Diosnö ösödo̧ Job mikwo̧ usula emawina jawa 34 - Dios Iwene

Eliu tupakwö yöa̧lina jawa

¹ Tupakwö yöa̧linobe Eliuma, ju'wedö Job ömöledönö:

² —Ökwödö –Waisanö omukwatadösa, nöinö waisakwawa jawa waisachadösa, –jö̧baladöma, yöta̧li̧ kwa̧ja̧kwaduwo.

³ Kwöwaisaduwa chömöledö, kwakwawa söinö 'dö̧ekwojobö jö̧ba̧lö, 'dȩbawö edadösa, jö̧tö? Ja̧danö, ja̧ 'dȩbawö dedi̧danö, dölakiyunö yötja̧li̧ otiwojobö jö̧balö a̧ja̧kwö edadösa, jö̧tö?

⁴ Jo̧kwajabetjö̧, bakobe da̧ja̧kwaja̧ omukwatö dedö, ökwödöbi, Jobbi yöka̧laduwaja̧ma di̧ya otiwojobö, jö̧balö.

⁵ —Jobma baikwö yöa̧lajabe: –Dios öba a'otjö wene jwitijayonö, ötjönö pjabatö lȩekwa jweinö yöbawö̧kö̧ Diosma.

⁶ Jo̧kwajabetjö̧ sulabenö ja̧binö̧kö̧sa jö̧ba̧lö yöta̧lenama, omöna yöba̧lo̧ jö̧ba̧lö ötjabökwesa. Jau, sulabenö ja̧tököjayonö, chö̧bibajökenanö labinö ötjönö kwaajabe Diosma, ¡Ötjöwe! –jö̧ba̧lö yöa̧lajabe, jö̧tö?

⁷ Bakwo̧bi Job yöa̧li̧danö yöba̧lo̧ma ö̧jenaji̧? Bakwo̧bi Job sulabenö Diosnö yöa̧li̧danö yöba̧lo̧ma ö̧jenaji̧? Kabatökönö jejenö sulabenö yöa̧lobö ösödo̧ ichejekwa, –Sulabenö ja̧tököjayonö, Dios sulabenö usula chemawinö weökwesa, –jö̧ba̧lö.

⁸ —Jau, Job yöa̧li̧ma, sulabedö tjö̧möledöso̧ ö̧ji̧danö yöba̧lo̧, jadanö sulabenö ja̧badökwö kwebacho̧ ichejekwa.

⁹ Sulabo̧ yöa̧li̧danö baikwö yöa̧lajabe Jobma, –Dios wei̧ a̧ja̧kwö ja̧nö, joba ösödi̧danö ja̧tjobö tjisakwi̧ma mikwawökö ji̧, –jö̧ba̧lö sulabo̧ yöa̧li̧danö yöa̧lajabe, jö̧tö?

¹⁰ —Jo̧kwajabetjö̧ ökwödö okwa jawa waisanö omukwatadöma, baikwö yöta̧lakwa̧ kwa̧ja̧kwaduwo: Diosma la'akatjöda sulabenö ja̧bö̧kö̧, Okobe Jwiinö Juluwo̧ma ja'yubebi sulabenö ja̧bö̧kö̧.

¹¹ Jau chömöledö, jojodö otidö tjö̧ji̧danö, tjö̧ji̧ mikwawi̧danö iyo̧ Diosma, otiwanö ja̧bö tjö̧jojobö, sulabenö ja̧bö tjö̧jojobö jö̧ba̧lö edajo̧, ja̧tjaja̧ mikwawi̧danö jweinö lȩekwa yöbawö, jobadönö baledakwa̧ webo̧ Diosma.

¹² Isabenö sulabenö ja̧bö̧kö̧ Okobe Jwiinö Juluwo̧ Diosma chömöledö, lȩekwa yöawo jö̧a̧li̧danöda lȩekwa yöbawo̧ chömöledö, ö'öbönö lȩekwa yöbawö̧kö̧, la'akatjöda.

¹³ —Chömöledö, Dios bö̧je la'aka luwo̧ ö̧ji̧ma, bö̧jȩbi mölȩjȩbi inesö la'aka luwo̧ ö̧ji̧ma, jelo̧da iteada̧lobö weökwe, la'aka luwo̧ baibinaji̧? Kwöwaisaduwa chömöledö, itedatjöda la'aka luwo̧ jo̧, jö̧tö?

¹⁴ Jau chömöledö, Diosda ja̧kwawa iyobetjö̧, okobe deinö 'yaba̧ladö tju̧ju̧kwobe. Okobe deinö 'yaba̧ladö dö̧ji̧ma, Dios itea ja̧kwawa dujuna̧lobetjö̧, ja̧danö Dios itea imuyupjo dujuna̧lobetjö̧, 'yaba̧ladösa, jö̧tö? Ja̧danö, Dios isabenö jojodönö suli̧ öwaedobö jö̧a̧litjö̧ma, ja̧ iteda jawama, iteda yemidanö 'döebena.

¹⁵ Jejenö 'döebitjö̧ma, okobe deinö bö̧jȩnö ju̧kwadöma bakobe debö di̧'yena, jadanö ökwödö lete'otjö otidinawö̧ jojodöma, tjebachajö nijisopja̧da badibena, —jö̧ba̧lö yöa̧linobe Eliuma.

Diosma okobe jwiinö waiso̧, ja̧danö okobe deinö jojodönö bakweminö edo̧, jö̧ba̧lö Eliu yöa̧lina jawa

¹⁶ Tupakwö yöa̧linobe Eliuma: —Job, ökwöma okwa jawa waisanö omukwato̧ kwö̧jitjö̧ma, bi̧ya yötawakwa̧ a̧ja̧kwö kwomukwato, chiwene ökwöi̧ a̧ja̧kwö, otiwanö kwomukwato:

¹⁷ Bakwo̧ jweinö lȩekwa yöawobö öpöjödo̧ma, inesö la'aka luwo̧ ö̧jobö jȩnaji̧? Jwiena, jö̧tö? Jo̧kwajabetjö̧ tajawedö yöka̧lobeda inesö suli̧ jwibo̧ Diosnö, –Sulabenö lȩekwa yöbawo̧, –jö̧ba̧lö?

^18-19 —Diosda inesö la'aka luwo̧ma chömöledöso̧, ja̧danö jo̧bada okobe deinö jojodönö otidinobetjö̧, bakweminö edo̧ jojodönö, la'aka luwedönöbi, nöinö tea juna̧ladönöbi, usulasedönöbi. Jau Job, la'aka luwedö sulabenö ja̧tjenama, –Aaa, bidöma la'aka luwedötjobetjö̧, wene jwia, lȩtebö̧kö̧wö̧, –jö̧ba̧lö yöba̧lö̧kö̧. Bö̧jȩ inesö la'aka luwo̧ sulabenö ja̧iökwe, jweinö yöbawo̧, –Mikwawö̧kö̧ja, –jö̧balö, ja̧danö ju'wedö la'aka luwedö sulabenö ja̧tjenama, jweinö yöbawo̧, –Ökwödöma sulabedöja, –jö̧ba̧lö. Okobe deinö jojodönö jweinö lȩekwa yöbawo̧ Diosma

²⁰ —Jau Job, Dios lȩebenama, juluwanö ö'wö babibadö jojodöma. Inesö juluwadönö lȩebakwa̧bi wayökökwe Diosnöma, baikwö yöta̧la: Lȩebawö̧, juluwanö ö'wö babibadö jojodöma, yö̧te ja'ö kwaajawö̧, debö tji̧'yobe.

²¹ Jau, Diosma jojodönö bakwonökwena edo̧, okobe jwiinö jabö tjö̧ji̧ edo̧.

²² Sulabenö ja̧badö tjuju̧kwawemi ja'yubebi jwiobe, sulabenö ja̧tji̧ Dios edapji jö̧ba̧lö, yȩa'wo okwa, bakwainö öwawökö'wo yȩa'wo okwa sulabenö jatji̧tjö̧bi, otiwanö edo̧ Diosma.

²³ —Diosma ida̧ökö okobe jwiinö waiso̧ jojodönö, sulabenö ja̧badö tjö̧jojobö, otiwanö ja̧badö tjö̧jojobö jö̧ba̧lö. –Ötjö lȩekwa luwo̧ chöba a'o ichibajadö, yötjawaja̧ ikenada chöwaisakwo̧sa, –jö̧ba̧löma omukwatö̧kö̧ Diosma, yötjawakwa̧ abönö ida̧ökö waiso̧.

²⁴ Ja̧danö, ida̧ökö waiso̧obetjö̧, sulabenö ja̧tjojobö jö̧ba̧lö abebö a̧ja̧kwökönö, ösödenama inesö juluwadönö söbebö lobo̧, ja̧danö iteda ösödi̧danö, jobadö tjö̧jinemi ju'wedönö kabebö juno̧.

²⁵ Jau, isabenö jobadö ja̧bö tjö̧ji̧ edö öwaisobetjö̧, yö̧te ja'ö jwibatö lobo̧ jobadönö, jwiinö söbebö lobo̧ jobadönö.

²⁶ —Sulabenö ja̧bö tjö̧jiökwe, öwaetjöda öwawinö jobadönö lȩbȩbo̧,

²⁷ iteda wei̧ tja̧ja̧kwobö tjöpöjödobetjö̧. Jau, jobadönö weijayonö, mikwawökö ji̧ jö̧ba̧lö a̧ja̧kwö tjö̧jobö tjöpöjödinobe,

²⁸ ja̧danö jojodönö usula tjemawinö ja̧tji̧nobe. Jobekwö sulabenö ja̧tji̧awö̧, usulasedö tjubudekwi̧ma Dios öba a'o ökwöobe, ja̧danö jwibadö tjubudekwi̧bi a̧ja̧kwobe Diosma. Ja̧danö tjubudekwiökwe, jobadönö pjabatö, balekwa mikwa lȩbebo̧ Diosma.

²⁹ —Jo̧kwaijayonö ju'wibi yötawakwö, jojodö sulabenö ja̧tjijayonö, lȩbebökönö, –Yadakwöda, –jö̧ba̧lö Dios iteada̧lobö ösöditjö̧ma, yayonö bakwobi jo̧banö yöa̧lobö jwiobe, –Dios, Sulabenö lȩbebö̧kö̧ja, –jö̧ba̧lö, Diosda inesö la'aka luwo̧obetjö̧. Ja̧danö Diosnö tjedapji jö̧ba̧lö, Dios uju̧kwawobö jö̧a̧litjö̧ma, bakwo̧bi jo̧banö edobö jwiena. Jejenö jo̧be Job, ja̧danö ju'wikwenama juluwanö lȩbebökönö, ö̧ji̧ tjedobö i̧sȩbököjayonö, jo̧bada inesö la'aka luwo̧ma, tjitebokwena inesö la'aka luwo̧bi, jojodö bakwo̧nökwena inesö la'aka tjuluwo̧bi jo̧bada.

³⁰ Jau, Diosda tjöbeba̧lo̧ma, Diosnö öpöjödadöma inesö la'aka luwedö ja̧nö, jojodönö webö tjö̧japji jö̧ba̧lö, jadanö jojodönö suli̧ waedö 'daliwa tjönapji jö̧ba̧lö.

³¹ —Baikwö abebö cha̧ja̧kwakwö Job: Diosnö yöba̧lö akebinaji̧, –Chuluwo Dios, sulabenö jatiökwe ötjönö lȩkebajabe, jo̧kwaitjö̧ tupakwöma sulabenö jatökakwo̧sa.

³² Jo̧kwajabetjö̧ ötjönö kwö̧ba̧jadobö atebakwö, kwöba a'otjö sulabenö jatinama di̧yajö jö̧ba̧lö, jadanö waisachibajo̧, jemi tupakwö jatökakwo̧sa jejenöma, –jö̧ba̧lö akebinaji̧?

³³ Jobekwö akebököjayonö, kwedemi Diosnö weköbobö jȩnaji̧? –Dios, baikwö pjakatotjö, baikwö lȩkebokotjö, –jö̧ba̧lö weköbobö jȩnaji̧? Omudawö junö̧kö̧sa ötjöma ja̧ jawama Job, ökwöda omukwatö yökawo, otiwi̧ma di̧ya, jö̧ba̧lö. Jo̧kwajabetjö̧ yöka̧lobö atebakwö Job, ja̧ jawa dakwö kwomukwatobeda?

³⁴ —Ju'wedö okwa jawa waisanö omukwatadöma, yöta̧li̧ a̧ja̧kwö yötja̧lena,

³⁵ –Job yöa̧li̧ma, wajwibö yöba̧lo̧, yöa̧li̧ma, okwa jawa waisachibökönö omöna jawa yöba̧lo̧.

^36-37 Sulabedö yötja̧li̧danö bakwainö sulabenö yöba̧lo̧ Jobma, sulabenö ja̧bajo̧, jemi tupakwö jwiinö sulabenö ja̧bo̧. Jau, dö̧'da̧de ja̧nö, Diosnö yebabinö omukwatökönö, jwaikwöda nöinö sulabenö yöba̧lo̧ Diosnö, jo̧kwajabetjö̧ isabenö lȩekwa luwedö tjöba a'o ö̧jo jö̧ba̧lo̧ Jobma, jo̧banö lȩekwa yötjawakobetjö̧, –jö̧ba̧lö yötja̧lena waisanö omukwatadöma, —jö̧ba̧lö yöa̧linobe Eliuma, Jobnö.