Josué 11 - Dios Iwene

Josue u'dakwö ju̧kwadönö ujuluwina jawa

¹ Jazor comunidad la'aka luwo̧ Jabin mikwo̧ma israel jojodö canaan niji̧ a̧li̧kwö ju̧kwadönö tjujuluwina wene a̧ja̧kwinobe, ja̧danö a̧ja̧kwajo̧, bakobe ju'wedö canaan niji la'aka luwedökwö israel jojodönö ölakwabikwawö tjujuluwobö omukwatinobe. Jejenö omukwatö, yöbawadönö weinobe, Madon comunidad la'aka luwo̧ Jobab mikwo̧nöbi, Simron comunidad la'aka luwo̧nöbi, Acsaf comunidad la'aka luwo̧nöbi,

² u'dakwö mösa'iju comunidadtenia la'aka luwedönöbi, Galilea o̧pesobu a̧li̧kwö comunidadtenia la'aka luwedönöbi, jawo̧ meajobekwö comunidad Nafot Dor la'aka luwo̧nöbi,

³ jawo̧ laebobekwöbi meajobekwöbi cananeos la'aka luwedönöbi, amorreos la'aka luwedönöbi, hititas la'aka luwedönöbi, ferezeos la'aka luwedönöbi, mösa'ijunö ju̧kwadö jebuseos la'aka luwedönöbi, heveos jojodö, Hermon mösa'o pjea niji̧ Mizpanö ju̧kwadö la'aka luwedönöbi, yöbawadönö weinobe Jabinma, —Okobe deinö ko̧ko̧kwö, bakobe israel jojodönö dölakwabikwawo, ju'wedönö tjujuluwinadanö ökwödönöbi tjujuluwapji jö̧ba̧lö, —yötjawobö.

⁴ Yötjawawö̧, jobadö la'aka luwedöma bakobe israel jojodönö tjölakwabikwawobö tjösödinobe, ja̧danö okobe deinö tjömöayedö ölakwabikwawa jojodönö öbibö tjo̧ko̧kokwinobe, jwiinö ba̧jȩkwadö tjo̧ko̧kokwinobe, so̧biapu ba̧jȩkwi̧danö. Ja̧danö ju'wibi, nöinö ka̧ba̧yudönöbi, ölakwabikwawa jawa kolukiyabi tjichejebinobe, israel jojodönö tjujuluwobo.

⁵ Jejenö ko̧ko̧kwö, okobe deinö jobadöma tjabakwemi Merom ojwese'dotjö tjujuninobe, jobetjö labebö, israel jojodönö tjölakwabikwawakobetjö̧.

^6-7 Jejenö tjo̧ko̧kwiökwe, Josuema israel ölakwabikwawa jojodönö öbibö i̧'yinobe Merom ojwese'dobe. Ja̧danö, tjichibakwa̧ abönö, Isabenö Jo̧ma Josuenö yöawinobe, —Idö ko̧ko̧kwadönö yekabobö jwiobe Josue, isabenö jobadönö kwujuluwobö chiyakobetjö̧. Jau Josue, isabenö israel jojodö jobadönö kwabö lotjobö chiyocha, itekwayi, babedajayena baibakwa̧ abönö, ida̧ökö okobe deinö jobadönö kwabö loköbaduwakwedöja. Ikenama, jejenö jobadönö juluwajadö, tja̧jwi̧mu ka̧bayudö tji̧se'bo ja'önö 'wikebaduwo, kabayudöma otiwanö ö'öbakwawöködö batjibanö, ja̧danö kolukiyama juwö loköbaduwo, —jö̧ba̧lö yöa̧linobe Isabenö Jo̧ma Josuenö. Ikenama Josuema ömöayedö ölakwabikwawa jojodökwö ichibö meibinobe Meromtjö ko̧ko̧kwajadönö. Tjichibaja̧ wajwitjonö, juluwanö metjibinobe,

⁸ ja̧danö Isabenö Jo̧ma israel jojodönö iyinobe, jwiinö jobadönö tjujuluwobö. Jwiinö jobadönö tjujuluwinobe israel jojodöma, jobetjö dötjibajenanö, ja̧danö israel jojodöma jobadönö lubö kwabawö lotjinobe, u'dakwö jalobe comunidad Sidonbebi, jawo̧ meajobekwö Misrefot Mayin comunidadbebi, jawo̧ laebobekwö Mizpa wabekobebi. Jwiinö jobadönö tjujuluwinobe, ölakabikwawadötjö bakwo̧bi ö̧jibökenanö baibanö.

⁹ Ikenama, jobadönö juluwajo̧, Isabenö Jo̧ weinadanö ja̧inobe Josuema, tja̧jwi̧mubajadö kabayudö tji̧se'bo ja'önö 'witjebobö weinobe, otiwanö ö'öbakwawöködö batjibanö, ja̧danö kolukiyama juwö lotjobö weinobe.

¹⁰ Ikenama, ja̧ kabatibö, Josuema tjebachajö ölakwabikwawa jojodökwö Jazor comunidadbe i̧'yinobe. Ajayinöma Jazor comunidadma okobe jwiinö ja̧ nijitjö inesö la'aka comunidad ji̧nobe, jo̧kwajabetjö ja̧ comunidad ujuluwobö i̧'yinobe Josuema. Ja̧danö ölakwabikwawö, Jazor la'aka luwo̧nö kwabö lotjinobe, ja̧danö Jazor comunidad jojodönö tjujuluwinobe.

¹¹ Ja̧danö, juluwajadö, okobe deinö jobe ju̧kwadönö kwabawö lotjinobe, bakwo̧bi ö̧jibökenanö. Isabenö jwiinö söbebö lotjinobe Jazor jojodönöma, ja̧ comunidadtjö bakwo̧bi yaba̧lo̧ma deinö, ja̧danö söbebö lobajadö, Jazor comunidad juwö lotjinobe.

¹² Ja̧danö ju'wibi, ju'wedö Jazor la'aka luwo̧nö pjabatinadö la'aka luwedönöbi ujuluwinobe Josuema, tjitebotenia bakwo̧nökwena ujuluwinobe, ja̧danö la'aka luwo̧kwenabi, okobe deinö tjömöayedönöbi kwabawö lotjinobe. Kwabawö lotjobö Isabenö Jo̧ ömöayo̧ Moises weinadanö, okobe deinö jobadönö kwabawö lotjinobe.

¹³ Jo̧kwaijayonö, jojodönö kwabawö lotjijayonö, Jazor comunidad juwö lotjinadanöma juwö lotjinokobe ju'wi comunidadteniama. Okobe jwiinö mösa'o wame tjotidina comunidadteniatjö, sule Jazor comunidadda juwö lotjinobe.

^14-15 Ja̧danö, jojodönö kwabawö lobajadö, tjiteaaja̧ma tjeminobe israel jojodöma, tja̧jwi̧munöbi, ju'wi tjiteabi. Jo̧kwaijayonö, Isabenö Jo̧ wei̧danö okobe deinö jojodönö kwabawö lotjinobe, bakwo̧bi ö̧jibökönö. Damötjö̧ Isabenö Jo̧ma ömöayo̧ Moisesnö jejenö kwabawö lotjobö weinobe, ja̧danö Moisesma ja̧ weawa Josuenö weinobe, ja̧danö Josuema jwaikwöda ja̧ weawadanö ja̧inobe. Isabenö jwaikwöda Isabenö Jo̧ Dios Moisesnö weinadanö ja̧inobe Josuema, ja'yubebi ji̧bökönö, jwaikwöda okobe jwiinö wei̧danö ja̧inobe Josuema.

¹⁶ Jobekwö laebobe Josue canaan niji ujuluwina wenema. Josuema okobe jwiinö canaan niji ujuluwinobe, mösa'iju jȩmi nijibi, a̧li̧kwö Neguev ötjabobe nijibi, okobe jwiinö Gosen ötjabobe nijibi, ba̧ba̧lawobe nijibi, Jordan ö'öbö Araba ötjabobe nijibi. Okobe jwiinö israel niji mösa'iju ujuluwinobe, inesö mö mösa'ijubi, ju'wi mösa'ijubi,

¹⁷ a̧li̧kwö ja̧'o, Seir niji yöneawa'o Jalac mikwa'otjö, u'dakwö ja̧'o Hermon mikwa'ö badeibö wabeko, Libano wabeko jȩmi comunidad Baal Gadbe ichibanö, okobe jwiinö ja̧ ö'weje niji ujuluwinobe. Okobe jwiinö ja̧ niji la'aka luwedönö ujuluwinobe, ja̧danö okobe deinö jobadönö kwabawö loinobe.

¹⁸ Lekwe möle jobadö la'aka luwedökwö ölakwabikwawö ö̧jinobe Josuema,

¹⁹ ja̧danö jobadökwö bakwo̧bi dösölö̧jinö tjö̧jakwa̧ wene yöbawö tjujuninokobe israel jojodöma, sule Gabaon comunidad jojodö heveo jojonöda ölakwabikwawökönö dösölö̧jinö tjö̧jakwa̧ wene yöbawö tjujuninobe. Okobe deinö ju'wedö canaan niji ju̧kwadönö, ölakwabikwawöda jobadönö tjujuluwinobe.

²⁰ Jejenö baledinama, Isabenö Jo̧ Diosda baledobö ja̧ina. Isabenö Jo̧ma canaan niji ju̧kwadö tjo̧'wo 'diachibanö weinobe, israel jojodökwö tjölakwabikwawobö, israel jojodö jobadönö lȩlöinö tjedapji jö̧ba̧lö. Damötjö Isabenö Jo̧ma Moisesnö weinobe, lȩlöinö edökönö, okobe deinö canaan niji ju̧kwadönö kwabawö lotjobö, ja̧danö jejenö weinadanö kwabawö lotjakobetjö̧, canaan ju̧kwadö tjo̧'wo 'dibachibö tjölakwabikwawobö weinobe.

²¹ Ja̧danö ju'wibi ja̧ möle baledina wene baikwö laebobe. Ajayinöma jwiinö ödöbaedö anaquita jojodöma a̧li̧kwö mösa'iju jȩmi comunidadnö tjö̧jinobe, Hebron comunidadtjöbi, Debir comunidadtjöbi, Anab comunidadtjöbi, ju'wi juda nijitjö mösa'iju jȩmibi. Jo̧kwaijayonö, ja̧ möle jenanö, Josuema jobadönö ujuluwinobe, ja̧danö jobadönöbi, tjitebo comunidadnö ju̧kwadönöbi kwabawö loinobe.

²² Jwiinö jobadönö söbebö loinobe, israel nijitjö bakwo̧bi ö̧jibökenanö. Jo̧kwaijayonö israel nijitjö detjijayonö, jobadötjö o̧bukwedöma ina filisteo jojodö tjitebonö tjö̧jinobe, Gaza comunidadtjöbi, Gat comunidadtjöbi, Asdod comunidadtjöbi.

²³ Jobekwö laebobe Josue canaan niji ujuluwina wenema. Okobe jwiinö ja̧ niji israel niji baibanö ujuluwinobe, ajayinö Isabenö Jo̧ Moisesnö tjujuluwobö weinadanö badekwachinö. Ikenama, juluwajo̧, ölakwabikwawö kaatakwawajenama, Josuema israel jojodötjö bakwasokwena jojodönö tjitebokwena baibanö niji 'da̧batö iyinobe, bakwasokwena tjitebo baibanö. Jo̧kwajabetjö, bajaliyanö wene jwiinö tjitebo baibanö jobe tjö̧jinobe israel jojodöma.