Josué 4 - Dios Iwene

Inawiya Jordan ojwetjö tjemina wene, tupakwö Dios pjaatina tjomukwatibobö

¹ Ja̧danö, okobe deinö israel jojodö Jordan ojwe tjöbaledaja̧ ikenama, Isabenö Jo̧ma Josuenö weinobe,

² —Babe ömadö docebedönö, bakwasokwena jojodötjö bakwo̧nö omudawö,

³ baikwö webidönö: –Belö Jordan mikwödö ö'wejenö baledö doce inawiya kwemaduwo, Diostjö jojodötjö tjö̧'da̧de pjabatadö 'diinö tjö̧jatanajelö, ja̧danö jobetjö emajadö, inawiya kwe'ewaduwo, makö yö̧te kwabekwaduwakwemibe, jobe kwödaduwobö, –jö̧ba̧lö webidönö, —jö̧ba̧lö weinobe Isabenö Jo̧ma.

⁴ Weökwe, Josuema ömadö ajayinö 'da̧batö ujunajawö̧nö docebedönö jwöinobe, israel jojodötjö bakwasokwena bakwo̧nö 'da̧batö ujunajawö̧nö.

⁵ Ja̧danö, jobadönö jwöbajo̧, Josuema weinobe: —Kwuluwo̧duwi Isabenö Jo̧ Dios iteapjo ojwe okwa jo̧bekwö 'ya̧wibaduwi, ja̧danö jobetjö bakwo̧nökwena inawa bakwawa omudawö kwemaduwo, okobe jwiinö doce inawiya baibanö. Jau, israel jojodötjö docesaso dö̧jobetjö̧, doce inawiya kwemaduwo,

⁶ ja̧ inawiya tupakwö Dios pjaataja̧ wene i̧sȩkwobö. Jau chömöledö tupakwö kwi̧tji̧muduwima inawiya edö, abebö tja̧ja̧kwena, –Ja̧ inawiyama tajawedö bai tjödinada? Di̧ya wene yöbawö tjödinada? –jö̧ba̧lö abebö tja̧ja̧kwena. Ja̧danö, jejenö abebö tja̧ja̧kwenama,

⁷ babe möle baledaja̧ wene yökawaduwena, –Isabenö Jo̧ iteapjo, wei̧ wȩyukwa öbiya döbölataja a̧ja̧pjo ojwebe ichibenama, ojwe isuwöma kaatibinobe, ökwödö israel jojodö otiwanö kököachibajenada döbaledobö, –jö̧ba̧lö kwataduwena. Jejenö babe kwe'ewaduwakwa̧ inawiyama babe baledaja̧ wene ba̧kwelöjatebö tjomukwatibobö inawiya ja̧kobe. Jejenö jojodö tjomukwatibobö ja̧kobetjö̧, inawiya emaduwi, —jö̧ba̧lö weinobe Josuema, ömadö docebedönö.

⁸ Jejenö weawö̧, jobadö israel jojodöma Josue weaja̧danö ja̧tjinobe. Israel jojodöma docesaso tjö̧jobetjö̧, docenö inawiya tjeminobe, ojwe ö'wejetjö, Isabenö Jo̧ Josuenö tjemobö weaja̧danö. Ja̧danö, emajadö, ja̧ yöte tjabakwemibe tje'ewinobe, ja̧danö jobe japopo baibanö tjödinobe.

⁹ Ja̧danö, ju'wibi, Josuema inawiya a̧linösa̧mutjö döwalataja inawiya ojwe ö'wejenö japopo baibanö ödinobe, tjö̧'da̧de pjabatadö Dios iteapjo e'ewadö tjö̧jatanajemima. Ja̧danö, ja̧ Josue ödinawa öwiyama, babebi ina Jordan ojwe ö'weje bo̧be.

¹⁰ Diostjö jojodötjö tjö̧'da̧de pjabatadö isapjo e'ewadöma, jobe ojwe ö'weje ja̧nö tjiteada̧linobe, okobe jwiinö Josue weaja̧danö israel jojodö katjatakwawenanö kabatö. Isabenö Jo̧ma Josuenö weinobe israel jojodönö yöawakwa̧ma, ja̧danö ina 'yaa̧layi, Moisesma Josuenö weinobe, tjöbaledena ja̧tja̧kwa̧ma, ja̧danö okobe jwiinö ja̧ jawa katjatakwawenanö kabatö, Dios iteapjo e'ewadöma jobe ojwe ö'wejenö ja̧nö tjiteada̧linobe. Ja̧ möle baledina, baikwö laebobe. Israel jojodöma juluwanö tjöbaledinobe.

¹¹ Ja̧danö okobe deinö israel jojodötjö tjöbaledakwedö tjöbaledaja̧ ikenama, bajaliyanö tjö̧'da̧de pjabatadöma Isabenö Jo̧ iteapjo e'ewö, ojwe ö'wejetjö labebö, jojodö tjöba a'o tjöbaledinobe.

¹² Ja̧ möle Moises weinadanö, israel jojodötjö bakwachödö tjitebo juna̧ladö Rubensaso jojodötjö ölakwabikwawadöbi, Gadsaso jojodötjö ölakwabikwawadöbi, Manasessaso ja'ö jojodötjö ölakwabikwawadöbi, ju'wedö tjömöledö israel jojodö tjabönö ojwe tjöbaledinobe, tjitebo tjujuna̧lobö pjabatö tjölakwabikwawotö jö̧ba̧lö.

¹³ Jobadöma cuarenta mil jenanö ölakwabikwawadöma tjitea ölakwabikwawa jawa kwebatö, Isabenö Jo̧ öba a'o tjöbaledinobe Jerico badeibö mejebe, ju'wedö tjömöledö israel jojodönö pjabatö tjölakwabikwawobö.

¹⁴ Ja̧ möle baleditjö̧, Isabenö Jo̧ma öwaetjöda öwawinö okobe deinö israel jojodö tjöba a'otjö i̧sȩbinobe Josuenö, Isabenö bite Josueda chömöledö israel jojodö tjuluwo̧ baibanö kabebö chujunajökwe, jö̧ba̧lö. Ja̧danö, jejenö i̧sȩbiawö̧, Moisesnö otiwanö omukwatö tjö̧jinadanö, Josuenöbi otiwanö omukwatö tjösödinobe, Biteda duluwo̧ baibanö Dios omudawö ujuninökwema jö̧ba̧lö̧, ja̧danö jejenö Josuenö ösödö tjö̧jinobe, bajaliyanö ö'wö baibenanö kabatö.

¹⁵ Okobe deinö israel jojodö ojwe tjöbaledaja̧ ikenama, Isabenö Jo̧ma Josuenö weinobe,

¹⁶ —Josue, tjö̧'da̧de pjabatadötjö chiteapjo e'ewadönö webi, Jordan ö'wejetjö latjebobö, —jö̧ba̧lö.

¹⁷ Weökwe, Josuema tjö̧'da̧de pjabatadönö weinobe, —Tjowita, Jordan ojwetjö labebaduwi, —jö̧ba̧lö.

¹⁸ Weawö̧, Isabenö Jo̧ iteapjo, jo̧bakwö israel jojodökwö yöbawö junawa i̧sȩkwapjo e'ewadö tjö̧'da̧de pjabatadöma, weaja̧danö ojwe ö'wejetjö latjebinobe. Ja̧danö, ojwetjö labebö, ö'öbö kököo jö̧a̧lemibe tjömasapiyanö tjö̧jatenama, Jordan ojwema juluwanö yemidanö isuwö lamatinobe, ja̧danö ajayinö ja̧ja̧danö, yemidanö su̧'bȩ babibö welachibanö okwatibinobe.

¹⁹ Ja̧ möle jejenö baledina mölema, ajayi jawo̧tjö domulataja jawa möle baledinobe. Ja̧danö, ojwe baledajadö, Guilgal ötjabobe tjabakwemi tjujuninobe, jobe tjabekwobö. Jobe Guilgalma, Jerico comunidad ö'öbö jo̧be, jawo̧ laebobekwö.

²⁰ Ja̧danö, Guilgalbe ichibajadö, Jordad ojwe ö'wejetjö inawiya tjemaja̧ öwiyama, Josuema jobe Guilgaltjö japopo baibanö ödinobe.

²¹ Ja̧danö jobe lödö, israel jojodönö yöawinobe: —Tupakwö kwi̧tji̧muduwi tupadanö jojodö tjemuma, biwa inawiya edö abebö tja̧ja̧kwakwedö, –Biwa inawiyama, taji wene yötjawotö jö̧ba̧lö tjödinada? –jö̧ba̧lö abebö tja̧ja̧kwakwedö.

²² Ja̧danö, jejenö abebö tja̧ja̧kwenama, kwitji̧muduwinö yökawaduwobö ja̧kobe, –Ökwödö Israel jojodöma Jordan ojwe baledö, Dios köködö loajemibenöda otiwanö döbaledijatö, –jö̧ba̧lö yökawaduwobö ja̧kobe.

²³ Jau chömöledö, damötjö jwaibalawa Mar Rojo ötjabawa döbaledobö köködö loinadanö, babe mölebi bakwainö Jordan mikwödö köködö loajabeta kwuluwo̧duwi Isabenö Jo̧ Diosma, okobe deinö otiwanö döbaledenanö kabatö.

²⁴ Jobekwö iteda ujulu i̧sȩbajabe dösödökwe Isabenö Jo̧ Diosma chömöledö, bö̧jȩ ba̧kwemeachibanö ju̧kwadö jojodöma a̧ja̧kwö tjöwaisachibakobetjö̧, Isabenö Jo̧ Diosma isabenö jwiinö juluwo̧, jö̧ba̧lö. Ja̧danö, ju'wibi, ökwödö israel jojodö ba̧kwelöjatebö kabatökönö kwuluwo̧duwi Isabenö Jo̧ Diosnö yebabinö omukwatö, Jwiinö juluwo̧ Dösödökwe Isabenö Jo̧ma jö̧ba̧lö omukwatö kwö̧jaduwakobetjö̧, jejenö kwöba a'oduwitjö iteda ujulu i̧sȩbajabeta, —jö̧ba̧lö yöawinobe Josuema, inawiya Guilgaltjö ödenama.