Diosnö ösödo̧ Job mikwo̧ usula emawina jawa 35 - Dios Iwene

Eliu tupakwö yöa̧lina jawa

¹ Jejenö yöba̧lajo̧, tupakwö Jobnö yöa̧linobe Eliuma, baikwö:

² —Ökwö yöka̧laja̧ma, Diosnö yöka̧lajabe ichejekwa, –Ötjöma Diostjö bajalekwönönö otiwanö ja̧bö jo̧sa, –jö̧ba̧lö. Kwedemi jejenö yöka̧loböma otiwenaji̧?

³ —Ju'wibi baikwö Diosnö yöka̧lajabe, –Sulabenö ja̧bökönö chö̧ji̧ mikwawi̧ma, di̧yada? Mikwawökena, –jö̧ba̧lö, jadanö ju'wibi, –Sulabenö ja̧bökönö chö̧jitjö̧ma, Dios iyi̧tjö taji chemakwa̧da? Chemökena, sulabenö ja̧bö chö̧jatjö̧bö –jö̧ba̧lö yöka̧lajabe ichejekwa.

⁴ —Jejenö yöka̧li̧tjö̧, baikwö chatadakwö, ökwönöbi, kwömöledönöbi:

⁵ Mölȩjȩbekwö kwedo, jadanö ojwiyo'wo edö kwomukwato. Diosma ja̧tjö möakwönönö jo̧, jö̧tö?

⁶ Sulabenö ja̧köbi̧ma, Diosnö suli̧ kwöwaedenaji̧? Jwiinö nöinö sulabenö jaköbitjö̧bi, jo̧banö suli̧ kwöwaedobö kwujuluwenaji̧?

⁷ Jadanö otiwanö Dios wei̧ a̧ja̧kwö kwö̧jitjö̧ma, Diosnö kwiyi̧ma di̧ya̧da? Jo̧banö pjabatö, jwii̧ jawa ju'wi jaye kwiyenaji̧? Kwöwaisa Job, ja̧maökö, jö̧tö?

⁸ Sulabenö ja̧köbenama, bö̧jȩ jojodönöda suli̧ waedo̧ja, jadanö Dios wei̧ a̧ja̧kwö kwö̧jenama, ökwödanöbedö bö̧jȩ jojodönöda pjabatö jo̧ja.

⁹ —Ju'wedö usula tjemawinö ja̧tja̧jawö̧, budekwadö jojodöma, juluwadö tjujuluwiawö̧, usula emawö jwöbeba̧ladö, –Pjabati, –jö̧ba̧lö.

^10-11 Jo̧kwaijayonö jejenö jwötjeba̧li̧ma, otiwanö omukwatö Diosnö jwöbeba̧löködö. Otiwanö omukwatö, –Ökwödönö otidina Diosma, yö̧te do̧'wo ösöwanö lo̧dobö pjabato̧, ja̧danö tebonö ju̧kwadötjö bajalekwönönö waisadö dö̧jobö baja̧do̧, ja̧danö pji̧yutjö bajalekwönönö waisanö domukwatobö pjabato̧ Diosma, jo̧banö ösödö adebobö jo̧be, –jö̧ba̧lö tjomukwato jö̧ba̧ladö, jo̧kwaijayonö omukwatöködö jejenöma. Sule usula emawö, –Pjabati, –jö̧ba̧lö jwöbeba̧ladö.

¹² Jau Job, isabenö usula emawö jwötjeba̧lobe, jo̧kwaijayonö sulabedö ja̧nö, otiwadösa jö̧ba̧lö omukwatö jwötjeba̧liökwe, atadö̧kö̧ Diosma.

¹³ Jau Job, Diosnö ösödökönö jwötjeba̧liökwe, jobadönö a̧ja̧kwö̧kö̧, Okobe Jwiinö Juluwo̧ Diosma a̧ja̧kwö̧ pjabatö̧kö̧.

^14-15 —Ökwö yöka̧li̧bi ja̧danö Job. Ökwöma Diosnö yöka̧lajabe, –Diosnö chedökökwe, sulabenö jatinojobö ja̧tinokojobö jö̧ba̧lö yöawakwo̧, yöa̧lakwa̧ teada̧lo̧sa, –jö̧ka̧lajabe. Jo̧kwaijayonö ju'wibi yöka̧lajabe, –Diosma sulabedönö dameakwö lȩebo jö̧a̧lijayonö, sulabenö lȩbȩbö̧kö̧, jadanö jojodö sulabenö jatji̧ edö omukwatö̧kö̧, –jö̧ba̧lö yöka̧lajabe. Jobekwö dötölatajanö ömukwatö sulabenö yöka̧liökwe, ökwö budekwö yöka̧li̧bi a̧ja̧kwökena Job.

¹⁶ Jau Job, jobekwö yöba̧lö, yöta̧lajawö̧ jwöbeba̧ladödanö ichejekwo̧ja Job, ja̧danö nöinö yöka̧lijayonö, mikwa jwii̧ yöba̧lo̧ja. Jau Job, jejenö dötölatajanö yöka̧lenama, wajwibö sule yöa̧lakwawa ko̧ko̧dabinö mikwa jwii̧ jawada yöba̧lo̧ja, —jö̧ba̧lö yöa̧linobe Eliuma.