Josué 8 - Dios Iwene

Israel jojodö Hai comunidad tjujuluwina jawa

¹ Jemi ikenama Isabenö Jo̧ma Josuenö yöa̧linobe: —Josue, bemi jojodönö yebabökönui, Dujuluwobö jwiobe, jö̧ba̧lö. Yebabökönö, okobe deinö israel jojodötjö ölakwabikwawa jojodönö öbibö kwi̧'yo, Hai comunidadbe. Jau Josue, isabenö yötawakwö, Hai comunidad la'aka luwo̧nöbi, okobe deinö ömöledönöbi kwujuluwaduwobö chiyajabe, ja̧danö itebo comunidadbi, itea nijibi jo̧batjö 'dökebobö chiyajabe.

² Ja̧danö, jo̧banö kwujuluwaja̧ ikenama, Jericotjö ja̧köbinaduwada̧nö okobe deinö jojodönöbi, comunidadbi söbebö loköbaduwo, bakwo̧bi ö̧ji̧bökönö. Jo̧kwaijayonö, Hai comunidad kwujuluwaduwenama, tjitea wene jwiinö kwemaduwobö ja̧kobe, tja̧jwimunöbi, ju'wi tjiteabi. Ja̧danö, jobadönö kwujuluwaduwakwa̧ma, baikwö wetakwö, abönö ju'wedönö weköbo, comunidad o̧pe tju̧ju̧kwawobö, comunidad jojodö latjebenama, Hai comunidad jojodö tjomapekwönö metji̧bobö, —jö̧ba̧lö weinobe Isabenö Jo̧ma, Josuenö.

³ Weökwe, Josuema Dios weaja̧danö ölakwabikwawa jojodönö öbibö i̧'yinobe. Ja̧danö, ölakwabikwawa jojodötjö treinta milbedö juluwadönö omudawö ujuninobe, yö̧te Hai comunidadbe tji̧'yobö.

⁴ Jobadönö omudawajo̧, Josuema jobadönö weinobe, —A̧ja̧kwaduwitjö, ökwödöma ju̧kwawiyabö Haibe kwi̧'yaduwo, ja̧danö ichibajadö, comunidad o̧pe kwu̧ju̧kwaduwo. Jobe kwu̧ju̧kwaduwakwa̧ma, comunidad yöne kwiteada̧laduwo, ödö labebökönö, ja̧danö jobe ja̧nö eda̧lakwawönö kwiteada̧laduwo, wetenama juluwanö mekibaduwakobetjö̧.

⁵ Ja̧danö comunidad o̧pe kwuju̧kwawaduwonö, ötjöbi ju'wedö ölakwabikwawa jojodöbi, jweinö comunidad apjude badeibö dichakobe, waapji öwawinö. Ja̧danö, jejenö dichibiawö̧, comunidad jojodö ökwödökwö tjölakwabikwawobö latjebenama, tjöba a'otjö dödibakwedösa, comunidadtjö labebö, ökwödönö lutjobö.

⁶ Jejenö dödibiawö̧, ökwödönö lutjibakobe, –Belö dötjibajinadanö, yemidanö dujuluwajawö̧ dötjibajobe israel jojodöma, –jö̧ba̧lö. Jejenö tjöba a'otjö döbibajö, jobadönö ödibakobe, comunidadtjö ödö batjibanö.

⁷ Jemi ikenama, ökwödönö lubö comunidadtjö latjebajenama, ökwödöma kwuju̧kwaduwemitjö labebö, comunidad tebachibö kwujuluwaduwobö ja̧kobe. Jau chömöledö, Duluwo̧ Isabenö Jo̧ Diosma ökwödö kwujuluwaduwobö pjaatakobe, ja̧danö kwujuluwaduwobö ja̧kobe.

⁸ Jemi ikenama, comunidad juluwajadö, comunidad nötedö, ökwölanö juwö loköbaduwo. Jau chömöledö, jobekwö Isabenö Jo̧ weaja̧ yötawaduwakwö, jo̧kwajabetjö̧ jejenö ja̧köbaduwo, —jö̧ba̧lö weinobe Josuema.

⁹ Jejenö ja̧tja̧kwa̧ yöbawö, Hai comunidadbe tji̧'yobö weinobe. Ja̧danö, weawö̧, weaja̧danö tju̧ju̧kwawobö tji̧'yinobe, ja̧danö ichibö, Betel comunidadbi, Hai comunidadbi 'da̧de tju̧ju̧kwawinobe, tjölakwabikwawenama Hai comunidad jojodönö tjomapekwönö metji̧bobö. Jobe tju̧ju̧kwawinemima, Hai comunidadtjö jawo̧ meajobekwö tju̧ju̧kwawinobe. Ja̧danö, jobadö jejenö Haibe tji̧'yonö, Josuema ju'wedö israel jojodökwö janö yö̧te abinobe.

¹⁰ Ja̧danö, ju'wi dewachö yȩayi a̧laibinobe Josuema, ja̧danö israel jojodötjö ölakwabikwawadönö o̧ko̧kodinobe. Ja̧danö, ko̧ko̧dajo̧, ju'wedö luwedökwö jojodönö öbibö i̧'yinobe Hai comunidadbe.

¹¹ Ja̧danö, okobe deinö Josuekwö kwebachadö ölakwabikwawa jojodöma Hai comunidad yöne ichibö, tjabakwemi tjujuninobe, Hai comunidadtjö u'dakwöchobe. Ja̧danö Hai comunidadtjö, tjabakwemitjö 'da̧de, wabeko ji̧nobe.

¹² Ja̧danö Josuema ömadö cinco milbedö jenanö ujuninobe, comunidadtjö jawo̧ meajobekwö Betel comunidadbi, Hai comunidadbi 'da̧de tjö̧jobö, Hai comunidad metjibakobetjö̧.

¹³ Jejenö ölakwabikwawa jojodönö tjujuninobe. Ölakwabikwawa jojodötjö ba̧jȩkwadöma Hai comunidadtjö u'dakwö bajalenö tjö̧jinobe, ja̧danö ju'wedö cinco milbedöma, jawo meajobekwö tjö̧jinobe. Ja̧danö, ja̧ yö̧te Josuema wabekonö ö̧jinobe.

¹⁴ Ja̧danö, israel jojojönö edajo̧, Hai comunidad la'aka luwo̧ma, ju'wi dewachö yȩayi, juluwanö iteda ömöayedö ölakwabikwawa jojodökwö laebinobe, israel jojodönö mebibö ölakwabikwawobö. Labebö, ba̧ba̧lawobekwö tji̧'yinobe, israel jojodökwö tjölakwabikwawakwemibe. Jo̧kwaijayonö, jejenö labebö i̧'yenama, wajwiinobe, Comunidad o̧pe ju̧kwawö metji̧bakwedö tju̧ju̧kwobe, jö̧ba̧lö.

¹⁵ Ja̧danö, jobadökwö ölakwabikwawö, Josuebi, jo̧bakwö ju̧kwadöbi ömöna tji̧sȩkwinobe, Ökwödönö tjujuluwajabe, jö̧ba̧lö, ja̧danö jojodö deobekwö dötjibajinobe, Hai comunidad jojodönö tjitebotjö ödö ötjibakobetjö̧.

¹⁶ Ja̧danö, jejenö dötjibiawö̧, okobe deinö comunidadnö ju̧kwadö ömadönö jwötjinobe, döbibajadönö lubö kwakwatjakwawobö. Ja̧danö, tupakwö döbibajö, Hai comunidad lubadönö ötjibinobe israel jojodöma, comunidadtjö ödö tjichibanö.

¹⁷ Okobe deinö Hai comunidad ömadöbi, Betel comunidad ömadöbi bakwo̧bi ö̧ji̧bökönö lutjinobe israel jojodönö, ja̧danö ju'wibi, lubö latjebenama, comunidad apjude tumatökönö latjebinobe.

¹⁸ Ikenama, comunidadtjö ödö tjichibenama, Isabenö Jo̧ma Josuenö weinobe, —Tjo̧wi, otokwöte kwe'ewötema, Hai comunidad jo̧bekwö kabebö i̧sȩbi, babe kwujuluwaduwobö chiyocha, —jö̧ba̧lö. Weökwe, Josuema otokwöte kabebö, i̧sebinobe Hai comunidadkwö, metjibotö jö̧ba̧lö ju̧kwawadö edö metjibakobetjö̧.

¹⁹ Ja̧danö, jejenö metjibobö i̧sȩbiawö, metji̧botö jö̧ba̧lö ju̧kwawadöma juluwanö ö'öbakwawö, Hai comunidad tetjachinobe, ja̧danö jobe juluwajadö, juluwanö ökwöla tjönötedinobe, comunidad tjujuwobö.

²⁰ Ja̧danö, Hai comunidad ölakwabikwawadöma tjökömakwö jalachibö tjedinobe, tjiteboajama imiu'wo mölejebekwö kaamobe. Jejenö edö, 'daliwanö dö̧libajabe jö̧ba̧lö dötjibajobö jö̧tja̧linobe, jo̧kwaijayonö, waekwinobe. Dötjibajobö jwiinobe, ajayinö tjöba a'otjö döbibajadöma jalachibö lubadönö tjölakwabikwawobetjö̧.

²¹ Josuebi, ju'wedö israel jojodöbi imiu'wo kaamobe edö, Ida̧ökö comunidad tjujuluwajabe jö̧ba̧lö, tjöwaisachibinobe, ja̧danö jalachibö, Hai comunidad ölakwabikwawadönö metjibinobe.

²² Ja̧danö ju'wibi, comunidad juwajadö, ajayinö ju̧kwawinadö israel jojodöma Hai comunidadtjö labebö, Hai ölakwabikwawadö tjökömakwötjö metjibinobe. Jo̧kwajabetjö̧, bakwachobebi, jelekwöchobebi israel jojodö tjö̧jinobe, ja̧danö jejenö tjötjösawobetjö̧, Hai jojodö dötjibajobö jwiinobe. Ja̧danö israel jojodöma okobe deinö jobadönö kwabawö lotjinobe, bakwo̧bi döbibajö ö̧jibökönö.

²³ Ja̧danö, Hai la'aka luwo̧nö ina 'yaba̧lo̧nö do̧tjatinobe, ja̧danö do̧batajadö, Josue ö̧jobekwö tjichejebinobe.

²⁴ Jejenö okobe deinö Hai comunidadtjö labebö, israel jojodönö lubibajadönö tjujuluwinobe, ja̧danö bakwo̧bi ö̧ji̧bökönö okobe deinö jobadönö kwölöte'onö dȩdȩbö kwabawö lotjinobe. Ikenama, ölakabikwawadönö kwabawö lobajadö, Hai comunidadbe tjetjachajinobe, ja̧danö okobe deinö jobe ju̧kwadönöbi kwabawö lotjinobe, jobe ju̧kwadötjö bakwo̧bi ö̧jibökönö.

²⁵ Ja̧ möle okobe deinö Hai comunidad jojodöma debö tji̧'yinobe, ömadökwö, ya̧dökwö doce mil jenanö.

²⁶ Ja̧danö Josuema, ajayinö otokwöte kabebö i̧sebinemitjö, okobe deinö Hai comunidad jojodönö kwabawö lotjenanö baibanö, kabatakwawökönö otokwöte kabebö i̧sȩba̧linobe, ja̧danö okobe deinö kwabawö lotjaja̧ ikenada, bajaliyanö i̧sȩba̧laja̧ma kaatakwawinobe.

²⁷ Ja̧danö, jojodönö kwabawö lotijayonö, tja̧jwimunö kwabawö lotjinokobe israel jojodöma, idöda tja̧jwi̧mu batjibanö tjeminobe, Isabenö Jo̧ Josuenö tjemobö weaja̧danö.

²⁸ Ja̧danö, Hai comunidad juwö lobajo̧, Josuema okobe jwiinö comunidad pjolö lotjobö weinobe, Hai comunidadma jwiinö pjolö loawemida baibanö, ja̧danö babebi ina pjolö loawobeda jo̧be Hai comunidadma.

²⁹ Ja̧danö, Hai comunidad la'aka luwo̧nö kwabö lobö, iteba'o towinö öninobe Josuema, yö̧te baibenanö kabatö. Ja̧danö, yö̧te baibenama, Josuema weinobe, iteba'o towitjö emö, comunidad apjude ji̧nena ikwö lotjobö, ja̧danö ikwö lobajadö, wamenö inawiya tjödobö, mö japopo baibanö. Ja̧danö, babe mölebi, ja̧ mö japopoma, ina Haitjö bo̧be.

Josue israel jojodönö Isabenö Jo̧ weinasa'ye yöa̧lina jawa

³⁰ Jemi ikenama, ja'yubenö lekwajabetjö̧, Josuema Isabenö Jo̧ israel jojodö tjuluwo̧ Diosnö iyawemi otidinobe, Mösa'o Ebal mikwa'onö.

³¹ Ja̧danö, iyawemi otidenama, jwaikwöda Moises Ebal mösa'otjö tjotidobö i̧wȩyudinadanö otidinobe. Moises i̧wȩyudinasa'yenö wȩyudö weinobe: Ichibajadö, Ebal mösa'otjö iyawemi kwotidaduwo, ja̧danö kwotidaduwenama, sule jojodö la'akatjöda tjotidinökö inawiyanöda, jojodö la'akatjöda 'dii jawakwö tjotidinököwiyanöda kwotidaduwobö jo̧be, jö̧ba̧lö. Ja̧danö, Josue otidinötema, jwaikwökwe laebi̧danö otidinobe. Ja̧danö, iyawemi otidajadö, jobetjö jwiinö ubinö iyawa Isabenö Jo̧nö tjiyinobe, ja̧danö ju'wibi bakobe Dioskwö ösökwö ja̧kwawa jawa iyawabi jobetjö tjiyinobe.

³² Ja̧danö, ju'wibi, jobe israel jojodö tjöba a'otjö, tjedalo̧nö, Josuema inawa nöawa öwiyawi̧ jobe ödinobe, ja̧danö lödajo̧, ja̧ inawiyanö Moises i̧wȩyudina jawa Dios weawama inawiyanö i̧wȩyudinobe, Moises jejenö inawiya wamenö i̧wȩyudobö weinadanö.

³³ Ja̧danö, jobe wabekotjö Diostjö jojodötjö tjö̧'da̧de pjabatadö Levi jojodöma, Isabenö Jo̧kwö israel jojodökwö yöbawö junawa i̧sȩkwapjo isapjo tje'ewinobe. Ja̧danö, okobe deinö israel jojodötjö damöbi, lȩekwa luwedöbi, ju'wedö luwedöbi, ju'wedö israel jojodöbi, jobadökwö ju̧kwadö jelobetjö ichajadöbi, japjo bakwachobebi, bakwachobebi tjö̧jinobe, Josue yöawakwa̧ tja̧ja̧kwobö. Jojodötjö ja'öma, Guerizin mikwa'o badeibö tjö̧jinobe, ja̧danö ja'ö Ebal mikwa'o badeibö tjö̧jinobe, ja̧danö Isabenö Jo̧ iteapjoma, tjö̧'da̧de ji̧nobe. Jejenö tjö̧jobö wȩyudö weinobe Isabenö Jo̧ ömöayo̧bina Moisesma, jejenö ja̧nö, Dios pjaatakwa̧ wene tja̧ja̧kwobö, jo̧kwajabetjö weinadanö jejenö tjö̧jinobe.

³⁴ Ikenama, jejenö ju̧kwadönö yöa̧linobe Josuema, okobe jwiinö Dios wei̧ wene wȩyukwa'ye laebi̧ma. Dios pjaatakwa̧ wenebi, lȩebakwa̧ wenebi, okobe jwiinö yöa̧linobe Josuema, ja'yubebi ji̧bökönö.

³⁵ Isabenö okobe jwiinö yöa̧linobe Josuema, okobe jwiinö Moises weina jawatjö, bakwöta jawabi ji̧bökönö, okobe jwiinö weawasa'yenö laebi̧ma israel jojodö ko̧ko̧kwadönö yöa̧linobe Josuema, ömadö tjöba a'otjöbi, ya̧dö tjöba a'otjöbi, tjemu tjöba a'otjöbi, jelobetjö ichajadö israel jojodö tjö̧'da̧de ju̧kwadö tjöba a'otjöbi, okobe deinö tjöba a'otjö, tja̧ja̧kwa̧lonö yöa̧linobe Josuema.