Josué 24 - Dios Iwene

Isabenö Jo̧ israel jojodönö pjaatina jawa

¹ Jemi ikenama, Josuema yemidanö jwöinobe israel jojodönö, Siquen comunidadtjö tjo̧ko̧ko̧kwachobö. Bakwasokwena la'aka luwedönöbi, tjömöledökwena tjuluwedönöbi, lȩekwa luwedönöbi, ju'wedö israel jojodötjö luwedönöbi jwöinobe, ja̧danö jwöawö̧, ko̧ko̧kwachö tjichinobe, Dios öba a'o ichibö tja̧ja̧kwobö.

² Jejenö tjichibiökwe, Josuema okobe deinö ko̧ko̧kwadönö Isabenö Jo̧ yöawaja̧ jobadönö yöawinobe, baikwö: —Chömöledö, baikwö yöawobe ökwödö israel jojodö duluwo̧ Isabenö Jo̧ Diosma ökwödönö: –Damötjö̧ kwa'dödö Tera mikwo̧bi, itji̧mu Abraham mikwo̧bi, Najor mikwo̧bi Eufrates mikwödö tupakwöchobe tjö̧jinobe, ja̧danö jobe ja̧nö ju'wedö tjösödawö̧ Diosbedö tjomukwatawö̧nö ösödö tjö̧jinobe.

³ Jejenö tjö̧jemi ja'ötjö ötjöma kwa'dömine Abrahamnö jobetjö öbibö chichejebijatö, ja̧danö okobe jwiinö Canaan nijibenö öbibö kwetatijatö Abrahamnö, ja̧danö itji̧mu tupadanö jojodö tjö̧ba̧jekwachinö pjatatijatö. Jo̧banö itji̧ Isaacnö 'yaebobö chiyijatö,

⁴ ja̧danö Isaacnö itji̧mu du̧ju̧tajanö 'yaebobö chiyijatö, Jacobnöbi, Esaunöbi. Ja̧danö, Esaunö chiyijatö, Seir mösa'o jȩmi niji ö̧jobö, jo̧babi itji̧mu tupadanö jojodöbi. Ja̧danö Esau jobe ö̧jonö, Jacobbi, itji̧mubi Egipto nijibe tji̧'yinobe, jobe tjö̧jobö.

⁵ Ikenama ja'yubenö lekwajabetjö, Moisesnöbi Aaronnöbi wetijatö, ja̧danö Egipto jojodönö lȩtebijatö. Jobe tjö̧'da̧de ja̧nö, jwiinö jobadönö lȩtebijatö, usula tjemawinö, ja̧danö jemi ikenama jobadö tjitebotjö lakebaduwinö ötibijatö baikwö.

⁶ –Ja̧danö kwa'dödönö Egiptotjö latjebinö ötibenama, jwaibalawa Duwödöbe tjichibanö ötibijatö, ja̧danö jejenö ötibiawö̧, Egipto jojodötjö ölakwabikwawadöma kwa'dödönö lutjinobe, kolukiyanö ölakabikwawadökwöbi, ka̧ba̧yudönö wa̧nö ölakwabikwawadökwöbi, ja̧danö kwa'dödönö lubö, jobadöbi jwaibalawa Duwödö ö'öböbe tjichibinobe.

⁷ Jejenö lubö tjichibiawö̧, kwa'dödöma ötjönö budekwö atjebinobe ötjö Isabenö Jo̧nö, ja̧danö atjebi̧tjö̧, yȩa'wo chujunijatö Egipto jojodötjö, ökwödötjö kwö̧'da̧deduwinö. Jemi ikenama jwaibalawa jobadö Egipto jojodönö okwatobö wetijatö, jobadönö söbebö lobö, ja̧danö ökwödö israel jojodöma Egipto jojodönö söbebö lotina kwöbajaleduwinö kwedaduwijatö. Jemi ikenama lekwe möle jojodö deobe kwö̧jaduwijatö.

⁸ –Jemi ikenama ökwödönö öbibö chichejebijatö Amorita jojodö tjitebobe, Jordantjö jawo̧ laebobekwö nijibe. Jobadöma ökwödökwö tjölakwabikwawinobe, ja̧danö ökwödö jobadönö kwujuluwaduwobö chiyijatö. Kwöba a'oduwitjö jobadönö söbebö lotijatö, ja̧danö ökwödöma tjiteboinemima, kwiteboduwi baibanö 'dökebinaduwobe.

⁹ –Jemi ikenama Moab niji la'aka luwo̧ Balac mikwo̧ma ökwödö israel jojodönö ölakwabikwawotö jö̧ba̧lö laebinobe, ja̧danö Balaam mikwo̧nö jwöinobe, Balaam ökwödönö suli̧ waedakwawa jwöeba̧lobö.

¹⁰ Jo̧kwaijayonö Balaam ökwödönö suli̧ waedakwawa ökwödönö jwöeba̧lobö jö̧a̧li̧ma cha̧ja̧kwobö chöpöjödijatö, jwaikwöda ökwödönö otiwanö baledakwa̧ weneda yöawobö wetijatö, isabenö suli̧ öwaedobö jö̧a̧li̧tjö kwö̧jibaduwinö pjatatijatö.

¹¹ –Jemi ikenama Jordan ojwe baledajadö, Jerico comunidadbe kwichibinaduwobe, ja̧danö jejenö kwichibaduwiawö̧, Jerico jojodöma ökwödökwö tjölakwabikwawinobe. Ja̧danö amorreos jojodöbi, ferezeos jojodöbi, cananeos jojodöbi, hititas jojodöbi, gergeseos jojodöbi, heveos jojodöbi, jebuseos jojodöbi ökwödönö tjölakwabikwawinobe, jo̧kwaijayonö okobe deinö jobadönö kwujuluwaduwobö chiyijatö.

¹² Ötjöda jwiinö yetjaibanö wetijatö, wene jwiinö jobadönö kwabö loköbaduwobö. Damötjö̧ bakwachödö ju̧kwadö Amoritas jojodötjö du̧ju̧taja la'aka luwedönöbi, ojwetjö baikwöchobe ju̧kwadönöbi jejenö kwujuluwaduwobö pjatatijatö. Jau, ökwödö kwujuluduwinö, 'böpönöbi, kwölöte'onöbi kwujuluwinaduwokobe, ötjöda kwujuluwaduwobö pjatatobetjö, jobadönö kwujuluwinaduwobe.

¹³ Ja̧danö, tjitebo niji ökwödönö chiyijatö. Ju'wedöda ida̧ökö tjotidina batjiju ökwödönö chiyijatö, ja̧danö ju'wedöda tjotidina comunidadnö kwö̧jaduwobö chiyijatö. Jo̧kwajabetjö̧ babema ökwödöma ju'wedö tjotidina comunidadnö otiwanö kwö̧jaduwobe, ja̧danö ju'wedöda uba batjo tjotidinayutjö, ökwödö kwotidinököyutjö otiwanö uba du̧bö kwadöja, ja̧danö olivo waji̧ kwujuninaduwökowitjö otiwanö olivo kwadöja, —jö̧ba̧lö Isabenö Jo̧ israel jojodönö yöawi̧ yöawinobe Josuema, israel jojodö ko̧ko̧kwadönöma.

¹⁴ Jejenö yöbawajo̧, tupakwö yöawinobe Josuema, —Chömöledö, jejenö ökwödönö otiwanö pjaatina jawa omukwatö, Isabenö Jo̧nö kwösödaduwobö jo̧be, isabenö inesö otiwanö pjabato̧ jö̧ba̧lö, ja̧danö jwaikwöda jo̧banö ösödö, wei̧danö ja̧bö kwö̧jaduwo. Jau chömöledö, kwa'dödö Eufrates mikwödö tupakwö tjösödinawö̧nöbi, Egipto nijinö ja̧nö tjösödinawö̧nöbi kabatibö lobö, jwaikwöda Isabenö Jo̧nöda ösödö kwö̧jaduwobö jo̧be.

¹⁵ —Jau chömöledö, Isabenö Jo̧nöda kwösödaduwobö jo̧be, jo̧kwaijayonö, Isabenö Jo̧nö ösödö kwö̧jaduwobö kwöpöjödaduwitjö̧ma, babe möleda omudawö kwujunaduwobö jo̧be, kwösödaduwakwawö̧nöma, damötjö̧ kwa'dödö Eufrates mikwödö tupakwö tjö̧jena tjösidinawö̧maö̧kö̧, bemi niji ju̧kwadö amorreos jojodö tjösödawö̧maö̧kö̧. Jo̧kwaijayonö ökwödö israel jojodöma ju'wedö tjösödawö̧nöda kwösödaduwobö omudawö kwujunadwuitjö̧böbi, ju'wedönö la'akatjöda chösödökakwo̧sa chömöledö. Ötjöbi, yö̧ne chömöledöbi, jwaikwöda Isabenö Jo̧nöda ösödö dö̧jakwedösa, jo̧ba wei̧da a̧ja̧kwö, —jö̧ba̧lö yöawinobe Josuema, israel jojodönö.

¹⁶ Jejenö yöawiawö̧, israel jojodöma tjatadinobe, —Ökwödöbi jwaikwöda Isabenö Jo̧nöda dösödakwedösa, la'akatjöda jo̧banö kabatibö, ju'wedö tjösödawö̧nö dösödobö jwibadösa,

¹⁷ jo̧ba duluwo̧ Isabenö Jo̧ Diosda ökwödönöbi, da'dödönöbi Egiptotjö ladebinö baikwö ichejebinobetjö̧. Jau, jo̧bada Egipto jojodö tjömöayedö dö̧jitjö dö̧jibinö pjabatinama, ja̧danö jo̧bada yökawaja̧ inesö juluwi̧ ji̧ jawa dedonö i̧sȩbinama. Okobe jwiinö kwedachena, jo̧bada tjöbeba̧lö pjaatinobe, ja̧danö ju'wedö tjö̧'da̧denö döbaledonö, jo̧bada otiwanö tjöbeba̧lö pjaatinobe.

¹⁸ Ja̧danö Isabenö Jo̧ Diosda okobe deinö bemi nijinö ju̧kwinadö, amorreos jojodönö döba a'otjö a'dewö lobinama, jo̧kwajabetjö̧ ökwö kwösödi̧danö, ökwödöbi bakwainö Isabenö Jo̧ wei̧ a̧ja̧kwö, jo̧banö dösödakwedösa, jo̧bada duluwo̧ Diosobetjö̧, —jö̧ba̧lö tjatadinobe israel jojodöma.

¹⁹ Tjatadökwe, Josuema jobadönö yöa̧linobe, —Chömöledö, chedemi Isabenö Jo̧ Diosnö dösödakwedösa jö̧ba̧lö yöka̧laduwaja̧ma waekwena. Isabenö Jo̧ Diosma jwiinö suli̧tjö 'da̧bachibö jo̧, ja̧danö sulabenö ja̧köbaduwitjö̧bi, Dios wei̧ öpöjödö kakataduwitjö̧bi, isabenö ökwödönö lȩebakwo̧. Jau chömöledö, kwuluwo̧duwi Diosma, kwösödaduwi̧ a̧'dȩlo̧, itenöda kwösödaduwo, ja'yubebi ju'wedö tjösödawö̧nö kwösödaduwoko, jö̧ba̧lö.

²⁰ Isabenö Jo̧ma isabenö otiwanö ökwödönö pjaatinajayonö, jo̧banö kabatibö ju'wedö tjösödawö̧nö ösödö kwö̧jaduwitjö̧ma, ökwödönö pjaati̧ kabatibö lȩebakobe ökwödönö, ökwödönö söbebö loenanö baibanö, —jö̧ba̧lö yöa̧linobe Josuema.

²¹ Yöa̧li̧awö̧, israel jojodöma tjatadinobe, —Ökwödöma Isabenö Jo̧nö kadatibökakwedösa, jwaikwöda Isabenö Jo̧nö ösödö dö̧jakwedösa, —jö̧ba̧lö.

²² Tjatadökwe, —Ökwödöda yökawaduwaja̧ a̧ja̧kwö waisadöja, Isabenö Jo̧nö kwösödaduwobö omudawö kwujunaduwaja̧ma, –Wei̧ kadatibitjö̧ma lȩebobö jo̧be, –jö̧ba̧lö, jö̧tö? —jö̧ba̧lö yöa̧linobe Josuema. Yöa̧la̧wö, —Jau, yöda̧laja̧ a̧ja̧kwö waisadösa, —jö̧ba̧lö tjatadinobe.

²³ Tjatadökwe, Josue yöa̧linobe, —Isabenö Jo̧nö kwösödaduwobö omudawö kwujunaduwitjö̧ma, ju'wedö tjösödawö̧ o̧'wo jawa kwö̧'da̧deduwinö ja̧dönö ikwö loköbaduwo. Ja̧danö, jwaikwöda Isabenö Jo̧ israel jojodö duluwo̧ Diosnöda kwösödaduwobö kwisakwaduwo, jo̧ba wei̧da a̧ja̧kwö, —jö̧ba̧lö.

²⁴ Yöa̧lawö̧, israel jojodöma Josuenö yötja̧linobe, —Jau, Duluwo̧ Isabenö Jo̧ Diosnöda dösödakwedösa, ja̧danö jo̧ba wei̧da a̧ja̧kwö dö̧jakwedösa, —jö̧ba̧lö.

²⁵ Jejenö yötja̧lökwe, Josuema jobe Siquen comunidadtjö israel jojodökwö Dioskwö yöbawö junawa wȩyukwöja i̧wȩyudinobe, isabenö bakwo̧nökwena ja̧bö tjö̧jakwa̧ wȩyukwöjama. Ja̧danö, okobe jwiinö Dios jojodönö wei̧ jawa kwiyalu'yenö i̧wȩyudinobe, israel jojodö a̧ja̧kwö tjö̧jo jö̧ta̧li̧ weawa jawama.

²⁶ Okobe jwiinö ja̧ weawa jawama, Josuema kwiyalu'yenö i̧wȩyudinobe, —Bi'yema Duluwo̧ Dios wei̧ wȩyukwa'ye, —jö̧ba̧lö. Ja̧danö, ju'wibi jobe Isabenö Jo̧ eju badeibösowi Encina töwi ö'öbönö, Josuema inawa nöawa möakwö a̧la̧pedö ujuninobe.

²⁷ Jejenö a̧la̧pedö junö, Josuema jojodönö yöawinobe, —Chömöledö, biwa inawama, okobe jwiinö yöbawö dujunaja̧ma a̧ja̧kwajabe ichejekwa, Isabenö Jo̧ yöawaja̧ wenebi, datadaja̧ wenebi. Jo̧kwajabetjö̧ baikwö wanedö yötawa, ökwödöma otiwanö da̧ja̧kwakwedösa jö̧ba̧lö yöka̧laduwajayonö, sulabenö kwuluwo̧duwi Dios wei̧ kakatibaduwitjö̧ma, biwa inabama i̧sȩkwadanö ja̧kobe, –Bidö israel jojodöma yöbawö tjujunina kabatibö, wainö sulabenö ja̧badö, —jö̧ba̧lö.

²⁸ Jobekwö yöawinobe Josuema israel jojodönö, ja̧danö yöbawajo̧, webö loinobe okobe deinö tjitebokwena tjȩwa̧jobö.

Josue ö'wö baibina jawa

²⁹ Ja̧danö, ja̧ jawa baledaja̧ ikenama, ja'yubenö lekwajabetjö̧ Isabenö Jo̧ ömöayo̧ Josuema ö'wö baibinobe. Jwiinö pöe ö'wö baibinobe Josuema, ciento diez o̧biya juna̧lo̧ ö'wö baibinobe.

³⁰ Ja̧danö ö'wö babibajo̧nö tjo̧tji̧nobe, iteda itebo comunidad Timnat Seratjö, iteda itebo baibanö israel jojodö Josuenö tjiyinemi nijinö. Ja̧ Timnat Sera comunidadma, Efrain niji mösa'iju jȩmi comunidad, Gaas mösa'otjö u'dakwöchobe.

³¹ Josue ina 'yabalo̧ ö̧jayi, ja̧danö ju'wedö israel jojodötjö luwedö Josue ö̧jinena ju̧kwadö ina 'yaba̧ladö tjö̧jayi, israel jojodöma otiwanö Isabenö Jo̧ wei̧ a̧ja̧kwö tjö̧jinobe. Jobadö luwedöma idöda tjöbajalenö tjedinobe okobe jwiinö Isabenö Jo̧ israel jojodönö pjaatina jawama, ja̧danö jobadö ina 'yatja̧layi, tjömöayedö israel jojodöma otiwanö Diosnö ösödö tjö̧jinobe.

Tja'dömine Jose iwe'iju tjo̧tji̧na jawa

³² Ja̧danö, tja'dömine Jose iwe'iju, Egipto nijitjö tjichejebina iwe'ijuma, Siquen comunidadtjö tjo̧tjinobe. Ja̧ Josenö tjo̧tjinemima, damötjö̧ Jacob Siquen mikwo̧ abedo Jamor mikwo̧tjö midö eminemi. Jacobma cien balada ö̧pibiya imidinobe Jamornö, iteda itea niji baibanö emobö, ja̧danö ja̧ nijima Jose itji̧mu tupadanö jojodö tjitea niji baibinobe.

Tjö'da̧de pjabato̧ Eleazar ö'wö baibina jawa

³³ Ja̧danö, Aaron itji̧ Eleazar mikwo̧bi ö'wö baibinobe, ja̧danö jo̧banö tjo̧tjinobe iteda itji̧ Fines itebo comunidad Guibeatjö. Ja̧ Efrain niji mösa'iju jȩmi comunidad Guibeama, Fines mikwo̧nö tjiyinemi, iteda itebo baibanö.