Diosnö ösödo̧ Job mikwo̧ usula emawina jawa 40 - Dios Iwene

¹ Jobekwö yöba̧lajo̧, Isabenö Jo̧ma Jobnö yöa̧linobe:

² —Job, ökwöma ötjö Okobe Jwiinö Juluwo̧ Dioskwö jwöjwöbakwawö, jwekebobö jö̧ka̧li̧ji̧? Ötjö Diosnö yöka̧lajabe, –Diosma sulabenö ja̧ajabe, –jö̧ba̧lö, tajawedö abebö cha̧ja̧kwaja̧ atadökönö kwö̧jobeda? Isabenö ötjönö jwekebobö ji̧tjö̧ma, kwatado jö̧ka̧lena, —jö̧ba̧lö yöa̧linobe.

Job Diosnö atadina jawa

³ Isabenö Jo̧ jejenö yöa̧lökwe, Jobma atadinobe baikwö:

⁴ —Chuluwo Dios, ötjöma isabenö mikwawö̧kö̧sa. Isabenö atadakwawa jwibo̧sa, yöta̧loböma jwiobe. Jau chuluwo, chömamunö chaa mu'dökwibö, 'wii̧nö batibakwo̧sa.

⁵ Ida̧ökö yöta̧lo jö̧ta̧li̧tjö bajalekwönönö sulabenö yöta̧latö chuluwo̧, bemi tupakwö yöba̧lökönö, 'wii̧nö chö̧jakwosa, —jö̧ba̧lö atadinobe Jobma.

Isabenö Jo̧ yemidanö Jobnö yöa̧lina jawa

⁶ Jejenö atadökwe, jwa̧lȩ'epjo doibajelö yöa̧linobe Diosma, Jobnö:

⁷ —Babe yemidanö ökwönö abebö cha̧ja̧kwakwo̧sa, jadanö atebökwe kwatadotjö. Jo̧kwajabetjö̧ jojo juluwo̧ otidobö a̧la̧ibi̧danö, chöba a'o a̧la̧ibi, otiwanö kwatadakobetjö̧.

⁸ Ötjöma inesö lȩekwa luwo̧ jo̧sa, kwedemi lȩekwa yötawaja̧ öpöjödö, –Lȩekwa yöawo jö̧a̧lidanö yöbawö̧kö̧ Diosma, –jö̧ba̧lö lȩekwa yötawaja̧ söbebö loköbobö jȩnaji̧? Ja̧danö, ökwöda, –Ötjö Jobma wene jwibo̧sa, –jö̧ba̧lö yöka̧lakobetjö̧, ötjö Diosnö, –Sulabenö ja̧bo̧, –jö̧ba̧lö yöka̧lobö jȩnaji̧?

⁹ —Ökwöma ötjö Dios chujuluwi̧danö, juluwo̧köbobeji̧? Böba ökwödö, chiwene ökwöi̧danö ökwöda kwiwene ökwödobö juluwo̧köbobeji̧?

¹⁰ Chujuluwi̧danö kwujuluwitjö̧ma, ötjö chi̧sekwi̧danö, kwujulu kwi̧sekwo. Kamijido̧ 'dutjawi̧danö, inesö la'aka luwedö tjujulu 'dukawo, salöinö kwujulubi, otiwanö okwönö tjomukwati̧bi 'dukawo.

¹¹ —Sulabedönö kwödameakwi̧ i̧sȩbö, jelobekwena ju̧kwadönö lȩkebo, ja̧danö okobe deinö otiwadösa jö̧ba̧lö sulabenö omukwatadönö, nijakwö batjibanö jwibatö loköbo.

¹² Jau, okobe deinö otiwadösa jö̧ba̧ladönö, jobadönö edöda mikwawöködö batjibanö jwibatö loköbo, jenada sulabedönö söbebö loköbo.

¹³ Jobadönö söbebö lobajo̧, nijiso̧pja̧nö o̧tjö loköbo, bakobe ö'wö babibajadö tjuju̧kwemi tjö̧jobö, pje'datö loköbo.

¹⁴ Jobekwö ja̧köbobö kwujuluwitjö̧ma, ötjöbi ökwönö yöta̧lakwo̧sa, isabenö ökwöda kwujulunö kwö̧jibobö juluwo̧ja, —jö̧ba̧lö jwebebö yöa̧linobe Diosma Jobnö.

¹⁵ Tupakwö yöa̧linobe Diosma, Jobnö: —Ju'wibi yöta̧lakwö Job, hipopotamo ötjabökwenö kwomukwato. Hipopotamobedöma, pakayadö tjukwi̧danö meje'ye kwadö, jadanö ökwönö chotidinadanö, ötjöda jo̧banöbi chotidijatö.

¹⁶ Isabenö ibȩjwi̧ya juluwo̧ jo̧bama, jadanö ukwa'wobi jwiinö juluwo̧.

¹⁷ Öwali'bobi 'dibo̧ jo̧bama, towisöte 'dii̧danö öwali'bo 'dibo̧, ja̧danö ibȩjwa̧ i̧be'bo, 'diinö chubukwinobedanö ichejekwa.

¹⁸ Ja̧danö iwe'ijubi 'dibo̧ jo̧bama, bronze 'diidanö iwe'iju 'dibo̧, ja̧danö i̧bȩjwa̧ 'dii jawatjö otikwobedanö jwiinö 'dibo̧.

¹⁹ —Okobe deinö ötjö Dios chotidinawö̧tjö, bajalekwönönö juluwo̧ baibanö chotidinökwe jo̧ba hipopotamo ötjabökwenö. Isabenö juluwo̧ baibanö chotidinökwe jo̧banö, ja̧danö ötjöda jo̧banö chotidinobetjö̧, jo̧banö juluwo̧sa.

²⁰ Mösa'iju ju'wedö tebonö jukwadö tjalewemima, jo̧ba u̧kwa pokwobe,

^21-22 ja̧danö lotos towi teebe isadanö ö'wachö aba̧lo̧. Jau, lotos towi teebe, ja̧danö ju'wi towibiya teebe, ojwe isa'ye jȩmi, ojwenö ju̧kwawo̧ jo̧bama.

²³ Isabenö wene jwiinö jo̧ hipopotamoma, ojwe buluwanö okwatibitjö̧bi, yebabö̧kö̧, Jordan ojwe jobanö buluwanö isuwitjö̧bi, wene jwiinö jo̧, jo̧kwada, jö̧ba̧lö.

²⁴ Isabenö juluwo̧ jo̧ba chotidinökwema, eda̧lö ö̧jayi, bakwo̧bi jo̧banö ujuluwobö jwibo̧, 'daliwadanö i̧su̧ tiatobö isakwitjö̧bi, waekwobe, isabenö juluwo̧ baibanö chotidinobetjö̧, —jö̧ba̧lö yöa̧linobe Diosma.