Josué 14 - Dios Iwene

Jordan ojwetjö jawo̧ meajobekwö niji tjitebokwena baibanö 'da̧yö tjiyina jawa

¹ Ja̧danö, bakwachödö Moises iyinadanö, Josuebi Diostjö jojodötjö inesö tjö̧'da̧de pjabato̧ Eleazarbi niji 'da̧batö tjiyinobe, bakwasokwena jojodö tjitebo baibanö. Dios chiyocha jö̧a̧lina badekwachinö, Josuebi, Eleazarbi, israel jojodötjö bakwasokwena luwedöbi Canaan niji 'da̧batö tjiyinobe, baikwö:

² Damötjö Isabenö Jo̧ma Moisesnö weinobe, —Niji 'da̧batö kwiyaduwenama, inawiya pjei̧ öwiya nijakwö jabajadö kwedaduwo, diso jojodö di̧ya niji tjemakwojobö, —jö̧ba̧lö. Ja̧danö, jelemutjö ö'wejemusaso, ja̧danö ja̧'ösaso ina tjitebo jwibadönö, Dios weinadanö inawiya pjei̧ öwiya jabö edö 'da̧batö tjiyinobe.

^3-4 Baikwö laebobe jejenö tjiyobö ji̧ labebö loawama: Jose itji̧mu tupadanö jojodöma, bakwasoda tjö̧jinokobe, dosolataja jojodö tjö̧jinobe, Manasessasobi, Efrainsasobi. Jo̧kwajabetjö̧, okobe deinö israel jojodöma, a̧linösamutjö wa̧pösokwa jojodö tjö̧jinobe. Ja̧danö, Jordan ojwe bakwachödötjö, Moisesma ida̧ö̧kö̧ dosolataja jojodönöbi, ja'ösaso jojodönöbi tjitebo baibanö iyinobe. Ja̧danö, tupakwö jelesokwena jojodönö tjiyobö weijayonö, Levisaso jojodönö tjitebo weinokobe, jo̧kwajabetjö̧ Josue 'da̧batö iyenama, jelemutjö ö'wejemusaso jojodönöbi, ja'ösaso jojodönöbi 'da̧batö iyobö ji̧nobe. Ja̧danö, Levisaso tjitebo baibanö tjiyinököjayonö, tjömöledö jelesokwena jojodö tjö̧'da̧de tjö̧jobö tjiyinobe. Ja̧danö jelobekwena comunidad niji Levi jojodö tjitea niji baibanö tjiyinobe, comunidadnö otiwanö tjö̧jobö, ja̧danö comunidad ö'öbö niji tjiyinobe, mejetjö tja̧jwimu otiwanö tjukwobö.

⁵ Isabenö Jo̧ma Moisesnö weinobe, jobekwö canaan niji 'da̧'yö tjiyobö. Ja̧danö, jejenö Moisesnö weinadanö, canaan niji 'da̧'yö junö, bakwasokwena jojodö tjitebo baibanö tjiyinobe.

Caleb itebo baibanö niji tjiyina jawa

⁶ Josue jamatö israel jojodö tjitebo baibanö iyina jawa, baikwö laebobe. Ju'wi möle, Guilgal comunidadtjö, Caleb mikwo̧ma ju'wedö ömöledö judasaso jojodökwö ichibinobe Josue öba a'o, niji atjebobö. Jo̧ba Calebma Jefone mikwo̧ itji̧, ja̧danö quenizita jö̧ba̧lö ötjabökwe. Josue öba a'o ichibö, Calebma Josuenö aebinobe baikwö: —Josue, ökwöma kwöwaisa damötjö Isabenö Jo̧ Dios ötjönöbi, ökwönöbi yöa̧lina, iteda ömöayo̧ Moisesnö yöa̧lina jawama. Jau Josue, ina Cades Barneanö dö̧jayi, Diosma ökwödönö otiwanö yöawinobe.

⁷ Kwöwaisa, damötjö cuarenta o̧biya chujuna̧lenama, Isabenö Jo̧ ömöayo̧ Moisesma ötjönö weinobe, Cades Barneatjö labebö, Dios iyakwa̧ niji edö kwetachobö, ja̧danö kwebachajo̧, chedina wene jweinö yötawijatö. Jau Josue, chomajadenö otiwanö omukwatö, jweinö otiwanö yötawijatö.

⁸ Jo̧kwaijayonö, ju'wedö chömöledö ötjökwö niji edö kwebachadöma, sulabenö jojodö yetjaibanö yötjawinobe, israel jojodö yebabinö Diosnö katjatibi̧ baibanö. Jo̧kwaijayonö, ju'wedö katjatibinajayonö, katatibijökötö ötjöma, jwaikwöda Chuluwo̧ Isabenö Jo̧ Diosnö ösödö, wei̧ cha̧ja̧kwijatö.

⁹ Ja̧danö, jejenö jwaikwöda Diosnö chösödiökwe, ja̧ möle Moisesma otiwa jawa wene yöbawö ujuninobe ötjönö, baikwö: –Caleb, ökwöma jwaikwöda Chuluwo̧ Isabenö Jo̧ Diosnö ösödö kwö̧jobetjö̧, Diosma kwebachö kwedaja̧ nijitjö ökwönö 'da̧batö iyakobe, ökwöbi, kwitji̧mu tupadanö jojodöbi ba̧kwelöjatebö ja̧ niji̧ kwujuna̧laduwakobetjö̧, –jö̧ba̧lö yöbawö ujuninobe Moisesma.

¹⁰ —Ja̧danö, kwöwaisa Josue, Isabenö Jo̧ jö̧a̧linadanö, isabenö otiwanö iteada̧lajabe ötjönö. Ja̧ möle ötjönö yöbawö ujuninelö baikwöma, cuarenta y cinco o̧biya baledibajabe. Jojodö deobe kwebachö, ju'wedö israel jojodö debö tji̧'yinobe, jo̧kwaijayonö jö̧a̧linadanö Isabenö Jo̧ma otiwanö ötjönö pjabatö iteada̧lajabe, ja̧danö ida̧ökö ochenta y cinco o̧biya chujuna̧lijayonö, ina pöe waekwökönö otiwanö chöjobe.

¹¹ Jau Josue, ja̧ möle chujuluwinadanö, ina bakwainö chujuluwobe, otiwanö döpöjojodönö ölakwabikwawö chö̧joböbi, ju'wi mölekwena dö̧ji̧ jawa chotidoböbi.

¹² Jo̧kwajabetjö̧, babe Isabenö Jo̧ jö̧a̧lina badekwachinö chitebo baibanö kwiyobö atebakwö, –Kwekachina niji chiyocha, –jö̧a̧lina nijima. Jau Josue, ja̧ damötjö mö'sa'iju jȩmi niji kwetachinemi kwiyobö atebakwö, Isabenö Jo̧ jö̧a̧lina badekwachinö. Ja̧ niji yötjawina kwa̧ja̧kwijatö Josue, –Inesö ödöbaedö anaquita jojodöma, inesö 'diinö tjöbebö tjotidina comunidadnö tju̧ju̧kwobe, –jö̧ba̧lö. Ja̧danö, isabenö jejenö 'diinö tjöbebö tjö̧jobe, jo̧kwaijayonö chedemi Isabenö Jo̧ma ötjökwö pjabatö ö̧jakobe, ja̧danö damötjö̧ jö̧a̧linadanö, jobadönö jobetjö a'dewö lotocha, chitebo baibanö, —jö̧ba̧lö niji abebö yöa̧linobe Calebma.

¹³ Jejenö aebökwe, Josuema Diosnö aebinobe, Calebnö pjaatobö, ja̧danö Caleb aebaja̧danö iyinobe, —Hebron comunidadma Jefone itji̧ Calebnö wetobe itebo baibanö, Dios Calebnö chiyocha jö̧a̧lina badekwachinö, —jö̧ba̧lö.

¹⁴ Jo̧kwajabetjö̧ Hebron comunidadma Jefone itji̧ Caleb quenizita ötjabökwe itebo comunidad baibinobe, ja̧danö ja̧ möletjö baikwö bajalenö Caleb iteboobe Hebronma. Caleb jwaikwöda israel jojodö tjösödökwe Isabenö Jo̧ Diosnö ösödö ö̧jinobetjö̧, Hebron comunidadma Caleb itebo baibinobe, Dios chiyocha jö̧a̧lina badekwachinö.

¹⁵ Ajayinö Hebron comunidadma ju'wi imi mikwinobe, Quiriat Arba jö̧ba̧lö. Anaquita jojodötjö inesö la'aka luwo̧ ajayinö ji̧nama, Arba mikwo̧ ö̧jinobe, ja̧danö ajayinö Hebronma jo̧ba iminö mikwinobe, Quiriat Arba jö̧ba̧lö. Jobekwö laebobe Josue Caleb itebo iyina jawama, ja̧danö jemi ikenama lekwe möle israel jojodöma wene jwiinö ölakwabikwawökönö tjö̧jinobe canaan nijinö.