Josué 3 - Dios Iwene

Israel jojodö Jordan mikwödö tjöbaledina jawa

¹ Jemi ikena möle yȩayi, Josuebi okobe deinö ju'wedö israel jojodöbi a̧la̧ibö Sitintjö labebö tji̧'yinobe Jordan mikwödö ö'öböbe. Ja̧danö, ojwe petjibakwedö, jobe petjibobö tjiteada̧linobe.

² Ja̧danö, wapötakwa möle baledaja̧ ikena, luwedöma jojodö tjö̧'da̧de kwebachö yötjawinobe,

³ —Duluwo̧ Isabenö Jo̧ Dios iteapjo, Dios wei̧ wȩyukwa öbiya döbölataja a̧ja̧pjoma, kabebö tje'ewakobe Levita jojodö Diostjö jojodötjö tjö̧'da̧de pjabatadöma. Jejenö kabebö tje'ewi̧ kwedaduwenama, ökwödöbi a̧la̧ibö ökömanö kwi̧'yaduwo.

⁴ Babe di̧'yakwa̧ma, la'akatjöda edajiköbaduwokobe di̧'yakobe, jo̧kwajabetjö̧ Dios iteapjo ökömanö lukibaduwo, kwi̧'yaduwakwa̧ma kwöwaisaduwakobetjö̧. Jo̧kwaijayonö, ökömanö 'ya̧nö, Dios iteapjo yöne kwichibaduwobö jwiobe, ödö, bakwöta kilometro jenanö ödökwönönö lukibaduwobö jo̧be, jo̧kwajabetjö̧ teada̧lönö kwö̧jaduwo, yöne kwichibaduwapji jö̧ba̧lö, —jojodönö webö yötjawinobe luwedöma.

⁵ Ja̧danö Josuema jojodönö weinobe, —Isabenö Jo̧ öba a'o tjichibakwedö tjidichawi̧danö, wame jawa kwusuladuwi babe dichawö loköbaduwo, itekwayi möle Isabenö Jo̧ma kwö'da̧deduwitjö kwöbajaleduwi jalaka baibanö iteda ujulu i̧sȩbakobetjö̧, —jö̧ba̧lö weinobe.

⁶ Ja̧danö, tji̧'yakwa̧ badekwachenama, Josuema tjö̧'da̧de pjabatadönö weinobe, —Babe Dios iteapjo kabebö, jojodö tjabönö kwi̧'yaduwo, —jö̧ba̧lö. Weawö̧, isapjo kabebö, jojodö tjabönö tji̧'yinobe.

⁷ Ja̧danö, Isabenö Jo̧ma Josuenö yöawinobe, —Babe mölȩ badekwachajabe, okobe deinö israel jojodö tjöba a'otjö ökwökwö chö̧ji̧ chi̧sȩbakwa̧ma. Ja̧u Josue, chi̧sȩbakwa̧ edö, öwaetjöda öwawinö tjöwaisachibakobe, Moiseskwö chö̧jinadanö isabenö ökwö Josuekwöbi jo̧sa̧ jö̧ba̧lö, ja̧danö isabenö tjuluwo̧ baibanö chujunaja̧ wene öwawakobe.

⁸ Babe ja̧köbakwa̧ yötawakwö, tjö̧'da̧de pjabatadö Dios iteapjo kwebatadönö weköbo, Ojwe ö'öbö ichibajadö, jemi tupakwö ja'yubeda kwötjibenanö baibanö 'ya̧wibö tjöjamatobö weköbo jobadönö, —jö̧ba̧lö yöawinobe Diosma Josuenö.

⁹ Yöawökwe, Josuema israel jojodönö yöawinobe, —Baikwö kwichaduwo, Isabenö Jo̧ kwuluwo̧duwi Dios yöawi̧ kwa̧ja̧kwaduwobö, —jö̧ba̧lö.

¹⁰ Ja̧danö, ichajadönö yöawinobe Josuema: —Chömöledö, babe baledakwa̧ edö kwöwaisaduwakwedöja, 'yaba̧lo̧ Diosma isabenö ökwödökwö jo̧, ja̧danö isabenö cananeo jojodönö köba a'oduwitjö a'dewö loakwo̧, jö̧ba̧lö. Jau chömöledö, baledakwa̧ edö, öwaetjöda öwawakobe, isabenö babe nijinö ju̧kwadönö, cananeo jojodönöbi, hitita jojodönöbi, heveo jojodönöbi, ferezeo jojodönöbi, gergeseo jojodönöbi, amorreo jojodönöbi, jebuseo jojodönöbi kwöba a'oduwitjö a'dewö loakobe jö̧ba̧lö.

¹¹ Ja̧ wene i̧sȩbi̧ baledakwa̧ baikwö yötawaduwakwö: Okobe jwiinö bö̧jȩ la'aka luwo̧ Dios iteapjo, iteda wei̧ wȩyukwa öbiya döbölataja a̧ja̧pjoma, kwabönöduwi Jordan mikwödönö baledakobe.

^12-13 Ja̧danö ja̧pjo kwebatadö tjö̧'da̧de pjabatadö ojwebe ichibö, tjömasapiyanö ojwe okwanö tjö̧jamatenama, ojwema isuwaja̧ma kaatibakobe. Diosma ojwe tjöeba̧lakobe, a̧li̧kwö isuwökönö, u'dakwöda möakwö bakwobe okwatibenanö, a̧li̧kwöchobenö otiwanö kwöbaledaduwakobetjö̧. Jobekwö edö, öwaetjöda öwawinö kwöwaisaduwakobe, Diosma isabenö kwöpöjojodönö a'dewö loakobe jö̧ba̧lö. Jo̧kwajabetjö̧, baikwö wetaduwakwö, ömadö 12bedönö omudawö kwujunaduwo, bakwasokwena jojodötjö bakwo̧nö, tupakwö wetakwa̧ tjotidakwedönö, —jö̧ba̧lö yöawinobe Josuema israel jojodönö.

¹⁴ Jejejenö yöawawö̧, israel jojodöma tjabakwemitjö latjebinobe, Jordan ojwe petjibobö, ja̧danö tjabönö tjö̧'da̧de pjabatadöma Dios iteapjo tje'ewinobe.

¹⁵ Ja̧ mölema, batjo wa̧ji̧ emajitja mölȩ, ojwe ba̧kwelöjatebö okwatajiyena, ja̧danö ojwema okwatajiya bajalekwönönö jwiinö su̧'bȩ baibanö okwatinobe. Jo̧kwaijayonö, jwiinö okwatijayonö, isapjo e'ewadö tjö̧'da̧de pjabatadö tjömasapiya ojwenö tjö̧jatenama,

¹⁶ ojwema isuwö kaatibinobe. Ja̧danö, ojwiyo isuwo jö̧a̧lajobuma, ödö, u'da Saretan yöne comunidad Adan mikwobe ö'öbö okwatinobe, a̧li̧kwö kököachibenanö. A̧li̧kwö jwaibalawa Arabanö ja̧wa, Mar Muerto ötjabawabe isuwo jö̧a̧lijayonö, Adan comunidad ö'öbö lamatö, jobetjöda okwatibinobe. Jo̧kwajabetjö̧, jejenö kököachibiawö̧, israel jojodöma jobe Jerico yöneawinö tjöbaledinobe.

¹⁷ Ja̧danö, Isabenö Jo̧ iteapjo e'ewadö tjö̧'da̧de pjabatadöma, ojwe ja'ö ichibö, tjöjamatinobe, ja̧danö jobe ojwe ja'ö ja̧nö tjiteada̧linobe, okobe deinö israel jojodö tjöbaledenanö kabatö. Ja̧danö, ojwe lo̧ jö̧a̧lemibenö, israel jojodöma kököachibajena nijibenö tjöbaledinobe.