Josué 16 - Dios Iwene

Efrainsaso jojodönöbi, Manasessaso ja'ö jojodönöbi tjitebo baibanö wetjina jawa

¹ Baikwö laebobe Jose itji̧mu tupadanö jojodönö niji wetjina jawa, Efrainsaso jojodöbi, Manasessaso ja'ö jojodöbi tjitebo baibanö. Jose itji̧mu tupadanö jojodö tjitebo bakwachobema, baikwö jo̧be: Jerico comunidad badeibö, Jordan ojwetjö, Jerico ojwese'dotjö jawo̧ laebobekwö baibanö, ja̧danö jobetjö mösa'iju jȩmi nijibenö, Betel comunidadbe ichibanö.

² Ja̧danö, Beteltjö bakwachobema tupakwö baledobe, Luz comunidadbe ichibanö, ja̧danö jobetjö arquita jojodö tjitebo comunidad Astarotbe ichibanö.

³ Ja̧danö jobetjö, jawo̧ meajobekwö bajalenö jafletitas jojodö tjitebobe ichibanö, mösa'o la'aka Bet Joron comunidadbe ichibanö, ja̧danö jobetjö Guezer comunidadbe ichibanö, ja̧danö jobetjö jwaibalawa Mediterreano ichibanö dötewobe bakwachobema.

⁴ Jobekwö laebobe Jose itji̧mu tupadanö jojodö Manasessaso jojodöbi Efrainsaso jojodöbi tjitebo niji bakwachobema, Dios —Chiyocha, —jö̧a̧lina badekwachinö tjitebo baibanö wetjinama.

⁵ Efrainsaso jojodö tjitebo, tja'dödötjö bakwasokwena tupadanö jojodö tjitebo niji bakwachobema, baikwö laebobe: Tjitebo a̧likwöchobe bakwachobema, jawo̧ laebobekwö ji̧ comunidad Atarot Adartjö, mösa'o wa̧pekwa'o Bet Joron comunidadbe ichibanö ,

⁶ ja̧danö jobetjö jwaibalawa, Mediterreano mikwobube ichibanö dötewobe Efrain niji a̧likwöchobe bakwachobema. Ja̧danö Efrain niji u'dakwöchobe bajalema, Micmetat comunidad. Ja̧danö niji̧ jawo̧ laebobekwö bakwachobema, baikwö laebobe: Micmetattjö jamatö, jawo̧ laebobekwö dötewobe, ikenama Tanat Silo comunidad jo̧bekwö jalachobe, ja̧danö jobetjö tupakwö Janoa comunidadtjö jawo̧ laebobekwöchobe ichibanö.

⁷ Ja̧danö Janoatjö, Atarot comunidadbe ichibanö, ja̧danö jobetjö Nara comunidadbe, ja̧danö jobetjö Jerico comunidadbe ichibanö, ja̧danö jobetjö Jordan ojwe ichibanö kabatö. Jobekwö laebobe Efrain niji jawo̧ laebobekwöchobe bakwachobema.

⁸ Ja̧danö Efrain niji u'dakwöchobekwö bakwachobema, baikwö laebobe. Tapuaj comunidadtjö jamatö, jawo̧ meajobekwö dötewobe, Cana ojwe u'da ichibanö, ja̧danö jemi tupakwö bakwachobema, Cana ojweda, Jwaibalawabe ichibenanö kabatö. Jobekwö laebobe Efrain nijima, Dios —Chiyocha, —jö̧a̧lina badekwachinö Efrainsaso jojodötjö bakwasokwena jojodö tjitebo baibanö wetjinama.

⁹ Ja̧ nijibi, Efrain niji baibanö 'da̧batö wetjinobe, ja̧danö ju'wibi Manasessaso niji okwa, ju'wi comunidadbiyabi, ö'öbö pjei̧ comunidadteniabi 'da̧batö tjujuninobe, Efrainsaso jojodö tjitebo baibanö.

¹⁰ Jobekwö laebobe Efrain niji baibanö 'da̧batö tjujuninama, jo̧kwaijayonö, Efrain jojodöma Guezer comunidadnö ju̧kwadö cananeo jojodönö a'dewö lotjinokobe, jo̧kwajabetjö̧ jobadö cananeo jojodöma ina babe mölebi baibanö, ina Efrain jojodö tjö̧'da̧de tjuju̧kwobe. Ja̧danö, a'dewö lobökönö, Efrain jojodöma cananeo jojodönö wetjinobe, tjömöayedö 'diinö otidadö batjibanö.