Josué 6 - Dios Iwene

Israel jojodö Jerico comunidad tjujuluwina jawa

¹ Ja̧danö, ja̧ möle Jerico comunidad ju̧kwadöma, 'diinö comunidad pje'datö tjö̧jinobe, israel jojodönö yetjabobetjö̧. 'Diinö tjipje'datinobe, bakwo̧bi teachökönöbi, bakwo̧bi laebökönöbi.

² Ja̧danö, Isabenö Jo̧ma Josuenö yöawinobe, —Baikwö yötawakwö Josue, Jerico comunidad kwujuluwaduwobö chiyobe, la'aka luwo̧nöbi, okobe deinö ömöayedötjö inesö juluwadö ölakwabikwawa jojodönöbi kwujuluwobö chiyobe.

³ Baikwö yötawakwö jobadönö kwujuluwaduwakwa̧ma: Okobe deinö ökwödö ölakwabikwawa jojodöma, comunidad bakwötanö söpödö kwekachaduwo. Jejenö jelemutjö bakwöta möle baledibanö, bakwöta mölekwena, bakwötanö söpödö kwekachaduwakwedöja.

⁴ Ja̧danö, jejenö kwekachaduwonö, chiteapjoma, tjö'da̧de pjabatadö tje'ewobö jo̧be, ja̧danö chiteapjo abönö, jelemutjö du̧ju̧taja tjö̧'da̧de pjabatadö trompeta pjubö kwetjachobö jo̧be. Jejenö jelemutjö bakwöta möle baledibanö, ja̧köbaduwobö jo̧be, ikenama jelemutjö dötölaja mölema, tjö̧'da̧de pjabatadö pjubö kwetjachonö, jelemutjö dötölatajanö söpödö kwekachaduwobö ja̧kobe.

⁵ Ja̧danö jelemutjö dötölatajanö söpödö kwebachajadö, tjö̧'da̧de pjabatadö labinö pjutjakobe, tjowita jö̧ba̧lö. Ja̧danö, jejenö tjo̧wita jö̧ba̧lö pjutjenama, okobe deinö jojodöma labinö ökwöinö jwötjeba̧lakobe, ja̧danö jejenö jwötjeba̧lenama, comunidad tjöekwemima nijakwö meakobe, ja̧danö okobe deinö ölakwabikwawadöma jweinö comunidad tetjachakwedö, Jerico jojodönö tjujuluwobö. Apjudebenö tebachökönö, tjöekwemi ja̧jemibenö jweinö tebachö tjölakwabikwawakwedö, —jö̧ba̧lö yöawinobe Isabenö Jo̧ma Josuenö.

⁶ Weökwe, Josuema tjö̧'da̧de pjabatadönö weinobe, —Isapjo Isabenö Jo̧ wei̧ wȩyukwa öbiya döbölataja a̧ja̧pjoma e'ewaduwi, ja̧danö ja̧pjo abönö, ökwödötjö jelemutjö du̧ju̧taja trompeta pjubadö kwetjachobö webaduwi, —jö̧ba̧lö weinobe tjö̧'da̧de pjabatadönö.

⁷ Ja̧danö ju'wedö jojodönö weinobe, —Jerico comunidad söpödö kwebachaduwi, ölakwabikwawa jawa kwiteaduwi kwebatö, Isabenö Jo̧ iteapjo abönö kwebachaduwi, —jö̧ba̧lö weinobe israel jojodötjö ölakwabikwawadönö.

⁸ Weawö̧, Josue weaja̧danö ja̧tjinobe. Isabenö Jo̧ öba a'otjö, jelemutjö du̧ju̧taja tjö̧'da̧de pjabatadöma trompeta pjubö kwetjachinobe, ja̧danö tjökömanö Isabenö Jo̧ iteapjo, Dioskwö israel jojodökwö yöbawö junawa i̧sȩkwapjo tje'ewinobe.

⁹ Ja̧danö pjubadö tjabönö, ölakwabikwawa jojodöma kwetjachinobe, ja̧danö isapjo ökömanö, ökömakwö teada̧ladö ölakwabikwawa jojodö kwetjachinobe. Ja̧danö okobe jwiinö söpödö kwetjachonö, trompeta pjubadöma kabatökönö pjubö kwetjachinobe.

¹⁰ Jo̧kwaijayonö, ju'wedö jojodöma 'wiinö kwetjachinobe, Josue weaja̧danö. Latjebakwa̧ abönö, Josuema jojodönö weinobe, —Kwekachaduwonö, ölakwabikwawadö jwötjeba̧li̧danöma jwöbeba̧lökönaduwi, ja̧danö yöba̧löbi ja'yubebi yöba̧lökönaduwi, jwaikwöda 'wiinö ja̧nö kwekachaduwobö jo̧be, –Tjo̧wita, jwöbeba̧laduwi, –jö̧ba̧lö bajaliyanö ökwödönö wetenanö kabatö. Ja̧danö, jejenö, –Jwöbeba̧laduwi, –jö̧ba̧lö wetenama, jenada jwökeba̧laduwobö ja̧kobe, —jö̧ba̧lö Josue weaja̧danö 'wiinö kwetjachinobe.

¹¹ Jejenö ja̧ möle Isabenö Jo̧ iteapjo bakwötanö comunidad söpödö kwetjatobö weinobe. Ja̧danö, bakwötanö söpödibajadö, tjabakwemibe tjȩwa̧bijinobe, ja̧danö jobe yöte tjabinobe.

¹² Ikena möle dewachö, Josuema yȩayi a̧la̧ibinobe, ja̧danö tjö̧'da̧de pjabatadöma Isabenö Jo̧ iteapjo kabebö tje'ewinobe.

¹³ Ja̧danö jelemutjö du̧ju̧taja tjö̧'da̧de pjabatadöma, trompeta e'ewö, Isabenö Jo̧ iteapjo abönö kabatökönö pjubö kwetjachinobe. Ja̧danö kabatökönö pjutjonö, ölakwabikwawa jojodöma tjabönö kwetjachinobe, ja̧danö Isabenö Jo̧ iteapjo ökömanö, ökömakwö teada̧ladö ölakwabikwawa jojodö kwetjachinobe.

¹⁴ Ja̧danö ja̧ dötölataja mölebi, ajayi möle ja̧tjinadanö bakwötanö söpödibajadö, tjabakwemibe tjȩwa̧jinobe. Jejenö jelemutjö bakwöta möle baledibanö ja̧tjinobe.

¹⁵ Ikenama, jelemutjö dötölataja möle dewachenama, ina yȩayi a̧la̧ibö, ajayinö kwetjachinadanö söpödö kwetjachinobe. Jo̧kwaijayonö ja̧ mölema, bakwötanödama söpödö kwetjachinokobe, jelemutjö dötölatajanö söpödö kwetjachinobe. Ja̧ möle jelemutjö dötölataja möleda jelemutjö dötölatajanö söpödö kwetjachinobe.

¹⁶ Ja̧danö, jelemutjö dötölatajanö baibanö söpödö kwetjachenama, tjo̧wita jö̧ba̧lö labinö trompeta pjutjakwa̧ abönö, Josuema jojodönö weinobe, —Babe tjö̧'da̧de pjabatadö, Tjo̧wita, jö̧ba̧lö labinö pjutjenama, labinö jwökeba̧laduwobö ja̧kobe, Isabenö Jo̧ma comunidad kwujuluwaduwobö iyajobetjö̧.

¹⁷ Ja̧danö, Isabenö Jo̧ Diosnö iyawa baibanö, okobe jwiinö comunidad söbebö loköbaduwobö ja̧kobe, okobe deinö jojodönöbi, tjajwimunöbi, tjiteabi jwiinö söbebö loköbaduwobö ja̧kobe. Okobe deinö bemi comunidad jojodötjö, sule jilekwamuböködökwö 'da̧'da̧bakwawö ju̧ju̧ Rajab mikwujuda, ja̧danö jejunö ju̧kwadöda tjö̧jibakwedö, Rajabma otiwanö dömöledö Jerico tjedobö wedinawö̧nö pjajatinobetjö̧.

¹⁸ Ja̧danö, Isabenö Jo̧ma okobe jwiinö söbebö lodobö weajobetjö̧, teada̧lönö kwö̧jaduwo, ökwödötjö bakwo̧bi söbebö loköbaduwobö weaja̧ jawa kwemaduwapji jö̧ba̧lö. Söbebö lodobö weaja̧ jawatjö kwemaduwitjö̧ma, wene ökwödö israel jojodönö baibobö jwökebaduwena, ja̧danö ökwödö israel jojodöma Dios lȩebakwawö̧ badibanö jwökebaduwena.

¹⁹ Jo̧kwajabetjö̧ okobe jwiinö bemi comunidad teama, söbebö loköbaduwo. Jo̧kwaijayonö okobe jwiinö plata jawabi, oro jawabi, okobe jwiinö broncetjöbi, 'dii jawatjöbi otikwa dȩja̧piyama, Isabenö Jo̧ itea baibanö 'da̧batö kwujunaduwo. Ja̧danö, 'da̧batö junajadö, Isabenö Jo̧ ejutjö ju'wi nöinö mikwawi̧ jawakwö dödakobe, —jö̧ba̧lö weinobe Josuema.

²⁰ Weawö̧, weaja̧danö jwötjeba̧linobe. Tjö̧'da̧de pjabatadö tjo̧wita jö̧ba̧lö labinö pjutjenama, jojodöma jwiinö labinö jwötjeba̧linobe, ja̧danö tjöekwemima jwiinö nijakwö bajalenö mebö bamatinobe. Ja̧danö, jejenö tjöekwemi meiawö̧, tjöekwemi meajena jweinö comunidad tetjachinobe israel jojodöma, ja̧danö comunidad jojodönö tjujuluwinobe.

²¹ Ja̧danö okobe deinö comunidadnö ju̧kwadönö kwabawö lotjinobe, ömadönöbi, ya̧dönöbi, damönöbi, tjemunöbi, pa̧ka̧yadönöbi, obejadönöbi, bu̧lu̧dönöbi. Okobe deinö jobe ju̧kwadönö kwölöte'onö kwabawö lotjinobe.

²² Jo̧kwaijayonö okobe deinö ju'wedö Jericonö ju̧kwadönö kwabawö lotjonö, Josuema ajayinö Jerico edö kwebachinadö du̧ju̧tajanö weinobe, —Isuju Rajab jejube tebachö, jejutjö öbibaduwi jojosujunöbi, okobe deinö jömöledönöbi, ajayinö jobujunö yöbawö kwujuninaduwa̧danö, —jö̧ba̧lö.

^23-25 Weawö̧, jobadö ajayinö Jerico edö kwebachinadöma tebachö, Rajabnöbi, jabe'donöbi, jojo'donöbi, jöja̧wo̧dönöbi, okobe deinö ju'wedö jömöledönöbi jobetjö tjeminobe, ju'wedö Jerico jojodökwö debö tji̧'yapji jö̧ba̧lö̧. Ja̧danö, jobetjö emajadö, israel jojodö tjabakwemi ö'öbönö öbibö tjujuninobe. Otiwanö Jerico edö kwebachadönö pjajatiökwe, balekwa mikwa lȩlöinö pjabatö tjö̧jibinö pjaatinobe Josuema, ja̧danö baikwö bajalenö israel jojodökwö jö̧jajabe Rajab mikwujuma. Ja̧danö jojodöma okobe jwiinö platatjö otikwa jawabi, orotjö otikwa jawabi, broncetjöbi, 'dii jawatjöbi otikwa dȩja̧piyabi ko̧ko̧dö, Isabenö Jo̧ eju okwa ju'wi nöinö mikwawi̧ jawakwö tjödinobe. Ja̧danö Jerico comunidad jwiinö ubinö tjujuwinobe, comunidadbi, okobe jwiinö comunidad ji̧ jawabi. Jwiinö ja̧ comunidad söbebö lotjinobe.

²⁶ Ja̧danö ja̧ möle Josuema jojodönö yöawinobe: —Isabenö bemi comunidad yemidanö tjotidobö jwiobe. Isabenö lȩebakwo̧ Isabenö Jo̧ma, bemi comunidad otidakwo̧nö. Baikwö lȩebakwa̧ wene yötawa, bemi comunidad otidakwo̧ jamatö comunidad la'aka otidenama, itji̧ abönö pöema ö'wö baibakobe, ja̧danö otidö kabatö comunidad apjude ujunenama, itji̧ bajaleapo jojo ö'wö baibakobe. Isabenö bemi comunidad otidakwo̧nö lȩebakobe Isabenö Jo̧ma, —jö̧ba̧lö yöawinobe Josuema.

²⁷ Ja̧danö, ja̧ möle baledi̧natjö̧, öwaetjöda öwawinobe, Isabenö Jo̧ma Josuekwö jo̧ jö̧ba̧lö. Ja̧danö niji ba̧kwemeachibanö jojodöma Josuenö tja̧ja̧kwinobe, Isabenö Josuema juluwo̧, jö̧ba̧lö.