Diosnö ösödo̧ Job mikwo̧ usula emawina jawa 4 - Dios Iwene

Elifaz mikwo̧ wajwibö Jobnö atadina jawa

¹ Job jejenö usula emawö yöa̧liökwe, ömöledöso̧ Elifaz mikwo̧ma yöa̧laja̧ öpöjödö atadinobe Jobnö:

² —Job, ökwönö yöta̧lobö chösöda, ökwönö yöta̧litjö̧ma, öpöjödachibökönö otiwanö kwa̧ja̧kwakwa̧ji̧? Chedemi kwa̧ja̧kwobö kwöpöjödena, jo̧kwaijayonö sulabenö yöka̧laja̧ a̧ja̧kwajo̧, bemi tupakwö atadökönö 'wiinö chö̧boböma jwibo̧sa, atadö yöta̧lobö jo̧be.

³ —Baikwö yötawakwö Job, ökwöma isabenö ba̧jȩkwadö jojodönö ba̧ja̧dö yöbawinaja, ja̧danö ba̧jȩkwadö me'dawadönö tjujuluwachibanö pjabatinaja.

⁴ Jau Job, ju'wedö Diosnö tjösödi̧ katjatibo jö̧tja̧linenama, katjatibapji jö̧ba̧lö pjabatinaja, ja̧danö tupakwönönö tjujuluwachibanö pjabatinaja.

⁵ —Jo̧kwaijayonö belö ju'wedönö pjakatinajayonö, wene ökwönö baibenama, juluwanö me'dawachibo̧ja, kwo̧'wo 'dibachibö kwöbaledo jö̧ka̧lijayonö, juluwanö me'dawachibö o̧'wo tjo̧bekwo̧ja Job.

⁶ —Baikwö yötawakwö Job, isabenö otiwanö yebabinö Diosnö kwösöditjö̧ma, ökwönö pjaatakwa̧ wene kwösödobö jȩna, ja̧danö isabenö Dios wei̧ a̧ja̧kwö kwö̧jinatjö̧ma, isabenö otiwanö kwo̧'wo ösöwanö kwösödobö jȩna, –Dios wei̧ a̧ja̧kwö chö̧jiökwe, isabenö otiwanö pjaatakwo Diosma, –jö̧ba̧lö. Isabenö öwawobe Dios öba a'otjö wene kwujuna̧li̧ma Job, baikwö labebö lobö yötawa:

⁷ Dios öba a'otjö wene jwibo̧ bakwo̧bi, Dios lȩebökwe debö i̧'yinaji̧? Ja̧danö Dios wei̧ a̧ja̧kwö ju̧kwadötjö, Diosma ju'wedönö söbebö loinaji̧? Kwöwaisa Job, la'akatjöda baledajiokobe, sule Dios öba a'otjö wene juna̧ladöda Dios lȩebi̧tjö emadö, jö̧tö?

⁸ —Jau Job, ötjö chedina jawa baikwö yötawa: Dios lȩebawö̧ma, sule sulabenö ja̧binadöda Dios lȩebi̧tjö̧ emadö, baikwö wanedö yötawa: Ödebiya tjödobö sobajadö, jojodö ju'wi jaye ödebiya tjöditjö̧ma, bakwainö tjö̧dina jawa wa̧ji̧da tjemakwedö, jö̧tö? Ja̧danö jojodö sulabenö Dios wei̧ a̧ja̧kwökönö ja̧bö tjö̧jitjö̧ma, isabenö Dios lȩebi̧tjö̧ tjemakwedö, batjo waji̧ jawa emawadanö.

⁹ Jau Job, sulabenö ja̧tji̧ökwe, Dios lȩebi̧tjö debö tji̧'yakwedö, jobadönö ödameakwobetjö̧, debö tji̧'yinö söbebö lobo̧ Diosma, jö̧tö? Ja̧danö ökwönö baledi̧ma, ja̧dajiobe Job.

¹⁰ —Jau Job, jobadö sulabedö ajayinö juluwadö didibadödanö tjichejekwinajayonö, Dios söbebö loakwa̧wö̧, baikwö wanedö yötawa: Ajayinö didibadö juluwadö, labinö tulubadö tjö̧jinajayonö, tjo'ye pabebö loakobe Diosma.

¹¹ Ja̧danö tjo'ye pabebö loawö̧, tjukwakwawö̧nö juluwökönö, a̧wi̧chi̧tjö debö tji̧'yakwedö, ja̧danö tji̧tji̧munö tjipjelekwachinö a'dewö loakobe. Jobekwö wanedö yötawa, Dios sulabedönö lȩebi̧ma, jobadö tjö̧ji̧danö kwö̧ji̧ma kakatibo Job, —jö̧balö yöa̧linobe Elifazma.

Chi̧'wi̧didanö chedajabe, jö̧ba̧lö Elifaz yöa̧lina jawa

^12-13 Tupakwö yöa̧linobe Elifazma, Jobnö: —Chi̧'wi̧dinö cha̧ja̧kwaja̧ yötawakwö, ju'wedö tja̧ja̧kwokonö cha̧ja̧kwaja̧ma. Yö̧te ja'ö, bö̧jȩ jojodö bö̧ti̧ söinö abajitjena, chi̧'widikwatö.

¹⁴ Jau Job, jwiinö yetaibanö chi̧'wi̧dikwatö, okobe jwiinö chiwe'iju tjö̧awinö chi̧'widikwatö, baikwö chi̧'widikwaja̧ yötawakwö:

¹⁵ Isapjonö kwebacho̧ chöba a'o öbaledobekwö chedatö, bulukanö yetaibanö öbaledobekwö chedatö.

¹⁶ Ikenama, chöbajale a'o baledajo̧, isapjonö kwebacho̧ma chöba a'o öjamatobekwö chedatö, ja̧danö chi̧'wi̧dinö, jo̧banö chedijayonö, otiwanöma chedökötö, dakwö ichejekwo̧jö jö̧balö. Jau, 'wiinö chöba a'o ö̧jinobe, ikenama 'wiinö ö̧jajelö, tjo̧'omanö yöa̧lobe cha̧ja̧kwijatö, baikwö yöa̧li̧ma:

¹⁷ –Bakwo̧ woba jojo, Dios öba a'o wene jwiinö ö̧jobö jȩnaji̧? Jojodönö otidina Dios öba a'o bakwo ö̧jenama, -Bitema sulabe jwibo̧, -jö̧ba̧lö Dios yöa̧lenaji̧? Ja̧maökö, baikwö yöta̧la:

¹⁸ Diosma iteda ömöayedö angeledönö o̧'wo wanalö̧kö̧, -Bidöma la'akatjöda sulabenö ja̧tjökena, -jö̧balö. Jau, Diosma iteda ömöayedö angeledötjö ju'wedönö yöba̧lo̧, -Sulabenö ja̧badö, -jö̧ba̧lö, jö̧tö?

¹⁹ Jau, Dios ömöayedö angeledöbi Dios öba a'otjö wene juna̧ladö, ja̧danö angeledö wene tjujuna̧litjö̧ma, lete'otjö otidinawö̧ jojodöbi isabenö Dios öba a'otjö wene tjujuna̧lakwedö, la'akatjöda Dios öba a'o wene jwiinö tjö̧joböma jwitjakwedö. —Jau, baikwö yötawa bö̧je jojodönö: Bö̧jȩ jojodöma nijiso̧pjatjö otidinawö̧, ja̧danö pjȩlȩbönö 'bȩbö lotji̧danö, juluwanö kwabö lotjawö̧.

²⁰ Isabenö juluwöködö jojodöma, yȩayi otiwanö tjö̧jijayonö, yö̧te baibakwa̧ abönö debi babibadö bö̧je jojodöma, wajwitjonö juluwanö debi babibadö bö̧je jojodöma.

²¹ Jau, sabana'wotjö otikweju juluwanö nijakwö bakobe mei̧danö, juluwanö debö 'ya̧dö bö̧jȩ jojodöma, waisanö omukwatakwawa ina tjöwaisachibapji, juluwanö debö 'ya̧dö bö̧jȩ jojodöma, –jö̧ba̧lö isapjonö kwebacho̧ yöa̧lobekwö cha̧ja̧kwijatö chi̧'wi̧dinö, —jö̧ba̧lö yöa̧linobe Elifazma, Jobnö.