Diosnö ösödo̧ Job mikwo̧ usula emawina jawa 9 - Dios Iwene

Bildad yöa̧liökwe Job atadina jawa

¹ Bildad yöa̧liökwe, Jobma atadö yöa̧linobe, baikwö:

² —Jau Bildad, chöwaisa, yöka̧li̧danö jo̧be. Jo̧kwaijayonö, baikwö yöta̧la, bakwo̧ sulabenö ja̧inökötjö̧ma, Dios öba a'otjö dakwö i̧sȩbobö, wene jwiinö ö̧ji̧ma.

³ Ja̧danö, Dios bakwo̧nö, –Sulabenö ja̧binaja, –jö̧ba̧lö yöa̧litjö̧ma, dakwö atadobö? Sulabenö ja̧inökötjö̧bi, dakwö Dioskwö jwöjwöbakwawö atadobö? Diosma mil jenanö jo̧banö abebö a̧ja̧kwena, ja̧danö bakwötanöbi atadobö jwiena.

⁴ Jau, isabenö jwiinö waisanö omukwato̧ Diosma, ja̧danö isabenö jwiinö juluwo̧. Bakwo̧bi Dios öba a'o 'diinö jwöjwöbakwawö jo̧ ö̧jȩnaji̧? Bakwo̧bi Dios öba a'o ja̧nö, isabenö wene jwibo̧sa i̧sȩbo̧ma ö̧jenaji̧? Deobe la'akatjöda. Bakwo̧bi Dios öba a'o 'diinö jo̧ma deobe.

⁵ —Isabenö jwiinö juluwo̧ Diosma, baikwö yötawa: Baledakwa̧ wajwitjonö, mösa'iju pjolatö lobo̧ Diosma. Jwiinö juluwo̧obetjö̧, ödameakwenama mösa'iju 'yebö lobo̧,

⁶ ja̧danö niji tjöawobö webo̧, ja̧danö bö̧jȩ la'aka tjö̧awobö webo̧.

⁷ Ju'wibi jawo̧nö, –Labebökönui, –jö̧ba̧lö weenama, labebö̧kö̧ jawo̧ma, ja̧danö ju'wibi ösödenama si̧li̧'idö tjidejatökönö tjöbeba̧lo̧ Diosma.

⁸ —Jau, isabenö jwiinö juluwo̧ Diosma, jo̧bada mölejȩ sedatö öninobe, ja̧danö jo̧bada jwaibalawa loi̧ ja̧tö loinobe, jwaibalawa loi̧ yöachibakobetjö̧.

⁹ Jo̧bada si̧li̧'idönö öninobe, ja̧danö tjö̧li̧kwena tjö̧lobö weinobe, Alade'ba jö̧ba̧lö ödabiwö̧ si̧li̧'idönöbi, Maliyu aka jö̧ba̧lö ödabiwö̧ si̧li̧'idönöbi, Itji̧mukwa'wo jö̧ba̧lö ödabiwö̧ si̧li̧'idönöbi, Lele isabuluka jö̧ba̧lö ödabiwö̧ si̧li̧'idönöbi.

¹⁰ —Jau, jo̧ba Diosda inesö otiwi̧ jawa, ökwödö bö̧je jojodö wajwidi jawa otido̧ma, dö̧ba̧ja̧dökenanö nöinö edajidökö jawa otido̧ jo̧bada.

¹¹ Ju'wibi, dedokonö kwebacho̧ Diosma, chöbajale a'o öbaledijayonö, chedökökwe, ja̧danö chö̧jelö labebö tupakwönönö i̧'yenabi, wajwitonö tupakwö 'yo̧.

¹² Isabenö jwiinö juluwo̧ Diosma, ju'wi jaye 'döebobö jö̧a̧litjö̧ma, 'wainö 'döbebo̧, bakwo̧bi tjöbeba̧lo̧ma deobe, bakwo̧bi, –'Dökeba, tajawedö 'dököbobeda, –tjöbeba̧lö yöba̧lo̧ma deobe.

¹³ —Ja̧danö Dios ödameakwenama, juluwanö kabatibö̧kö̧ ödameakwi̧ma, damötjö̧ inesö labo̧ jwaibalawanö jo̧ Rahab ötjabökwenöbi, Rahabnö pjabatadönöbi juluwinama jo̧ba Diosda.

¹⁴ Jau, isabenö jwiinö juluwo̧ Diosma, jo̧kwajabetjö̧ ötjöbi, Diosbi lȩekwa luwo̧ öba a'otjö dö̧jonö, –Jobma sulabenö ja̧bo̧, –jö̧ba̧lö Dios yöa̧litjö̧ma, dakwö chatadobö? Dakwö yöba̧lö chatadoböjö, ötjönö wanedö yöa̧li̧ kaatibakobetjö̧?

¹⁵ Sulabenö ja̧tinököjayonö, yayonö atadakwawa jwiinö chö̧jibena. Jau, öba a'o ja̧nö chatadobö jwibo̧sa, atadökönö, abeböda, –Chuluwo̧, lȩlöji̧nö kwedobö atebakwö, –jö̧ba̧lö budekwö atebobö jȩna.

^16-17 —Isabenö ötjönö dameakwo̧ Diosma ichejekwa. Sulabenö ja̧tinököjayonö, jwa̧lȩ'epjo labinö doibi̧danö lȩbebo̧, ja̧danö nöinö ötjönö kwakwaobedanö lȩbȩbo̧. Jo̧kwajabetjö̧ jo̧banö jwöbö, –Lȩeka luwo̧ öba a'o di̧'yaduwo, –jö̧balö yöta̧lökwe, –Jau di̧'yo, –jö̧ba̧lö ataditjö̧bi, –Yöta̧li̧ otiwanö a̧ja̧kwakwo̧ Diosma, –jö̧ba̧lö chomukwatökena, isabenö jwiinö ötjönö ödameakwobetjö̧.

¹⁸ Jau, ja'yubenö kabatibökönö, jwaikwöda cho̧'wo tjo̧ekwinö webo̧ Diosma, juluwanö kabatibökönö lȩbȩbo̧, cho̧'wo chemökenanö baibanö.

¹⁹ —Jau, isabenö ja'yubebi Dios öba a'otjö tjöteba̧lakwawobö jwibo̧sa, baikwö yöta̧la: Jo̧bakwö chölakwabikwawobö jö̧ta̧litjö̧ma, waekwena, Diosma jwiinö juluwo̧obetjö̧. Ja̧danö lȩekwa luwo̧ öba a'o öjamatobö wetitjö̧bi, waekwena, bakwobi lȩekwa luwo̧ öba a'o öjamatobö webo̧ deobetjö̧.

²⁰ Isabenö sulabenö ja̧tinököjayonö, ötjöda chiwenebi sulabo̧ chö̧ji̧ i̧sȩbena, ja̧danö sulabenö ja̧tinököjayonö, yayonö Dios i̧sȩbena, –Isabenö wene juna̧lo̧ Jobma, –jö̧ba̧lö.

²¹ —Isabenö sulabenö ja̧binö̧kö̧sa, jo̧kwaijayonö jo̧kwada, ötjönö baledakwa̧ma mikwawokobe ötjönöma. Jwiinö chöpöjödobe chö̧ji̧ma, –Debö chi̧'yowe, –jö̧ba̧lö.

²² Diosma okobe deinö söbebö lobo̧, sulabenö ja̧badönöbi, sulabenö ja̧böködönöbi, jo̧ba öba a'otjö okobe deinö bakwaibedödanö dö̧jobe ichejekwa.

²³ Jau, wene babibö, jojodö juluwanö debö tji̧'yenama, edö obo̧ Diosma, wene jwibadö debö tji̧'yenabi, edö obo̧ Diosma ichejekwa.

²⁴ Diosma sulabenö jabadö luwedö batjibobö weajabe, ja̧danö lȩekwa luwedö edöködö batjibobö weajabe ichejekwa. Diosda jejenö weinökötjö̧ma, tida jejenö weinada? Jelo̧ma deobe.

²⁵ —Ötjö chö̧ji̧ma isabenö juluwanö 'dö̧jibajobe, baikwö wanedö yötawa: Juluwanö ö'öbakwawawo̧ ö'öakwawi̧danö, chö̧ji̧ mölebiyama juluwanö döibajobedanö ichejekwa, ja̧danö ötjönö baledi̧ma, jwaikwöda suli̧ jawada baledobe ötjönöma.

²⁶ Jau, ojwenö ji̧ isa'yetjö otikwowi isowi juluwanö baledi̧danö, ja̧danö wiyuli juluwanö ukwakwo̧nö jwibachö meibi̧danö, juluwanö 'dö̧ibajobe ötjö chö̧ji̧ mölebiyama.

²⁷ —Chuluwo̧ Dios, ötjöwe! Sulabenö ja̧tinököjayonö, usula emawo̧sa. Chomukwatena, –Aaa, usula chemawijayonö, Diosnö budekwö kabatibö, cho̧'wo ösöwanö chöjocha, –jö̧ba̧lö̧.

²⁸ Jo̧kwaijayonö yetabi, chedemi jejenö budekwö katatibitjö̧ma, yayonö bakwainö inia tjöbö usula chemawena, jadanö ju'wibi, chedemi ötjönö kwomukwatökena, –Jobma sulabenö ja̧bö̧kö̧, –jö̧ba̧lö.

²⁹ Jau chuluwo̧, ida̧ökö ötjönö yöbawö kwujunajabe ichejekwa, –Jobma sulabenö ja̧bo̧, –jö̧ba̧lö. Jejenö ida̧ökö ötjönö yökawajabema, tajawedö ina kwöba a'otjö yötawoböjö? Kwöba a'otjö sulabenö ja̧bökönö chö̧jobö chisakwi̧ma mikwawokobe ichejekwa, ¡ötjöwe!

³⁰ —Jau, ja̧bu'onö chidichawitjö̧böbi, chömamiju inesö dichawasobunö chidichawitjö̧böbi, mikwawökena.

³¹ Chidichawijayonö, laju okwa ikwö loköbena, jwiinö yȩbo̧ batibanö. Jau, jwiinö yȩbo̧ batibanö ikwö loköbena, ötjö chö̧kamisibi ötjönö öpöjödenanö baibanö, –Jobma inesö yȩbo̧, –jö̧ba̧lö.

³² —Ötjöwe, Dios öba a'otjö dakwö chi̧sȩbobö wene jwibö chö̧ji̧ma. Ötjö chö̧ji̧danö, Diosma jojoso̧da ö̧jitjö̧ma, bakobe lȩekwa luwo̧ öba a'o dichibobö ötibena, wene jwibo̧ chö̧ji̧ chi̧sȩbakobetjö̧. Jo̧kwajayonö ötjö chö̧ji̧danö jö̧kö̧ Diosma, jo̧bama Diosbo̧, jojoso̧bö̧kö̧.

³³ Jau, Diosbi, ötjöbi duluwo̧ lȩekwa luwo̧ ö̧jitjö̧ma, dö̧'da̧de ja̧nö a̧ja̧kwena, dite jweinö yöawojobö jö̧ba̧lö, ja̧danö ökwödönö lȩekwa weena. Jo̧kwaijayonö, jobekwöbo̧ lȩekwa luwo̧ deobe, Diosda inesö la'aka luwo̧ ö̧jobetjö̧, ja̧danö dö̧'da̧de ja̧nö yöawakwo̧ lȩekwa luwo̧ deobe.

³⁴ —¡Ötjöwe, jwiinö Dios lȩebökwesa, jwiinö yetaibanö lȩebökwesa! Dios ötjönö lȩebi̧, jwiinö yetaibanö lȩebi̧ kaatibobö chösöda.

³⁵ Ötjönö lȩebi̧ kaatibitjö̧ma, yebabökönö jo̧ba öba a'o yötawena. Jau, chöwaisa ötjöma, isabenö sulabenö ja̧binö̧kö̧sa jö̧ba̧lö, ja̧danö ötjönö lȩebi̧ kaatibitjö̧ma, yebabökönö jo̧ba öba a'o ja̧nö labebö lobö yötawena, —jö̧balö yöa̧linobe Jobma.