Josué 17 - Dios Iwene

Manasessaso ja'ö jojodönö niji 'da̧batö tjiyina jawa

¹ Ja̧danö, Jose itji̧ Efrainsaso jojodönö niji wetjinadanö, Jose itji̧ abönö pöe Manasessaso jojodönöbi niji wetjinobe, baikwö: Manases itji̧ abönö pöe, Galaad abe'do Maquir mikwo̧ itji̧mu tupadanösaso jojodönö wetjinobe, Galaad nijibi, Basan nijibi. Jobadö Maquir itji̧mu tupadanö jojodöma inesö ölakwabikwawadö tjö̧jobetjö̧, ja̧ niji jobadönö wetjinobe.

² Ja̧danö ju'wedö Manases itji̧mu tupadanösasokwena jojodönöbi tjitebo baibanö wetjinobe. Manases itji̧mu tupadanösasokwena luwedö ömadöma, bidö: Abiezer mikwo̧bi, Jelek mikwo̧bi, Asriel mikwo̧bi, Siquen mikwo̧be, Hefer mikwo̧bi, Semida mikwo̧bi.

³ Ja̧danö, Hefer itji̧ Zelofejad mikwo̧ i̧tji̧mu ömadöma deinobe, i̧tji̧mu ya̧dönöda 'yaebinobe Zelofejad mikwo̧ma, ja̧danö itji̧mu ya̧döma, bidö: Majla mikwujubi, Noa mikwujubi, Jogla mikwujubi, Milca mikwujubi, Tirsa mikwujubi.

⁴ Jobadöma Diostjö jojodötjö tjö̧'da̧de pjabato̧ Eleazar mikwo̧bi, Josuebi, ju'wedö luwedöbi tjöba a'o ichibö yötja̧linobe, —Isabenö Jo̧ma Moisesnö weinobe, ju'wedö dömöledö ömadönö niji wei̧danö, ökwödönöbi ditebo baibanö weobö, jo̧kwajabetjö̧ ökwödönö adeba, Dios wei̧danö badekwachinö ditebo baibanö weköbaduwobö, —jö̧ba̧lö. Jo̧kwajabetjö̧, ajayinö Isabenö Jo̧ weinadanö, tjömöledö ömadönö niji wetji̧danö, jobadö Zelofejad itji̧mu ya̧dönöbi tjitebo baibanö niji wetjinobe.

^5-6 Ja̧danö, Manases itji̧mu tupadanö jojodötjö ya̧dönöbi tjitebo baibanö jejenö wetjinobetjö̧, Jordan ojwetjö jawo̧ meajobekwö domulataja jawa baibanö niji 'da̧batö wetjinobe Manasessaso jojodönö. Jejenö jawo̧ meajobekwö domulataja jawa baibanö niji 'da̧batö wetjinobe. Ja̧danö jawo̧ laebobekwö ju'wedö Manasessaso ja'ö jojodö tjitebo baibanö dötölataja jawa baibanö 'da̧batö wetjinobe, Galaad nijibi, Basan nijibi.

⁷ Manases niji bakwachobema baikwö laebobe: Asersaso ö'öbötjö Sequem comunidadtjö jawo̧ laebobekwö comunidad Micmetat baibanö dötewobe. Ja̧danö Micmetattjö a̧likwö En Tapuaj comunidad jojodö tjitebo niji baibanö.

⁸ Ja̧ comunidad niji labebö loawa jawa baikwö laebobe, Tapuaj nijima, Manasessaso jojodö tjitebo niji ji̧nobe, jo̧kwaijayonö Tapuaj comunidadma Efrainsaso jojodö tjitebo comunidad ji̧nobe. Ja̧ comunidad Manases niji okwa ji̧jayonö, Efrainsaso jojodö tjitebo comunidad ji̧nobe.

⁹ Ja̧danö, Manases niji bakwachobema, Tapuajtjö Cana ojwe ichibanö ji̧nobe, ja̧danö jemi tupakwö jwaibalawabe ichibanö, ja̧ ojweda Manases niji bakwachobe ji̧nobe. Manases nijitjö ojwe bakwachödö comunidadteniama, Efrain niji comunidad ji̧nobe.

¹⁰ Bakwachödö Manases niji ji̧nobe, ja̧danö bakwachödö, Efrain niji ji̧nobe. Ja̧wo̧ meajobekwö, jwaibalawada Manases niji bakwachobema ji̧nobe, ja̧danö jakwölakwö Asersaso tjitebo niji bakwachobema Manases niji bakwachobema ji̧nobe, ja̧danö jawo̧ laebobekwö Isacarsaso tjitebo niji bakwachobema, Manasessaso niji bakwachobe ji̧nobe.

¹¹ Ja̧danö, Aser niji okwabi, Isacar niji okwabi, Manases jojodöma tjitebo comunidad tjujuna̧linobe, Betsean comunidadbi, Ibleam comunidadbi, Dor comunidad ju'wi imi Nafot comunidadbi, Endor comunidadbi, Tanac comunidadbi, Meguido comunidadbi. Ja̧ comunidadbiyabi, ö'öbö pjei̧ comunidadbi̧yabi, jeleso niji okwa ji̧najayonö, Manases jojodö tjitebo comunidad ji̧nobe.

¹² Ja̧ comunidadtenia Manasessaso jojodö tjitebo baibanö wetjinajayonö, ina lekwe möle Cananeo jojodöda jobe tjö̧jinobe. Manasessaso jojodöma jobadö jobe ajayinö ji̧nadönö tjujuluwobö jwitjinobe ajayinöma, jo̧kwajabetjö̧ Cananeo jojodöda jobe tjö̧jinobe.

¹³ Jemi tupakwö, israel jojojodö juluwadö batjibenama, jobadö Cananeo jojodönö tjujuluwinobe, jo̧kwaijayonö tjujuluwijayonö, jobetjö a'dewö lotjinokobe. Jwaikwöda jobetjö a'dewö lotjobö ji̧najayonö, a'dewö lobökönö, tjö̧möayedö batjibanö wetjinobe, ja̧danö tjömöayedö ja̧nö, labinö tjotidobö wetjinobe.

Jose itji̧mu tupadanö jojodö Josuenö atjebina jawa

¹⁴ Ja̧danö, Jose Itji̧mu tupadanö jojodö Efrain jojodöbi, Manases jojodöbi Josuenö yötja̧linobe, —Duluwo̧ Josue, Ökwödöma isabenö bajȩkwadösa, Duluwo̧ Isabenö Jo̧ otiwanö ökwödönö pjaatinobetjö̧, ba̧jȩkwadösa ökwödöma. Jo̧kwaijayonö, dö̧ba̧jekwijayonö, bakwemi ja'yuwemida kwiyajabe. Ajayi kwiyaja̧tjö bajalekwönönö kwiyobö adebakwö, kwiyina nijinö otiwanö dö̧ba̧jekwachokobetjö̧, —jö̧ba̧lö atjebinobe.

¹⁵ Atjebökwe, Josuema jobadönö atadinobe, —Jau, isabenö ba̧jȩkwadöja, ja̧danö kwiteboduwi Efrain niji mösa'iju jȩmi niji jalokobetjö̧, tebobe kwi̧'yaduwo, jobe jubö lobö, kwiteboduwi baibanö kwotidaduwobö. Jau, kwiteboduwi jalokobetjö̧, ferezeo jojodöbi, refaita jojodöbi tjitebobe 'ya̧nö, tebo juköbaduwo, jobe kwöjaduwobö, —jö̧ba̧lö atadinobe Josuema.

¹⁶ Atadawö̧, Efrainsaso jojodöbi, Manasessaso jojodöbi tjatadinobe, —Mösa'iju jȩmi nijinö dö̧ba̧jekwachököjayonö, ba̧ba̧lawobe ju̧kwadö cananeo jojodönö dujuluwoböma juluwöködösa. Jobadöma kolukiyanö ölakwabikwawadö, 'dii̧ jawatjö otikwa kolukiyanö, jo̧kwajabetjö̧ jobadö Betsan comunidad ju̧kwadönöbi, jemi ö'öbö pjei̧ comunidadtenia ju̧kwadönöbi, Jesreel wabekonö ju̧kwadönöbi dujuluwobö juluwöködösa, —jö̧ba̧lö tjatadinobe.

¹⁷ Tjatadökwe, Josuema jobadö Efrainsaso jojodönöbi, Manasessaso jojodönöbi yöawinobe: —Isabenö ba̧jȩkwadöja, ja̧danö juluwadöja. Jo̧kwajabetjö̧ sule bakwemida chiyokobe ökwödönö, ajayinö chiyinakwö,

¹⁸ ju'wibi okobe jwiinö mösa'iju jȩmi niji̧bi chiyaduwakwö. Ja̧danö babe ja̧ niji teboda ji̧jayonö, ökwödöma towibiya jubö loköbaduwakwedöja, jobe kwö̧jaduwobö, ja̧danö okobe jwiinö ja̧ niji kwujuja̧laduwakwedöja. Ja̧danö ju'wibi yötawaduwakwö, Cananeo jojodö jö̧ka̧linaduwawö̧nö̧ isabenö kwujuluwaduwakwedöja. Yö̧ka̧laduwidanö, 'dii̧ jawatjö otikwa kolukiya juna̧ladö, ja̧danö isabenö juluwadö, jo̧kwaijayonö yayonö jobadönö a'dewö loköbaduwakwedöja, —jö̧ba̧lö yöawinobe Josuema.