna yöka̧linaduwa̧da, –Ökwödöma ditebotjö ödö ja̧dösa, –jö̧ba̧löma? A̧dekwanö ditebonö kwö̧jaduwonö, tajawedö ödö ja̧dösa jö̧ba̧lö omöna yöka̧linaduwa̧da?

²³ Jejenö omöna yöka̧linaduwobetjö̧, ökwödönö lȩebakwawa baikwö yötawaduwakwö, ökwödöma ba̧kwelöjatebö dömöayedöda kwö̧jaduwakwedöja, ja̧danö ba̧kwelöjatebö chuluwo̧ Dios eju jawa imi paböbi, ojwiyo waböbi kwotidaduwakwedöja, —jö̧ba̧lö yöa̧linobe Josuema, sulabenö omöna yöka̧linaduwobe, jö̧ba̧lö.

²⁴ Yöa̧liawö̧, gabaonitas jojodöma tjatadinobe, —Ökwödönö omöna yöda̧linama, baikwö labebö lobö yödawakwö: Da̧ja̧kwijatö kwuluwo̧duwi Isabenö Jo̧ Dios iteda ömöayo̧ Moisesnö weinama, okobe jwiinö ditebo niji ökwödö israel jojodönö iyobö, ja̧danö okobe deinö bemi nijinö ju̧kwadönö kwabawö loobö. Ja̧danö, jejenö weina wene da̧ja̧kwinobetjö̧, jwiinö yedaibijatö, Isabenö ökwödönö kwabö lotjakobe, jobadötjö dö̧jiboböma jwiobe, jö̧ba̧lö. Jo̧kwajabetjö̧, jejenö yedabobetjö̧, ökwödönö omöna yöda̧lijatö, kwabö loköbaduwakwa̧tjö dö̧jibobö.

²⁵ Ja̧danö, babema ökwödöma kwömöayedösa, ökwödönö weköbobö. Jau Josue, Baikwö otiwanö weawa jö̧ba̧lö kwomukwati̧danö, ökwödönö weköbobö jo̧be, jo̧kwajabetjö̧ yöka̧laja̧danö kwömöayedö otidadö badibakwedösa, —jö̧ba̧lö tjatadinobe gabaonitas jojodöma Josuenö.

²⁶ Ja̧danö, jejenö Josue weaja̧danö baledinobe. Josuema weinokobe israel jojodönö, gabaonitas jojodönö kwabö lotjobö.

²⁷ Jobadönö kwabö lobökönö, israel jojodö tjömöayedö batjibanö weinobe, jemi tupakwö, tjuluwedö israel jojodö tjitea imi paböbi, ojwiyo waböbi tjotidobö. Ja̧danö ju'wibi, Isabenö Jo̧ Diosnö iyawöte jawa imibi, ojwiyobi emö tjotidobö, jelobebi, jelobebi Isabenö Jo̧ israel jojodö iyawöte tjotidobö weenama, jobe ja̧ jawa tje'ewobö. Ja̧danö, jejenö weinobetjö̧, babe mölebi baibanö ina ja̧ otidadö tjuju̧kwobe gabaonitas jojodöma.