Diosnö ösödo̧ Job mikwo̧ usula emawina jawa 38 - Dios Iwene

Isabenö Jo̧ Dios Jobnö yöa̧lina jawa

¹ Jemi ikenama, Isabenö Jo̧ma Jobnö yöa̧linobe, jwa̧lȩ'epjo doibajelö Jobnö yöa̧linobe, baikwö:

² —Ökwöma tiköba Job, ötjö waisanö omukwatö chujunaja̧ kwöpöjödobö, –Diosma sulabenö webo̧, –jö̧ba̧lö? Wajwibo̧köbijayonö, kwedemi jejenö yöka̧lobö otiwenaji̧?

³ Babema ökwönö abebö cha̧ja̧kwakwo̧sa, jadanö ötjönö kwatadakwo̧ja, jo̧kwajabetjö̧ jojo juluwo̧ otidobö a̧la̧ibi̧danö, chöba a'o a̧la̧ibi, kwatadakobetjö̧, —jö̧ba̧lö yöa̧linobe Diosma, Jobnö.

Dios Jobnö abebö a̧ja̧kwina jawa

⁴ Baikwö abebö a̧ja̧kwinobe Diosma, Jobnö: —Damötjö bö̧jȩ la'aka wa̧pedö chujuninenama, jobe edö kwö̧jinaji̧? Isabenö okwa jawa waisanö omukwato̧ kwö̧jitjö̧ma, bi̧ya abebö cha̧ja̧kwakwa̧ atadö labebö loköbo:

⁵ Ti omudawö ujuninada, bö̧je la'aka dokwa jalobe chujunakwajö, jö̧ba̧lö? Isabenö waiso̧ kwö̧jitjö̧ma, kwatadobö kwöwaisena Job. Ja̧danö la'akama, dokwa jalojobö jö̧ba̧lö, ti ö̧ba̧ja̧dinada?

⁶ Ja̧danö bö̧je la'akama, taji wame wanawobeda? Ja̧danö bö̧jȩ la'aka lödawawa inawama, ti ödinada?

⁷ Jawa lödawobe tjedinobe angeledöma, ja̧danö edö, tjo̧'wo ösöwachibanö jwötjeba̧linobe, ti inawa ödiniawö̧ jejenö jwötjeba̧linada?

⁸ Ja̧danö bakwuju jitji̧nö jemakwa̧ abönö, jusulasobu juluwanö ja̧jajibi̧danö, jwaibalawa ajayinö jamatenama, tida jwaibalawa bakwachobe baibanö yöbatö tumatö öninadaja, jwaibalawa tupakwö welachibapji jö̧ba̧löma?

⁹ —Ötjödasa jejenö otidinama Job, ökwö deköbayi jejenö otidinasa. Ka̧miji̧do̧ 'dutjati̧danö, Ojwiyo'wo o̧bakwa'wonö jwaibalawa 'dutatijatö, ja̧danö koleasö̧jȩnö pji̧tjebi̧danö, yȩa'wo chönijatö.

¹⁰ Ötjöda omudawö chujunijatö, jwaibalawa bakwachobeteniama, ja̧danö apjude tumatö tjipje'dati̧danö chipje'datijatö,

¹¹ –Jwaibalawa, baikwöda kwichibakwo̧ja, bemi tupakwö kwichibökakwoja, jadanö buluwanö loköbi̧ juluwijayonö, bemi tupakwö kwöbaledökakwo̧ja, –jö̧ba̧lö chipje'datijatö. Ökwö deköbayi, ötjödasa jejenö chotidijatö.

¹² —Ökwöja Job? Bakwötanöbi möle dewachakwa̧ weköbinaji̧? Bakwötanöbi dewi̧ kwö̧ba̧ja̧dinaji̧, –Babeda kwidewachobö jo̧be,

¹³ babeda yö̧te, jojodö sulabenö ja̧tjena yȩi̧ jamatö lobö, bö̧jȩ ö'öbö kwidejatobö jo̧be, –jö̧ba̧lö weköbinaji̧?

¹⁴ Mölȩ jamatö dewachenama, mösa'ijubi, wabekijubi jamatö öwawobe, sabana'wo tili'da̧lidanö, jö̧tö?

¹⁵ Ja̧danö möle dewachi̧ma, sulabedö tjujulu söbebö loobedanö ichejekwa, yȩa'wo okwa jojodönö suli̧ tjöwaedena yȩa'wo dejatakobetjö, jö̧tö? Bakwötanöbi jejenö baledobö weköbinaji̧?

¹⁶ —Bakwötanöbi jwaibalawa la'aka edö kwȩwa̧jinaji̧? Delö laebojobö jö̧ba̧lö edö kwȩwa̧jinaji̧? Inesö da̧kwobe kwekachinaji̧?

¹⁷ Ja̧danö ö'wö babibinadö tjuju̧kwemi apjude kwedinaji̧? Ja̧danö inesö yȩa'wo tjöekwemi apjude kwedinaji̧?

¹⁸ Ja̧danö bö̧jȩ dokwa jalojobö jö̧ba̧lö isabenö otiwanö kwöwaisiji̧? Isabenö waiso̧ kwö̧jitjö̧ma, abebö cha̧ja̧kwaja̧ atadö, labebö lobö yöbawitjö.

¹⁹ —Ja̧danö dewi̧ laebelöma, daikwö bajalenö jo̧beda? Ja̧danö yȩa'wo laebelöma, delö laebobeda?

²⁰ Ökwöma dewi̧bi, yȩa'wobi tjebatö, ajayinö laebinelö ȩwa̧ji̧nö weköboböma kwöwaisobeji̧? Jobe 'ya̧kwawama kwi̧sȩbobö kwöwaisobeji̧?

²¹ Ökwö yöka̧laja̧ a̧ja̧kwö, isabenö pöeja, ja̧ jawa ina jwiayi kwö̧jinobedanö yöka̧lajabe Job, jokwajabetjö̧ labebö loköbobö kwöwaisena, jö̧tö?

^22-23 —Ja̧danö bö̧jenö tjoduwakwa̧ tiyuwi̧ nieve jawa lödaweju tebachö kwedinaji̧? Ja̧danö chömöledö wene baledö, tjöpöjojodökwö tjölakwabikwawena pjatatakobetjö, tiyuwaso inawiyadanö pjei̧ öwiya jawa lödaweju chujunala, jejubi tebachö kwedinaji̧?

²⁴ Jadanö böba laebelö ya̧kwawama, dimada? Ja̧danö jawo̧ laebobekwötjö jwa̧lȩ'epjoma, delö labebö jwa̧lȩ'ewobeda?

²⁵ —Ja̧danö tidaja ojwiyo o̧bakwa̧ mana sobö po̧ebinada, nijakwö labinö ojwiyo o̧bakobetjö̧? Ja̧danö tidaja böba kweachakwa̧ma omudawö ujuninada?

²⁶ Ti weobeda, jojodö deobe ojwiyo o̧bobö, jwiinö kököobe jojodö deobe ojwiyo o̧boböma?

²⁷ Jobe jojodö deobe kököapji jö̧ba̧lö, ja̧danö isa'ye otiwanö pokwakobetjö ti ojwiyo o̧bobö weobeda?

²⁸ —Ojwiyobi, si̧li̧'idö tji'olibi abe'dobi ö̧jenaji̧?

²⁹ Bakwuju jukwa'wotjö ojwiyo tiyuwaso baibanö laebobeji̧? Jitji̧nö jemi̧danö, mölejebetjö tjoduwi̧ tiyuwaso inawiyadanö pjei̧ öwiya bakwuju jemenaji̧?

³⁰ Jau Job, ojwiyo tiyuwachibenama, inawadanö 'diachibobe, ja̧danö jwiinö tiyuwenama, da̧kwobe wamenö hielo baibanö 'diachibobe, ja̧ jawa labebö loawa kwöwaisobeji̧?

³¹ —Ja̧danö si̧li̧'idö Itji̧mukwa'wo jö̧ba̧lö ötjabiwö̧nö bakobe tjö̧lakobetjö̧ di̧batö kwujunobö kwöwaisobeji̧? Ja̧danö Maliyu aka jö̧ba̧lö ötjabiwö̧ si̧li̧'idö wainökwena kwatjachakobetjö̧, kwejatobö kwöwaisobeji̧?

³² Si̧li̧'idö sasokwena latjebo jö̧tja̧lena ökibobö kwujuluwenaji̧? Ja̧danö si̧li̧'idö Alade'ba jö̧ba̧lö ötjabiwö̧nöbi, Usaso jö̧ba̧lö ötjabiwö̧nöbi kwetjachakwa̧ jwekebobö kwöwaisenaji̧?

³³ Ja̧danö sili'ikwena kweachi̧kwena kwöwaisobeji̧? Ja̧ jawa kwöwaisobetjö̧, bö̧jȩ jawabi weköbobö kwöwaisenaji̧?

³⁴ —Ja̧danö ojwiyo o̧bakwa̧ webö, mölȩjebekwö jwöbeba̧lö, –Babeda ojwiyo o̧bi, –jö̧ba̧lö weköbitjö̧ma, nöobu ökwönö o̧benaji̧?

³⁵ Ja̧danö böbanö idejatobö weköbitjö̧ma, weköbi̧danö dejatö kwaenaji̧? Weköbökwe, –Chuluwo̧, –jö̧ba̧lö böba atadenaji̧?

³⁶ —Tidaja jojodö tjomajadenö waisanö tjomukwatobö pjabato̧ma Job? Tidaja okwa jawa waisanö tjomukwatobö pjabato̧ma?

^37-38 Tidaja waisanö omukwato̧obetjö, okobe jwiinö ojwiyo'wiju ö̧ba̧jadobö waiso̧ma, dokwa ba̧jȩkwa'wo jö̧ba̧lö? Ja̧danö nijiso̧pja 'diinö baibanö, ja̧danö niji lete'o baibanö, tida mölejȩ ji̧ i̧sa̧yu tobebö, ojwiyo o̧bobö webo̧ma? Ökwödaji̧?

^39-40 —Ja̧danö didiba jukwakwa̧ jisakwenama, jukwakwo̧nö luköbobö kwöwaisobeji̧? Jitji̧mu a̧wi̧chi̧ tjöbö, tja̧jeju okwa metjibotö jö̧ba̧lö bȩtjachena, ja̧danö i̧lȩdo okwa metji̧botö jö̧balö tjiteada̧lenama, tjomeawachibanö tju̧kwa̧ kwiyobö kwöwaisenaji̧?

⁴¹ Tidaja bo̧lȩdö tjukwakwa̧ 'da̧batö juno̧ma Job? Tji̧tji̧mu tjukwotö jö̧ba̧lö ötjönö budekwö, a̧wi̧chi̧ tjöbö kwetjachenama, tidaja tju̧kwa iyo̧ma? Ötjödasa Job, ökwömaökö, —jö̧ba̧lö yöa̧linobe Diosma, Jobnö.