Josué 13 - Dios Iwene

Dios Josuenö israel jojodö tjitebo baibanö niji 'da̧batö iyobö weina jawa

¹ Ja̧danö, Josue jwiinö pöe ö̧jena, Isabenö Jo̧ma Josuenö yöa̧linobe, baikwö: —Josue, ökwöma ida̧ökö jwiinö pöeja, ja̧danö ina nöinö niji̧ ji̧bobe, ökwödö israel jojodö kwemaduwoböma.

² Ina kwemaduwobö ji̧bemi niji̧ma, baikwö yöta̧la: Ina okobe jwiinö guesureo jojodö tjitebo niji̧ kwemaduwobö jo̧be, ja̧danö okobe jwiinö filisteo jojodö tjitebo niji̧ kwemaduwobö jo̧be.

^3-4 Jobadö filisteo jojodötjö la'aka luwedöma, Gaza comunidadtjö bakwo̧, Asdod comunidadtjö bakwo̧, Ascalon comunidadtjö bakwo̧, Gat comunidadtjö bakwo̧, Ecron comunidadtjö bakwo̧ tjö̧jobe, okobe deinö bakwamubedö luwedö batjibanö, ja̧danö tjitebo ina kwemaduwobö jo̧be. Jau Josue, okobe jwiinö filisteo jojodö tjitebo, egipto niji ö'öbösödö Sijor mikwödötjö, u'dakwö Ecron comunidad ichibanö niji̧ma, filisteo jojodö jobe tjö̧jijayonö, isabenö canaan nijiobe, ja̧danö kwemaduwobö jo̧be. Ja̧danö, a̧likwö ju̧kwadö aveos jojodö tjitebo niji̧bi ina kwemaduwobö jo̧be. Ju'wibi ina okobe jwiinö cananeo jojodö tjitebo niji kwemaduwobö jo̧be, u'da sidonio jojodö tjitebo comunidad Arajtjö, amoreo jojodö tjitebo ö'öbö comunidad Afecbe ichibanö.

⁵ Ja̧danö okobe jwiinö guiblitas jojodö tjitebo niji̧bi ina kwemaduwobö jo̧be. Ja̧danö Libano niji, jawo̧ laebobekwö niji̧ma ina kwemaduwobö jo̧be, Hermon mösa'o ö'öbö comunidad Baal Gadtjö, Lebo Jamatbe ichibanö.

⁶ Ja̧dano okobe jwiinö sidonio jojodö tjitebo niji, Libanotjö, Misrefot Mayinbe ichibanö niji̧bi ina kwemaduwobö jo̧be. Okobe jwiinö ja̧ yötawaja̧ niji̧ ju̧kwadönö, ötjöda israel jojodö tjöba a'otjö a'dewö lotakwo̧sa Josue, jo̧kwajabetjö̧, ja̧ nijibi israel jojodönö 'da̧batö kwiyobö jo̧be. Jau Josue, ina ja̧ niji̧ kwemaduwököjayonö, ju'wi niji 'da̧batö kwiyenama, ja̧ nijibi 'da̧batö junö israel jojodönö kwiyo, israel jojodö tjitebo baibanö, ötjöda tjemobö pjatatakobetjö̧.

⁷ Ja̧danö, ina tjitebo jwibadö jelemutjö̧ ö'wejemusasobi, Manasessaso ja'öbi, tjitebo baibanö niji 'da̧batö kwiyobö badekwachajabe Josue. Okobe jwiinö ida̧ökö kwemaduwaja̧ nijibi, tupakwö kwemaduwakwa̧ nijibi 'da̧batö kwiyo, bakwasokwena jojodö tjitebo niji̧ tjujuna̧lobö, —jö̧ba̧lö yöa̧linobe Isabenö Jo̧ma, Josuenö.

bakwasokwena jojodönö Moises ajayinö niji 'da̧yö iyina jawa

⁸ Ju'wedö Manasessaso jojodötjö ja'öbi, Rubensaso jojodöbi, Gadsaso jojodöbi ida̧ökö tjitebo tjujuna̧linobe. Jordan ojwe tjöbaledakwa̧ abönö, Isabenö Jo̧ ömöayo̧bina Moisesma ida̧ökö tjitebokwena iyinobe, Jordantjö jawo̧ laebobekwö nijima.

⁹ Ja̧ Moises iyina niji̧ma, bi̧ya: Arnon wabeko ö'öbö comunidad Aroertjö, wabeko ja'ö jȩmi comunidad baibanö nijibi, ja̧danö okobe jwiinö ba̧ba̧lawobe, Medeba comunidadtjö, Dibon comunidadbe baibanö nijibi,

¹⁰ ja̧danö okobe jwiinö amorreo jojodötjö la'aka luwo̧bina, Hesbon comunidadtjö ji̧na Sijon mikwo̧ weina comunidadtenia nijibi, amonitas jojodö tjitebo ö'öbö baibanö niji̧bi iyinobe Moisesma.

¹¹ Ja̧danö Galaad nijibi, ja̧danö okobe jwiinö Guesur jojodö tjitebo nijibi, Maca jojodö tjitebo nijibi, okobe jwiinö Hermon mösa'o nijibi, okobe jwiinö Basan niji, Saleca comunidadbe baibanö nijibi iyinobe Moisesma.

¹² Ja̧danö okobe jwiinö Basan niji la'aka luwo̧bina Og mikwo̧ weina nijibi iyinobe Moisesma. Jo̧ba Ogma inesö ödöbaedö refaitas ötjabawö̧tjö bajaleapo ji̧na, ja̧danö Basan niji la'aka luwo̧ ja̧nö, ju'wikwenama Astarot comunidadtjö, ju'wikwenama Edrey comunidadtjö ömöayedönö weinobe. Moisesma ju'wedö israel jojodökwö Sijon mikwo̧nöbi, Og mikwo̧nöbi ujuluwinobe, ja̧danö jobadönö juluwö, tjömöayedönö kwabawö lobö a'dewo lotjinobe. Ja̧ jobadö ajayinö tjiteboinemima, Moisesma 'da̧batö iyinobe, Rubensaso jojodöbi, Gadsaso jojodöbi, Manasessaso ja'ö jojodöbi tjitebo baibanö.

¹³ Ja̧danö, ja̧ Guesur jojodöbi, Maca jojodöbi tjitebo niji 'da̧batö iyinajayonö, israel jojodöma Guesur jojodönöbi, Maca jojodönöbi a'dewö lotjinokobe, jo̧kwajabetjö̧ jobadö Guesur jojodöbi, Maca jojodöbi ina babebi israel jojodö tjö̧'da̧de tju̧ju̧kwobe, babe mölebi baibanö.

¹⁴ Ja̧danö, ju'wedö bakwasokwena jojodönö tjitebokwena iyijayonö, Levisaso jojodönöda iyinokobe Moisesma, Diosma jobadönö tjitebo niji iyoböma weinokobetjö̧. Damötjö̧ Dios yöawinobe, israel jojodö Isabenö Jo̧ Diosnö tjiyenama, tjiyi̧tjö jobadö Levisaso jojodö tju̧kwa baibanö tjemakobe, jö̧ba̧lö. Ja̧danö, ja̧ israel jojodö tjiyi̧tjö tju̧kwa tjujuna̧lobetjö, tjitebo niji baibanö iyinokobe Moisesma, ju'wedö israel jojodönö niji iyi̧danöma.

¹⁵ Baikwö laebobe Moises bakwasokwena jojodönö iyina jawa: Rubensaso jojodötjö okobe deinö bakwasokwena tjitebo niji baibanö iyinobe, baikwö:

¹⁶ Rubensaso nijima, Arnon wabeko ö'öbö comunidad Aroertjö, wabeko ja'ö comunidadbe baibanö ji̧nobe, ja̧danö okobe jwiinö Medeba comunidad ö'öbö niji ba̧ba̧lawobema,

¹⁷ ja̧danö Hesbon comunidadbi, okobe jwiinö Hesbon jȩna ba̧ba̧lawobe comunidadteniabi. Ja̧ comunidadteniama, baikwö laebobe: Dibon comunidadbi, Bamot Baal comunidadbi, Bet Baal Megon comunidadbi,

¹⁸ Yahaza comunidadbi, Cademot comunidadbi, Mefat comunidadbi,

¹⁹ Quiriatayin comunidadbi, Sibma comunidadbi, Zaret Sajar, wabeko ö'öbö ja̧'o mösa'onö ji̧ comunidadbi,

²⁰ Bet Peor comunidadbi, Bet Yesimot comunidadbi, Pisga mösa'o ö'öbö nöchemi nijibi.

²¹ Okobe jwiinö ja̧ ba̧ba̧lawobe ji̧ comunidadteniama, Rubensaso jojodönö iyinobe Moisesma. Ja̧ nijima ajayinö amorreo jojodötjö inesö la'aka luwo̧ Sijon weinemi, ja̧danö Sijonma Hesbon comunidadnö ja̧nö okobe jwiinö ja̧ niji weinobe. Jo̧ba Sijonma ajayinö Moises ujuluwinökwe. Ajayinö Moisesma Sijonnöbi, Sijon ömöayedö madianitas jojodötjö la'aka luwedö Ebi mikwo̧nöbi, Requen mikwo̧nöbi, Zur mikwo̧nöbi, Jur mikwo̧nöbi, Reba mikwo̧nöbi ujuluwinobe, ja̧ nijinö ajayinö ji̧nadönöma.

²² Ja̧danö ju'wibi jobadönö ujuluwenama, Beor itji̧ Balaam mikwo̧nöbi kwabö loinobe. Jo̧ba Balaamma, tupakwö baledakwa̧ öwaisotö jö̧ba̧lö mea bobö ö̧jinobe, ja̧danö ju'wedönö kwabö lotjenama, Balaamnöbi kwabö lotjinobe Israel jojodöma.

²³ Ja̧ jobadö tjiteboinemima, Rubensaso jojodönö iyinobe Moisesma, tjitebo baibanö, ja̧danö okobe jwiinö ja̧ niji jawo̧ meajobekwö Jordan ojwe ichibanö Rubensaso niji ji̧nobe, Rubensaso jojodötjö bakwasokwena jojodö tjitebokwena nijima. Ja̧ nijibi, comunidadteniabi, Dios Rubensaso jojodönö iyina baibinobe, damötjö̧ Dios chiyocha jö̧a̧lina badekwachinö.

²⁴ Ja̧danö, Rubensaso jojodönö iyi̧danö, Gadsaso jojodönöbi iyinobe, Gadsaso jojodötjö bakwasokwena jojodönö niji iyinobe, tjitebo baibanö.

²⁵ Jobadönö iyinama baikwö laebobe: Jazer comunidad nijibi, okobe jwiinö Galaad niji comunidadteniabi, amonitas jojodö ajayinö tjö̧jinemi niji ja'öbi, Raba comunidad yöneawobe comunidad Aroer niji ichibanö.

²⁶ Ja̧danö ju'wibi, Hesbon comunidadtjö, Ramat Mispebe ichibanö, ja̧danö Betoninbe ichibanö, ja̧danö Majanayin comunidadtjö, Debir ö'öböbe ichibanö, okobe jwiinö ja̧ nijibi Gadsaso jojodönö iyinobe Moisesma.

²⁷ Ja̧danö ju'wibi, wabeko comunidadtenia iyinobe, Bet Aram comunidadbi, Bet Mirma comunidadbi, Sucot comunidadbi, Zafon comunidadbi, ja̧danö okobe jwiinö ju'wi ajayinö Hesbon comunidad la'aka luwo̧ Sijon weinemi jobadönö iyinobe. Jawo̧ meajobekwö, tjitebo niji bakwachobema Jordan ojwe ji̧nobe, ja̧danö u'dakwö, Galilea o̧pesobuma tjitebo bakwachobe ji̧nobe. Jobetjö jawo̧ laebobekwö nijima, Gadsaso jojodö tjitebo baibanö iyinobe.

²⁸ Ja̧ nijibi, comunidadteniabi, tjitebo baibanö iyinobe Moisesma Gad jojodötjö bakwasokwena jojodönö, Dios chiyocha jö̧a̧lidanö badekwachinö.

²⁹ Ja̧danö, Manasessaso ja'ö jojodönöbi niji iyinobe Moisesma, Dios chiyocha jö̧a̧lina badekwachinö. Jobadö Manases ja'ö jojodötjö bakwasokwena jojodönö tjitebokwena 'da̧batö iyinobe Moisesma.

³⁰ Jobadönö iyina baikwö laebobe: Majanayin comunidadtjö jamatö, okobe jwiinö Basan niji baibanö jobadönö iyinobe. Okobe jwiinö Basan niji la'aka luwo̧bina Og weinemi iyinobe jobadönö, ja̧danö okobe jwiinö Jair niji comunidadtenia iyinobe, sesenta comunidad baibanö.

³¹ Ja̧danö, Galaad niji ja'öbi, Basan la'aka luwo̧ Og itebo comunidadbiya Astarotbi, Edreibi, jobadö Manases jojodönö iyinobe. Okobe jwiinö ja̧ niji ajayinö ji̧na Manases itji̧ Maquir itji̧mu tupadanö jojodönö iyinobe Moisesma, Maquir itji̧mu tupadanö jojodö bakwasokwena jojodönö.

³² Jobekwö laebobe Moises niji 'da̧batö iyina jawa, Jordan ojwetjö jawo̧ laebobekwö iyinama. Jericotjö jawo̧ laebobekwö, Moab ba̧ba̧lawobe ina tjö̧jayi, Dios jö̧a̧lina badekwachinö Moisesma jobadönö niji 'da̧'yö iyinobe, tjitebo baibanö.

³³ Jo̧kwaijayonö, ju'wedönö niji iyijayonö, Levisaso jojodönö tjitebo baibanö iyinokobe Moisesma. Israel jojodö tjösödökwe Isabenö Jo̧ Diosma Levi jojodönö damötjö̧ wanedö̧ yöawinobe, —Ökwödö Levisasö jojodö kwujuna̧laduwakwa̧ma, nijimaökö, ötjö Diosnöda kwujuna̧laduwakwedöja, Ötjöda ökwödönö iyö chiteada̧lakobetjö̧, —jö̧ba̧lö. Jo̧kwajabetjö̧, jobadönö niji iyinokobe Moisesma, ju'wedönö iyi̧danöma.