Diosnö ösödo̧ Job mikwo̧ usula emawina jawa 39 - Dios Iwene

¹ Tupakwö yöa̧linobe Diosma Jobnö: —Tupakwö abebö cha̧ja̧kwakwö Job, isabenö chöwaisi̧danö waiso̧ kwö̧jojobö jö̧ba̧lö: Mösa'onö ju̧kwadö chi̧vo̧dönö kwöwaisiji̧, –Tjitjimunö dianö tjemobejö? –jö̧ba̧lö? Tebonö ju̧kwadö yama tji̧tji̧munö tjemenama, jobadönö kwedobeji̧?

² Ajayinö metu'wo batjibinelö, tjitji̧munö tjemenanö baibanö kwöwaisiji̧, –Jawo̧dö dokwa ba̧jȩkwadö baledobejö? –jö̧balö.

³ Jau Job, bamatö, tjitji̧munö emadö, ajayinö metu'wo tjö̧jaja̧ma, tji̧tji̧munö emadö,

⁴ ja̧danö tjemajawö̧, meje'yenö ja̧nö da̧peachadö tji̧tji̧muma. Ja̧danö da̧peachajadö, jelobekwö labebadö, ajayinö tjöjinobe ȩwa̧jöködö, ja̧ baledi̧ edö waiso̧köbobeji̧?

⁵ —Ja̧danö tebonö jo̧ buluma, ti ejatö loinadaja, uluwo deinö iteda ösödi̧danö kweachakobetjö̧?

⁶ Jobadönö chiyijatö, meje'ye jwiemi, jojodö deobe tjö̧jobö.

⁷ Jobadö bu̧lu̧döma comunidadnö jaliwobe ökwöi̧ma öpöjödadö, ja̧danö jojodö deobe, bu̧lu̧dönö jwebebadö jwötjokobeda tjö̧jobö ösödadö.

⁸ Jobe ja̧nö, mösa'ijunö kwebachö, tjukwakwa̧ isakwadö, okobe jwiinö ö̧'dö̧wi pokwi̧ jawa tjukwotö jö̧ba̧lö, mösa'ijunö kwebachö isakwadö, ökwöda jejenö tjö̧jobö weköbinaji̧?

⁹ —Ja̧danö tebonö jo̧ pakayaso̧ma, –Otidi, –jö̧balö weköbökwe, weköbi̧ otidobö ösödö, kwajwimu tjukwapjo meje'yesapjo ö'öbö abenaji̧?

¹⁰ A̧la̧chi'bonö soawaka töobö di̧katobö jȩnaji̧ tebonö jo̧ pakayaso̧nö? Jejenö di̧katajökwe, kwökömanö lubö, batjosayu soenaji̧?

¹¹ Isabenö juluwo̧ jo̧ba pakayaso̧ma, jejenö juluwo̧obetjö̧, otiwanö otidakwo̧ jö̧ba̧lö kwo̧'wo kwöwana̧lobö jȩnaji̧? Otidaji, jö̧ba̧lö webajo̧, lakebaja̧ okobe otiwanö otidenaji̧?

¹² Weköbajökwe, kwöbatjo wa̧ji̧ emö, otiwanö ichejebenaji̧? Trigojaye ko̧ko̧dajo̧, chabö loawejube otiwanö e'ewenaji̧? Jau Job, isabenö ötjödanö kwujuluwitjö̧ma, jobekwö weköbi̧ a̧ja̧kwo jö̧a̧lena.

¹³ —Ja̧danö nöbo̧patunö yöta̧la, jöwaja̧pi̧ya labinö welewuju, jö̧tö? Jejenö welewö, 'duwi köa̧li̧danö köja̧lenaji̧?

¹⁴ Ja̧danö baikwö yöta̧la nöbo̧patusujunö, iyabiya lödaju, wainö nijinöda bo̧bö labebuju. Ju'wedö pji̧yu̧ iyabiya yötjachi̧danöma teada̧lökuju, nijida tubedena jö̧ba̧lö, labebuju.

¹⁵ Jau, omukwatöködö jobadöma, bakwo̧ ja̧tö loena, ja̧danö tebonö ju̧kwadö söbebö lotjena, jö̧ba̧lö omukwatöködö.

¹⁶ Jitji̧munö sulabenö ja̧buju nöbo̧patuma, jitji̧munö, jitji̧muböködö tjö̧ji̧danö teada̧lökuju. Iyabiya lödaju, omukwatökuju, jelo̧ söbebö loitjö̧ma, chödaja̧ mikwawökena, jö̧ba̧lö.

¹⁷ Jau Job, ötjö Diosma jobujunö waisanö jomukwatobö chiyijökötö, ja̧danö okwa jawa waisanö jomukwatobö chiyijökötö, jokwajabetjö̧ jejenö omukwatökönö ju̧ju̧.

¹⁸ Jo̧kwaijayonö waisanö omukwatöködö tjö̧jijayonö, isabenö juluwanö ö'öbakwawadö jobadöma, baikwö yöta̧la: Kabayudönö wa̧nö ö'öbakwawadöma, juluwanö ö'ötjakwawijayonö, jobadö ö'ötjakwawi̧tjö bajalekwönönö juluwanö ö'öbakwawadö. Ökwöda jejenö tjö̧jobö kwiyinaji̧?

¹⁹ —Ja̧danö kabayuja? Kabayuma juluwo̧, jö̧tö? Ökwöda ujulu kwiyinaji̧? Kamijido̧ 'dutjati̧danö, kabayu u̧lu̧me'anö öwö'ye ödöa'ye 'duawobö kwiyinaji̧?

^20-21 Ökwöda kabayunö kwiyinaji̧, juluwanö malakayu döidanö, döbö ö'öakwawoböma? Isabenö ölakwabikwawa jawa juluwo̧ ka̧ba̧yuma, juluwo̧sa jö̧ba̧lö, bakwena ja̧nö ja̧takwö jwöbeba̧lo̧, jojodö a̧ja̧kwö yetjaibanö. Ja̧danö juluwanö ö'öbakwawo̧, tjölakwabikwawobekwö ö'öbakwawo̧.

²² Yebabökönö, –Yeabikwawama di̧yada, –jö̧ba̧lö obö yöa̧lobedanö ichejekwa, ja̧danö kwölöte'okwö jo̧banö metjibijayonö, jalachiböma döbibajö̧kö̧.

²³ Nayu̧nö a̧japjo ökwöijayonö, ja̧danö tjotjokwöte salöijayonö,

²⁴ juluwanö chichibowe, jö̧ba̧lö ölakwabikwawotö jö̧ba̧lö ö'öbakwawo̧, jadanö metjibakwa yöbawö trompeta pjutjenama, teada̧lökönö juluwanö 'yo̧.

²⁵ Jau, trompeta ökwöenama, –Tjo̧wita, –jö̧ba̧lö jwöobedanö ichejekwa, jadanö ödötjö tjölakwabikwawi̧ 'dö̧batö, ölakwabikwawa luwedö jwöbö wetji̧bi, ölakwabikwawadö jwötjeba̧li̧bi a̧ja̧kwö ösödo̧. Ökwöda jejenö kabayu ö̧jobö weköbinaji̧?

²⁶ —Ja̧danö pjibole mö köa̧li̧ma, ökwöda okwa jawa waisanö kwomukwatinobetjö̧, öwa̧ja̧piyanö mö köba̧lö, a̧li̧kwöchobe bajalenö köobeji̧?

²⁷ Ökwöda weköbajawö̧, wiyulima mö köba̧lajadö, möemi tja̧'do̧ tjotidobeji̧?

²⁸ Jau, mö inawanö janö, mösa'otjö yalikwaobe, ilȩdo̧nö 'diinö tjuju̧kwobe wiyulima,

²⁹ jobe ja̧nö, ödötjö otiwanö eda̧lö, tjukwakwawö̧nö edadö.

³⁰ Ja̧danö ukwakwo̧nö juluwajo̧, wiyuli itji̧muma ujuluwajökwe ökwösobu owadö. Jau, wobiya bȩmima, wiyulibi jobe jo̧, jö̧tö? Ökwöda jejenö weköbajawö̧, wiyulima jejenö tju̧ju̧kwobeji̧? —jö̧ba̧lö abebö a̧ja̧kwinobe Diosma, Jobnö.