Josué 10 - Dios Iwene

Israel jojodö amorreos jojodönö tjujuluwina jawa

¹ Ja̧danö, Jerusalen comunidad la'aka luwo̧ Adonisedec mikwo̧ma baledina wene a̧ja̧kwinobe, baikwö: —Jerico comunidadbi, inesö la'aka luwo̧nöbi, jwiinö söbebö lotjinadanö, Josue ömöayedö ölakwabikwawa jojodöma Hai comunidadbi juluwajadö, bakwo̧bi ö̧ji̧bökönö la'aka luwo̧nöbi jojodönöbi kwabawö lotjinobe, ja̧danö comunidad jwiinö pjolö lotjinobe, —jö̧ba̧lö a̧ja̧kwinobe. Ja̧danö ju'wibi, —Gabaon comunidad jojodöma, israel jojodökwö dösölö̧jinö tjö̧jakwa̧ wene yöbawö tjujuninobe, ja̧danö wene jwiinö israel jojodö tjö̧'da̧de ju̧kwadö, —jö̧ba̧lö a̧ja̧kwinobe Adonisedecma.

² Jejenö a̧ja̧kwö, Adonisedecma jwiinö yeaibinobe. Gabaon comunidadma, jalobe comunidad ji̧nobe, Hai comunidadtjö bajalekwönönö jalobe ji̧nobe, ja̧danö okobe deinö Gabaon comunidad ömadöma, ölakwabikwawa juluwadö tjö̧jinobe. Gabaon comunidadma ju'wi inesö la'aka luwedö tjö̧jemi comunidadbiya juluwi̧danö juluwemi ji̧nobe, jo̧kwajabetjö̧ Gabaon comunidad jojodö israel jojodökwö dösölö̧jinö tjö̧jakwa̧ yöbawö tjujunaja̧ wene a̧ja̧kwö, ajayitjö bajalekwönönö yeaibinobe Adonisedecma.

³ Jo̧kwajabetjö̧, Jerusalen comunidad la'aka luwo̧ Adonisedecma yöbawadönö weinobe ju'wedö amorreo la'aka luwedönö yötjawobö, Hebron comunidad la'aka luwo̧ Hoham mikwo̧nöbi, Jarmut comunidad la'aka luwo̧ Piream mikwo̧nöbi, Laquis comunidad la'aka luwo̧ Jafia mikwo̧nöbi, Eglon comunidad la'aka luwo̧ Debir mikwo̧nöbi yötjawobö, baikwö:

⁴ —Gabaon comunidad jojodöma Josuekwöbi, ju'wedö israel jojodökwöbi dösölö̧jinö tjö̧jakwa̧ wene yöbawö tjujuninobe, jo̧kwajabetjö atebaduwakwö kwömöayedö ölakwabikwawa jojodökwö ichö, ötjönö pjakataduwobö, Gabaon comunidad jojodönö dujuluwakobetjö̧, —jö̧ba̧lö aebinobe.

⁵ Jejenö aebawö̧, aebi̧danö ja̧tjinobe, jo̧kwajabetjö̧ jobadö amorreo jojodötjö la'aka luwedöma tjömöayedö ölakwabikwawa jojodönö ko̧ko̧dö, bakobe Gabaon comunidadbe tji̧'yinobe. Jobadö amorreo jojodötjö la'aka luwedöma bidö, Jerusalen la'aka luwo̧bi, Hebron la'aka luwo̧bi, Jarmut la'aka luwo̧bi, Laquis la'aka luwo̧bi, Eglon la'aka luwo̧bi, ja̧danö tjömöayedökwö Gabaon comunidad tjösawö tji̧'yinobe, jobadönö tjujuluwobö.

⁶ Jejenö tjichiawö̧, Gabaon comunidad jojodöma yöbawadönö wetjinobe, Guilgalnö jo̧ Josuenö yötjawobö, baikwö: —Duluwo̧, ökwödö kwömöayedönö le'dedö lobökönö, juluwanö pjabatö kwicho, yöbawö kwujuninadanö ökwödönö pjabatö kwichobö jo̧be! Jau duluwo̧, okobe deinö amorreo jojodotjö la'aka luwedöma, ko̧ko̧kwö ökwödönö tjujuluwobö mösa'ijutjö tjichajabeta. Ökwödö kwömöayedönö tjujuluwapji jö̧ba̧lö juluwanö pjabatö kwichowe, —jö̧ba̧lö yötjawobö wetjinobe.

⁷ Yötjawökwe, Josuema israel jojodötjö inesö juluwadönöbi, ju'wedö ölakwabikwawa jojodönöbi öbibö, Guilgaltjö labebö i̧'yinobe, Gabaon comunidadbe.

⁸ Ja̧danö, Isabenö Jo̧ma Josuenö yöawinobe, —Josue, jobadö amorreo jojodö ölakwabikwawa jojodönö yekaboko. Jau Josue, isabenö jobadönö kwujuluwobö chiyajabe, jo̧kwajabetjö jobadötjö bakwo̧bi kwöba a'o ö̧joböma jwiakobe, isabenö okobe deinö jobadönö kwujuluwakobe, —jö̧ba̧lö.

⁹ Ja̧danö, yöawaja̧danö baledinobe. Josuema, yöte baledibanö Guilgaltjö kwebachajo̧, wajwitjonö juluwanö ichibö meibinobe amorreo jojodönö.

¹⁰ Ja̧danö Isabenö Jo̧ma israel jojodö tjöba a'otjö jwiinö yetjaibobö weinobe, Dakwö ja̧dakwajö jö̧ba̧lö tjö̧bawö ja̧tjenanö baibanö. Ja̧danö, jobe Gabaontjö israel jojodöma ba̧jȩkwadönö kwabawö lotjinobe, jobetjö a'dewö lotjenanö baibanö. Jejenö tjujuluwawö̧, amorreo jojodöma jobetjö dötjibajinobe, Bet-horonbe 'ya̧kwawamabenö, ja̧danö tjökömanö lubö, israel jojodöma jobadönö kwabawö lotjinobe, Azeca comunidadbebi, Maceda comunidadbebi tjichibenanö kabatö.

¹¹ Ja̧danö ju'wibi baledinobe. Israel jojodö tjöba a'otjö dötjibajonö, Bet-horonbe 'ya̧kwawamabenö mösa'otjö yutjutjajonö, Isabenö Jo̧ma mölejebetjö tiyuwaso inawiyadanö pjei̧ öwiyanö ikwawö loinobe jobadönö, ja̧tjö ba̧jekwadö debö tji̧'yenanö. Isabenö ba̧jekwadö amorreo jojodöma Isabenö Jo̧ ikwaja̧tjö debö tji̧'yinobe ja̧ möle, israel jojodö kwabö lotjajawö̧tjö bajalekwönönö ba̧jȩkwadö pjei̧ öwiyatjö debö tji̧'yinobe.

¹² Ja̧danö, ju'wibi baledinobe ja̧ möle, Isabenö Jo̧ israel jojodö amorreo jojodönö tjujuluwobö pjaatina mölema. Ja̧ möle ju'wedö israel jojodö tja̧ja̧kwonö, Josuema Isabenö Jo̧nö aebinobe, —Jawo̧ma meajökönö Gabaon wame ö̧jobö chösöda, ja̧danö yöte jawo̧ma Ajalon wabeko wame kwebachökönö ö̧jobö chösöda, —jö̧ba̧lö aebinobe.

¹³ Ja̧danö, jawo̧ma jobe bakwenanda 'yö̧könö ö̧linobe, ja̧danö yö̧te jawo̧ma kwebachökönö ö̧linobe, israel jojodöma tjöpöjojodönö tjujuluwenanö baibanö. Ja̧ baledina wenema, Jaser iwȩyudina'yenö laebobe, baikwö: —Jawo̧ma mölejȩ ja'ö 'yö̧könö bakwenada ölinobe, juluwanö meajökönö, ja̧danö bakwöta möle jenanö, jobe ö̧linobe jawo̧ma, —jö̧ba̧lö laebobe.

¹⁴ Ja̧ mölejaye, la'akatjöda baledinokobe, jemi abönödabi, jemi ikenabi. Ja̧ möleda Isabenö Jo̧ma jojo aebi̧ a̧ja̧kwö, jawo̧ 'yö̧könö ö̧lobö weinobe, Isabenö Jo̧ma isabenö israel jojodönö pjabatö ölakwabikwawö ö̧jinobetjö̧.

¹⁵ Ja̧danö, tjöpöjojodönö tjujuluwaja̧ ikenama, Josuebi, okobe deinö israel ölakwabikwawadöbi tjömöledö tjuju̧kwobekwö tjȩwa̧jinobe, Guilgalbe.

Josue bakwamubedö la'aka luwedönö ujuluwina jawa

¹⁶ Baikwö laebobe Josue jobadö amorreo jojodötjö bakwamu la'aka luwedönö ujuluwina wenema. Israel jojodökwö ölakwabikwawö, tjöba a'otjö dötjibajenama, amorreo jojodötjö la'aka luwedö bakwamubedö luwedöma ötöla okwa tjuju̧kwawinobe, Maqueda comunidad yöne ötölanö.

¹⁷ Ja̧danö, ju'wedöma Josuenö yötjawinobe, —Amorreo jojodötjö bakwamubedö la'aka luwedönö döbadekwajabeta, jobadöma Maqueda comunidad yöne ötöla okwa tjuju̧kwawajabe, —jö̧ba̧lö.

¹⁸ Yötjawökwe, Josuema ölakwabikwawa luwedönö weinobe, —Inawa nöawa öwiyawi̧ bö̧lȩdö kwutumataduwo teachakwawemima, ja̧danö ju'wedö teada̧ladönö kwujunaduwo, latjebapji jö̧ba̧lö tjiteada̧lobö.

¹⁹ Jo̧kwaijayonö, ökwödöbi, ju'wedö kwömöayedö ölakwabikwawa jojodöbi jobe kwiteada̧laduwoko. Ökwödöma jwaikwöda döpöjojodö tjökömanö lubö, mebibö kwabawö loköbaduwodönö. Jau chömöledö, Duluwo̧ Isabenö Jo̧ Diosma jobadönö dujuluwobö iyajabe, jo̧kwajabetjö̧ juluwanö jobadönö ludibaduwo, döbibajö tjitebo comunidad tjöekwemi okwa tetjachapji jö̧ba̧lö, —weinobe Josuema.

²⁰ Josue weaja̧danö ja̧tjinobe, ja̧danö jwiinö jobadönö tjujuluwinobe. Jwiinö jobadönö söbebö lotjinobe, ja̧danö sule o̧bukwedöda israel jojodötjö döbibajö tjitebo comunidadbe tjichibinobe. Ja̧danö, ji̧bajadö döbibajö 'diinö tjöekwemi comunidad okwa tetjachaja̧ ikenama,

²¹ israel jojodötjö ölakwabikwawa jojodöma, wene jwiinö Josue ö̧jobekwö tjȩwa̧bijinobe, Maqueda comunidadtjö tjabakwemibe. Ja̧ baledaja̧ wene a̧ja̧kwö, okobe deinö ja̧ nijinö ju̧kwadöma jwiinö yetjaibinobe, ja̧danö jwiinö yetjaibobetjö̧, ja'yubebi israel jojodönö sulabenö yötja̧loböbi yetjabinobe.

²² Jemi ikenama Josuema weinobe, —Inawa ötöla po̧bebaduwi, ja̧danö jobetjö ju̧kwawadö bakwamubedö la'aka luwedönö chö̧jobekwö ichejebaduwidönö, —jö̧ba̧lö.

²³ Weawö̧, weaja̧danö ja̧tjinobe, ja̧danö ötölatjö bakwamubedö la'aka luwedönö tjichejebinobe, Jerusalen comunidad la'aka luwo̧nöbi, Hebron comunidad la'aka luwo̧nöbi, Jarmut comunidad la'aka luwo̧nöbi, Laquis comunidad la'aka luwo̧nöbi, Eglon comunidad la'aka luwo̧nöbi.

²⁴ Jejenö tjichejebiökwe, Josuema okobe deinö israel jojodötjö ölakwabikwawa jojodö tjichobö jwöinobe, ja̧danö tjuluwedö jo̧bakwö ju̧kwadönö weinobe, —Bidö la'aka luwedö tjulume'anö ja̧taduwi, –Bidönö dujuluwajabe, —jö̧ba̧lö. Weawö̧, ichibö tjulume'anö tjö̧jatinobe, ja̧danö tjö̧jatenama,

²⁵ Josuema jobadö israel jojodötjö luwedönö yöawinobe, —Isabenö döpöjojodönö yekabiduwobö jwiobe, –Ökwödö israel jojodöwe, dujuluwobö jwiobe, –jö̧ba̧lö. Isabenö yötawaduwakwö chömöledö, bidönö kwujuluwaduwaja̧danö, okobe deinö kwöpöjojodönö kwujuluwaduwobö pjaatakwo̧ Isabenö Jo̧ma, döpöjojodökwö kwölakwabikwawaduwenama, —jö̧ba̧lö yöa̧linobe Josuema.

²⁶ Ikenama, jejenö yöba̧lajo̧, Josuema jobadö bakwamubedö la'aka luwedönö kwabö loinobe kwölöte'onö, ja̧danö jemi ikenama tjiteba'iju bakwamu jawa towibiyanö mö öninobe. Ja̧danö, jejenö önajawö̧, tjiteba'iju jobe tjö̧linobe, yi̧bena baibenanö kabatö.

²⁷ Ikenama, jawo̧ mebajö yi̧atibena jenanö, Josuema weinobe, tjiteba'iju towitjö meatö, ötöla okwa, ajayinö tju̧ju̧kwawinöla okwa ikwö lotjobö. Jemi ikenama ötöla teachakwawemi tumatö, inawa nöawa öwiyawi̧ bö̧lȩdö tjutumatinobe, ja̧danö babe mölebi baibanö ja̧ tumatakwawa öwiyama jobe bo̧be.

²⁸ Ja̧danö, ju'wibi, ja̧ möle Josuema ölakwabikwawa jojodökwö Maqueda comunidad ujuluwinobe. Juluwajo̧, okobe deinö Maqueda comunidadnö ju̧kwadönöbi, la'aka tjuluwo̧nöbi kwabawö loinobe, bakwo̧bi ö̧jibökönö. Jejenö ajayinö Jerico cominidad la'aka luwo̧nö kwabö loinadanö, Maqueda comunidad la'aka luwo̧nöbi kwabö loinobe.

²⁹ Ikenama, Maqueda comunidad juluwajadö, Josuebi, ju'wedö israel ölakwabikwawa jojodöbi tupakwö Libna comunidadbe 'ya̧nö, jobe ju̧kwadökwö tjölakwabikwawinobe.

³⁰ Ja̧danö Isabenö Jo̧ma iyinobe, ja̧ comunidad ju̧kwadönöbi, Libna la'aka luwo̧nöbi israel jojodö tjujuluwobö. Ja̧danö, juluwajo̧, Josuema okobe deinö Libna comunidadnö ju̧kwadönö kwabawö loinobe, bakwo̧bi ö̧jibökönö, okobe deinö kwabawö loinobe. Ja̧danö, Jerico la'aka luwo̧nö kwabö loinadanö, Libna la'aka luwo̧nöbi kwabö loinobe.

³¹ Ikenama, Libnatjö labebö, tupakwö Laquis comunidadbe i̧'yinobe Josuema, israel ölakwabikwawa jojodökwö, ja̧danö Laquisbe ichibö, comunidad tjösawö tjölakwabikwawinobe.

³² Jobe dötölataja möle Laquis comunidad tjujuluwobö tjölakwabikwawinobe, ja̧danö dötölataja möle ölakwabikwawajadö, Isabenö Jo̧ma Laquis comunidad israel jojodö tjujuluwobö iyinobe. Ja̧danö, Laquis comunidad juluwajo̧, okobe deinö jobe ju̧kwadönö kwabawö loinobe Josuema, Libna comunidadtjö ja̧inadanö.

³³ Ju'wibi Guezer comunidad la'aka luwo̧ Horan mikwo̧ma, Laquis comunidad jojodökwö tjölakwabikwawi̧ wene a̧ja̧kwö, jobadönö pjabatö ichinobe, ömöayedö ölakwabikwawa jojodökwö. Jo̧kwaijayonö, jo̧banöbi ujuluwinobe Josuema, ja̧danö la'aka luwo̧ Horan mikwo̧nöbi, okobe deinö ömöayedö ölakwabikwawa jojodönöbi kwabawö loinobe, bakwo̧bi ö̧jibökönö.

³⁴ Ikenama, Laquistjö labebö, tupakwö Eglon comunidadbe i̧'yinobe Josuema, israel ölakwabikwawa jojodökwö. Eglonbe ichibajadö, tjösawö tjölakwabikwawinobe,

³⁵ ja̧danö i̧ya̧da möle comunidad tjujuluwinobe, ja̧danö jobe ju̧kwadönö kwabawö lotjinobe. Laquistjö ja̧inadanö, okobe deinö jobe ju̧kwadönö kwabawö lotjobö weinobe Josuema, bakwo̧bi ö̧jibökönö.

³⁶ Ikenama, Eglontjö labebö, Josuema israel ölakwabikwawa jojodökwö tupakwö Hebronbe i̧'yinobe. Ja̧danö, Hebron jojodökwö ölakwabikwawö,

³⁷ Hebron comunidadbi, ö'öbö comunidadteniabi tjujuluwinobe. Ja̧danö, juluwajadö, Hebron la'aka luwo̧nöbi, okobe deinö jobe ju̧kwadönöbi, Hebrontjö pjei̧ comunidadtenia ju̧kwadönöbi kwabawö lotjinobe. Eglontjö ja̧inadanö, okobe deinö bakwo̧bi ö̧jibökönö kwabawö lotjobö weinobe Josuema.

³⁸ Ikenama, Hebrontjö labebö, Josuema israel ölakwabikwawa jojodökwö tjebachajö, Debir comunidadbe ölakwabikwawö tji̧'yinobe.

³⁹ Ja̧danö, ölakwabikwawö, Debir comunidadbi tjujuluwinobe, Debir la'aka luwo̧nöbi, okobe jwiinö ö'öbö comunidadteniabi tjujuluwinobe israel jojodöma. Ja̧danö, jobebi juluwajadö, okobe deinö jobe ju̧kwadönö kwabawö lotjinobe. Hebrontjö weinadanö, ja̧danö Libnatjö weinadanö, okobe deinö bakwo̧bi ö̧jibökönö, Debir jojodönöbi, la'aka tjuluwo̧nöbi kwabawö lotjobö weinobe Josuema.

⁴⁰ Jejenö Josuema okobe jwiinö ja̧ a̧li̧kwöchobe niji ujuluwinobe, mösa'iju jȩmibi, a̧li̧kwöchobe Neguev ötjabobebi, ba̧ba̧lawobebi, mösa'iju ö'öbö nijibi. Ja̧danö jelobetenia ujuluwenama, okobe deinö jojodönö, bakwo̧bi ö̧jibökönö kwabawö lotjobö weinobe Josuema. Israel tjuluwo̧ Isabenö Jo̧ Dios weinadanö, okobe deinö bakwo̧bi ö̧jibökönö kwabawö lotjobö weinobe Josuema.

⁴¹ Ja möle Josue ujuluwinemima, baikwö laebobe, a̧li̧kwö niji Cades Barneatjö, Gaza nijibe ichibanö, ja̧danö okobe jwiinö Gosen niji Gabaon comunidadbe ichibanö ujuluwinobe.

⁴² Okobe jwiinö ja̧ nijibi, okobe deinö jobe ju̧kwadö la'aka luwedönöbi bakobe juluwanö ujuluwinobe Josuema, israel tjuluwo̧ Isabenö Jo̧ Diosma israel jojodönö pjabatö ölakwawibikwawinobetjö̧.

⁴³ Ja̧danö, jejenö juluwajo̧, Josuema ju'wedö israel jojodökwö Guilgalbe ȩwa̧jinobe, ju'wedö israel jojodö tjuju̧kwobekwö.