Josué 23 - Dios Iwene

Josue bajaleapo jojodönö yöawina jawa

¹ Ajayinö nöinö tjöpöjojodökwö ölakwabikwawö tjö̧jinajayonö, Isabenö Jo̧ma otiwanö pjaatinobe israel jojodönö, wene jwiinö tjitebonö tjö̧jobö, ja̧danö pjaatobetjö̧ tjöpöjojodötjö bakwo̧kwöbi ölakwabikwawökönö tjö̧jinobe. Jejenö lekwe möle baledajadö, Josuema jwiinö pöe jwöachinobe.

² Ja̧danö, pöe babibajo̧, Josuema israel jojodötjö luwedönö jwöinobe, bakwasokwena luwedönöbi, lȩekwa luwedönöbi, ju'wedö luwedönöbi, ö̧jobekwö tjichobö. Ja̧danö, ichajadönö yöawinobe Josuema: —Chömöledö, ötjöma ida̧ökö jwiinö pöesa, ja̧danö ö'wö batibakwa̧ma ida̧ökö yö̧neawachibobe.

³ Ökwödöma kwuluwo̧duwi Isabenö Jo̧ Dios kwöpöjojodönö ujuluwina edinadöja chömöledö, ajayinö kwiteboduwinö ji̧nadönö. Jau chömöledö, ökwödönö ösödö, kwuluwo̧duwi Isabenö Jo̧ Diosda kwöpöjojodönö juluwinama, jo̧bada kwöpöjojodönö ölakwabikwawinama, ökwödönö pjabatö.

⁴ Ja̧danö, Diosma okobe jwiinö Canaan niji ökwödönö iyobe, okobe jwiinö Jordan ojwetjö, jawo̧ meajobekwö bajalenö jwaibalawabe ichibanö niji ökwödönö iyobe, kwiteboduwi baibanö. Ja̧danö, jejenö iyobetjö̧, okobe jwiinö ja̧ niji 'da̧batö junö, ökwödö bakwasokwena jojodönö 'da̧batö junö wetijatö, bakwasokwena kwiteboduwi baibanö, ida̧ökö dujuluwinemi nijibi, ina dujuluwokobe nijibi.

^5-6 Ja̧danö, baikwö yötawaduwakwö, Dios wei̧ a̧ja̧kwö kwö̧jaduwitjö̧ma, isabenö pjaatakwo̧ kwuluwo̧duwi Isabenö Jo̧ Diosma. Jau chömöledö, ina dujuluwinokobe nijibe kwi̧'yaduwobö baibenama, ajayi pjaatinadanö pjaatakobe kwuluwo̧duwi Isabenö Jo̧ Diosma chömöledö, kwabönöduwi 'ya̧nö, jobadönö a'dewö loakobe, ja̧danö damötjö̧ yöbawö ujuninadanö, tjiteboinemi nijima, ökwödöda kwujuna̧laduwakwedöja chömöledö. Jau chömöledö, Dios wei̧ a̧ja̧kwö kwö̧jaduwitjö̧ma, isabenö jejenö pjaatakwo̧, jo̧kwajabetjö̧ teada̧lönö kwö̧jaduwo, okobe jwiinö Dios wei̧, Moises i̧wȩyudina jawa ja̧bö kwö̧jaduwakobetjö̧. Jelobekwö jalachibökönö, jwaikwöda Dios wei̧ jawa a̧ja̧kwö kwö̧jaduwo chömöledö.

⁷ —Ja'yubebi bemi canaan niji ju̧kwadökwö pjabacha̧lö kwö̧jaduwoko chömöledö, ja̧danö ja'yubebi tjösödawö̧ Diosbedö jö̧ba̧lö tjomukwatawö̧nö kwösödaduwoko. Jau chömöledö, ja'yubebi tjösödawö̧nö kwösödaduwoko, tjimibiyabi yöba̧lökönaduwi, ja̧danö tjiminö yöbawö junökönaduwi, ja̧danö wetji̧ a̧ja̧kwökönaduwi, ja̧danö jobadönö bȩbachibö ösödökönaduwi.

⁸ Jwaikwöda Kwuluwo̧ Isabenö Jo̧ Diosnöda ösödö, 'diinö kwö̧jaduwo, babe mölȩ baibanö 'diinö ja̧nö kwösödaduwi̧danö.

⁹ —Jau chömöledö, kwöwaisaduwa, Isabenö Jo̧ma ju'wedö tjitebo jojodönö, inesö juluwadönöbi kwöba a'oduwitjö a'dewö loinobe, jö̧tö? Isabenö jobadötjö bakwo̧bi kwöba a'oduwitjö ö̧jobe jwiinobe, Isabenö Jo̧ otiwanö ökwödönö pjaatinobetjö̧.

¹⁰ Jau chömöledö, iteda yöbawö ujuninadanö, kwuluwo̧duwi Isabenö Jo̧ Diosda döpöjojodönö ölakwabikwawobetjö̧, ökwödö israel jojodötjö bakwo̧da döpöjojodö milbedönö a'dewö loena. Jau, isabenö juluwadöja chömöledö, Diosda ökwödönö pjaatobetjö̧.

¹¹ Jo̧kwajabetjö teada̧lönö kwö̧jaduwo chömöledö, jwaikwöda kwuluwo̧duwi Isabenö Jo̧ Diosnö ösödö kwö̧jaduwakobetjö̧.

¹² Jau chömöledö, isabenö Diosnö ösödö kwö̧jaduwobö jo̧be, baikwö yötawaduwakwö: Diosnö ösödö kwö̧jaduwi kabatibö, bemi nijinö ji̧nadötjö ji̧bajadökwö bakibaduwitjö̧ma, jobadötjö kwilekwamu batjibanö kwemaduwitjö̧ma, isabenö kwö̧jaduwima waekwakobe chömöledö.

¹³ Jejenö kakatibaduwiökwe, kwuluwo̧duwi Isabenö Jo̧ Diosma pjaatökakobe chömöledö, kwöpöjojodöduwinö a'dewö loböma, ja̧danö jobadöma 'daliwadanö tjö̧jakwedö ökwödönöma, nöinö usula kwemaduwakobetjö̧. Jau chömöledö, bemi niji ajayinö ji̧nadökwö bakibaduwitjö̧ma, wanedö yötawa: jobadöma kwakwaakwawadanö batjibakwedö ökwödönö, ja̧danö sȩakadanö batjibakwedö, kwöbajaleduwi tjewawadö bakibaduwanö. Jejenö baleditjö̧ma, kwiteboduwitjö okobe deinö debö kwi̧'yaduwakwedöja chömöledö. Jau chömöledö, Kwuluwo̧duwi Isabenö Jo̧ma isabenö inesö otiwemi niji iyinobe ökwödönö, kwiteboduwi baibanö, jo̧kwaijayonö jo̧banö kabatibö bemi niji ju̧kwadökwö bakibaduwitjö̧ma, jwiinö kwöwaekwaduwakwedöja.

¹⁴ —Okobe deinö bö̧je jojodö debö tji̧'yidanö, ötjöbi juluwanö ö'wö batibakwo̧sa chömöledö, ja̧danö ö'wö batibakwa̧ abönö yötawaduwakwö chömöledö. Ökwödöma okobe deinö waisadöja chömöledö, kwomajadeduwinöbi, kwo̧'woduwinöbi isabenö waisadöja chömöledö, baikwö: Okobe jwiinö kwuluwo̧duwi Isabenö Jo̧ Dios ökwödönö yöbawö ujuninama, badekwachinö baibanö pjaatajabe, jö̧ba̧lö waisadöja, jö̧tö? Jau chömöledö, okobe jwiinö yöbawö ujunina jawatjö, bakwöta jawabi waekwinokobe, okobe jwiinö kwö̧'da̧deduwitjö badekwachinö otidajabe.

¹⁵ Ja̧danö baikwö yötawaduwakwö chömöledö, otiwa jawa ökwödönö pjaatakwa̧ yöbawö ujunina jawama, okobe jwiinö yöawinadanö badekwachajabe, jö̧tö? Ja̧danö, ju'wibi yötawaduwakwö chömöledö, sule otiwanö pjaatakwa̧ wenedama yöawinokobe chömöledö, wei̧ a̧ja̧kwökönö kwö̧jaduwitjö̧ma, lȩebakwa̧ wenebi yöawinobe chömöledö, ja̧danö a̧ja̧kwökönö kwö̧jaduwitjö̧ma, ja̧ lȩebakwa̧ yöawinabi badekwachinö lȩebakwo̧ Isabenö Jo̧ma chömöledö. Jau chömöledö, a̧ja̧kwökönö kwö̧jaduwitjö̧ma, okobe jwiinö Isabenö Jo̧ lȩebakwa̧ yöbawö ujunina jawabi badekwachinö lȩebakwo̧, jwiinö ökwödönö söbebö loenanö baibanö. Jau chömöledö, kwuluwo̧duwi Isabenö Jo̧ Diosma bemi inesö otiwemi nijima kwiteboduwi baibanö iyajabe, jo̧kwaijayonö a̧ja̧kwökönö kwö̧jaduwitjö̧ma, isabenö yöbawö ujunina badekwachinö, jwiinö ökwödönö söbebö loakwo̧.

¹⁶ —Kwuluwo̧duwi Isabenö Jo̧ Diosma iteda wei̧ ökwödönö weinobe chömöledö, wei̧ a̧ja̧kwö kwö̧jaduwobö chömöledö, ja̧danö ja̧ wei̧ a̧ja̧kwökönö, ju'wedö tjösödawö̧nö ösödö, jobadönö bȩbachibö kwösödaduwitjö̧ma, Isabenö Jo̧ma jwiinö ödameakwakobe ökwödönö chömöledö. Ja̧danö, jejenö ökwödönö ödameakwitjö̧ma, jwiinö ökwödönö lȩebakobe chömöledö, ja̧danö okobe deinö ökwödönö a'dewö loakobe bemi inesö otiwemi ökwödönö iyinemi kwiteboduwitjö, —jö̧ba̧lö yöawinobe Josuema, israel jojodönö.