Diosnö ösödo̧ Job mikwo̧ usula emawina jawa 33 - Dios Iwene

Eliu tupakwö Jobnö yöa̧lina jawa

¹ Tupakwö yöa̧linobe Eliuma, Jobnö: —Yöta̧laja̧danö, kwösödi̧ jawa yöta̧lobö chisakwökö Job, jo̧kwaijayonö babe otiwanö yöta̧lakwa̧ kwa̧ja̧kwobö atebakwö, okobe jwiinö yöta̧lakwa̧ otiwanö kwaja̧kwobö ateba.

² Jau Job, babema jamatö yöta̧lakwö, chinenenö jamatö yöta̧lakwö.

³ Ökwönö yöta̧li̧ma, sulabenö omukwatö yöta̧lökö, chomajadenö otiwanö chomukwati̧tjö, dötölatajanö omukwatökönö otiwanö chöwaisi̧ jawa yöta̧locha.

⁴ —Ötjöma Dios O̧'wo Luwo̧ otidinökwesa, ja̧danö ja̧kwawa chujuna̧li̧ma, Okobe Jwiinö Juluwo̧ Dios iyobetjö̧, 'yaba̧lo̧sa.

⁵ Ökwönö yöta̧lakwa̧ a̧ja̧kwajo̧, –Ja̧maökö, –jö̧ba̧lö kwatadobö ji̧tjö̧ma, jweinö kwatado, 'diinö ja̧nö, otiwanö labebö lobö yökawo, –Yöka̧laja̧ jawatjö, suli̧ma bi̧ya, –jö̧ba̧lö.

⁶ Jau Job, yebabökönö ötjönö kwatadobö ja̧kobe, ökwödanö bakwaibo̧chobetjö̧. Dios ökwönö otidinadanö, ötjönöbi lete'otjö dadö otidina Job,

⁷ jo̧kwajabetjö̧ ötjönö yekaboböma jwiobe. Yebabökönö ötjönö kwatadobö ja̧kobe. Jau Job, labinö ökwönö yöta̧lökakwo̧sa, dösölö̧jinö yöta̧lakwo̧sa.

⁸ —Kwöba a'o a̧ja̧kwö chö̧jonö cha̧ja̧kwatö Job, ötjöda yöka̧laja̧ chölakiyunö cha̧ja̧kwatö, baikwö yöka̧laja̧ma:

⁹ –Ötjöma bakwainö otiwanö ja̧bö jo̧sa, sulabenö jabö̧kö̧sa. Isabenö Dios öba a'otjö, chusula jwibö, otiwanö dichawo̧sa,

¹⁰ jo̧kwaijayonö chusula jwitijayonö, Diosma ötjökwö ölakwabikwawobö isakwobe, jadanö ötjönö öpöjödö omukwatobe, Chöpöjojo, jö̧balö.

¹¹ —Ja̧danö tupakwö yöka̧linobe, –Ötjönö öpöjödö, chömasapiya ka̧lenasonö yö̧ebajabe, ja̧danö chusula öbadekwajotö jö̧ba̧lö, okobe jwiinö kwetachi̧tenia eda̧lo̧ Diosma, –jö̧ba̧lö yöka̧laja̧ cha̧ja̧kwatö.

¹² Jejenö a̧ja̧kwajo̧, baikwö yötawakwö Job, yöka̧li̧ma sula. Diosnö yöka̧laja̧ma, Diosma bakwainö jojodanö jo̧ yöka̧lajabedanö ichejekwa, jo̧kwaijayonö jo̧bama ökwödö bö̧jȩnö ju̧kwadötjö jwiinö bajalekwönönöbo̧ Job.

¹³ Jo̧kwajabetjö̧ isabenö jo̧bakwö kwölakwabikwawobö jwiobe Job, –Abebö cha̧ja̧kwijayonö, sulabenö atadö̧kö̧ Diosma, –jö̧ba̧lö yöka̧lobö jwiobe.

¹⁴ —Diosma isabenö jojodönö yöba̧lo̧ Job, jo̧kwaijayonö yemidanö, yemidanö yöa̧lijayonö, yöa̧laja̧ wajwitjena, Diosma ötjönö yöa̧lajabe, jö̧ba̧löma.

¹⁵ Ju'wikwenama, yö̧te tji̧'wi̧dinö jojodönö yöa̧lena, yö̧te bö̧ti̧ söinö jojodö tjabenama.

^16-17 Tji̧'wi̧dinö jojodönö i̧sȩbena Diosma, yetjaibanö lȩekwa i̧sȩbena, –Sulabenö ja̧köbi̧ kabatibö kwöbalewacho, otiwo̧sa jö̧ba̧lö kwomukwati̧ kakatibo, –jö̧ba̧lö.

¹⁸ Jau Job, jejenö yöba̧lö, tjöbeba̧lönö pjabato̧ Diosma, jojodö suli̧ tjöwaekwapji jö̧ba̧lö, juluwanö ö'wö batjibapji jö̧ba̧lö, jobekwö yöba̧lö pjabato̧ Diosma.

¹⁹ —Ja̧danö ju'wikwenama, jojodönö jweebotö jö̧ba̧lö, inia tjötobö weena Diosma. Jejenö weiökwe, bakwo̧ camapjonö ba̧nö, iwe'iju niökwe ö̧bena.

²⁰ Jejenö inia tjöbö ja̧nö, kwakwawabi ukwobö öpöjödachibena, jwiinö söi̧ kwakwawabi ukwobö öpöjödena,

²¹ 'dalökachibenanö kabatö, iwe'iju ajayinö öwawinökö'wobi öwawenanö kabatö.

²² Jejenö baledökwe, ö'wö baibakwa̧ yöneawachibobe, ja̧danö ö'wö babibajadö tju̧ju̧kwemibe i̧'yakwa̧ yöneawachibobe.

²³ —Ja̧danö ju'wikwenama, jejenö ö̧jemi ja'ötjö, Dios weökwe angel jo̧banö pjabatö ichena. Jau Job, ba̧jȩkwadö Dios ömöayedö angeledöma, ja̧danö ju'wikwenama jobadötjö bakwo̧ ichibö ö̧bajadena, Dios wei̧ a̧ja̧kwö ö̧jobö.

²⁴ Ja̧danö Diosma jo̧banö lȩlö̧jinö edena, jadanö lȩlö̧jinö edö yöa̧lena, –Bite ö'wö baibapji jö̧ba̧lö, ö̧jibinö pjabati, ö̧jibinö midawama chöbadekwajabe, ö̧jibinö pjabati, –jö̧ba̧lö yöa̧lena.

²⁵ Jejenö yöa̧litjö̧ma, iteba'o yemidanö juluwo̧ baibena, ina möayo̧ ö̧jinadanö, iteba'o yemidanö otiwachibakobe.

²⁶ Jejenö balediökwe, Diosnö aebena, jadanö Diosma aebi̧ a̧ja̧kwö ösödena. O̧'wo ösöwachibanö Dios öba a'o ichibena, ja̧danö Diosma jo̧banö ösödakobe, –Bitema chöba a'o wene jwibo̧, –jö̧ba̧lö.

²⁷ —Jejenö balediökwe, o̧'wo ösöwanö lo̧ena, ju'wedönö yöbawö lo̧ena, –Sulabenö ja̧bö, isabenö wene laeböködanö sulabenö jatijatö, jadanö sulabenö ja̧tiökwe, ötjönö lȩebo jö̧a̧linobe Diosma. Jo̧kwaijayonö lȩebi̧tjö chemo jö̧ta̧linadanö lȩebinokobe ötjönö, lȩlöjinö edinobe Diosma.

²⁸ Ö'wö batibapji jö̧ba̧lö, lȩlöjinö edö pjaatinobe Diosma, ö'wö babibajadö tjuju̧kwemibe chi̧'yapji jö̧ba̧lö pjaatinobe. Jo̧kwajabetjö̧ sulabenö jatinajayonö, ina 'yaba̧lo̧ chöjobe, –jö̧ba̧lö o̧'wo ösöwanö lo̧ena.

²⁹ —Jau Job, jobekwö jojodönö yöba̧lö pjabato̧ Diosma, yemidanöbi, yemidanöbi jobekwö pjabato̧.

³⁰ Jojodö ö'wö babibö, ö'wö babibajadö tjuju̧kwemibe tji̧'yapji jö̧ba̧lö jejenö tjö̧jibinö pjabato̧, tjo̧'wo ösöwanö tupakwö 'yaba̧ladö tjuju̧kwobö.

³¹ —Otiwanö yöta̧li̧ kwa̧ja̧kwo Job, 'wii̧nö janö yöta̧li̧ kwa̧ja̧kwo, jadanö ökwönö yöta̧lakwo̧sa.

³² Ikenama yöta̧laja̧ a̧ja̧kwajo̧, yöka̧lobö jö̧ka̧litjö̧ma kwatado. Jau Job, isabenö ökwönö yöta̧lobö chösöda, –Jobma isabenö wene jwibo̧, –jö̧ba̧lö, jo̧kwajabetjö̧ isabenö wene jwibo̧ kwö̧ji̧ yöka̧lobö ji̧tjö̧ma, yöka̧lobö ja̧kobe.

³³ Jo̧kwaijayonö atadakwawa jwiinö kwö̧jitjö̧ma, a̧ja̧kwöda kwa̧ja̧kwo, 'wii̧nö ba̧nö kwa̧ja̧kwo, jadanö ökwönö ba̧ja̧dö yötawocha, waisanö omukwatakwawa kwöwaisachibakobetjö̧, —jö̧ba̧lö yöa̧linobe Eliuma.