Diosnö ösödo̧ Job mikwo̧ usula emawina jawa 31 - Dios Iwene

Job bajaleapo yöa̧lina

¹ Tupakwö yöa̧linobe Jobma: —Isabenö Dios wei̧ a̧ja̧kwö jo̧sa, baikwö wanedö yöta̧la: Ötjökwö, chöbajalekwö sulabenö edökönö chö̧jakwa̧ yöbawö chujunijatö, –La'akatjöda chilekwobökuju möayujunö chedökakwo̧sa, Aaa, isunö chö̧jowe, jö̧ba̧löma. Dios lȩebapji jö̧ba̧lö, la'akatjöda chilekwobököjunö ösödi̧nö chedökakwo̧sa, –jö̧ba̧lö jobekwö yöbawö chujunijatö ötjödada.

² Jau chömöledö, böje jojodö Diostjö demakwa̧, mölejebe jo̧ Okobe Jwiinö Juluwo̧ Dios iyakwa̧ jawama, di̧ya jawa iyobeda?

³ Dios wei̧ a̧ja̧kwöködöma, suli̧ waekwi̧ jawa emadö, sulabenö ja̧badöma söbebö loawa jawada emadö, jö̧tö. Ja̧ jawa chemapji jö̧ba̧lö, otiwanö Dios wei̧ a̧ja̧kwö chö̧jijatö.

⁴ —Dios wei̧ a̧ja̧kwö chö̧jinobema, taji waekwinada? Ja̧bö chö̧ji̧ Dios edinökiji̧? Kwetachi̧tenia edinökiji̧? Editjö̧ma tajawedö sulabo̧ usula emawi̧danö usula chemawobö weobedaja?

⁵ Isabenö yötawa, la'akatjöda omöna yöba̧lö̧kö̧sa jojodönö, la'akatjöda jojodönö suli̧ waedö omöna yöta̧lobö isakwö̧kö̧sa.

⁶ Dios jweinö ötjönö nönö edobö chösöda, sulabenö ja̧bö chö̧jinojobö, wei̧ a̧ja̧kwö chö̧jinojobö jö̧ba̧lö. Jejenö nönö editjö̧ma, edö öwaisakwo̧, isabenö wei̧ a̧ja̧kwö jo̧sa, jö̧ba̧lö.

⁷ —Jweinö yötawaduwakwö, isabenö sulabenö ja̧bö̧kö̧sa ökwödö yöka̧laduwi̧danöma. Isabenö Dios weinama manatjö 'da̧bachibö chi̧'yinatjö̧ma, ja̧danö chedaja̧ jawa ötjöda sulabenö chujuna̧lobö chösödinatjö̧ma, ja̧danö ju'wi Dios weökö jawa ja̧tinatjö̧ma, isabenö ötjönö lȩebobö jȩna.

⁸ Baikwö yöbawö chujunaduwakwö, jejenö sulabenö ja̧tinatjö̧ma, ötjöda batjo chotidaja̧, ju'wedöda tjukwobö jo̧be, ja̧danö chöbatjönö pokwi̧ma, 'yebö lotjobö jo̧be.

⁹ Ja̧danö isabenö jelo̧ ilekwonö ösödö, jobujukwö chö̧jotö jö̧ba̧lö eju apjude pjeanö ju̧kwawö chiteada̧linatjö̧ma,

¹⁰ chilekwoma ju'wedö tjömöayuju ja̧nö 'diinö jotidobö jo̧be, ja̧danö ju'wedöda jobujukwö tjö̧jobö jo̧be, jö̧ba̧lö yöbawö chujunaduwakwö, isabenö Dios weökö jawa ja̧binö̧kö̧sa, jö̧ba̧lö.

¹¹ —Jau chömöledö, isabenö jejenö sulabenö ja̧tinatjö̧ma, isabenö yöta̧laja̧danö baledobö jȩna, isabenö taba lö̧ji̧ jawa sulabenö ja̧tinobetjö̧, ja̧danö sulabenö jatiökwe, isabenö Dios lȩebobö jȩna.

¹² Jau chömöledö, jelo̧ ilekwokwö sulabenö chö̧jinatjö̧ma, ja̧ma söbebö loola ökwöladanö jȩna, ja̧danö ö'wö babibadö tju̧ju̧kwemi chichibenanö kabatö, ötjönö ubena, ja̧danö okobe jwiinö chitea ubo jö̧a̧lena. Isabenö jejenö ja̧tinatjö̧ma, Dios lȩebobö jȩna chömöledö.

¹³ —Ju'wibi chömöayedötjö bakwo̧ökö, bakwujuö̧kö̧ wene yöbawö, –Duluwo̧, ökwödönö sulabenö ja̧köbajabe, –jö̧ba̧lö yötjawi̧ a̧ja̧kwökönö jobadönö sulabenö ja̧tinatjö̧ma, isabenö Dios lȩebobö jȩna.

¹⁴ Jau chömöledö, jobadönö sulabenö ja̧tjitjö̧ma, 'dö̧ibaji mölȩ Dios lȩekwa yöawenema, jo̧ba öba a'otjö atadakwawa jwibö chö̧jena. –Kwömöayo̧nö tajawedö sulabenö jaköbinada? –jö̧ba̧lö abebö a̧ja̧kwökwe, chatadakwa̧ jwibö chö̧jibena, wainö ötjönö lȩebobö jȩna.

¹⁵ —Jau chömöledö, ötjöbi, chömöayo̧bi bakwaibedösa, mikwawö̧kö̧ jö̧ba̧lö chöpöjödobö jwiobe, baikwö yöta̧la: Chojo'do jukwa'wo ökwa chö̧jayi, ötjönö otidinabi, chömöayo̧nö otidinabi bakwo̧da, Diosda, baikwaibedösa ötjöbi chömöayo̧bi, jo̧kwajabetjö̧ mikwawö̧kö̧ jö̧ba̧lö yöa̧li̧ a̧ja̧kwökönö sulabenö ja̧tinatjö̧ma, isabenö Dios lȩebobö jȩna.

¹⁶ —Ju'wibi, jwibadö tjujuna̧lapji jö̧ba̧lö tjöteba̧linatjö̧bi, tjilekwamu wobekwinadönö pjabatökönö, –Dakwö dö̧jakwajö, –jö̧ba̧lö tjö̧jobö wetinatjö̧bi,

¹⁷ ötjöda otiwanö chukwonö, löyödönö tjukwobö iyökönö chö̧jinatjö̧bi, isabenö Dios lȩebobö jȩna chömöledö.

¹⁸ —Jo̧kwaijayonö jejenö ja̧bö ji̧nö̧kö̧sa la'akatjöda chömöledö, ba̧kwelöjatebö tjemubayo̧ chö̧jelö baikwö bajalenö, ba̧kwelöjatebö jobadöjayedönö pjabato̧sa. Isabenö ba̧kwelöjatebö löyödönö pjabatinasa̧, tjabe'dodanöbo̧sa jö̧ba̧lö, jadanö chojo'do jeminelö baikwö bajalenö ba̧kwelöjatebö pjabatiachijatö tjilekwamunö wobekwinadönö.

¹⁹ —Ju'wibi, usulasedö kamisi jwibö, tiyuwi̧tjö tjime'dawobe edajo̧, ja̧danö usulaso̧ wamesa̧do̧ jwibö ö̧ji̧ edajo̧,

²⁰ chajwimu obejadö tji̧sȩdo̧tjö chiyökökwe, bakwo̧bi, –Sulabenö iyö̧kö̧ Jobma, –jö̧ba̧lö yöawobö ji̧tjö̧ma, Dios lȩebobö jȩna.

²¹ Ja̧danö löyödönö suli̧ waedö, –Löyödötjobetjö, bidönö sulabenö ja̧tijayonö, lȩekwa luwedö lȩtjebökena, –jö̧ba̧lö, löyödönö sulabenö ja̧tinatjö̧ma, isabenö Dios lȩebobö jȩna.

²² Jau chömöledö, jejenö ja̧tinatjö̧ma, chöja chöböbe'otjö 'yebö lotjobö jena, isabenö sulabenö jatinobetjö̧.

²³ Jo̧kwaijayonö, Diosnö yetabobetjö̧ jejenö ja̧binö̧kö̧sa chömöledö. Jau chömöledö, Dios inesö ujulu edö, chujulu jwibö yetabijatö, ja̧danö yebabinö ja̧nö, jejenö ja̧tijökötö, –Dios labinö lȩebapji, –jö̧ba̧lö.

²⁴ —Ju'wibi, balada jawa oro cho̧'wo wana̧lö, –Bakwai̧ oro chujuna̧lobetjö̧ otiwanö chö̧jakwo̧sa, –jö̧ba̧lö cho̧'wo chöwa̧na̧litjö̧ma,

²⁵ ja̧danö, –Ötjöda otiwanö otidö, nöinö juna̧lo̧ batibajabe, isabenö otiwanö juna̧lo̧sa, –jö̧ba̧lö, otiwo̧sa jö̧ba̧lö chomukwatitjö̧ma, isabenö Dios lȩebobö jȩna.

²⁶ —Ju'wibi, möle jawo̧ idejatobe edö, jadanö yö̧te jawo̧ otiwi̧ edö,

²⁷ jojodö wajwitjonö chomajadenö möle jawo̧nöbi, yöte jawo̧nöbi bȩbachibö chösödobö omukwatö, chömamu du̧batö jobadönö chösödinatjö̧ma,

²⁸ isabenö Dios lȩebobö jȩna. Jau chömöledö, bȩbachibö jobadönö chösöditjö̧ma, bakwainö mölejebe jo̧ Diosnöda chösödo jö̧ta̧li̧ kabatibö, chösödoko jö̧ta̧lawö̧nö chösödena, jadanö jejenö sulabenö chösödiökwe, isabenö ötjönö lȩebobö jȩna.

²⁹ —Ju'wibi, bakwo̧ chöpöjojo wene ujuna̧lenama, cho̧'wo ösöwachibanö wene ujuna̧lobö chösödinatjö̧ma, jadanö ju'wedö jo̧banö sulabenö ja̧tjenama, otiwa jö̧ba̧lö, jo̧ba usula emawobö chösödinatjö̧ma, isabenö Dios lȩebobö jȩna.

³⁰ Jo̧kwaijayonö jejenö ja̧binö̧kö̧sa chömöledö, jadanö la'akatjöda jelo̧nö öpöjödö, dameakwö abebinö̧kö̧sa, –Dios, chöpöjojonö kwabö loköbobö atebakwö, –jö̧ba̧lö.

^31-32 —Isabenö otiwanö pjabato̧sa jojodönö chömöledö. Isabenö sulabenö pjabatökönö chöjinatjö̧ma, chömöayedöma yötjawobö jȩna, –Sulabenö pjabatö̧kö̧ Jobma, –jö̧ba̧lö. Jo̧kwaijayonö otiwanö pjatatinada edinadö chömöayedöma, ja̧danö yötjawobö jo̧be, –Dululuwo̧ Jobma isabenö otiwanö jojodönö pjabatö jo̧, –jö̧ba̧lö. Jau, jelobetjö ichajadö chejube tjichibenama, la'akatjöda a̧petutjöda tjabobö webö̧kö̧sa, ba̧kwelöjatebö jobadönö tebato̧sa, chejunö otiwanö tjabobö. Ja̧danö la'akatjöda chu̧kwa kwakwawa a̧'dȩlö̧kö̧sa, okobe deinö jojodönö a̧'dȩlökönö iyo̧sa, otiwanö tjukwobö, chömöayedöbi ja̧ wene edö waisadö chömöledö.

^33-34 —Ju'wibi, jojodö ja̧biatji̧danö, sulabenö ja̧bajo̧, sulabenö jataja̧ tojö chujuninatjö̧ma Dios lȩebobö jȩna. Jau, jojodönö yebabinö omukwatö, –Jojodö sulabenö ja̧taja̧ tjöwaisitjö̧ma tjö̧dameakwena, chömöledö ötjönö tjöpöjödachibapji jö̧ba̧lö, 'wiinö ja̧nö, chejutjö labebökönö, yöbawökönö sulabenö jataja̧ chotojocha, –jö̧ba̧lö, sulabenö ja̧tijayonö, sulabenö ja̧bö̧kö̧sa i̧sebö chö̧jinatjö̧ma, Dios lȩebobö jȩna.

³⁵ —Ötjöwe, bakwo̧bi ötjönö a̧ja̧kwo̧ma deobe. Isabenö yöta̧la, okobe jwiinö yöta̧laja̧ma, jweinö omöna yöba̧lökönö yöta̧lajabe, ja̧danö Okobe Jwiinö Juluwo̧ Dios a̧ja̧kwajo̧ yöawobö chösöda, jweinö yötawojobö, yötawokojobö jö̧ba̧lö. Ötjönö öpöjödadö, –Jobma sulabenö ja̧bo̧, –jö̧ba̧lö yöba̧ladö, wȩyukwöja tji̧wȩyudobö chösöda, –Job sulabenö ja̧inama bi̧ya, –jö̧ba̧lö wȩyukwöjama.

³⁶ —Ja̧ wȩyukwöja chujuna̧litjö̧ma, taba jwiinö öwawinö chöböbe'onö kwetatena, bakwo̧ butjawaka ubutjawi̧danö chubutjawena, toja̧lökönö.

³⁷ Yebabökönö, la'aka luwo̧ yebabökönö lȩekwa luwo̧ öba a'o ichibi̧danö, yebabökönö inesö lȩekwa luwo̧ Dios öba a'o chichibena, okobe jwiinö ja̧bö chö̧jina jawa labebö lotakobetjö̧.

³⁸ —Isabenö sulabenö ja̧binö̧kö̧sa chömöledö. Ötjö chöbatjo niji chönaukwinatjö̧ma, ja̧danö naukwajo̧ ötjöda chöbatjo baibanö chotiditjö̧ma, Dios lȩebobö jȩna.

³⁹ Jau, ju'wedö tjitea nijitjö pokwi̧ midökönö, ja̧ niji ajayi luwedö a̧wi̧chi tjötjonö, ötjöda midökönö chukwinatjö̧ma, isabenö Dios lȩebobö jȩna.

⁴⁰ —Jau, ju'wedö tjitea niji chönaukwinatjö̧ma, trigo pokwo jö̧a̧lemi sȩötjeda pokwobö jȩna, ja̧danö cebada pokwo jö̧a̧lemi, sula'woda pokwobö jȩna, —jö̧ba̧lö yöa̧linobe Jobma, ötjönö baledi̧ma, sulabenö ja̧tiökwe lȩbebö̧kö̧ Diosma, jö̧ba̧lö. Jejenö yöba̧lajo̧, Jobma yöba̧lö kaatibinobe.