Diosnö ösödo̧ Job mikwo̧ usula emawina jawa 37 - Dios Iwene

¹ Tupakwö yöa̧linobe Eliuma: Böba ökwöi̧ a̧ja̧kwö, chomajade tjö̧awobe, ja̧danö chomajadema labinö döobe.

² Otiwanö kwa̧ja̧kwo Dios yöawi̧ma, baikwö wanedö yöta̧la, böba ökwöi̧ma, Dios yöa̧li̧da ökwöobedanö jobe.

³ Okobe jwiinö bö̧jȩ ba̧kwemeachibanö ökwöobö webo̧, bö̧jȩ bajale ichibanö böba dejatobö webo̧ Diosma.

⁴ Ja̧danö, böba idejatobö webajo̧, iwene ökwöobö webo̧, iteda iwene ökwöi̧danö, böba labinö ökwöobö webo̧, ja̧danö jejenö yöa̧lo̧nö, böba nöinö dejatinö webo̧.

⁵ —Jau, böba labinö ökwöi̧danö, labinö döbajale jalaka baibanö yöba̧lo̧ Diosma, ja̧danö inesö otiwi̧ jawa otido̧, okwa jawa döwaisi̧tjö bajalekwönönö otiwi̧ jawa otido̧.

⁶ Jau, nieve jawa webo̧ Diosma, –Nijakwö tjoduwi, –jö̧ba̧lö, ja̧danö ojwiyo nöobö o̧bobö webo̧, –Nijinö tobebi, –jö̧ba̧lö.

⁷ Jejenö webö, okobe deinö tjotidawakwena katjatibobö webo̧, okobe deinö jojodö edö Dios otidi̧ tjöwaisakobetjö̧.

⁸ Jejenö jwa̧le'epjo doibobö weiawö̧, tebonö ju̧kwadöma tjejukwena ȩwa̧ja̧dö, ja̧danö jobeda teada̧ladö, ojwiyo o̧bö kaatenanö baibanö.

⁹ —A̧li̧kwötjö jwa̧le'epjo doibobö webo̧ Diosma, ja̧danö u'dakwötjö jwiinö tiyuwinö, jwa̧le'ewobö webo̧.

¹⁰ Ja̧ jwa̧le'ewi̧ma, Diosda pjuobedanö ichejekwa, jadanö jejenö pjui̧ma, ojwiyo tiyuwawa baibanö tiyudo̧, ja̧danö ojwema bakwainö ojwiyo tiyuwawa baibanö 'diachibobe.

¹¹ Ojwiyo emö, ojwiyo'wo okwa ano̧ Diosma, ja̧danö ojwiyo'wotjö böba dejatinö kwaobö webo̧.

¹² —Ojwiyo'wo kweachi̧tenia webo̧ Diosma, jelobekwö, jelobekwö kweachobö, iteda ösödi̧danö jojodö tjö̧jemi ba̧kwemeachibanö kweacha'wo, Diosda omukwatö ujuni̧danö baledakobetjö̧.

¹³ Ju'wikenama jojodönö lȩbebö, jejenö webo̧, ja̧danö ju'wikwenama lȩlöjinö edobetjö̧, jejenö ojwiyo webo̧ Diosma. Ja̧danö lȩebobö jö̧a̧litjö̧bi, lȩlöinö edobö jö̧a̧litjö̧bi, bakwainö iteda omukwatö ujunaja̧danö baledobe.

¹⁴ —Yöta̧li̧ otiwanö omukwatö kwa̧ja̧kwo Job, 'wii̧nö ja̧nö, Dios döbajale jalaka baibanö otidi̧ jawa kwomukwato.

¹⁵ Ökwöma kwöwaisiji̧, –Ja̧jaye baledi̧ma, dakwö baledobö weobejö? –jö̧ba̧lö? Ojwiyo'wotjö böba idejatobö wei̧ma, –Dakwö weobejö? –jö̧ba̧lö labebö loawa kwö̧waisobeji̧?

¹⁶ Ja̧danö bakwainö okobe jwiinö waiso̧ Dios otidi̧, ojwiyo'wo mebökönö öni̧ma, –Mölejȩnö dakwö önobejö? –jö̧ba̧lö labebö loawa kwöwaisobeji̧?

¹⁷ Kwöwaisa Job, a̧li̧kwötjö jwa̧lȩ'epjo jwa̧lȩ'ewaja̧ okobe, okobe jwiinö 'wii̧nö jȩnama, kwö̧ka̧miji̧do̧nö ja̧nö kwejelachibenanö tubobe, jö̧tö?

¹⁸ Kwedemi ökwö tubiökwe ejelachibo̧ma, Diosnö pjakatobö kwöwaisenaji̧? Jo̧banö pjakatenaji̧, tjöbadekwawöte 'diinö ji̧danö ojwiyo'wiju sedatö önoböma?

¹⁹ Ja̧ jawa waiso̧ kwö̧jitjö̧ma, ökwödönö kwö̧ba̧ja̧do Job, otiwanö Diosnö yöda̧lakwa̧ döwaisakobetjö̧. Jau, ökwödöma wajwibadösa, otiwanö Diosnö yöda̧lakwa̧ma, jo̧kwajabetjö̧ isabenö yöta̧laja̧ jawa kwöwaisitjö̧ma, ökwödönö kwö̧ba̧ja̧do.

²⁰ —Kwedemi Diosnö yötja̧lobö chösödenaji̧, –Eliuma kwöba a'o ichibö yöa̧lobö jö̧a̧la, –jö̧ba̧lö? Ja̧maökö Job, Dios öba a'o ichibö yöta̧litjö̧ma, iteda inesö ujuluma ötjönö söbebö loena, baikwö yöta̧la:

²¹ Jwa̧le'epjo ojwiyo'wo jelobekwö jwa̧le'ewaja̧ ikena, mölejȩ 'dawökinö möle jawo̧ mölejȩnö ö̧lenama, bakwo̧ jweinö jawo̧nö söinö edobö jȩnaji̧? Ja̧maökö.

²² Diosbi ja̧danö Job, u'dakwötjö icho̧, bakwai̧ oro salöi̧danö ujulu dejatinö. Jau, iteda inesö salöi̧ ujulunö icho̧ Diosma, döbajale jalaka baibanö, jwiinö yedaibi̧nö.

²³ Okobe Jwiinö Juluwo̧ Diosma, isabenö jwiinö juluwo̧, domukwati̧tjö bajalekwönönö isabenö jwiinö juluwo̧. Ju'wibi bakwainö sulabe jwibo̧ Diosma, jadanö lȩekwa yöawo jö̧a̧li̧danö bakwainö otiwanö yöbawo̧, la'akatjöda sulabenö ja̧bö̧kö̧ ökwödönöma.

²⁴ Jo̧kwaiawö̧, Diosnö yebabinö omukwatö ösödadösa, isabenö otiwo̧obetjö̧. Jau Job, isabenö otiwo̧ Diosma, ja̧danö, –Waisadöma ökwödödasa, –jö̧ba̧lö sulabenö omukwatadönö a̧ja̧kwö̧kö̧ Diosma, —jö̧ba̧lö yöa̧linobe Eliuma.