Diosnö ösödo̧ Job mikwo̧ usula emawina jawa 5 - Dios Iwene

Elifaz tupakwö wajwibö Jobnö yöa̧lina jawa, wene kwujuna̧li̧ma, ökwöda jawa jö̧ba̧lö

¹ Tupakwö yöawinobe Elifazma, Jobnö: —Isabenö Dios lȩebi̧tjö kwö̧jibobö jwibo̧ja Job, baikwö yötawa: Babe, –Pjabatitjö, –jö̧ba̧lö jwöbo̧ja, jo̧kwaijayonö ökwönö atadakwo̧ma deobe. Ja̧danö inesö juluwadö angeledönö pjatjatobö jwököbijayonö, waekwakobe, bakwo̧bi atadökakobe.

² —Usula emawö ja̧nö, kwödameakwoböma jwiobe Job, baikwö yötawa: Waisanö omukwatöködöma, waisachibökönö jwaikwöda dameakwö ju̧kwadö, ja̧danö ja̧ tjö̧dameakwi̧ma, ö'wö batjibobö ja̧i̧, jö̧tö? Ja̧danö wajwibadöma, ö'wiyabinö edadö ju'wedönö, ja̧danö ö'wiyabinö tjedobetjö̧, ja̧tjö̧ debö 'ya̧dö omukwatöködöma, jö̧tö?

³ —Waisanö omukwatöködö tjomukwati̧danö kwomukwatoko Job, baikwö yötawa: Ötjöma waisanö omukwatöködö tjö̧ji̧ edinasa, baikwö chedina yötawakwö. Bakwo̧ waisanö omukwatö̧kö̧nö chedijatö, ajayinö otiwanö ji̧nanö. Ajayinöma jo̧babi, itji̧mu tupadanö jojodöbi otiwanö tjö̧jakwedö jö̧balö ichejekwijatö, jo̧kwaijayonö jo̧ba ö̧ji̧bi, itji̧mu tjö̧ji̧bi juluwanö suli̧ waekwinobe.

⁴ Jau Job, waisanö omukwatö̧kö̧ itji̧muma, la'akatjöda wene jwiobe jö̧kö̧dö, kabatökönö labobe ja̧nö, wene juna̧ladö. Ja̧danö, lȩekwa luwedö tjöba a'o tjö̧jenama, jobadönö pjabato̧ma bakwo̧bi deobe, ja̧danö jwaikwöda lȩtjȩbawö̧ tju̧ju̧kwobe waisanö omukwatö̧kö̧ i̧tji̧muma.

⁵ —Ju'wibi iteda öbatjo jawa emö̧kö̧ waisanö omukwatö̧kö̧ma. Öbatjo wa̧ji̧jayonö, iteda emö ukwakwa̧ abönö, ju'wedö a̧wi̧chi̧ tjöbadöma ichö naukwadö öbatjo wa̧ji̧ma. Jau, okobe jwiinö öbatjo jawa tjönaukwobe, ösötje sȩötjebiya 'da̧de wa̧ji̧bi tjönaukwobe, jo̧ba waisanö omukwatö̧kö̧ okobe jwiinö jwibo̧ baibanö. Ja̧danö ju'wibi, ajayinö nöinö ujuna̧lijayonö, ju'wedö idöda tjemotö jö̧ba̧ladöma, jo̧ba itea 'dötjebobe, jwienanö baibanö.

⁶ —Ju'wibi yötawakwö Job: Ökwödö bö̧je jojodö wene dujuna̧li̧ma, nijiso̧pjatjö ichökö ji̧, ja̧danö wene dujuna̧li̧ma, nijitjö pokwökö ji̧.

⁷ Baikwö wanedö yötawa bö̧je jojodö wene tjujuna̧li̧ma: Ökwöla ubenama, ökwöla ubö kaami̧ jawa ba̧kwelöjatebö möakwö kaamobe, jö̧tö? Ja̧danö, tjojo'do jeminelö, ö'wö batjibenanö kabatö, bö̧je jojodöma ba̧kwelöjatebö wene ju̧na̧ladö, bö̧je jojodötjobetjö̧, —jö̧ba̧lö yöa̧linobe.

Sulabenö kwomukwati̧ kabatibö, balewachö Diosnö akebo, Elifaz Jobnö wajwibö yöa̧lina jawa

⁸ Tupakwö yöa̧linobe Elifazma, Jobnö: —Job, ökwö usula kwemawi̧danö, ötjöbi usula chemawitjö̧ma, jweinö omukwatö, Diosnö atebena, lȩlöjinö edö pjaatobö. Jau Job, ötjöma Diosnö atebena, –Chuluwo̧ Dios, isabenö usula emawo̧sa, lȩlöjinö edö pjakatobö atebakwö, –Diosnöda atebo jö̧ta̧lena. Ökwöbi, tajawedö jejenö akebokobeda?

⁹ Jau Job, Diosnöda akebobö jo̧be, baikwö yötawa: Diosma inesö otiwi̧ jawa otido̧, bö̧je jojodö wajwidi jawama. Isabenö nöinö inesö otiwi̧ jawa otido̧ Diosma, dö̧ba̧jadökenanö iteda ujulu i̧sȩbö, otiwi̧ jawa otido̧ Diosma.

¹⁰ —Jau Job, baikwö yötawakwö Dios otidi̧ jawama: Diosma ojwiyo o̧bobö webo̧, döbatjiju otiwanö pokwakobetjö̧, ojwiyo otiwanö webo̧ Diosma.

¹¹ Ja̧danö, ju'wibi, –Mikwawöködösa, –jö̧ba̧lö omukwatadönö kabebö juno̧ Diosma, mikwawadö batjibanö. Ja̧danö budekwadönö kabebö juno̧, tjo̧'wo ösöwachibanö wene jwiena tjö̧jobö.

¹² —Ja̧danö ju'wibi, suli̧ tjöwaedotö jö̧ba̧ladö suli̧ tjöwaedakwa̧ waisanö omukwatö tjujunijayonö, otiwanö tjöbeba̧lö pjabato̧ Diosma, omukwatö tjujunaja̧ badekwachinö suli̧ tjöwaedapji jö̧balö.

¹³ Jau Job, isabenö tjöeba̧lobö waiso̧ Diosma, suli̧ tjöwaedotö jö̧baladö waisanö suli̧ tjöwaedakwa̧ omukwatö tjujunijayonö, ja̧ waisanö tjomukwataja̧ balewö lobo̧ Diosma, jobadönö 'daliwa baibanö, suli̧ tjöwaedotö jö̧balö omukwatö tjujunaja̧ baledökönö.

¹⁴ Baikwö wanedö yötawa, jobadö suli̧ tjöwaedotö jö̧ba̧lö omukwatadönö: Dios tjöeba̧liawö, dewijayonö yȩa'wo okwa kwetjachobedanö kwebachadö, möle ja'ö jawo̧ jweinö ö̧jenabi, yö̧te ja'ö diwanö kwetjachi̧danö kwebachadö, Dios tjöeba̧lobetjö̧.

¹⁵ —Ja̧danö ju'wibi otiwanö pjabato̧ Diosma, jwibadönöma. Jau Job, otiwanö tjöbeba̧lö pjabato̧ Diosma jwibadönöma, jobadönö kwabö lotjapji jö̧ba̧lö, ja̧danö juluwadö jobadönö suli̧ tjöwaedapji jö̧balö.

¹⁶ Jo̧kwajabetjö̧ jwibadö tjösödobö jo̧be, –Isabenö Dios pjaatakwawö̧sa, –jö̧ba̧lö, Diosma sulabedö 'wi̧nö batjibanö tjöeba̧lobetjö̧.

¹⁷ —Isabenö yötawakwö Job, babe ökwönö baledi̧ jawama: Sulabenö ja̧köbiökwe, Diosma ökwönö jweebotö jö̧ba̧lö lȩbebo̧. Ja̧danö, Dios jweebi̧ öpöjödökönö, otiwanö kwa̧ja̧kwitjö̧ma, isabenö kwo̧'wo ösöwachibanö kwö̧jakwo̧ja. Jau Job, Diosma bakwo̧nö jweebitjö̧ma, isabenö o̧'wo ösöwanö ö̧jobö jo̧be jweebökwema, –Dios otiwanö pjaatökwesa, –jö̧ba̧lö. Jo̧kwajabetjö̧ kwöpöjödoko Okobe Jwiinö Juluwo̧ Dios ökwönö jweebi̧ma, baikwö labebö lobö yötawa:

¹⁸ Jojodönö jweebotö jö̧ba̧lö, isabenö inia tjötjinö webo̧ Diosma, jo̧kwaijayonö ju'wibi, seachibanö pjabato̧. Jau Job, ajayinö jwebebö kwaijayonö, jemi ikenama ju'wibi otiwachibanö otidö lobo̧ Diosma, jo̧kwajabetjö̧ otiwanö jweebi̧ kwa̧ja̧kwo, öpöjödökönö.

¹⁹ —Jau Job, Diosnö kwa̧ja̧kwitjö̧ma, isabenö otiwanö kwö̧ji̧binö pjaatakwo̧ja. Jo̧banö ösödö kwa̧ja̧kwitjö̧ma, okobe jwiinö sulabenö baledi̧tjö̧ kwö̧jibinö pjaatakwo̧ Diosma, baikwö labebö lobö yötawa:

²⁰ A̧wi̧chi̧ tjököbenama, a̧wi̧chi̧tjö debö kwi̧'yapji jö̧ba̧lö kwö̧ji̧binö pjaatakwo̧ Diosma. Ja̧danö ju'wibi, tjölakwabikwawenama, ökwönö kwabö lotjapji jö̧ba̧lö tjöeba̧lakwo̧ Diosma.

²¹ Ja̧danö ju'wibi, ökwönö sulabenö omöna yötja̧lapji jö̧ba̧lö, otiwanö tjöeba̧lakwo̧ Diosma. Ja̧danö Dios ökwönö tjöeba̧lobetjö̧, kwipjeatenia söbebö lotjenama, yebabökönö kwö̧jakwo̧ja, –Dios otiwanö pjaatökwesa, –jö̧ba̧lö.

^22-23 —Ja̧danö ju'wibi, jelobetenia tjöbatjiju suli̧ waekwiawö̧, a̧wi̧chi̧ tjötjenabi, wene jwiinö otiwanö kwo̧'wo ösöwanö oköbakwo̧ja Job, yebabökönö, baikwö wanedö yötawa: Jelobetenia tjöbatjiju pokwapji jö̧ba̧lö, inawiya tjöeba̧lijayonö, Dios ökwönö pjaatobetjö̧, inawiyama ja'yubebi tjöeba̧lökakobe kwöbatjoma, ja̧danö otiwanö kwöbatjo wa̧ji̧ kwukwakwo̧ja. Ja̧danö ju'wibi labidö tebonö ju̧kwadö tjö̧jijayonö yekabökakwo̧ja, baikwö wanedö yötawa: Dios ökwönö pjaatobetjö̧, ökwökwö tebonö ju̧kwadökwö dösölö̧jinö kwö̧jaduwakwa̧ wene bakobe yöbawö kwö̧jinaduwobedanö ichejekwakobe, ju'wedönö suli̧ tjöwaedonö, tebonö ju̧kwadö labidöma ja'yubebi ökwönö suli̧ tjöwaedökakobetjö̧.

²⁴ —Ja̧danö ju'wibi, Dios ökwönö pjaatobetjö̧, kwöwaisakwo̧ja, –Chejutjö wene jwia, la'akatjö̧da tjönaukwökeju, –jö̧ba̧lö. Jau Job, okobe jwiinö kwitea ba̧ja̧dö kwedakwo̧ja, ja̧danö ba̧ja̧dö kwedenama, okobe jwiinö kwöbadekwakwo̧ja, ja'yubebi jwiökakobe, Dios otiwanö pjaatobetjö̧.

²⁵ Ju'wibi kwöwaisakwo̧ja, –Dios pjaatobetjö, chi̧tji̧mu tupadanö jojodöma isabenö tjö̧ba̧jekwachakwedö, meje'ye nöinö pokwö ba̧jȩkwachi̧danö, chi̧tji̧mu tupadanö jojodöbi isabenö tjö̧ba̧jekwachakwedö, –jö̧ba̧lö kwo̧'wo ösöwanö kwö̧jakwo̧ja.

²⁶ —Ja̧danö ju'wibi, ina möayo̧ kwö̧jayi woköbökakwo̧ja Job, Dios pjaatobetjö̧, jwiinö pöe babibajo̧da bajaliyanö woköbakwo̧ja, baikwö wanedö yötawa: Trigo ochobia juluwanö 'wibö ko̧ko̧dö lödöködö ina ö'dö̧wayima, sule otiwanö da̧peachö kaatena, otiwanö wa̧jö ajöchenada emadö, jö̧tö? Ja̧danö, Dios otiwanö pjaatobetjö̧, sule pöe babibajo̧, woköbo jö̧ka̧lenada ö'wö bakibakwo̧ja, Diosnö kwa̧ja̧kwiökwe otiwanö pjaatobetjö̧.

²⁷ —Jobekwö döwaisachibina jawa yötawakwö Job, jweinö kwomukwatobö. Jau Job, ökwödöma bö̧je jojodö dö̧ji̧ waisachö dedajabe, ja̧danö waisachajadö dedajabe, isabenö yötawaja̧danö jo̧be jö̧ba̧lö. Jo̧kwajabetjö̧ otiwanö jwebebö yötawaja̧ kwa̧ja̧kwo Job, ja̧danö a̧ja̧kwajo̧, sulabenö kwomukwati̧ kabatibö kwöbalewacho, yötawaja̧danö Dios ökwönö otiwanö pjaatakobetjö̧, —jö̧ba̧lö yöa̧linobe Elifazma, Jobnö.