Josué 2 - Dios Iwene

Rajab mikwuju israel jojodönö pjajatina jawa

¹ Jemi ikenama, Josuema du̧ju̧taja ömadönö weinobe, tjabakwemi Sitintjö labebö, canaan niji ju̧kwadö wajwitjonö, niji edö kwetjachobö. Jobadönö webö yöa̧linobe: —Canaan niji edö kwebachaduwi, ja̧danö inesö kwedaduwobö chösödi̧ma, Jerico comunidad, —jö̧ba̧lö weinobe. Weawö̧, edö tji̧'yinobe, ja̧danö Jerico comunidad tebachö, bakwuju jilekwamuböködökwö 'da̧'da̧bakwawö ju̧ju̧ Rajab mikwuju jejube tetjachinobe, jobe tjö̧jobö.

² Ja̧danö, jobe niji jojodödanö tjichejekwotö jö̧ba̧lö ja̧tji̧najayonö, ju'wedöma Jerico comunidad la'aka luwo̧nö yötjawinobe, —Duluwo̧, israel jojodötjö ju'wedöma babe yö̧te ditebo comunidad tetjachajabeta, ditebo niji tjedotö jö̧ba̧lö ichajadöma, —jö̧ba̧lö.

³ Yötjawökwe, Jerico la'aka luwo̧ma ömöayedönö weinobe Rajab jejube edö tji̧'yobö, —Idö kweju tebachajadönö labebidönö, jobadöma ditebo tjedotö jö̧ba̧lö tjichajobetjö̧, —jö̧ba̧lö Rajabnö wetjobö.

^4-6 La'aka luwo̧ ömöayedö jejube tjichibakwa̧ abönö, Rajabma israel jojodönö tojö jujuninobe, ichibö tjöbadekwapji jö̧ba̧lö. Jobadö israel jojodönö öbibö mö jönöchinobe, jeju mö tju̧ju̧kwawobö. Jobe jeju mö, lino ochiju jököködobö jujuna̧linobe, ja̧danö ja̧ ochijukwö mö jönöchebajawö̧nö tjöwawökönö jumuchebinobe. Jemi ikenama, luwo̧ ömöayedö ichibö, labebidönö jö̧ba̧lö wetjioko, atadö omöna yöja̧linobe, —Isabenö chejube tjichatö, jo̧kwaijayonö jobadönö wajwitatö, israel jojodöda jö̧ba̧löma. Jobadöma ida̧ökö latjebajabeta, yi̧bena jenanö, comunidad apjude tjutumatakwa̧ abönö latjebajabeta. Wajwita ötjöma jobadö tji̧'yajabema, jo̧kwaijayonö juluwanö lubö kwi̧'yaduwitjö̧ma isabenö jobadönö kwöbadekwajaduwena, babeda latjebajabeta, —jö̧ba̧lö jatadinobe.

⁷ Jejenö omöna yöja̧liawö̧, israel jojojodönö isakwadöma juluwanö lubö latjebinobe, ja̧danö isakwö tji̧'yinobe, Jordan ojwe le'da̧kwobe peibakwawemibe tjichibenanö kabatö. Ja̧danö, latjebaja̧ ikena, apjude teada̧ladöma juluwanö comunidad apjude tjutumatinobe.

⁸ Ja̧danö, ja̧ yöte tjabakwa̧ abönö, Rajabma jönöchinobe jeju mö, israel jojodökwö yöja̧lakwawobö.

⁹ Ja̧danö, jobadönö yöja̧linobe, —Chöwaisa, Isabenö Jo̧ma ditebo nijima juluwanö ökwödö israel jojodönö iyakobe, jö̧ba̧lö. Isabenö okobe deinö chitebo jojodöma yebabinö tjö̧bawö tjö̧jobe kwöbaduwi a'otjö, jwiinö yedabobetjö̧.

¹⁰ Jau, ökwödöma Isabenö Jo̧ ökwödönö pjaatina wene da̧ja̧kwajabetija. Egipto nijitjö lakebaduwenama, Isabenö Jo̧ Dios jwaibalawa Mar Rojo ötjabawa köködö loina wene da̧ja̧kwijatö, kököemibenö otiwanö kwöbaledaduwobö. Ja̧danö ju'wibi, Jordan mikwödö jawo̧ laebobekwö kwichibaduwena, du̧ju̧taja amorreo la'aka luwedönö Sijon mikwo̧nöbi, Og mikwo̧nöbi kwujuluwinaduwa wene da̧ja̧kwijatö. Jau, jobadönöbi, okobe deinö tjömöledönöbi bakwo̧bi ö̧jibökönö jwiinö söbebö loköbinaduwa wene da̧ja̧kwijatö.

¹¹ Ja̧danö, jejenö da̧ja̧kwobetjö̧, jwiinö yedaibijatö, dujulu ja'yubebi jwienanö baibanö. Jo̧kwajabetjö̧ yebabinö ja̧nö, babema ökwödökwö dölakwabikwawoböma jwibadösa, kwuluwo̧duwi Isabenö Jo̧ Diosma isabenö juluwo̧ jö̧ba̧lö döwaisobetjö̧. Jau, Kwuluwo̧duwi Isabenö Jo̧ Diosma, mölejȩtjöbi, bö̧jetjöbi okobe jwiinö juluwo̧, jo̧kwajabetjö̧ jwiinö yedabobe ökwödönö.

¹² Ja̧danö, ökwödönö dösölö̧jinö pjatatobetjö̧, balekwa mikwa ötjönöbi dösölö̧jinö pjakataduwobö atebaduwakwö. Jau, ökwödönö kwö̧jibaduwinö pjatatajabetjö̧, balekwa mikwa ötjönöbi, yö̧ne chömöledönöbi dö̧jibinö pjakataduwobö chösöda. Isabenö pjakataduwakwa̧ yöbawö junö, –Omöna yöda̧litjö̧ma Isabenö Jo̧ Dios ökwödönö lȩebobö jo̧be, –jö̧ba̧lö pjakataduwakwa̧ wene yöbawö kwujunaduwobö atebaduwakwö.

¹³ Jau, isabenö debö di̧'yapji jö̧ba̧lö, chabe'donöbi, chojo'donöbi, chö̧ja̧wo̧dö yadönöbi ömadönöbi, ja̧danö jobadö yöne tjö̧möledönöbi tjö̧jibinö pjakataduwakwa̧ wene yöbawö kwujunaduwobö ateba, —jö̧ba̧lö balekwa mikwa pjatjatobö ajebinobe Rajabma.

¹⁴ Ajebawö̧, —Jau, otiwa. Isabenö yöbawö dujunakwö, kwö̧jibaduwinö pjadatökötjö̧ma, Dios ökwödönö kwabö loobö ja̧kobe. Isabenö ökwödönö pjabatö, döpöjojodö ökwödönö tjöbadekwajokobö yökawökötjö̧ma, isabenö ökwönö pjadatakwedösa. Jau Rajab, Isabenö Jo̧ kwitebo niji ökwödö ditebo baibanö iyenama, yöbawö dujunaja̧ wene omukwatö isabenö dösölö̧jinö pjadatakwedösa, —jö̧ba̧lö tjatadinobe ömadöma.

¹⁵ Rajab jeju o̧do̧ma ji̧nobe comunidad tjöekwemi yöne pöali̧nö, ja̧danö jejutjö ventanasa'doma a̧petukwöchobe ji̧nobe. Jo̧kwajabetjö̧, yötja̧lakwawaja̧ ikenama, Rajabma jobadönö ventanasa'donö jwijatinobe a̧la̧chi'bonö.

¹⁶ Ja̧danö, jobadönö jwijatenama, yöja̧linobe: —Ökwödöma mösa'ijube ju̧kwawö kwi̧'yaduwo, ökwödönö isakwadö tjöbadekwapji jö̧ba̧lö, ja̧danö jobe wapötakwa möle baledibanö ju̧kwawö teada̧laduwi. Ikenama, ökwödönö isakwadö tjȩwa̧jaja̧ ikenama, wene jwiinö kwȩwa̧jaduwena kwömöledö tju̧ju̧kwobekwö, —jö̧ba̧lö yöja̧linobe.

¹⁷ Ja̧danö omadöma Rajabnö yötja̧linobe, —Baikwö yödawakwö kwö̧jibaduwobö ja̧köbaduwakwa̧ma, ja̧danö jwaikwöda yödawi̧danö ja̧köbobö jo̧be, debö kwi̧'yaduwapji jö̧ba̧lö. Yödawi̧ a̧ja̧kwökönö wainö ja̧bö debö kwi̧'yaduwitjö̧ma, pjadatobö jwiena, ja̧danö pjadatakobe jö̧da̧lijayonö, wene jwiinö dö̧jena, kwa̧ja̧kwokobetjö̧.

¹⁸ Baikwö wedaduwakwö, baikwö kwitebo jojodönö dujuluwobö dichenama, bi'bo duwa'bo kwöno, a̧petukwöchobe öwawinö dedobö. Ja̧danö, okobe deinö yöne kwömöledönö ko̧ko̧dö kweju okwa tebatö bakobe kwö̧jaduwo, kwabe'dobi, kwojo'dobi, kwöjawo̧döbi, ju'wedö yöne kwömöledöbi.

¹⁹ Kweju okwatjö labebökönö kwö̧jaduwo, baikwö yöda̧la, bakwo̧ kwejutjö labebö, comunidad mananö ja̧nö debö i̧'yitjö̧ma, jo̧bada jawa, ökwödö jawamaökö, kwejutjö laebajobetjö, ja̧danö wene jwiinö dö̧jena. Jo̧kwaijayonö ökwökwö kweju okwa ju̧kwadötjö bakwo̧nöbi dömöledö israel jojodö kwabö lotjitjö̧ma, ja̧ma ökwödö jawaakobe, ja̧danö Dios ökwödönö lȩebobö ja̧kobe.

²⁰ Jo̧kwaijayonö ökwödö dö̧ji̧ ju'wedönö yökawitjö̧ma, yöbawö dujunaja̧ma mikwawökakobe. Jau Rajab, isabenö pjadatakwa̧ wene yöbawö dujunobö weköbajabe, ja̧danö weköbaja̧danö yöbawö dujunajabe, jo̧kwaijayonö döpöjojodönö pjabatö ökwödönö yökawitjö̧ma, yöbawö dujunaja̧ wenema söbebö loköbena, ja̧danö ökwödönö kwabö lodijayonö, wene jwiinö dö̧jakwedösa, —jö̧ba̧lö yötjawinobe Rajabnö.

²¹ Yötjawoko, —Jau, otiwa, yökawaduwaja̧danö ja̧tocha. Otiwanö da̧jaduwi, —jö̧ba̧lö jatadinobe. Ikenama latjebinobe, ja̧danö Rajabma duwa'bo di̧batö jö̧ninobe ventanasa'donö, wetjaja̧danö.

²² Jobadö ömadöma jobetjö labebö, mösa'ijube tji̧'yinobe, ja̧danö jobe wapötakwa möle baledibanö teada̧lö tjö̧jinobe, jobadönö isakwadö tjȩwa̧jenanö kabatö. Ja̧danö jobadö isakwadö, nöinö okobe jwiinö Jericobe 'ya̧kwawamabenö tjisakwijayonö, tjöbadekwajinokobe, jo̧kwajabetjö̧ bajaliyanö tjȩwa̧jinobe.

²³ Jemi ikenama ömadö Josue weinawö̧ma tjȩwa̧jinobe. Mösa'ijutjö yutubajö, Jordan mikwödö pebibö Josue ö̧jobekwö tjichibinobe, ja̧danö ichibajadö, okobe jwiinö baledaja̧ wene yötjawinobe.

²⁴ Ja̧danö Josuenö yötjawinobe, —Isabenö Jo̧ Diosma isabenö canaan niji demobö iyajabe, jobe ju̧kwadöma isabenö tjö̧bawö yetjabobe ökwödönö, —jö̧ba̧lö Josuenö yötjawinobe.