Diosnö ösödo̧ Job mikwo̧ usula emawina jawa 36 - Dios Iwene

¹ Tupakwö yöa̧linobe Eliuma:

² —Kwo̧'wo 'dibachibö, ina ja'yubenö lekwe kwa̧ja̧kwo Job, Dios jawa ökwönö yötawakobetjö̧. Jau Job, tupakwö Diosnö yöta̧lakwa̧ chujuna̧la, –Diosma isabenö otiwo̧, –jö̧ba̧lö.

³ Chöwaisi̧ jawatjö yötawocha Job, ödötjö chöwaisachibina jawama, ja̧danö ötjönö otidina Diosnö i̧sebö yötawocha, –Ötjönö otidina Diosma isabenö otiwanö omukwatö jo̧, –jö̧ba̧lö.

⁴ —Isabenö yötawakwö Job, yöta̧li̧ma, omöna wene yöbawö̧kö̧sa. Isabenö ötjö ökwökwö jo̧ma, otiwanö Diosnö waiso̧sa Job, ja̧danö jweinö yötawakwö, baikwö:

⁵ Diosma isabenö juluwo̧, jo̧kwaijayonö juluwo̧jayonö, jojo bakwo̧nöbi öpöjödö̧kö̧, –Bitema mikwawö̧kö̧, –jö̧ba̧lö. Isabenö juluwo̧ Diosma, ja̧danö okobe jwiinö okwa jawa waiso̧ Diosma.

⁶ —Lȩekwa luwo otiwo̧ Diosma, isabenö sulabedönö lȩbebö, söbebö lobo̧ sulabedönöma. Jau, Job, sulabedö ju'wedönö sulabenö jabö tjö̧jiökwe, balekwa mikwa jobadönö lȩbebo̧ Diosma, lȩebo jö̧a̧li̧danö.

⁷ Ja̧danö, Dios wei̧ a̧ja̧kwö ju̧kwadönö, otiwanö edö teada̧lo̧ Diosma, jobadönö kabebö wano̧, inesö la'aka luwedökwö bamatö webö tjö̧jobö, jadanö ba̧kwelöjatebö jobadönö otiwanö tjomukwatobö pjabato̧.

⁸ —Ja̧danö jojodö sulabenö ja̧bajadö, usula emawö ka̧lena tjö̧bitjö̧ma,

⁹ jobadönö otiwanö ba̧ja̧dö jwebebo̧ Diosma. Sulabenö ja̧tjaja̧ma di̧yajö jö̧ba̧lö pjabatö yöbawo̧, jadanö mikwawadösa jö̧ba̧lö sulabenö ja̧bö tjö̧jina jawa ba̧ja̧dö jwebebo̧.

¹⁰ Ba̧jadö yöawi̧ tjajakwobö webo̧, –Sulabenö ja̧bö kwö̧jaduwi̧ kabatibö, otiwanö ja̧bö kwö̧jaduwo, –jö̧ba̧lö.

¹¹ Ja̧danö, Dios yöawi̧ a̧ja̧kwö, wei̧ a̧ja̧kwö tjö̧jitjö̧ma, jemi tupakwö otiwanö tjö̧jobö pjabato̧, o̧bakwena tjo̧'wo ösöwanö tjö̧jobö pjabato̧.

¹² Jo̧kwaijayonö tja̧ja̧kwobö tjöpöjöditjö̧ma, kwabö lotjawö̧ debö tji̧'yakwedö, yöa̧laja̧ okwa jawa do̧tjatokobetjö̧, debö tji̧'yakwedö.

¹³ —Tjomajadenö Diosnö öpöjödadöma, jwaikwöda dameakwö ju̧kwadö, jadanö jobadönö lȩbebö, ka̧lena tjö̧bobö weenabi, yayonö Diosnö budekwöködö.

¹⁴ Jo̧kwajabetjö̧ ina möayedö tjö̧jayi, debö 'ya̧dö jobadöma, tji̧lȩkwamuböködökwö sulabenö 'da̧'da̧bö ju̧kwadö tjö̧'da̧de ja̧nö, juluwanö debö 'ya̧dö.

¹⁵ —Usula tjemawinö webö, jojodönö jwebebö ba̧ja̧do̧ Diosma, usula tjemawinö webö, jo̧banö tjomukwatobö webo̧, otiwanö jo̧banö tjöwaisachibakobetjö̧.

¹⁶ Ökwönöbi jejenö pjaatobö jö̧a̧lena ichejekwa Job, baikwö yöta̧la: Usula emawö kwö̧ji̧tjö lakebinö pjaatobö jö̧a̧lena, otiwobe jalobe wene jwiinö kwö̧jobö̧, jadanö kwitea mesasöte inesö otiwi̧ kwakwawa ujunobö jö̧a̧lena, otiwanö kwukwakobetjö̧.

¹⁷ Jo̧kwaijayonö jejenö pjaatobö jö̧a̧lijayonö, ju'wida omukwato̧ja babema, –Tajawedö sulabedönö lȩbebö̧kö̧jö̧, isabenö jweinö lȩbebo̧ ö̧jitjö̧ma, isabenö jobadönö lȩbebo jö̧balo̧ Diosma, –jö̧ba̧lö omukwatö jo̧ja. Ja̧ jawa omukwatö kwö̧joko Job, ja̧ jojodönö lȩebakwa̧ jawama, Diosda jawa, iteda omukwatö ujuni̧danö lȩebobö jo̧be.

¹⁸ —Teada̧lönö kwö̧jo Job, dameakwö ja̧nö, Diosnö oköbapji jö̧ba̧lö. Ja̧danö ju'wibi teada̧lönö kwö̧jo, ju'wedö balada iyö, –Sulabenö jaköbitjö̧ma, nöinö balada dimidakwedösa, –jö̧ba̧lö tjiyi̧ kwemapji jö̧ba̧lö, ja̧danö emajo̧, sulabenö jaköbapji jö̧ba̧lö.

¹⁹ Jau Job, nöinö balada kwujuna̧lijayonö, ja'yubebi pjaatökena, usula kwemawapji jö̧ba̧lö, okobe jwiinö kwujulunö usula kwemawi̧tjö lakebobö kwisakwitjö̧bi, waekwena.

²⁰ Ja̧danö ju'wibi yö̧te juluwanö baibakwa̧ kwomukwatoko, –Juluwanö ö'wö batibowe, –jö̧ba̧lö.

²¹ Teada̧lönö kwö̧jo Job, sulabenö ja̧bö jö̧könui, baikwö yöta̧la: Jejenö sulabenö ja̧köbapji jö̧ba̧lö, usula emawö kwö̧jobö weajabe Diosma, jokwajabetjö̧ otiwanö omukwatö, sulabenö ja̧bö kwö̧joko.

²² —Isabenö yöta̧lakwö Job, Diosma isabenö jwiinö juluwo̧, ja̧danö jo̧bajayo̧ ba̧ja̧do̧ma, bakwobi deobe.

²³ Bakwo̧bi Diosnö ba̧ja̧do̧ma deobe, –Baikwö ja̧bö kwö̧jo, –jö̧ba̧lö ba̧ja̧do̧ma, ja̧danö bakwobi deobe, –Sulabenö jaköbajabe, –jö̧ba̧lö Diosnö jwebebo̧ma.

^24-25 Isabenö otiwanö otido̧ Diosma, jojodö jo̧banö ösödö lo̧tji̧danö, isabenö otiwanö otido̧. Jau, okobe deinö jojodöma Dios otidi̧ tjedajabe, ödö ja̧nö, Dios otiwanö otidi̧ eda̧ladö Job, ökwöbi jo̧banö ösödö yöka̧lobö kwomukwatibo, –Otiwanö otido̧ Diosma, –jö̧ba̧lö.

²⁶ —Isabenö otiwanö juluwo̧ Diosma, ökwödö bö̧je jojodö dö̧waisi̧tjö bajalekwönönö juluwo̧. Isabenö lekwe o̧biya jo̧ Diosma, dö̧ba̧jadökenanö, jwiinö lekwe o̧biya jo̧ jo̧bama.

^27-28 Baikwö yöta̧la, Dios waisanö otidi̧ma: Diosda bö̧jetjö ojwiyo kaamobö webo̧, ojwiyo'wo baibanö, jadanö jemi ikenama jo̧bada tjebachajö ojwiyo baibanö ojwiyo o̧bobö webo̧, jojodönö pjabatö, otiwanö nöinö ojwiyo o̧bobö webo̧.

²⁹ —Ja̧ Dios otidi̧ma wajwibadösa, –Dakwö jejenö baledobö webo̧jö, –jö̧ba̧lö. Jau, ojwiyo'wo mölejȩnö kweachi̧ma wajwibadösa, ja̧danö Dios ö̧jemi mö̧lȩjenö böba labinö ökwöi̧bi wajwibadösa, –Tajawedöjö, –jö̧ba̧lö.

³⁰ Okobe jwiinö ö'öbötenia böba dejatobö waisanö webo̧, jwaibalawa la'akabi dewenanö baibanö dejatobö waisanö webo̧.

³¹ —Jejenö iteda inesö ujulunö, bö̧je jojodö tjitebokwena ju̧kwadönö teada̧lö webo̧, ja̧danö tju̧kwa̧ nöinö tjujuna̧lobö, otiwanö iyo̧.

³² Iteda ömamunö böba do̧a̧lobedanö ichejekwa, jadanö jweinö böba webo̧, ösödenada kwaoböma.

³³ Ja̧danö böba ökwöi̧ webo̧, ojwiyo o̧bakwa̧ döwaisobö, pa̧ka̧yadöbi ojwiyo o̧bakwa̧ tjöwaisobö, waisanö böba webo̧ Diosma, —jö̧ba̧lö yöa̧linobe Eliuma.