Diosnö ösödo̧ Job mikwo̧ usula emawina jawa 41 - Dios Iwene

¹ Tupakwö yöa̧linobe Diosma: —Inesö juluwo̧ jwaibalawanö jo̧ Leviatan ötjabökwenöbi kwomukwato ja̧danö. Jo̧banö lö̧'awö, a̧jwa̧sopjanö do̧katenaji̧? A̧la̧chi'bonö, aaponö di̧katenaji̧?

² A̧lachi'bo i̧su̧nö kwupu'yebobö kwöwaisenaji̧, kwösödena jo̧banö ökibakobetjö̧? Ja̧danö a̧jȩnö akwatö kwö̧lö̧'awobö kwöwaisenaji̧.

³ Kwujuluwajökwe, jo̧banö kwejatobö aeba̧lenaji̧? Jo̧banö lȩlöjinö kwedobö, budekwö aebenaji̧?

⁴ Kwujuluwajökwe, –Isabenö weköbi̧ chotidakwo̧sa, –jö̧ba̧lö yöbawö ujunenaji̧, ja̧danö yöbawö junajo̧, ina 'yaa̧layi, weköbi̧ otidenaji̧?

⁵ Jojodö pji̧yu̧nö döyötö, ajwikwö tjalewi̧danö, Leviatannö döyötajo̧, jo̧bakwö kwalewenaji̧? Jo̧banö a̧la̧chi'bonö di̧batajo̧, kwömöayedö ya̧dö tjajwi baibanö kwiyenaji̧?

⁶ Jo̧banö do̧batajadö, kwakwawa iyawedöma, kwakwawa iyawejutjö jo̧banö mikwanö tjiyobö jö̧tja̧lenaji̧? Ba̧i̧ tjiyidanö, nöbo̧obetjö̧, itebiya 'wi'wibö tjiyenaji̧?

⁷ Jo̧banö kwujuluwotö jö̧ba̧lö, otokwötebiyanö, i̧sȩdo doköbenaji̧? Uubi otokwötenö doköbenaji̧?

⁸ Kwöwaisa Job, bakwötanöbi jo̧banö kwujuluwobö kwölakwabikwawitjö̧ma, isabenö labinö ölakwabikwawakwo̧, ja̧danö kwujuluwobö jö̧ka̧laja̧ma waekwena, jö̧tö? Jau, labinö ölakwabikwawaja̧ la'akatjöda kwo'wo sökibökena, jadanö la'akatjöda yemidanö jo̧banö kwujuluwobö kwisakwökena, –Jwiinö chujulutjö bajalekwönönö juluwo̧, –jö̧ba̧lö.

⁹ —Jau Job, Leviatannö tjujuluwoböma juluwöködö jojodö la'akatjöda, ja̧danö jobanö tjujuluwobö jö̧ba̧ladöma, jo̧banö edö yebabinö tjujuluwobö tjomukwataja̧ma kabatibadö.

¹⁰ Jwiinö labo̧obetjö̧, bakwo̧bi jobanö iwiludoböma omukwatökena, –Chiwiluditjö̧ma, debö chi̧'yena, –jö̧ba̧lö, jö̧tö? Ötjö jo̧banö otidinaja? Bakwo̧bi ötjökwö ölakwabikwawotö jö̧ba̧lö, chöba a'o öjamatobö jȩnaji̧?

¹¹ Bakwo̧bi ötjönö iyajo̧, –Chiyaja̧ tjekatobö wetakwö, –jö̧ba̧lö ötjönö weobö jȩnaji̧? Ja̧maökö Job. Kwöwaisa, okobe jwiinö bö̧jȩnö ji̧ma, ötjöda chitea jo̧be, bakwo̧bi, –Tjebatitjö, –jö̧ba̧lö weoböma jwibo̧.

¹² —Tupakwö yöta̧la chotidinökwe Leviatannö, baikwö: Isabenö juluwo̧ baibanö chotidijatö, iteba'obi, ibȩjwa̧bi otiwo̧, juluwo̧ baibanö chotidijanötö.

¹³ Jo̧bama, tjöekwa̧do̧ 'dia̧do̧ 'duawobedanö ichejekwa, ja̧danö bakwobi ja̧ tjöekwa̧do̧ kaoböma jwiobe. Bakwo̧bi tjöekwa̧do̧ söbibö, okwa doobö jwiobe.

¹⁴ Ja̧danö bakwobi jo̧ba aa po̧ebobö jwibo̧, oo'ye jwiinö yetjaibo'ye ujuna̧lobetjö̧.

¹⁵ Ja̧danö ibekabi titjatobö jwiobe, baikwö wanedö yötawa: Ibeka ba̧kwemeachibanö nöinö tjöekwa̧ öpiya juna̧lo̧ ichejekwa, 'diinö dötewinö.

¹⁶ Jau, bakwapi jelepikwö jwiinö yöneawobetjö̧, imiyupjobi teachobö jwiobe.

¹⁷ Jwiinö tjöekwo̧ jo̧ba Leviatanma, ibeka tjöekwa öpiyama, bakobe do̧a̧lakwawobedanö ichejekwa, jadanö bakwapibi 'dötjebobö jwiobe.

¹⁸ —Jo̧ba Leviatan ja'i̧enama, dewi̧ ja'i̧obedanö ichejekwa, ja̧danö obajalebiyama, yeayi duwinö dewachi̧danö, öbajalebiya duwinö salöobe.

¹⁹ Aatjö, ökwöla laebobedanö ichejekwa, aatjö ökwöla pjuobedanö ichejekwa.

²⁰ Isu̧tjö, imiupjo laebobedanö ichejekwa, isa'ye juwö imuyupjo laebi̧danö, ja̧danö ojwiyo tubedö ja̧tjena laebi̧danö.

²¹ Pjuenama, aatjö ökwöla pjuobedanö ichejekwa, ubö̧'a̧bi nötedö pjubo̧ jo̧bama.

²² —Ulu̧me'abi jwiinö juluwo̧ jo̧ba Leviatanma, kweachi̧tenia, jojodö yetjaibanö kwebacho̧.

²³ Ukwa'wo i̧sȩdo̧bi isabenö jwiinö 'dibo̧ jo̧bama, ukwa'wobi dobö tjujuluwobö jwiobe.

²⁴ Ja'yubebi yebabö̧kö̧ jo̧bama, wanedö yötawa yebabökönö ö̧ji̧ma: Omajadema inawa 'diawa, trigoso̧pja otikwawa, teebesawa 'dii̧danö omajade 'dibo̧ jo̧bama, ja'yubebi yebabö̧kö̧.

²⁵ —Ja̧danö Leviatan meibotö jö̧ba̧lö a̧la̧ibenama, juluwadöbi jwiinö yetjaibobe, opjolachibiawö̧, yebabinö öba a'otjö döbibajadö.

²⁶ Bakwo̧ kwölöte'onö jo̧banö kwaitjö̧ma, ja'yubebi suli̧ öwaedöbö jwiena, ja̧danö otokwötekwöbi, nayu̧nökwöbi, ju'wi tiatakwawa jawakwöbi tiatobö jö̧a̧litjö̧bi, waekwena.

²⁷ Jwiinö juluwo̧obetjö̧, Leviatan edemi, 'dii̧ jawama, isa'ye kököa'yedanö ji̧ ichejekwa, jadanö broncema, towisöte 'dolowötedanö ichejekwa.

²⁸ Jojodö nayu̧nö 'bötjitö̧ma, tjöba a'o döbibajö̧kö̧, ja̧danö inawiya wökwebö tjikwitjö̧ma, edemi sule trigo sula'wo tjikwobedanö ichejekwa.

²⁹ Ö̧sö̧'anö kwatjitjö̧ma, sule isa'yenö kwatjajabedanö ichejekwa, ja̧danö otokwöte tjikwi̧ ökwöi̧ a̧ja̧kwenama, yebabökönö a̧ja̧kwö obo̧ Leviatanma.

³⁰ —Leviatan ukwa'wo i̧sȩdo̧bi, i̧sa̧yu 'daekwayu 'duawobedanö ichejekwa, ja̧danö lete'o jȩmi töbö kweachenama, niji soawaka soi̧danö lete'o sobo̧.

³¹ Jwaibalawanö kwöenama, ojwiyo döbebö sö̧löakwawobe, ja̧danö jalachibenama itjei'wo jamatinö jalachibo̧.

³² Jwaibalawanö kwöbö kweachenama, nöinö itjei'wo baibanö kwebacho̧, jwiinö itjei'wo baibanö kweachobetjö̧, jwaibalawa öwö'ye dewa'ye ujuna̧lobedanö ichejekwi̧nö kebacho̧.

³³ —Isabenö juluwo̧ chotidinökwe Leviatanma, jo̧bajayo̧ juluwo̧ma deobe bö̧jetjöma. Isabenö ja'yubebi yebabö̧kö̧ jo̧bama.

³⁴ Okobe deinö chotidinawö̧tjö, juluwadösa jö̧ba̧ladö inesö la'aka tjuluwo̧ jo̧bada ichejekwa, ju'wedö juluwadösa jö̧baladötjö bajalekwönönö juluwo̧obetjö̧, —jö̧ba̧lö yöa̧linobe Diosma Jobnö, —Jo̧banö yekabi̧tjö bajalekwönönö, ötjönöda yekabo jö̧ka̧lökwesa, —jö̧ba̧lö.