Josué 18 - Dios Iwene

Ju'wedö israel jojodötjö bakwasokwena jojodö tjitebo baibanö 'da̧batö wetjina jawa

¹ Jemi ikenama, Canaan niji juluwajadö, okobe deinö israel jojodöma Silo comunidadtjö tjo̧ko̧ko̧kwinobe, ja̧danö jobetjö Dios eju tjujuninobe.

² Ja̧danö, israel jojodötjö ju'wedö ida̧ökö tjitebo tjujuna̧lijayonö, ina jelemutjö dosolataja jojodöma ina tjitebo niji jwibadö tjö̧jinobe, ina 'da̧batö wetjokobetjö̧.

³ Ina tjitebo niji jwitjiökwe, Josuema israel jojodö jobe ko̧ko̧kwadönö yöawinobe, baikwö: —Chömöledö, ökwödöma lekwe mölȩ teada̧ladöja, Dios iyina niji emökönö. Duluwo, da'dödö tjösödinökwe Isabenö Jo̧ Diosma isabenö otiwanö iyinobe ökwödönö, kwiteboduwi baibanö kwemaduwoböma, kwiteada̧lobö jwiobe chömöledö.

⁴ Jo̧kwajabetjö̧ baikwö wetaduwakwö chömöledö: Ökwödö ina kwiteboduwi jwibadöma, ömadönö 'da̧batö kwujunaduwo, niji kwebachö tjedobö. Bakwasokwena, ömadö wamedukwanö omudawö kwujunaduwo, ju'wedö tjiminö kwebachö tjedakwedönö. Ikenama jobadöma okobe jwiinö canaan niji edö kwetjachakobe, ja̧danö kwebachajadö, niji tjedaja̧ wȩyudö tjödobö ja̧kobe, –Bejenö 'da̧batö junö, ditebokwena dujuna̧lobö jo̧be, –jö̧ba̧lö.

⁵ Kwöwaisaduwa, judasaso jojodöma ida̧ö̧kö̧ a̧li̧kwöchobe tjitebo tjujuna̧lobe, ja̧danö Jose itji̧mu bakwasokwena jojodöma ida̧ökö u'dakwöchobe tjujuna̧lobe, jö̧tö? Jo̧kwajabetjö̧ ji̧baja̧ niji jelemutjö dötölataja tjitebokwena baibanö, wȩyudö tjödobö ja̧kobe, ökwödö jelemutjö dosolataja jojodö kwiteboduwi kwujuna̧laduwakobetjö̧, —jö̧ba̧lö.

⁶ Tupakwö weinobe Josuema, niji tedakwedönöma: —Nijima jelemutjö dötölata tjitebokwena baibanö kwi̧wȩyudaduwo, ja̧danö ösöjanö jweinö kwi̧wȩyudaduwo, ja̧ niji okwa ji̧ma, wajuwanö laebobö. Ikenama, ja̧ wȩyudajadö, baikwö chöba a'okwö kwichejebaduwo. Ikenama, ötjöma Duluwo̧ Isabenö Jo̧ Dios öba a'otjö inawiya jabö chedocha, Diosda bakwasokwena jojodö tjitebokwena baibanö tjemakwa̧ niji i̧sȩbakobetjö̧.

⁷ Jau chömöledö, kwöwaisaduwa, levitasaso jojodöma tjitebo baibanö tjemökakwedö, Dios jobadönö iyi̧ma wainö ji̧obetjö̧. Jobadönö iyi̧ma, Isabenö Jo̧tjö, tjömöledö israel jojodötjö tjö̧'da̧de pjabatadö tjö̧jobö, ja̧danö ja̧tjö tju̧kwa tjujuna̧lobö, jo̧kwajabetjö̧ jobadöma niji tjemökakwedö. Ja̧danö Gadsaso jojodöbi, Rubensaso jojodöbi, Manasessaso ja'ö jojodöbi, ida̧ökö Jordan ojwetjö jawo̧ laebobekwö tjitebo niji juna̧ladö, Isabenö Jo̧ ömöayo̧bina Moises jobadönö weinama, jö̧tö? Jo̧kwajabetjö̧, ökwödö jelemutjö̧ dosolataja jojodö ina kwiteboduwi kwemaduwobö jo̧be, jo̧kwajabetjö̧ niji edö kwekachaduwo, ökwödöbi kwiteboduwikwena kwujuna̧laduwakobetjö̧, —jö̧ba̧lö weinobe Josuema.

⁸ Weawö̧, bakwasokwena jojodöma kwebachö tjedakwedönö omudawö tjujuninobe. Ja̧danö, kwebachö latjebakwedönö, Josue weinobe: —Okobe jwiinö niji kwebachö kwedaduwo, ja̧danö kwedaduwaja̧ otiwanö kwi̧wȩyudaduwo, nijima baikwö baikwö jo̧be jö̧ba̧lö. Ikenama okobe jwiinö wȩyudajadö, tjekachajaduwo baikwö chö̧jobekwö, ja̧danö bai Silotjö, Isabenö Jo̧ öba a'otjö inawiya nijakwö jabö chedocha, diso jojodö di̧ya niji tjemakwojobö jö̧ba̧lö, —weinobe Josuema.

⁹ Weawö̧, jobadö ömadöma okobe jwiinö niji kwebachö tjedinobe, ja̧danö tjedaja̧ ösöjanö tjödinobe. Wȩyudö, tjedaja̧ niji 'da̧batö tjujuninobe, jelemutjö dötölataja tjitebokwena baibanö, ja̧danö tjitebokwena comunidadbiya imi tji̧wȩyudinobe, jelobe bi̧ya comunidadbiya jo̧be, jelobe bi̧ya comunidadbiya jo̧be, jö̧ba̧lö. Ikenama, wȩyudö kabatajadö, tjebachajö Josue öba a'o tjichibinobe, Silo comunidadbe.

¹⁰ Jejenö tjichibiökwe, Josuema jobe Silo comunidadtjö, Isabenö Jo̧ öba a'otjö inawiya jabö edinobe, diso jojodö di̧ya niji tjemakwojobö jö̧ba̧lö Dios i̧sȩbakobetjö̧. Jejenö jobe Silo comunidadtjö Josuema israel jojodötjö bakwasokwena jojodönö tjitebo baibanö weinobe, okobe deinö israel jojodötjö bakwasokwena jojodöma tjitebokwena otiwanö juna̧ladö batjibanö.

Benjaminsaso jojodö tjitebo baibanö niji 'da̧batö weina jawa

¹¹ Josue inawiya jabö edenama, ajayinö Benjaminsaso jojodönö weobö badekwachinobe. Ja̧danö, ju'wibi laebinobe, benjaminsaso jojodö tjitebo nijima, juda nijitjöbi, Jose itjimu tupadanösaso tjitebo nijitjöbi 'da̧de nijima tjiteboakobe, jö̧ba̧lö.

¹² Baikwö laebobe, benjamin niji wȩyukwöjama: U'dakwö tjitebo bakwachobema, Jordan ojwetjö jamatobe, ja̧danö jobetjö Jerico comunidad u'dakwöchobe dötewobe, jawo̧ meajobekwö, mösa'iju jȩmi nijibenö, Bet Aven comunidad tupakwö, jojodö deobe ichibenanö.

¹³ Ja̧danö jobetjö tjitebo bakwachobema a̧likwö dötewobe, Luz comunidad, ju'wi imi Betel comunidad ö'öbö mösa'obe ichibanö. Ja̧danö jobetjö tjitebo bakwachobema a̧li̧kwö dötewobe, Atarot Adar comunidadbe ichibanö. Ja̧ comunidadma, mösa'o la'aka Bet Joron comunidadtjö a̧likwösa'o mösa'onö jo̧be.

¹⁴ Ja̧danö, jobetjö, a̧li̧kwö bajalenö dötewobe benjamin niji bakwachobema juda niji comunidad Quiriat Baal, ju'wi imi Quiriat Yearin comunidadbe ichibanö. Jobekwö laebobe benjamin niji jawo̧ meajobekwö bakwachobe wȩyukwöjama.

¹⁵ Ja̧danö benjamin niji a̧li̧kwöchobe bakwachobe wȩyukwöjama, baikwö laebobe. Quiriat Yearin ö'öbötjö, jawo̧ laebobekwö bajalenö dötewobe, ojwese'do Neftoaj mikwe'dobe ichibanö.

¹⁶ Ja̧danö jobetjö Ben Hinon wabeko badeibö mösa'o, ju'wibi Refayin wabeko u'dakwöchobesa'o ö'öbönö dötewobe benjamin niji bakwachobema, ja̧danö tupakwö Hinon wabeko ö'wejenö dötewobe, Jebus comunidad mösa'o a̧li̧kwöchobenö, Enroguel comunidadbe ichibanö.

¹⁷ Ja̧danö Enrogueltjö, u'dakwöchobe bajalenö dötewobe benjamin niji bakwachobema, Ensemes comunidadbe ichibanö, ja̧danö jobetjö Adumim mösa'o nöchakwawemi badeibö comunidad Guelilotbe ichibanö. Ja̧danö jobetjö inesö nöawa, Rubenmine itji̧ Bohan iminö tji̧midinawa ichibanö dötewobe benjamin niji bakwachobema.

¹⁸ Ja̧danö jobetjö tupakwö Bet Araba comunidadtjö u'dakwöchobenö baledobe, ja̧danö jobetjö nijakwö bajalenö Jordan ojwe wabekobe ichibanö dötewobe.

¹⁹ Jobetjö Bet Jogla comunidadtjö u'dakwöchobenö baledobe, Mar Muerto ötjabawa bajale, Jordan ojwe 'dalapebe ichibenanö kabatö. Jobekwö laebobe benjamin niji a̧likwöchobe bakwachobe wȩyukwöjama.

²⁰ Ja̧danö, Benjamin niji jawo̧ laebobekwö bakwachobema, Jordan ojweda. Jobekwö laebobe benjamin niji bakwachobe wȩyukwöjama, ja̧danö okobe jwiinö ja̧ okwa nijima, Dios tja'dödönö, —Chiyocha, —jö̧ba̧lö tja'dödönö yöbawö ujunina jawa badekwachinö, jejenö 'da̧batö wetjinobe, Benjaminmine itji̧mu tupadanö jojodö bakwasokwena tjitebo baibanö.

²¹ Ja̧danö, benjamin niji comunidad imibiyama, baikwö laebobe, Jerico comunidadbi, Bet Jogla comunidadbi, Emec comunidadbi, Casis comunidadbi,

²² Bet Araba comunidadbi, Zemarayin comunidadbi, Betel comunidadbi,

²³ Avin comunidadbi, Para comunidadbi, Ofra comunidadbi,

²⁴ Quefar Amoni comunidadbi, Ofni comunidadbi, Gueba comunidadbi. Ja̧ a̧linösamutjö dötölataja comunidadbi, ö'öbö pjei̧ comunidadteniabi, benjamin niji comunidad ji̧nobe.

²⁵ Ja̧danö ju'wi comunidadbi benjamin niji comunidad ji̧nobe, bi̧ya: Gabaon comunidadbi, Rama comunidadbi, Berot comunidadbi,

²⁶ Mizpa comunidadbi, Cafira comunidadbi, Moza comunidadbi,

²⁷ Requen comunidadbi, Irpel comunidadbi, Tarala comunidadbi,

²⁸ Zela comunidadbi, Elef comunidadbi, Jebes, ju'wi imi Jerusalen comunidadbi, Guibea comunidadbi, Quiriat comunidadbi. Ja̧ a̧limusamutjö ö'wejemu jawa comunidadbiyabi, ö'öbö pjei̧ comunidadteniabi benjamin niji comunidad ji̧nobe. Jobekwö laebobe Benjamin itji̧mu tupadanö jojodö tjitebo baibanö niji 'da̧batö wetjinama. Damötjö Dios chiyocha jö̧ba̧lö tja'dödönö yöbawö ujunina wene badekwachinö, jejenö Dios wei̧danö 'da̧batö wetjinobe.