Diosnö ösödo̧ Job mikwo̧ usula emawina jawa 42 - Dios Iwene

Job Diosnö atadina jawa

¹ Isabenö Jo̧ jobekwö yöa̧liökwe, Jobma atadö yöa̧linobe, baikwö:

² —Chuluwo̧ Dios, chöwaisa, –Okobe jwiinö kwotidobö juluwo̧ja, –jö̧ba̧lö. Chöwaisa, –ju'wi jaye kwotidobö omudawö kwujunitjö̧ma, bakwo̧bi tjöeba̧lobö jwibo̧, –jö̧ba̧lö.

³ —Chuluwo̧, abebö kwa̧ja̧kwatö, –Ökwöma tiköba Job, ötjö waisanö omukwatö chujunaja̧ kwöpöjödobö, -Diosma sulabenö webo̧, –jö̧ba̧lö? Chuluwo̧, baikwö abebö kwa̧ja̧kwaja̧ atadö yöta̧lakwö: Isabenö okwa jawa waisanö chomukwatokobetjö̧, sulabenö yöta̧latö. Jau, ökwö omudawö kwujuninama, ötjö chomukwati̧tjö̧ bajalekwönönö inesö otiwi̧ jawa omudawö kwujuninajayonö, ötjöma wajwibö, sulabenö yöta̧latö.

⁴ —Ja̧danö chuluwo, ju'wibi yöka̧latö, –'Wii̧nö ja̧nö, otiwanö yöta̧lakwa̧ kwa̧ja̧kwo, ja̧danö ökwönö abebö cha̧ja̧kwocha, ja̧danö kwatadakwo̧ja, –jö̧ba̧lö yöka̧latö chuluwo̧.

⁵ Baikwö atadö yöta̧lakwö chuluwo: Ajayinö sule a̧ja̧kwöda ökwönö yötjawi̧ cha̧ja̧kwijatö. Jo̧kwaijayonö babema ötjöda chöbajalenö ökwönö chedajabe,

⁶ ja̧danö ökwönö edajo̧, ajayinö omukwatö yöta̧laja̧ma chötabakwobe, –Ötjö Jobma isabenö mikwawö̧kö̧sa, yöta̧loko jawa sulabenö yöta̧lajabe, –jö̧ba̧lö. Jau chuluwo̧, sulabenö chomukwataja̧ kabatibö chöbalewachajabe, jadanö chomukwati̧ chöbalewachaja̧ i̧sȩbö, nijiso̧pjanöbi, ökwölaso̧pjanöbi bamato̧sa, –Isabenö Dios öba a'otjö mikwawö̧kö̧sa, sulabenö ja̧köba, jö̧ba̧lö Diosnö̧ yöta̧lobö, —jö̧ba̧lö atadinobe Jobma Diosnö.

Isabenö Jo̧ Job ömöledönö yöa̧lina jawa

⁷ Jejenö Jobkwö yöba̧lakwawajo̧, Isabenö Jo̧ma Job ömöledöso̧ Elifaznö yöa̧linobe, —Isabenö dameakwo̧sa ökwönöbi, kwömöledö Bildadnöbi, Zofarnöbi, isabenö ö'öbönö ötjönö yöka̧laja̧duwobetjö̧. Jau Elifaz, chömöayo̧ Job jweinö ötjönö yöa̧li̧danöma yöba̧löködöja.

⁸ Jo̧kwajabetjö̧, ökwödönö dameakwö lȩtebapji jö̧ba̧lö, baikwö wetaduwakwö: Jelemutjö du̧ju̧taja pa̧ka̧yadö ömadönöbi, jelemutjö du̧ju̧taja obejadö ömadönöbi emajadö, chömöayo̧ Job ö̧jobekwö öbibö kwi̧'yaduwo, ja̧danö ichibajadö, jwiinö ubinö iyawa baibanö kwabö juwö kwiyaduwotjö. Jejenö kwiyaduwenama, chömöayo̧ Jobma ötjönö aebakobe ökwödönö, ökwödönö lȩtebapji jö̧ba̧lö, jadanö Job aebaja̧ cha̧ja̧kwakwo̧sa. Jau Elifaz, Job jweinö ötjönö yöa̧li̧danö yöba̧lökönö, ökwödöma isabenö wajwibö sulabenö yöka̧laduwajabe ötjönö, ja̧danö jejenö sulabenö yöka̧laduwi̧tjö̧, isabenö ökwödönö lȩtebobö jo̧be, jo̧kwaijayonö wetaja̧danö iyawa kwiyaduwaja̧ ikena Job ötjönö aebitjö̧ma, a̧ja̧kwö lȩlöjinö chedakwo̧sa ökwödönö, —jö̧ba̧lö weinobe Diosma.

⁹ Jejenö weawö̧, Elifazbi, Bildadbi, Zofarbi Isabenö Jo̧ wei̧danö ja̧tjinobe, ja̧danö Jobma jobadönö aebinobe, Dios jobadönö lȩebapji jö̧ba̧lö. Jejenö aebökwe, Isabenö Jo̧ma Job aebi̧ a̧ja̧kwö, jobadönö lȩebinokobe, —Chömöayo̧ chösödökwe aebi̧tjö̧, lȩlö̧jinö chedocha, —jö̧ba̧lö.

Job yemidanö otiwanö ö̧jina jawa

¹⁰ Jemi ikenama, Job ömöledönö lȩlöjinö edobö aebaja̧ ikenama, Isabenö Jo̧ma yemidanö otiwanö pjabatö iyinobe Jobnö. Okobe jwiinö ajayinö ujuna̧lina jawa, ajayinö Jobtjö 'döebina jawama, Jobnö tjebatajö iyinobe. Isabenö otiwanö jo̧banö iyinobe, ajayinö ujuna̧linatjö bajalekwönönö dötölatajanö ujuna̧lenanö baibanö.

¹¹ Ja̧danö okobe deinö Job öjawo̧döbi, ajayinö ömöledöbinadöbi yemidanö Jo̧b ö̧jobekwö tjichinobe, ja̧danö Job ejutjö jo̧bakwö ba̧nö tjukwinobe. Jobkwö janö, jo̧banö pjatatotö jö̧ba̧lö o̧'wo ösöwachibobö yötja̧lakwawinobe. Ajayinö Isabenö Jo̧ nöinö wene öbaledobö weinobetjö̧, ja̧tjö o̧'wo ösöwachibanö seachibobö pjatjatinobe. Ja̧danö, ju'wibi okobe deinö bakwo̧nökwena tjiteatjö Jobnö tjiyinobe, plata bakwa̧pa̧bi, orotjö otikwayu sasiyu bakwayubi.

¹² Isabenö otiwanö Jobnö iyinobe Isabenö Jo̧ma. Usula emawakwa abönö otiwanö iyinatjö bajalekwönönö, usula emawaja̧ o̧pe jwiinö otiwanö iyinobe. Jejenö otiwanö iyiökwe, obejadö catorce milbedönö ajikwinobe Jobma, ja̧danö camellodö seis milbedönö ajikwinobe, ja̧danö pakayadö dos milbedönö ajikwinobe, ja̧danö bu̧lu̧dö ya̧dönö, milbedönö ajikwinobe.

¹³ Ju'wibi itji̧munöbi yemidanö 'yaebinobe, itji̧mu ömadö jelemutjö̧ du̧ju̧tajanöbi, itji̧mu ya̧dö wamedukwanöbi.

¹⁴ Job itji̧mu ya̧dönö, baikwö imidinobe: Abönö pöonö, Jemima jö̧ba̧lö imidinobe, ja̧danö jöjawujunö Cesia jö̧ba̧lö imidinobe, jadanö bajaliya luwujunö Keren-hapuc jö̧ba̧lö imidinobe.

¹⁵ Isabenö otiwadö tjö̧jinobe Job itji̧mu ya̧döma, okobe jwiinö bö̧jȩ ba̧kwemeachibanö, Job itji̧mujaye ya̧dö otiwadö detjinobe. Ja̧danö, iteda itji̧mu ömadönö iyi̧danö, Jobma jobadö itji̧mu ya̧dönöbi iteatjö tjemobö iyinobe.

¹⁶ Job wene öbaledaja̧ ikenama, ina lekwe möle ö̧jinobe, ciento cuarenta o̧biya baibanö. Isabenö jwiinö lekwe ö̧jinobe, iteda ö̧'dö̧dö tupadanö tjö̧'dö̧dönöbi edenanö baibanö.

¹⁷ Ikenama, jwiinö pöe babibajo̧, jwiinö nöinö o̧biya juna̧lo̧ ö'wö baibinobe Jobma.