Diosnö ösödo̧ Job mikwo̧ usula emawina jawa 8 - Dios Iwene

Bildad Jobnö, sulabenö omukwato̧ja, sulabenö kwomukwati̧ kabatibö balewachi, jö̧ba̧lö wajwibö yöa̧lina jawa

¹ Jejenö Job yöa̧liökwe, Suah niji jojo Bildad mikwo̧ma öpöjödö atadinobe, baikwö:

² —Job, yöka̧li̧ma, omöna, sule jwa̧le'epjo jwa̧le'ewi̧danö yöba̧loja. Dokwa lekwe ja̧ omöna jawa yöka̧lakwa̧da? Sulabenö yöka̧la Job.

³ —La'akatjöda sulabenö lȩbȩbö̧kö̧ Diosma Job, ba̧kwelöjatebö jweinö lȩebo jö̧a̧li̧danöda lȩbebo̧ Okobe Jwiinö Juluwo Diosma.

⁴ Jau Job, Diosma kwitji̧munö lȩbebö, jobadönö kwabö loinobe, jo̧kwajabetjö̧ öwaetjöda öwawobe, kwi̧tji̧mu sulabenö ja̧tjiökwe, jobadönö lȩbebö kwabö loinobe, jö̧ba̧lö. Sulabenö ja̧böködönö lȩbȩbö̧kö̧ Diosma, jo̧kwajabetjö̧ öwaetjöda öwawobe, jobadönö lȩebinenama, sulabenö ja̧tjina mikwa baibanö jobadönö lȩebinobe, jö̧ba̧lö.

^5-6 —Ökwönö baledi̧bi ja̧danö Job, sulabenö ja̧köbiökwe lȩbebo̧ Diosma, jo̧kwaijayonö sulabenö kwomukwati̧ kabatibö balewachö, jwaikwöda Dios ösödi̧ jawa isakwö, baikwainö otiwanö Dios ösödi̧danö ja̧bö ja̧nö, Okobe Jwiinö Juluwo̧nö lȩlö̧jinö edobö akeba̧litjö̧ma, isabenö akebi̧ a̧ja̧kwö pjaatakwo̧ Diosma. Jau Job, jejenö ja̧bö Diosnö akebiökwe, isabenö a̧la̧ibö pjaatakwo̧ Diosma, ja̧danö ajayinö otiwanö kwö̧jina tjeatakobe, yemidanö otiwanö kwö̧jakobetjö̧.

⁷ Isabenö ajayinö kwö̧jinatjö̧ bajalekwönönö otiwanö pjaatakwo̧ Job, baikwö yötawa: Jwiinö otiwanö ökwönö iyobetjö̧, ajayinö kwujuna̧linama, jwibö kwö̧jinobedanö ichejekwakobe, bajaleapo iyi̧ma, ja̧tjö jwiinö bajalekwönönö iyakobetjö̧.

⁸ —Jau Job, damötjö̧ baledina jawa kwomukwato, ökwödötjö ajayinö ji̧nadö tjöwaisachibina jawa kwomukwato.

⁹ Ökwödöma sule mada tjeminawö̧sa Job, lekwe möle jö̧ködösa bö̧jenöma, ja̧danö döwaisi̧ma, sule ja'yubeda waisadösa, ökwödö babe möle ju̧kwadöma.

¹⁰ Jo̧kwajabetjö̧ isabenö da'dödömine tjöwaisachibina jawatjö kwöwaisachibobö jo̧be Job, da'dödömine yötjawina jawa otiwanö kwa̧ja̧kwo, jobadö tjöwaisachibina jawatjö ökwöbi otiwanö kwöwaisakobetjö̧.

¹¹ —Baikwö wanedö yötawa Job, ojwe ö'öbö pokwi̧ papiro mikwi̧ma, kököemi otiwanö pokwenaji̧? Ojwiyo jwiemi ja̧jaye otiwanö pokwenaji̧?

¹² Kwöwaisa, ina 'witjakwa̧ abönö, o̧bubiya laebonö ojwiyo jwiitjö̧ma, juluwanö kököachibobe ja̧jaye pokwi̧ma, ju'wi pokwi̧tjö bajalekwönönö kököachibobe, ojwiyo jwienama, jö̧tö?

¹³ Jobekwö baledobe okobe deinö Diosnö tjo̧'wo jwibibadönöma Job. Jau, ja̧ pokwi̧ baledi̧danö baledakobe Diosnö öpöjödadönö, –Otiwanö dö̧jakwedösa, –jö̧ba̧lö tjomukwatemi ja'ötjö, waekwakobe, debö tji̧'yakobe.

¹⁴ Jobadö Diosnö öpöjödadö tjo̧'wo tjöwana̧li̧ma, juluwi̧ jwii̧ jawada tjo̧'wo wana̧ladö, wanedö yötawa awöka acha'ba tjo̧'wo tjöwanalobe ichejekwa, ja̧danö juluwi̧ jwiobetjö̧, waekwobe.

¹⁵ Jau, jobadö Diosnö öpöjödadöma idöda tjujuna̧li̧ jawa tjo̧'wo wana̧ladö, –Otiwanö chujuna̧lobetjö̧, otiwanö chö̧jakwo̧sa, –jö̧ba̧lö, jo̧kwaijayonö waekobe, tjujuna̧li̧ jawa 'diinö do̧ba̧lö tjö̧jijayonö, 'diokobetjö̧ waekwobe.

¹⁶ —Ju'wibi wanedö yötawa, Diosnö öpöjödadö tjö̧ji̧ ichejekwi̧ma. Pokwi̧ma, otiwanö 'yoliwemi pokwobe, ja̧danö jawo̧ otiwanö dejatenama, otiwanö pokwobe, batjo bakwemeachibanö.

¹⁷ Jejenö pokwenama, pokwi̧ bö'diyama inawiya do̧alobe, ja̧danö inawiya jȩmibi otiwanö pokwobe.

¹⁸ Jo̧kwaijayonö, jejenö otiwanö pokwijayonö, 'yebö lotjenama, jwiinö baibobe ja̧ pokwi̧ma, ja̧danö ajayinö jobe ji̧najayonö, 'yebö lotjaja̧ ikenama, la'akatjöda pokwinokobedanö ichejekwa.

¹⁹ Jobekwö jo̧be Diosnö öpöjödadö tjö̧ji̧ma. Ajayinö otiwanö tjo̧'wo ösöwanö tjö̧jobedanö ichejekwijayonö, lekwemaökö. Ja'yubenö lekwajabetjö̧ jwiinö debi babibadö, ja̧danö tjö̧jinemi balekwedöda tjö̧jobe. Pokwi̧ juluwanö jwii̧ baibi̧danö, lekwema jö̧kö̧dö, Diosnö öpöjödadöma.

²⁰ —Jejenömaökö Diosnö ösödadönöma Job. Jau Job, Diosma la'akatjöda pjaatökakwo̧, sulabenö ja̧badönöma, ja̧danö ju'wibi la'akatjöda öpöjödökakwo̧, iteda öba a'otjö wene jwibadönöma.

²¹ Jo̧kwajabetjö̧ isabenö jweinö omukwatö jo̧banö kwösöditjö̧ma, isabenö ökwönö pjaatakwo̧, babe kwo'wo tjo̧achijayonö, isabenö kwo̧'wo ösöwachibanö oköbobö pjaatakwo̧, ja̧danö kwo̧'wo ösöwanö jwökeba̧lobö pjaatakwo̧.

²² Kwösödiökwe, jejenö pjaatakwo̧ ökwönö Job, ja̧danö ökwönö pjaatonö, ökwönö öpöjödadö taba lö̧jinö tjö̧jobö weakwo̧. Jau Job, ökwönö pjaatakobe Diosma, jo̧kwaijayonö sulabedönö söbebö loakobe, tjö̧jemi jwiinö baibanö, —jö̧ba̧lö yöa̧linobe Bildadma, Jobnö.