Diosnö ösödo̧ Job mikwo̧ usula emawina jawa 6 - Dios Iwene

Job atadö yöa̧lina jawa

¹ Elifaz yöa̧liökwe, Jobma atadinobe baikwö:

² —Isabenö o̧'wo tjo̧acho̧sa, baikwö wanedö yötawa, okobe jwiinö wene chujuna̧li̧bi, cho̧'wo tjo̧achi̧bi ko̧ko̧dö tjö̧nitjö̧ma, isabenö jwiinö ömöko jö̧a̧lena,

³ okobe jwiinö so̧biapu jwaibalawa ö'öbösa̧putjö bajalekwönönö ömöko jö̧a̧lena ötjö wene chujuna̧li̧ma. Ja̧danö, jejenö ömöki̧tjö̧, omukwatökönö labinö o̧'wo tjo̧achö yöta̧lajabe.

⁴ —Jau, wene chujuna̧li̧ma, baikwö wanedö yötawa, Okobe Jwiinö Juluwo̧ Diosma ötjönö 'böajobedanö ichejekwa, niekwa madeba ji̧ na̧yunö, ja̧danö ja̧ niekwa madebama cho̧'wo luwo̧nö teachajabe ichejekwa. Ölakwabikwawadö metji̧botö jö̧ba̧lö badekwanö tjö̧jamati̧danö, inesö labi̧ jawa chöba a'o i̧sȩbajabe Diosma, jwiinö yetaibanö, isabenö Diostjö wene juna̧lo̧sa ötjöma, ¡ötjöwe!

⁵ —Isabenö cho̧'wo ösöwachibanö pjaatakwawa jwiobetjö̧, cho̧'wo suli̧nö yöba̧lo̧sa, baikwö wanedö yöta̧la: Tebonö jo̧ bulo meje'ye ukwobö ujuna̧lenama, ukwotö jö̧ba̧lö jwöeba̧lenaji̧? Ja̧danö pakayaso̧ kwakwawa ukwonö, a̧wi̧chi̧tjö jwöeba̧lenaji̧? Ja̧maökö, kwöwaisaduwa, sule kwakwawa jwitjenada jwöbeba̧ladö, ja̧danö cho̧'wo ösöwachibokobetjö̧, jwöbeba̧lo̧sa, ötjöbi.

⁶ —Ju'wibi wanedö yötawa: Jojodö sayu jwiinö kwakwawa tjukwenaji̧? Inesö meyuwi̧ kwakwawa sayu jwiinö tjukwenaji̧?

⁷ Kwöködö la'akatjöda, ötjöbi ja̧jaye chukwobö öpöjödo̧sa, –Chöpöjöda chukwökö, –jö̧ba̧lö, ja̧danö ökwö yöka̧laja̧ma, ja̧ meyuwi̧ kwakwawadanö meyuwi̧ Elifaz, cha̧ja̧kwobö chöpöjöda.

^8-9 —Ötjöwe! Diosnö atebajabe, –Kwabö lobitjö, –jö̧ba̧lö, ja̧danö iteda ujulu i̧sȩbö, jwaikwöda ötjönö kwabö loitjö̧ma, chösödo jö̧ta̧lena.

¹⁰ Jau, ba̧kwelöjatebö Sulabe Jwibo̧ Dios wei̧ a̧ja̧kwö chö̧jajabe, jo̧kwajabetjö̧ ö'wö batibitjö̧ma wene jwiinö cho̧'wo ösöwachibena, nöinö inia tjöbö ö'wö batibitjö̧bi, cho̧'wo ösöwachibanö debö chi̧'yena, –Otiwanö ö'wö batibajabe, –jö̧ba̧lö.

¹¹ —Juluwö̧kö̧sa ötjöma, lekwe möle ö'wö batibakwa̧ chiteada̧lobö, babeda ö'wö batibobö chösöda. Jau, cho̧'wo 'dibachibö, lekwe mö̧le chö̧jitjö̧bi, la'akatjö̧da otiwanö chö̧jö̧kakwo̧sa̧ bö̧jȩnöma, jo̧kwajabetjö̧ babeda debö chi̧'yobö chösöda.

¹² Isabenö juluwö̧kö̧sa ötjöma, inawa 'diinö juluwi̧danö juluwö̧kö̧sa, ja̧danö chiteba'oma broncetjö otikwöka'o, lekwe möle cho̧'wo 'dibachibö chiteada̧lobö.

¹³ Jau, ja'yubebi chujulu jwibo̧sa, chöji̧ jawa otikwö lotoböma, ja̧danö bakwo̧bi ötjönö pjabato̧ma deobe, babeda ö'wö batibowe! —jö̧ba̧lö yöa̧linobe Jobma.

Chömöledöma pjabatöködö, jö̧ba̧lö Job jö̧a̧lina jawa

¹⁴ Tupakwö yöa̧linobe Jobma: —Bakwo̧ wene ujuna̧lenama, isabenö iteda ömöledö jo̧banö dö̧sö̧lö̧jinö pjatjatobö jö̧ba̧ladö. Ja̧danö jwaikwöda Okobe Jwiinö Juluwo̧ Diosnö yebabinö omukwatadöma, isabenö tjömöledöso̧nö pjabatadö.

^15-16 Jo̧kwaijayonö jejenö pjabatöködöja, ökwödö chömöledöma, ökwödönö cho̧'wo chöwa̧na̧loböma jwibo̧sa. Ökwödö chömöledöma, ojwe ja'yuwödö kököachibajödödanö ichejekwadöja, baikwö wanedö yötawa: O̧banö ja'yuwödöma welachibanö okwatibobe, hielobi, nievebi isobu baibenama, jwiinö okwatibobe ja̧jaye ojwema, jö̧tö?

¹⁷ Jo̧kwaijayonö, imiame babibö, tubenama, okwatokobe ja̧jaye ojwema, jobeda lo̧ jö̧a̧lijayonö, jwiböda kököachibobe.

¹⁸ Jau, jobeda ojwe lo̧ jö̧a̧lobetjö̧, tea iyadöma manatjö labebö, ojwe la̧jemibe 'ya̧dö, jobetjö ojwiyo tjowotö jö̧ba̧lö, jo̧kwaijayonö kököiawö̧, jojodö deobetjö ojwiyo o̧ti̧tjö ö'wö babibadö.

¹⁹ Tema comunidadtjö ichajadöbi, Saba comunidadtjö ichajadöbi jobe tjichibobe, –Isabenö ja'yuwödötjö dowakwedösa, –jö̧ba̧lö,

²⁰ jo̧kwaijayonö waekwobe, –Dowakwedösa, –jö̧balö tjo̧'wo wa̧na̧lö tjichibijayonö, owöködö. Jau, tjowotö jö̧ba̧lö tjichibijayonö, ojwiyo badekwajöködö, o̧'wo tjo̧achadö batjibanö.

²¹ Ökwödö chömöledöbi ja̧danö, ja̧jaye ojwe ji̧danö ichejekwadöja. Jau chömöledö, pjakataduwo jö̧ka̧la̧duwijayonö, ja'yubebi pjabatöködöja. Inesö wene chöbaledi̧ edö, yebabinö edadöja, pjabatökönö.

²² —Tajawedö ötjönö kwöpöjödaduwobö chömöledö, nöinö ateba̧liawö̧, kwöpöjödaduwaji̧? Nöinö abeba̧lökö̧sa chömöledö, la'akatjöda, –Kwiyaduwotjö, –jö̧ba̧löma abebö̧kö̧sa, jö̧tö? Ja̧danö la'akatjöda, –Kwujuna̧laduwitjö, jelo̧nö kwiyaduwo, ötjönö pjaatakobetjö̧, –jö̧ba̧löbi abebö̧kö̧sa, jö̧tö?

²³ Ja̧danö la'akatjöda, –Chöpöjojo ujulutjö chö̧jibinö pjabataduwi, –jö̧ba̧lö la'akatjöda abebö̧kö̧sa, jö̧tö? Ja̧danö la'akatjöda, –Juluwo̧ ujulutjö chö̧ji̧binö midaduwi, –jö̧ba̧lö la'akatjöda abebö̧kö̧sa, jö̧tö? Jau kwöwaisaduwa chömöledö, la'akatjöda abeba̧lö̧kö̧sa jejenöma, ötjönö kwöpöjödaduwo jö̧ba̧löma, —jö̧ba̧lö yöa̧linobe Jobma, ömöledönö.

Isabenö sulabenö ja̧binö̧kö̧sa, jö̧ba̧lö Job yöa̧lina jawa

²⁴ Tupakwö yöawinobe Jobma, —Chömöledö, ötjönö yöba̧ladöja, –Jobma sulabenö ja̧bo̧, –jöba̧lö. Isabenö sulabenö ja̧tinatjö̧ma, sulabenö ja̧tina jawa yöbawitjö, chöwaisachibobö, chöwaisachibanö kwö̧ba̧ja̧daduwotjö. Jejenö otiwanö kwö̧ba̧ja̧daduwitjö̧ma, 'wiinö babibö a̧ja̧kwö chösödocha, isabenö sulabenö ja̧tinatjö̧ma, kwö̧ba̧jadaduwotjö, chöwaisachibobö.

²⁵ —Jau chömöledö, otiwanö jwebebö yötjawi̧ma isabenö otiwa, a̧ja̧kwadö jweinö tjomukwatobö pjaati̧, jweinö yötjawobetjö̧. Jo̧kwaijayonö jejenömaökö ökwödö yökawaduwi̧ma, –Sulabenö ja̧bo̧ja, –jö̧ba̧lö yöka̧laduwijayonö, suli̧ma di̧yajö jö̧ba̧lö i̧sȩböködöja.

²⁶ Ötjöma usula emawö, jwiinö cho̧'wo tjo̧bekwö yöba̧lo̧sa jweinö, jo̧kwaijayonö yöta̧li̧ öpöjödadöja, –Job yöa̧li̧ma mikwa jwii̧ jawada yöba̧lo̧, –jö̧ba̧lö, ja̧danö jweinö yöta̧lijayonö, yöta̧laja̧ jwekebaduwobö isakwadöja.

²⁷ Ja'yubebi lȩlö̧jinö edöködöja chömöledö, nöinö usula chemawijayonö lȩlö̧inö edöködöja. Baikwö yötawa lȩlö̧jinö edökönö kwö̧jaduwi̧ma: Bakwo̧ löyo̧nö kwedaduwitjö̧ma, pjabatökönö, inawiya jabö alewadöja, ti ömöayo̧ baibakwojobö jö̧ba̧lö. Ja̧danö ju'wibi, kwömöledöso̧ jwibö ö̧jitjö̧ma, jo̧banö pjabatökönö mikwanö iyö lobadöja, ju'wedö tjömöayo̧ baibanö. Isabenö lȩlöjinö edöködöja chömöledö.

²⁸ —Jweinö döbabiyakwena dediakwawaduwo chömöledö, ökwödönö omöna yöta̧lökakwo̧sa chömöledö.

²⁹ Isabenö sulabenö ja̧binö̧kö̧sa chömöledö, jo̧kwajabetjö̧ ötjönö kwomukwataduwi̧, –Jobma sulabenö ja̧bo̧, –jö̧ba̧lö kwomukwataduwi̧ kabatibö, jweinö kwomukwataduwo.

³⁰ Isabenö yöta̧li̧ kwösödaduwobö jo̧be chömöledö, omöna yöba̧lö̧kö̧sa. Jau chömöledö, otiwi̧bi, suli̧bi waiso̧sa ötjöma, ja̧danö omöna yöba̧lökönö, jweinö yöba̧lo̧sa ötjöma, isabenö yöta̧li̧ kwösödaduwobö jo̧be, —jö̧ba̧lö yöa̧linobe Jobma.