Josué 22 - Dios Iwene

Rubensaso jojodöbi, Gadsaso jojodöbi, Manasessaso ja'ö jojodöbi tjitebobe tjȩwa̧jina jawa

¹ Jemi ikenama, Josue jwöinobe ju'wedö tjömöledö israel jojodönö pjabatö ichinadönö, Rubensaso ömadöbi, Gadsaso ömadöbi, Manasessaso ja'ö ömadöbi, ö̧jobekwö tjichobö,

² ja̧danö ichajadönö yöawinobe baikwö: —Chömöledö, Isabenö Jo̧ ömöayo̧bina Moises ökwödönö weinama, isabenö okobe jwiinö badekwachinö ja̧bö kakataduwajabe. Ja̧danö, okobe jwiinö ötjö wetinabi, otiwanö a̧ja̧kwö ja̧köbinaduwobe, weti̧ öpöjödökönö.

³ Ju'wedö kwömöledö israel jojodönö otiwanö pjakataduwajabe, jobadönö le'dedibökönö, lekwe möle otiwanö kabatibökönö tjöpöjojodönö tjujuluwobö pjakataduwajabe. Jau, teada̧lönö omukwatö kwö̧jaduwajabe, otiwanö kwuluwo̧duwi Isabenö Jo̧ Dios wei̧danö ja̧bö kwö̧jaduwakobetjö̧, otiwanö.

⁴ Ja̧danö, babe baikwö yötawaduwakwö, babema iteda yöbawö ujunina badekwachinö, kwuluwo̧duwi Isabenö Jo̧ Diosma kwömöledöduwi ju'wedö israel jojodönöbi otiwanö iyajabe, wene jwiinö tjitebokwena otiwanö tjö̧jobö. Jo̧kwajabetjö̧, babema otiwanö kwejuduwibe kwȩwa̧jaduwobö badekwachajabe, ökwödö kwiteboduwibe, Jordan ojwe bakwachödö Moises ökwödönö iyina kwiteboduwibe.

⁵ Ja̧danö, kwiteboduwibe kwȩwa̧jaduwenama, ö'wiyakwawönö omukwatö kwö̧jaduwo, jwaikwöda Isabenö Jo̧ ömöayo̧bina Moises ökwödönö webö ö̧ba̧ja̧dinadanö ja̧bö kwö̧jaduwakobetjö̧. Jau chömöledö, Moises weinadanö, jwaikwöda kwuluwo̧duwi Isabenö Jo̧ Diosnö ösödö kwö̧jaduwo, jwaikwöda okobe jwiinö jo̧ba ösödi̧danö ja̧bö kwö̧jaduwo, okobe jwiinö jo̧ba wei̧ a̧ja̧kwö kwö̧jaduwo. Isabenö Jo̧nö ösödö, 'diinö kwö̧jaduwo, ja̧danö wamenöbi, okwanöbi jwaikwöda jo̧banöda ösödö kwö̧jaduwo, wei̧ a̧ja̧kwö, —jö̧ba̧lö weinobe Josuema, Rubensaso jojodönöbi, Gadsaso jojodönöbi, Manasessaso ja'ö jojodönöbi.

⁶ Jejenö webö, Josuema Diosnö aebinobe jobadönö, ja̧danö Jordan bakwachödö tjitebobe tjȩwa̧jobö weinobe, ja̧danö weawö̧, tjejukwena tjȩwa̧jinobe.

⁷ Manasessaso jojodö tjitebo jawa labebö loawama, baikwö laebobe: Manasessaso ja'ö jojodönö, Moisesma Basan niji iyinobe Jordan ojwetjö jawo̧ laebobekwö nijima. Ja̧danö, ju'wedö Manasessaso ja'ö jojodönö, Josuema Jordantjö jawo̧ meajobekwö tjitebo baibanö iyinobe, ju'wedö israel jojodönö iyina niji ö'öbönö. Ja̧danö, Josue Manasassaso ja'ö jojodönöbi, Rubensaso jojodönöbi, Gadsaso jojodönöbi tjȩwa̧jobö weakwa̧ abönö, Diosnö aebinobe jobadönö,

⁸ ja̧danö jobadönö weinobe, —Babe kwejuduwibe kwȩwa̧ja̧duwobö jo̧be. Bai ökwödökwö ja̧nö, döpöjojodökwö ölakwabikwawöma, nöinö kwiteaduwi otiwanö kwemaduwajabe, kwa̧jwi̧muduwi ba̧jȩkwadönöbi, nöinö platabi, orobi, broncebi, 'dii jawabi, ja̧danö ju'wibi nöinö kamisibi otiwanö döpöjojodötjö 'dökebaduwajabe. Ja̧ e'ewö kwȩwa̧jaduwo kwiteboduwibe, ja̧danö ȩwa̧jadö, kwemaduwaja̧ma ju'wedö kwömöledönöbi kwiyaduwo, okobe deinö otiwanö kwujuna̧laduwobö, —jö̧ba̧lö weinobe Josuema.

⁹ Weawö̧, Rubensaso jojodöbi, Gadsaso jojodöbi, Manasessaso ja'ö jojodöbi tjitebobe tjewa̧jinobe. Ju'wedö tjömöledö israel jojodö canaan niji comunidad Silonö tjö̧jele labebö, idöda tjitebo Galaad nijibe tjewa̧jinobe, Isabenö Jo̧ Moisesnötjö̧ idöda tjitebo baibanö iyina nijibe.

Rubensaso jojodöbi, Gadsaso jojodöbi Manasessaso ja'ö jojodöbi Diosnö iyawöte tjotidina wene

¹⁰ Ja̧danö, tjitebobe ȩwa̧jö, Rubensaso jojodöbi, Gadsaso jojodöbi Manasessaso ja'ö jojodöbi Jordan ojwe ö'öbö nijibe tjichibinobe, Guelilot comunidadbe. Ja̧danö, jobe ichibajadö, Diosnö iyawöte mesasöte nööte tjotidinobe, jobe Jordan ojwe pjeanö. Ikenama, iyawöte otidajadö, tjitebobe tjewa̧jinobe.

¹¹ Jejenö iyawöte tjotidiawö̧, ju'wedö israel jojodöma tja̧ja̧kwinobe, —Rubensaso jojodöbi, Gadsaso jojodöbi, Manasessaso ja'ö jojodöbi Jordan ojwe ö'öbö, jawo̧ meajobekwöchobe Diosnö iyawöte tjotidinobe, —jö̧ba̧lö.

¹² Jejenö a̧ja̧kwö, ju'wedö israel jojodöma tjödameakwinobe jobadödönö, Dios weököte iyawöte sulabenö tjotidajabe jö̧ba̧lö. Jo̧kwajabetjö̧ okobe deinö Jordan ojwetjö jawo̧ meajobekwö ju̧kwadö israel jojodöma Silo comunidadtjö tjo̧ko̧kwachinobe, Rubensaso jojodönöbi Gadsaso jojodönöbi Manasessaso ja'ö jojodönöbi tjölakwabikwawobö.

¹³ Ja̧danö, tjölakwabikwawobö tji̧'yakwa̧ abönö, inesö Diostjö jojodötjö tjö̧'da̧de pjabato̧ Eleazar itji̧, tjö̧'da̧de pjabato̧ Fines mikwo̧nö wetjinobe, tjitebo Galaad nijibe 'ya̧nö, jobadö Rubensasobi, Gadsasobi, Manasessaso ja'öbi jojodökwö yöa̧lakwawobö.

¹⁴ Ja̧danö, jo̧ba Fineskwö ju'wedönöbi wetjinobe, israel luwedötjö ju'wedönöma. Jobe Silotjö domulataja jawasaso tjö̧jinobe, ja̧danö bakwasokwena luwo̧ bakwo̧nö wetjinobe, iteda ömöledötjö la'aka luwo̧ bakwo̧nö.

¹⁵ Jejenö weawö̧, Galaad nijibe tjichibinobe, ja̧danö Rubensasobi, Gadsasobi, Manasessaso ja'öbi jojodökwö ko̧ko̧kwö yötjawinobe, baikwö:

¹⁶ —Okobe deinö ju'wedö Isabenö Jo̧ ömöledö Israel jojodöma baikwö adebaduwakwö, –Tajawedö sulabenö ökwödö israel jojodö dösödökwe Isabenö Jo̧ Dios wei̧ sulabenö kakatibinaduwa̧da? Bakwötetjöda jo̧banö diyobö weijayonö, tajawedö jelöte weököte sulabenö kwotidaduwinada? Jejenö ökwödö kwiyaduwakwöte otidö, sulabenö Isabenö Jo̧ wei̧ öpöjödadöja dömöledö.

¹⁷ Kwömukwataduwökiji Peor nijitjö baledinama? Jobetjö ökwödö israel jojodötjö ju'wedöma sulebenö ja̧tjinobetjö̧, yȩdekwijatö, jwiinö yȩdekwijatö, ja̧danö jejenö yȩdekwiökwe, Isabenö Jo̧ma inesö labi̧ dö'wöchi̧ jawa weinobe, ökwödö jo̧ba ömöledötjö ba̧jȩkwadö ö'wö badibenanö. Ja̧danö, jejenö ba̧jȩkwadö ja̧tjö ö'wö badibinajayonö, ina ja̧ inesö dusulachibinama ökwödönö samobe, ja̧tjö didichawökenanö baibanö. Ja̧ baledina omukwatökönö,

¹⁸ babe Isabenö Jo̧ wei̧ kakatibaduwobö kwomukwataduwiji̧? Jejenö ja̧köbaduwa dömöledö! Jejenö babe ökwödö sulabenö Isabenö Jo̧ wei̧ kakatibaduwitjö̧ma, ödameakwakobe, babe ökwödöda sulabenö ja̧köbaduwiökwe, itekwai okobe deinö ökwödö israel jojodönö ödameakwakobe.

¹⁹ —Kwomukwataduwena, kwiteboduwi Galaad nijima suli̧ jȩmi, Isabenö Jo̧nö otiwanö ösödakwawa jwiemi jö̧ba̧lö. Jejenö kwiteboduwima suli̧ jȩmi jö̧ba̧lö kwomukwataduwitjö̧ma, Jordan ojwe pebibö, Isabenö Jo̧ eju ji̧ nijinö ökwödö dö̧'da̧de kwö̧jaduwo, jadanö ditea nijitjö emö, kwiteboduwi baibanö jobe kwö̧jaduwo. Jejenö kwösödaduwitjö̧ma, a̧'delökönö dö̧'da̧de kwö̧jaduwobö dösödakobe. Ökwödö israel jojodö dösödökwe Isabenö Jo̧ Diosnö iyawötema, bakwöteda, jo̧kwajabetjö̧ adebaduwakwö, Isabenö Jo̧ wei̧ kakatibaduwoko, ja̧danö ökwödö ju'wedö israel jojodönöbi kwöpöjödaduwoko. Jau dömöledö, Dios weökötetjö sulabenö kwiyaduwobö kwotidaduwitjö̧ma, Duluwo̧ Isabenö Jo̧ wei̧bi, ökwödönöbi sulabenö kakatibaduwena.

²⁰ —Zera itji̧ Acan sulabenö ja̧ina kwomukwataduwo dömöledö, Okobe jwiinö Jerico jawa Dios iteada baibanö 'da̧batö tjujunobö weijayonö, Acanma sulabenö iteda ujuna̧lobö eminobe, ja̧danö jejenö emiökwe Dios lȩebinobe, jö̧tö? Jejenö lȩebenama, sule Acannöda lȩebinaji̧? Jo̧banödamaökö, ja̧danö jo̧bada sulabenö ja̧ijayonö, okobe deinö israel jojodönö ödameakwinobe Diosma, ja̧danö ökwödötjö ju'wedöbi jo̧bakwö debö tji̧'yinobe. Ja̧ wene omukwatö, sulabenö ja̧köbaduwi̧ kakatibaduwo dömöledö, sulabenö ja̧köbaduwiökwe okobe deinö ökwödö israel jojodönö Dios lȩebapji jö̧ba̧lö, —Finesbi ju'wedöbi yötjawinobe.

²¹ Jejenö yötjawiawö̧, Rubensasobi, Gadsasobi, Manasessaso ja'ö jojodöbi tjatadinobe, ju'wedö bakwasokwena jojojodötjö luwedönö:

²² —Isabenö Jo̧ Diosma, okobe deinö tjösödawö̧tjö inesö juluwo̧ma, ja̧danö jo̧ba Isabenö Jo̧ Diosma domukwatina waiso̧, –Sulabenö omukwatö iyawöte dotidijökötö, –jö̧ba̧lö. Ja̧danö, jo̧ba öwaisi̧danö ökwödöbi kwöwaisaduwobö, baikwö labebö lobö yödawaduwakwö israel jojodö jelesokwena jojodönö: Isabenö Jo̧ wei̧ a̧ja̧kwökönö dotidinatjö̧bi, jo̧banö kabatibö dotidinatjö̧bi, babe möle isabenö ökwödönö kwabö loköbaduwobö jȩna,

²³ –Isabenö Jo̧nö kabatibö jelöte sulabenö otidadö, –jö̧ba̧lö. Ja̧danö jöte wamenö jwiinö ubinö iyawa diyitjö̧bi, trigoso̧pja iyawa diyitjö̧bi, Dioskwö ösökwö ja̧kwawa iyawa diyitjö̧bi, Isabenö Jo̧ma isabenö ökwödönö lȩebobö jȩna, sulabenö iyawa jawa wei̧ da̧ja̧kwokobetjö̧.

²⁴ Jo̧kwaijayonö ja̧maökö dömöledö, jötetjö Diosnö diyoböma la'akatjöda dotidijökötö dömöledö. Baikwö labebö lobö yödawa: Yedabijatö, ju'winö kwitji̧muduwi tupadanö jojodöma ökwödö ditji̧mu tupadanö jojodönö öpöjödö yötja̧lena, –Ojwe bakwachödö jojodököbaduwobetjö̧, ökwödötjöböködöja, Isabenö Jo̧ israel tjuluwo Dios ömöayedöböködöja.

²⁵ Isabenö Jo̧ma dö'wejenö Jordan ojwe lo̧bö ujuninobetjö̧, Isabenö Jo̧nö kwösödaduwobö jwibadöja, sule Jordan ojwetjö jawo̧ meajobekwö ju̧kwadöda Isabenö Jo̧nö tjösödobö jö̧ba̧ladöma, –jö̧ba̧lö yötja̧lena jö̧ba̧lö yedabijatö.

²⁶ —Jejenö omukwatö yöda̧lakwawijatö, ja̧danö yöba̧lakwawö jö̧da̧lijatö, –Diosnö iyawöte dotidaduwo, –jö̧ba̧lö. Jo̧kwaijayonö jötetjö jwiinö ubinö iyawabi, ju'wi iyawabi diyobömaökö dömöledö, la'akatjöda.

²⁷ Jau dömöledö, sule i̧sȩkwa baibotö jö̧ba̧lö dotidijatö, jöte edö, ökwödöbi, ditji̧mu tupadanö jojodöbi tjomukwatobö, –Isabenö bidöbi bakwainö Diosnö ösödadö, ju'wedö tjiyi̧danö, bidöbi Isabenö Jo̧ öba a'otjö jwiinö ubinö iyawabi, trigoso̧pja iyawabi, Dioskwö ösökwö ja̧kwawa iyawabi bakwainö iyadö, –jö̧ba̧lö. Tupakwö kwitjimuduwi ditji̧munö, –Isabenö Jo̧nö kwösödaduwobö jwibadöja, –jö̧ba̧lö yötja̧lapji jö̧ba̧lö, jöte dotidijatö.

²⁸ Jau dömöledö, domukwatijatö, ju'winö ökwödönöbi, ditji̧mu tupadanö jojodönöbi jejenö yötja̧litjö̧ma, dotidinöte i̧sȩbö datadena, –Isabenö Jo̧nö dösödöbö jo̧be. Ökwödödanö bakwaibedösa, edaduwi da'dödö tjotidinötema, bakwainö Isabenö Jo̧nö iyawötedanö tjotidinöte, isabenö ökwödödanö bakwainö Isabenö Jo̧nö dösödobö jo̧be, –jö̧ba̧lö datadena. Jau dömöledö, jötetjö iyawa kwabö juwö diyoböma la'akatjöda dotidijökötö, sule bakwainö Dios ömöledö dö̧ji̧ wene di̧sȩbo jö̧ba̧lö dotidijatö.

²⁹ —Jau dömöledö, la'akatjöda Isabenö Jo̧ wei̧ kadatibobö omukwatöködösa, la'akatjöda jelöte Dios weinökötetjö ubinö iyawabi, ju'wi iyawabi diyoböma omukwatöködösa. Sule duluwo̧ Isabenö Jo̧ Diosnö iyawöte, iteda eju badeibö jö̧tetjöda diyobö omukwatadösa, diyobö weinadanö, —jö̧ba̧lö tjatadinobe jelesokwena jojodötjö luwedönöbi, tjö̧'da̧de pjabato̧ Finesnöbi.

³⁰ Tjatadiawö̧, Diostjö jojodötjö tjö̧'da̧de pjabato̧ Finesbi, israel jojodötjö bakwasokwena luwedöbi a̧ja̧kwö tjösödinobe, Rubensasobi, Gadsasobi, Manasessasobi jojodö yötja̧li̧ma, —Isabenö bidöma Dios wei̧ kabatiböködö, —jö̧ba̧lö.

³¹ Ja̧danö yötja̧li̧ ösödö, Finesma jobadönö atadinobe, —Babe möle öwawinö edö döwaisobe, Isabenö Jo̧ma isabenö dö̧'da̧denö jo̧ jö̧ba̧lö, ja̧danö döwaisa, ökwödöma Isabenö Jo̧ wei̧ kabatiböködöja jö̧ba̧lö. Ja̧danö ajayinö, –Sulabenö ja̧tji̧ökwe, Isabenö Jo̧ma okobe deinö ökwödönö lȩebakwo̧, –jö̧ba̧lö yedabinajayonö, babe do̧'wo ösöwanö dö̧jobe, –lȩebökena, —jö̧ba̧lö atadinobe Finesma.

³² Ikenama, tjö̧'da̧de pjabato̧ Finesbi, ju'wedö israel jojodötjö luwedöbi, Rubensasobi, Gadsasobi jojodökwö ko̧ko̧kwö kabatajadö, Galaad nijitjö tjȩwa̧jinobe Canaan nijibe, ju'wedö israel jojodö tjö̧jobekwö, ja̧danö yötja̧lakwawaja̧ wene yötjawinobe.

³³ Yötjawi̧ a̧ja̧kwö, tjösödinobe ju'wedö israel jojodöma, ja̧danö Diosnö ösödö atjebinobe, otiwa jö̧ba̧lö. Ja̧danö, ajayinö Rubensasobi, Gadsasobi jojodö tjitebobe 'ya̧nö, ölakwabikwawö söbebö lotjobö ajayinö yötja̧lakwawinajayonö, jemi tupakwö yötja̧lakwawinokobe tjölakwabikwawoböma, —Jobadöbi Dios öba a'otjö wene jwibadö, —jö̧ba̧lö.

³⁴ Ja̧danö, Rubensaso jojodöbi, Gadsaso jojodöbi tjotidinöte mesasöte tjimidinobe, —I̧sekwöte, —jö̧ba̧lö. Yötja̧linobe, —Jötema bakwachödö ju̧kwadö israel jojodönöbi, bakwachödö ju̧kwadö israel jojodönöbi i̧sȩkwöte, Isabenö Jo̧da Diosma, —jö̧ba̧lö, jo̧kwajabetjö —I̧sekwöte, —jö̧ba̧lö tjimidinobe.