Josué 7 - Dios Iwene

Hai comunidad jojodö israel jojodönö tjujuluwina jawa

¹ Isabenö Jo̧ma israel jojodönö jweinö weinobe, ja'yubebi Jerico jawa tjemokobö, okobe jwiinö Isabenö Jo̧nö iyawa baibanö söbebö lotjobö. Jo̧kwaijayonö, jejenö weijayonö, israel jojodötjö bakwo̧ Acan mikwo̧ma a̧ja̧kwökönö sulabenö iteda ujuna̧lotö jö̧ba̧lö eminobe. Jo̧ba Acanma judasaso jojo, ja̧danö Carmi mikwo̧ itji̧, ja̧danö Carmima Zabdi mikwo̧ itji̧, ja̧danö Zabdima Zera mikwo̧ itji̧. Jo̧ba Acanma Isabenö Jo̧ weökö jawa eminobe, ja̧danö a̧ja̧kwökönö emiökwe, Isabenö Jo̧ma jwiinö ödameakwinobe israel jojodönö, weaja̧danö ja̧tjokobetjö̧.

² Ja̧danö, Jerico comunidad tjujuluwaja̧ ikenama, Josuema ju'wedönö weinobe jobetjö labebö, Hai comunidad edö tji̧'yobö. Hai comunidadma, Bet Aven comunidad yöneawobe, ja̧danö Betel comunidadtjö jawo̧ laebobekwö. Josuema jobadönö weinobe, —Mösa'onö jȩmi comunidad Hai mikwobe niji edö kwi̧'yaduwo, jobe dujuluwobö di̧'yakwa̧ abönö, —jö̧ba̧lö. Weawö̧, Josue weaja̧danö Hai comunidad edö tji̧'yinobe,

³ ja̧danö edö ȩwa̧jadö, Josuenö yötjawinobe, —Jobe Hai comunidadma, jalokobe, jojodö tjö̧ba̧jekwokobe. Dedemi sule dos milö̧kö̧, tres milö̧kö̧ ölakwabikwawadönö weköbitjö̧ma, juluwanö tjujuluwena, tjö̧ba̧jȩkwokobetjö̧. Jau Josue, okobe deinö tjime'dawinö jobe di̧'yobö jwiobe, Hai comunidadnö ju̧kwadöma sule o̧bukwedöda tju̧ju̧kwobetjö̧, —jö̧ba̧lö ȩwa̧jö yötjawinobe Josuenö.

⁴ Yötjawökwe, ösödinobe Josuema, jadanö yötja̧laja̧danö tres mil jenanö ölakwabikwawadönö weinobe, Hai comunidad tjujuluwobö. Jo̧kwaijayonö Hai jojodöma jobadönö tjujuluwinobe, jobetjö dötjibajenanö baibanö.

⁵ Ja̧danö, comunidad apjude a'o ölakwabikwawajadö, Hai comunidad jojodöma israel jojodönö a'dewö lotjinobe, ja̧danö jobetjö yutubajadönö lutjinobe, Sebarim ötjabobe tjichibenanö kabatö. Jejenö ölakwabikwawö, israel jojodötjö treinta y seis ölakwabikwawadönö kwabö lotjinobe Hai comunidad jojodöma, ja̧danö jejenö kwabö lobö tjujuluwiawö̧, ju'wedö israel jojodöma jwiinö yetjaibinobe, bidönö dujuluwoböma jwiobe, jö̧ba̧lö.

⁶ Ikenama, jejenö balediawö̧, Josuebi, ju'wedö israel jojodötjö luwedöbi jwiinö o̧'wo tjo̧achö tjökamiji̧do̧ kȩ'ekwö lotjinobe, ja̧danö Isabenö Jo̧ iteapjo öba a'o tjöba nijakwö tjöbamatinobe, ja̧danö jobe tjö̧binobe, yi̧ibena baibanö. Ju'wibi, nijiso̧pja tjuunö tjöwaninobe, jwiinö do̧'wo tjo̧bekwadösa jö̧ba̧lö.

⁷ Ikenama, jobe ba̧jadö, Josuema Diosnö aebinobe, baikwö: —Chuluwo̧ Isabenö Jo̧ Dios, ökwödöwe! Chuluwo̧, tajawedö ökwödö israel jojodö Jordan ojwe pedibobö öbibajo̧, babe amorita jojodö ökwödönö tjujuluwobö weköbaja̧da, tajawedö jejenö ökwödönö tjujuluwobö weköbaja̧da? Ökwödönö söbebö loköbobö jejenö ökibinaji̧? Ökwödöwe, la'akatjöda Jordan ojwe pediboko jö̧da̧lijatö, babe ökwödönö tjujuluwapji jö̧ba̧lö. Baikwö ichökönö, Jordan bakwachödöda dö̧jobö dösödinatjö̧ma otiwo jö̧a̧linobe, ökwödöwe.

⁸ Jau chuluwo̧, ökwödö israel jojodöma döpöjojodö tjöba a'otjö dödibajabe, jo̧kwajabetjö̧ babema dakwö yöta̧lakwajö?

⁹ Babe baledaja̧ a̧ja̧kwö, cananeo jojodöbi, ju'wedö bemi niji ju̧kwadöbi a̧ja̧kwö, ökwödönö tjujuluwobö tjomukwatakwedö, ja̧danö ökwödönö tjösawö, okobe deinö ökwödönö juluwö söbebö lotjena. Ja̧danö chuluwo̧, jejenö kwömöledö ötjabiwö̧nö söbebö lotjitjö̧ma, dakwö inesö juluwo̧ kwö̧ji̧ kwi̧sȩbobö? Kwömöledö ötjabiwö̧ okobe deinö debö di̧'yiawö̧, ökwönö juluwö̧kö̧ jö̧ba̧lö tjomukwatakwedö döpöjojodöma, —jö̧ba̧lö Isabenö Jo̧nö budekwö aebinobe Josuema.

¹⁰ Jejenö aebökwe, Isabenö Jo̧ma Josuenö atadinobe, —A̧la̧ibi. Kwöba nijakwö nijinö kwö̧bobö jwiobe, tajawedö bejenö baledobö weköbaja̧da jö̧ba̧lö.

¹¹ Babe wene kwöbaledaduwi̧ma, israel jojodö jawa, wetina tja̧ja̧kwinokobetjö̧. Jau, belö yötawijatö, söbebö loköbaduwobö wetaja̧ma emökönaduwi, kwemaduwitjö̧ma ökwödönö lȩekwa baibanö kwemaduwena, jö̧ba̧lö. Jo̧kwaijayonö, jejenö wetina a̧ja̧kwökönö, söbebö lotjobö wetina jawa tjemajabe. Ja̧ jawa naukwöbi, omöna yöba̧löbi tjemajabe, ja̧danö idöda tjiteakwö tjödajabe.

¹² Jo̧kwajabetjö̧, yötawinadanö baibajabe, tjöpöjojodö tjöba a'o tjö̧jobö tjujuluwokobe, ja̧danö tjöba a'otjö dötjibajobe. Isabenö yötawakwö, ajayinö Jerico jawa söbebö loköbaduwobö wetina jawa söbebö loköbaduwökötjö̧ma, la'akatjöda ökwödökwö ja̧nö pjatatökakwo̧sa, wetinadanö söbebö loköbaduwobö jo̧be.

¹³ Jo̧kwajabetjö̧, a̧la̧ibö, chöba a'o tjichibakwedö tjidichawi̧danö, wame tjusula jojodö dichawö lotjobö webi. Jojodönö baikwö weköbo: –Ökwödö Dios öba a'o kwusuladuwi̧ dichawö loköbaduwobö jo̧be, itekwayi öba a'o kwichibaduwobö. Jau, baikwö yöawobe Isabenö Jo̧ Israel jojodö tjuluwo̧ Diosma: Dios söbebö loköbaduwobö weina jawama, ökwödö israel jojodö kwö̧'da̧deduwi ina jo̧be. Ja̧danö baikwö yötawaduwakwö ökwödö israel jojodönö, la'akatjöda kwöpöjojodönö kwujuluwaduwobö jwiakobe, söbebö lobaduwi jö̧ba̧lö wetina jawa, kwö̧'da̧deduwitjö söbebö loköbaduwenanö baibanö, –jö̧ba̧lö ökwödönö yöawobe Isabenö Jo̧ma.

¹⁴ Jo̧kwajabetjö̧ itekwayi yȩayi Isabenö Jo̧ öba a'o bakwasokwena kwichibaduwobö ja̧kobe. Jejenö kwichibaduwiökwe, Isabenö Jo̧ma i̧sebakobe, diso jojo sulabenö ja̧inojobö jö̧ba̧lö. Jejenö isȩbenama, ja̧so jojodö tupadanösaso bakwasokwena tjichibobö ja̧kobe, ja̧danö jobadötjö diso jojo sulabenö ja̧inojobö i̧sȩbakobe. Ikenama tja'dökwena ömöledö tjichibobö ja̧kobe, dite itji̧mu tupadanö jojo sulabenö ja̧inojobö i̧sȩbobö. Ikenama i̧sȩbökwe itji̧mu tupadanö jojodötjö ömadöma, bakwo̧nökwena tjichibobö ja̧kobe, dite sulabenö ja̧inojobö jö̧ba̧lö Dios i̧sȩbakobetjö̧.

¹⁵ Ikenama, Biteda sulabenö söbebö lotjo jö̧tja̧li̧ jawa eminama, jö̧ba̧lö i̧sȩbakwo̧nö, ökwölanö tjujuwobö ja̧kobe, jo̧banöbi, okobe jwiinö ujuna̧laja̧bi. Sulabenö Isabenö Jo̧ weina wene a̧ja̧kwökönö, israel jojodö la'akatjöda ja̧tjo̧ko jö̧tja̧li̧ jawa sulabenö ja̧inobetjö̧, jejenö jo̧banö kwabö lobö, juwö lotjobö ja̧kobe, —jö̧ba̧lö Josue israel jojodönö yöawobö weinobe Isabenö Jo̧ma.

¹⁶ Weökwe, weaja̧danö ja̧inobe Josuema. Ja̧danö ikena möle yȩayi, dewachena Josuema israel jojodönö weinobe, bakwasokwena Dios eju yöneawinö tjichibobö. Ja̧danö, tjichibiökwe, Isabenö Jo̧ma i̧sȩbinobe, Sulabenö ja̧binama judasaso jojo, jö̧ba̧lö.

¹⁷ Ikenama juda jojodötjö, bakwasokwena tjichibobö weinobe, ja̧danö Zerasaso jojodönö i̧sȩbinobe, Sulabenö ja̧binama Zerasaso jojo, jö̧ba̧lö. Jo̧kwajabetjö̧ Zerasaso jojodötjö tja'dökwena ömöledö tjichibobö weinobe, ja̧danö Zabdi mikwo̧ itji̧mu tupadanö jojodönö i̧sȩbinobe, Sulabenö ja̧binama Zabdi itji̧mu tjupadanö jojodötjö bakwo̧, jö̧ba̧lö.

¹⁸ Ikenama Zabdi itji̧mu tupadanö jojodö ömadöma bakwo̧nökwena tjichibobö weinobe, ja̧danö judasaso jojodötjö, Zera itji̧ Zabdi itji̧ Carmi itji̧ Acan mikwo̧nö i̧sȩbinobe, Bite Acanda sulabenö ja̧binama, jö̧ba̧lö.

¹⁹ Jejenö i̧sȩbiökwe, Josuema Acan mikwo̧nö weinobe: —Chitji̧ Acan, sulabenö ja̧köbina wene yöbawitjö, ökwödö israel jojodö duluwo̧ Isabenö Jo̧ Dios ujulu öwaetjöda öwawobö. Dios öba a'otjö okobe jwiinö sulabenö ja̧köbina wene yöbawö, ja'yubebi tojata̧lökönö yöbawi, —jö̧ba̧lö weinobe.

²⁰ Weökwe, Acanma Josuenö atadinobe: —Isabenö sulabenö ja̧tajabetija, Isabenö Jo̧ israel jojodö duluwo̧ Dios weina a̧ja̧kwökönö sulabenö ja̧tijatö. Baikwö sulabenö ja̧tina yötawakwö:

²¹ Jerico jojodönö dujuluwenama, dujuluwajawö̧ tjiteatjö chedijatö, kamijido̧ babilonia nijitjö otikwa̧do̧ jwiinö otiwa̧do̧ wamesa̧do̧ma, ja̧danö ju'wibi plata ö̧pi̧ya doscientos ö̧pi̧ya chedijatö, ja̧danö ju'wibi orotjö cincuenta ö̧piyadanö ömöka'o chedijatö. Jejenö edajo̧, ötjöda chemotö jö̧ba̧lö chösödijatö, ja̧danö emajo̧, cheju i̧sȩdo̧tjö otikweju okwa sobö o̧tjö chotojijatö. Jau Josue, ja̧ chemina jawama, babe cheju okwa, niji okwa jo̧be, ja̧danö ju'wi jawa teebe, plata ö̧pi̧ya bo̧be, —jö̧ba̧lö atadinobe Acanma.

²² Jejenö yöawökwe, Josuema ju'wedönö weinobe, Acan ejube 'ya̧nö tjisakwobö, ja̧danö jobe ö'öbakwawö tjisakwinobe. Ja̧danö, Acan yöawaja̧danö, eju teebe tjöbadekwajinobe, ja̧danö plata ö̧pi̧ya ju'wi jawa teebe tjöbadekwajinobe.

²³ Badekwajadö, Acan ejutjö tjichejebinobe Josuebi, ju'wedö israel jojodöbi tjö̧jobekwö. Ja̧danö ichejebajadö, Isabenö Jo̧ öba a'o tjödinobe, isabenö Dios i̧sȩbaja̧danö Acanda sulabenö ja̧inobe, jö̧ba̧lö.

²⁴ Ikenama Josuebi, okobe deinö ju'wedö Israel jojodöbi Acannö öbibö tji̧'yinobe wabekobe. Ju'wibi, Acan önaukwina jawa platabi, kamiji̧do̧bi, orobi jo̧bakwö tje'ewinobe, ja̧danö okobe deinö i̧tji̧munöbi, ajwimu pa̧ka̧yadönöbi, bu̧lu̧dönöbi, obejadönöbi, ejubi, okobe jwiinö ju'wi iteabi Acankwö öbibö tji̧'yinobe.

²⁵ Ja̧danö, wabekobe ichibö, Josuema Acannö yöa̧linobe, —Acan, ökwöma sulabenö ökwödö israel jojodönö wene jwökebajabetija, ja̧danö jejenö ökwödönö wene jwökebiökwe, Isabenö Jo̧ma balekwa mikwa ökwönö wene weajabe, ja̧danö babe möle ökwönö lȩebobe, —jö̧ba̧lö. Ikenama, jejenö jö̧a̧laja̧ ikenama, okobe deinö israel jojodöma Acannöbi, itji̧munöbi, ajwimunöbi inawiya ikwawö kwabö lotjinobe. Ikenama, kwabö lobajadö, tjiteba'o ökwölanö juwö lotjinobe.

²⁶ Ikenama, tjöwame nöinö inawiya ko̧ko̧dö muchebö tjo̧tjinobe jobadönö mö japopo baibanö. Ja̧danö ja̧ tjödina inawiyama ina jobe ja̧ wabekonö bo̧be, wajuwanö jojodö tjedobö. Ja̧danö, ja̧ wabekotjö nöinö wene baledinobetjö̧, Wene Wabeko jö̧ba̧lö ötjabobe jobema. Ikenama, Isabenö Jo̧ weaja̧danö sulabenö ja̧binanö kwabö lotjiökwe, Isabenö Jo̧ma israel jojodönö ödameakwi̧ma kaatibinobe.