Josué 5 - Dios Iwene

¹ Ja̧danö, Josue yöa̧laja̧danö, ja̧ baledaja̧ wene a̧ja̧kwadöma, a̧ja̧kwö yetjaibinobe, Isabenö Jo̧ma juluwo̧, jö̧ba̧lö. Okobe deinö Jordan mikwödötjö jawo̧ meajobekwö ju̧kwadö amorreo jojodötjö la'aka luwedöbi, jwaibalawa ö'öbö ju̧kwadö canananeo jojodötjö la'aka luwedöbi baledina wene tja̧ja̧kwinobe, —Isabenö Jo̧ma Jordan mikwödö köködö loajabetija, okobe deinö israel jojodö tjöbaledenanö kabatö, —jö̧ba̧lö. Ja̧danö, jejenö a̧ja̧kwajadö, jwiinö yetjaibinobe israel jojodönö, —Tjösödökwema jejenö ujuluwitjö̧ma, ökwödöwe, jobadötjö dakwö dö̧jibakwajö, ökwödöwe, —jö̧ba̧lö.

Israel jojodötjö ömadö tjötade bajalesa̧diju 'wibebö lotjina jawa

² Ja̧danö, Jordan baledajadö, Guilgaltjö tjö̧jenama, Isabenö Jo̧ma Josuenö weinobe, —Damötjö ja̧tjinadanö, yemidanö israel jojodötjö ömadö tjötade bajalesa̧diju 'wibebö loköbaduwobö jo̧be, ina 'wibekwö loböködönöma. Jo̧kwajabetjö̧, inawa pedernal ötjabawatjö, i̧sa̧pi̧danö otidö, belö Guilgaltjö 'wibebö lobaduwi, —jö̧ba̧lö weinobe.

³ Weökwe, weaja̧danö Josuema pedernal ötjabawatjö i̧sa̧pi̧danö otidö, tjötade bajalesa̧diju 'wibebö lotjobö weinobe israel jojodönö, ja̧danö jobe mösa'o ja'yuwa'otjö 'wibebö lotjinobe. Ja̧danö, jejenö ja'otjö 'wibekwö lotjinobetjö, babema ja'o mösa'oma 'wibekwö loawa'o jö̧ba̧lö mikwobe.

⁴ Ja̧ Josue 'wibebö loobö ji̧na labebö loawama, baikwö laebobe. Ajayinö israel jojodö Egipto nijitjö latjebenama, ja̧ möle ju̧kwadö israel jojodötjö ömadönö tjötade bajalesa̧diju 'wibekwö lobajadö tjö̧jinobe. Jo̧kwaijayonö, okobe deinö ja̧ möle 'wibekwö lobajadöma, tjölakwabikwawobö juluwadöma, jojodö deobe janö, debö tji̧'yinobe, Egipto nijitjö latjebaja̧ ikenama.

⁵ Ja̧danö, okobe deinö Egipto nijitjö labebajadöma 'wibekwö lobajadö tjö̧jinajayonö, kwebachö tjö̧jonö tjitji̧munö tjeminawö̧ma, ina 'wibebö lobawöködö tjö̧jinobe.

⁶ Ajayinö ji̧nadö Egipto nijitjö labebinadöma, Isabenö Jo̧ wei̧ tja̧ja̧kwinokobe, ja̧danö jejenö tja̧ja̧kwiökökwe, Isabenö Jo̧ma jobadönö yöbawö ujuninobe, —Kwa̧ja̧kwinaduwokobetjö̧, la'akatjöda kwa'dödönö chiyakwo̧sa̧ jö̧ta̧lina niji, inesö kwakwawa otiwanö pokwobe nijibema, kwichibaduwökakwedöja, okobe deinö jojodö deobe kwebachö woköbaduwakwedöja, ja̧danö kwitji̧muduwida tetjachakwedö, —jö̧ba̧lö yöbawö ujuninobe. Ja̧danö, jejenö yöbawö ujuninadanö, israel jojodöma cuarenta o̧biya baledibanö jojodö deobe kwetjachinobe, okobe deinö jobadö tjölakwabikwawobö juluwinadöma ö'wö batjibenanö kabatö.

⁷ Ja̧danö, jobadö nijibe tjichibo jö̧tja̧linemi, tji̧tji̧muda tjichibobö ujuninobe Isabenö Jo̧ma, ja̧danö jobadö debö 'yi̧nadö tji̧tji̧munöda tjötade bajalesa̧diju 'wibebö loinobe Josuema. Kwebachö tjö̧jonö la'akatjöda 'wibebö lotjinokobetjö̧, ja̧ möleda 'wibekwö lotjobö ji̧nobe.

⁸ Ja̧danö, okobe deinö israel jojodötjö ömadö tjötade bajalesa̧diju 'wibebö lobö katjataja̧ ikenama, jobe tjabakwemi ja̧nö ö'wachö tjiteada̧linobe, 'wibekwö lotjajabetjö ni̧awö̧ tjö̧bibajenanö kabatö.

⁹ Ja̧danö, Isabenö Jo̧ma Josuenö yöawinobe, —Ajayinö Egipto nijitjö ju'wedö tjömöayedö tjö̧jinobetjö̧, taba lö̧ji̧nobe israel jojodönö, jo̧kwaijayonö babema ja̧ taba lö̧jinama, emö lotajabe, —jö̧ba̧lö. Jo̧kwajabetjö̧, jejenö yöawinobetjö̧, ja̧ möletjö baikwö bajalenö jobema Guilgal ötjabobe, Emö loinobe, jö̧ba̧lö.

Dios mönö öbaledina omukwatö ba'ali ajayinö tjitebonö ja̧nö tjukwina jawa

¹⁰ Ja̧danö, israel jojodö jobe Guilgalnö tjö̧jonö, Dios mönö öbaledina omukwatakwawa ba'ali möle badekwachinobe, jawo̧tjö catorce mölema. Jo̧kwajabetjö̧, jobe Jerico badeibö mejenö ja̧nö, yi̧benakwö ja̧ ba'ali tjukwinobe.

¹¹ Ja̧danö jejenö Dios mönö öbaledina omukwatakwawa ba'ali tjukwaja̧ ikena mölema, i̧ya̧da möle jamatö tjukwinobe ja̧ niji pokwi̧ma. Ja̧ möle, batjo waji̧tjö, ye'yeachi̧ jawa jwii̧ pan tjukwinobe, ja̧danö trigo balawa tjukwinobe.

¹² Ja̧danö, ida̧ökö tjitebo jawa kwakwawa tjukwobö jo̧betjö̧, mölejebetjö tjoduwi̧ kwakwawa Mana ötjabi̧ kwakwawama tjoduwö kaatinobe. Jemi ikena mölebi, tupakwöbi la'akatjöda tjoduwinokobe ja̧ Mana ötjabi̧ kwakwawama, ja̧danö ja̧ kwökönö, canaan niji jawa batjo wa̧ji̧da tjukwinobe.

Isabenö Jo̧ Dios ömöayedö la'aka tjuluwo̧ Josuenö öwawachina jawa

¹³ Ja̧danö, Josuema Jerico comunidad yöne ö̧jena, möakwö edemi ipjeanö bakwo̧nö edinobe, ömamunö kwölöte'o do̧ba̧lo̧nö. Jo̧banö edö, ö̧jobekwö 'ya̧nö abebö a̧ja̧kwinobe Josuema, —¿Ökwöma didöso̧köba? Ökwöma ökwödö israel jojodötjö ölakwabikwawa jojoköbiji̧? Döpöjojoköbiji̧? Yöbawitjö, —jö̧ba̧lö.

¹⁴ Abebö a̧ja̧kwökwe, —Ötjöma ökwödötjöbi, kwöpöjojodötjöbi jojobö̧kö̧sa, ötjöma Isabenö Jo̧ ömöayedö ölakwabikwawa jojodötjö tjuluwo̧sa, ja̧danö mölejebetjö kwö̧jobekwö chichajabe, —jö̧ba̧lö atadinobe. Atadökwe, Josuema öba nijakwö öbamatinobe, ichajo̧nö ösödö, ja̧danö abebö a̧ja̧kwinobe, —Chuluwo̧, kwömöayo̧sa, weawa yöbawitjö̧, a̧ja̧kwö ja̧tobö, —jö̧ba̧lö.

¹⁵ Jö̧a̧lökwe, Isabenö Jo̧ ömöayedö ölakwabikwawadötjö tjuluwo̧ma weinobe, —Bemi niji kwö̧jatemima wainöemi, ötjö chö̧jemiobetjö̧. Jo̧kwaobetjö̧ sapatu yo̧bekwi, —jö̧ba̧lö weinobe. Weökwe, weaja̧danö sapatu yo̧ekwinobe Josuema.