Josué 20 - Dios Iwene

Tjöeba̧lakwawa jawa comunidad 'da̧batö tjujunina jawa

¹ Jemi ikenama, Isabenö Jo̧ma Josuenö weinobe:

² —Josue, Israel jojodönö weköbo ötjö weti̧ma, baikwö: –Isabenö Jo̧ma ökwödönö yöawobe, Damötjö̧ Moisesnötjö̧ yötawijatö ökwödönö, comunidad 'da̧batö kwujunaduwobö, tjöeba̧lakwawa jawa comunidad baibanö, ja̧danö babe ja̧ 'da̧batö kwujunaduwobö badekwachajabe.

³ Jau, ja̧ comunidadbiya 'da̧batö kwujunaduwo, ökwödötjö bakwo̧ sulabenö omukwatökönö, kwabö lootö jö̧ba̧lö isakwökönö a̧dekwanö ömöledöso̧ ö'wö baibinö ja̧itjö̧ma, jobekwö döibajobö. Ja̧danö, ja̧ comunidadbiyama tjöeba̧lakwawa comunidad ja̧kobe, ö'wö babibajo̧ ömöledöso̧ balekwa mikwa kwabö lobo̧ma jo̧banö kwabö loapji jö̧ba̧lö.

⁴ Bakwo̧ jejenö kwabö lootö jö̧ba̧lö isakwökönö ömöledöso̧ ö'wö baibinö ja̧itjö̧ma, 'da̧batö kwujunaduwaja̧ comunidadbiyatjö ju'wi comunidadbe döibajobö ja̧kobe, ja̧danö ja̧ comunidad a'o ja̧nö, baledaja̧ wene labebö lobö yöawobö ja̧kobe, ja̧ comunidad luwedönö. Ja̧danö, yöawaja̧ a̧ja̧kwö, isabenö sulabenö omukwatököjayonö baibajabe jö̧ba̧lö tjösöditjö̧ma, comunidad tetjatobö ja̧kobe. Ja̧danö jobe tjö̧'da̧de ö̧jobö tjiyakobe, ja̧danö jobadökwö lekwe ö̧jakobe.

⁵ Ja̧danö, ömöledöso̧ ö'wö baibobö ja̧iökwe, balekwa mikwa kwabö lobo̧ jo̧banö luitjö̧ma, tjötjeba̧lobö ja̧kobe, kwabö loobö webökönö. Sulabenö omukwatökönö, ö'wö baibakwo̧nö öpöjödökönö, kwabö lootö jö̧ba̧lö isakwökönö ö'wö baibinobetjö̧, tjötjeba̧lobö ja̧kobe.

⁶ Ja̧danö, ömöledöso̧ ö'wö baibobö ja̧binama ja̧ comunidadnö ö̧jobö ja̧kobe, lȩekwa luwedö tjöba a'o ö̧jenanö baibanö. Ja̧danö, tjöba a'o ö̧ji̧awö̧, sulabenö omukwatököjayonö a̧dekwanö baledinobe jö̧ba̧lö lȩekwa yötjawitjö̧ma, jemi tupakwö i̧ya̧da comunidadnö ö̧jobö ja̧kobe, ja̧ möle inesö Diostjö jojodötjö tjö̧'da̧de pjabato̧ma ö̧'wö baibenanö kabatö. Ikenama, wene jwiinö itebobe ȩwa̧jena, ajayi itebo wene baibinemima, —jö̧ba̧lö Josue israel jojodönö yöawobö weinobe Isabenö Jo̧ma.

⁷ Jejenö yöawawö̧, bi̧ya comunidadbiya 'da̧batö tjujuninobe, tjöeba̧lakwawa comunidad baibanö: Galilea niji comunidad Cedes 'da̧batö tjujuninobe, tjöeba̧lakwawa comunidad baibanö. Cedesma, Neftalisaso jojodö tjitebo comunidad, mösa'iju jȩmi comunidad. Ju'wibi Siquen comunidad 'da̧batö tjujuninobe. Siquenma Efrainsaso niji mösa'iju jȩmi comunidad. Ju'wibi Quiriat Arba ju'wi imi Hebron comunidad 'da̧batö tjujuninobe. Hebronma Judasaso niji mösa'iju jȩmi comunidad. Jejenö Jordan ojwetjö jawo̧ meajobekwö wapötakwa comunidad 'da̧batö tjujuninobe, tjöeba̧lakwawa comunidad baibanö.

⁸ Ja̧danö bakwachödö Jericotjö jawo̧ laebobekwötjöbi wapötakwa comunidad 'da̧batö tjujuninobe, bi̧ya: Beser comunidad, Rubensaso niji, jojodö deobe ba̧ba̧lawobe ji̧ comunidadma. Ja̧danö ju'wibi, Gadsaso niji comunidad Ramot de Galaadbi 'da̧batö tjujuninobe. Ja̧danö ju'wibi Manasessaso niji comunidad, Golan de Basan 'da̧batö tjujuninobe. Ja̧ wapötakwa comunidadbi tjöeba̧lakwawa comunidad baibanö 'da̧batö tjujuninobe.

⁹ Ja̧ comunidadbiya 'da̧batö tjuninobe, bakwo̧ suli̧ öwaedotö jö̧ba̧lö omukwatökönö jelo̧nö ö'wö baibobö ja̧enama, jobekwö döibajobö, israel jojodöbi, jelobetjö ichajadö tjö̧'da̧de ju̧kwadöbi. Jejenö dötjibajobö 'da̧batö tjujuninobe, balekwa mikwa kwabö lobo̧ jobadönö kwabö loapji jö̧ba̧lö, lȩekwa luwedö tjöba a'o tjö̧jenanö kabatö.