Diosnö ösödo̧ Job mikwo̧ usula emawina jawa 30 - Dios Iwene

Ajayinö otiwanö tjomukwatökwe chö̧jinajayonö, babema otjökwesa, jö̧ba̧lö Job yöa̧lina jawa

¹ Tupakwö yöa̧linobe Jobma: Jo̧kwaijayonö, ajayinö otiwanö ötjönö tjomukwatinajayonö, babema ötjötjö baikwönönö möayedöbedöma ötjönö obadö. Mikwawöködöbi jejenö ötjönö obadö chömöledö, baikwö yöta̧la: Inesö mikwawöködö, chajwimu awilidökwö otidö, chajwimu obejadönö tjiteada̧lobö mikwawöködö jö̧ba̧lö chöpöjödinawö̧ tjitjimubi ötjönö obadö babema.

² —Isabenö nöinö usula emawo̧sa ötjöma, inesö mikwawöködö usulasedöbi ötjönö otjenanö baibanö. Jau, ajayinö weti̧ tjotidobö mikwawöködö, ida̧ökö tjujulu 'dö̧ibajawö̧, ja'yubebi weti̧ tjotidobö mikwawöködöbi ötjönö obadö batjibajabe. Jobadöma isabenö tjujulu jwibadö,

³ ja̧danö jwiinö jwibö ja̧nö, a̧wi̧chi̧ tjöbö 'dalökachadö tjö̧ji̧danö ju̧kwadö. Jwiinö a̧wi̧chi̧ tjöbö tjö̧jobetjö̧, jojodö deobe kököobe janö, towi bö'diyada cha'öbadö.

⁴ Kwakwawa jwitjobetjö̧, ösötje isakwö, lei̧ pokwi̧ kwadö, retama ötjabötje öjiya kwadö, ju'wi kwakwawa jwitjobetjö̧.

⁵ Jobadöma ju'wedö comunidadtjö a'dewö lotjawö̧, –Naukwabidö, –jö̧ba̧lö, jojodö tjö̧jelö a'dewö lotjawö̧. Jobadö inesö usula emawadöbi ötjönö otjobe babema.

⁶ —Jejenö a'dewö lotjiawö̧, ojwe köködö wabekonö usula emawö ju̧kwadö, ja̧danö laju okwabi, inawiya jȩnabi usula emawö ju̧kwadö.

⁷ Ösötje sȩötje jȩmi ja̧nö, tebonö ju̧kwadö tjubudekwi̧danö budekwadö, tiyuwiawö̧ sȩötje teebe ko̧ko̧kwö wo̧batadö.

⁸ Jobadöma wajwibadö yelösöda, tjimi jwibadöbi batjibanö isabenö mikwawöködö, okobe deinö bö̧jȩnö ju̧kwadötjö baikwönönöbedö jobadöma,

⁹ jo̧kwaijayonö jwiinö ötjö babe usula chemawobetjö̧, jobadötjö bajalekwönönö usulaso̧ batibajabe, jobadöjayedöbi ötjönö obadö batjibenanö kabatö. Jau chömöledö, bakwo̧ usulaso̧nö wanedö yötja̧lobö jö̧tja̧lenama, ötjönöda obö yöba̧ladö, –Jobma jwiinö usulaso̧, –jö̧balö, isabenö jwiinö usula emawo̧sa.

^10-11 —Diosma jwiinö ötjönö jwibatö loajabe ichejekwa, ja̧danö jwiinö mikwawö̧kö̧ batibanö usula chemawinö weajabe, jokwajabetjö̧ ötjönö öpöjödö, yö̧ne ichibökönö ödökwönönö ja̧dö, ja̧danö ötjönö edö, öpöjödö subadö, okobe jwiinö ötjönö sulabenö ja̧tjobö tjomukwati̧ma, idöda sulabenö tjomukwati̧danö jabadö, jobadö chöpöjojodöma.

¹² Chöwaisobekwöchobema, jobadötjö möayedöma ötjönö metjibotö jö̧ba̧lö a̧la̧ibadö, jadanö töbö metakobetjö̧, töawa jawa lödadö, ja̧danö ötjönö metjibakwa̧ jawa sulabenö otidadö.

¹³ Otiwanö dötibapji jö̧ba̧lö sulabenö tjöbeba̧ladö, ja̧danö bakwobi ötjönö pjabato̧ deobetjö̧, jwaikwöda ötjönö söbebö lotjobö isakwadö.

¹⁴ —Ötjönö mebibö tjujuluwi̧ma, baikwö wanedö yötawa: Tjöekwemi 'dobö lobajadö, tebachö ötjönö metjibobedanö ichejekwa,

¹⁵ jwiinö yetaibanö sulabenö ja̧badö. Jau, ajayinö jojodö otiwanö ötjönö tjomukwatinama, jwa̧lȩ'epjo e'ewö loinobedanö ichejekwa, jadanö ojwiyo'wo juluwanö jwiibi̧danö, nöinö chujuna̧linama juluwanö jwiibinobe, isabenö usula emawö jo̧sa, ¡ötjöwe!

¹⁶ —Ja̧danö, babema ja̧kwawa chujuna̧li̧bi 'dö̧ibajobe, mölȩkwena jwiinö inia tjöbö usula chemawobe.

¹⁷ Yöte baledibanö, chiwe'iju niachobe, inia tjöbö chö̧ji̧ma la'akatjöda söawachibokobe.

¹⁸ Iteda inesö ujulunö, Diosma chö̧ka̧misi do̧atajabe ichejekwa, jadanö chö̧ka̧misinö nu'yö, chö̧kwö̧la ödalebobedanö ichejekwa.

¹⁹ Ötjönö ikwö loajabe ichejekwa lete'o jȩmima, ja̧danö babema ökwölaso̧pjadanö, ja̧danö nijiso̧pjadanö ichejekwo̧sa, ja'yubebi mikwawö̧kö̧ batibobetjö̧.

²⁰ —Chuluwo̧ Dios, ökwönö budekwö atebijayonö, atebökwe atadö̧kö̧ja. Kwöba a'o a̧la̧ibö atebijayonö, atadökönö sule edöda edo̧ja.

²¹ Isabenö ötjönö suli̧ kwöwaedobö ösödo̧ja chuluwo̧, ja̧danö inesö kwujulunö, usula chemawinö mebibo̧ja.

²² Jwa̧le'epjo webo̧ja ichejekwa, jwa̧le'ewö ötjönö dobibö e'ewibobö, usula chemawinö webo̧ja.

²³ Chöwaisa chuluwo̧, juluwanö ö'wö batibobö weköbakwo̧ja chuluwo̧, okobe deinö 'yaba̧ladö bajalianö ö'wö batjibi̧danö, juluwanö ö'wö batibobö weköbakwo̧ja.

²⁴ —Usula chemawiökwe, tajawedö pakatokobeda chuluwo̧? Jojodö suli̧ waekwajadö, usula tjemawenama, bakwo̧ tupakwönönö suli̧ öwaedobö ja̧enaji̧? Pjaatobö atjebiökwe, suli̧ öwaedenaji̧? Ja̧maökö chuluwo!

²⁵ Ötjöbi ja̧danö chuluwo̧, usulasedönö chedenema, jobadönö suli̧ waedökönö, cho̧'wo tjo̧achö chubudekwijatö jobadönö, ja̧danö jwibadö jwibö tjö̧ji̧ edö, cho̧'wo tjo̧achö lȩlöjinö chedijatö jobadönö.

²⁶ —Jo̧kwaijayonö pjabatö̧kö̧ja jejenöma ötjönö chuluwo. Ökwönö usula emawö chubudekwiökwe, pjabatö̧köja chuluwo̧. Isabenö pjaatakwo̧ jö̧ta̧linajayonö, tupakwönönö suli̧da ichinobe, jadanö dewi̧ ichakwa̧ chiteada̧lijayonö, yȩa'woda ichinobe.

²⁷ Jejenö baledi̧tjö̧, kabatökönö chomajadenö cho̧'wo tjo̧bekwö jo̧sa, kabatökönö möletenia baledibanö inia tjöbö usula emawo̧sa.

²⁸ Jawo̧ ubökwedanö, chi̧sȩdo̧ yȩbo̧ kwebacho̧sa, jo̧kwaijayonö ötjönö ubinama, jawo̧damaökö, Diosda usula chemawinö weobetjö, chi̧sedo̧ ubökwedanö jo̧sa. —Jwiinö usula chemawobetjö̧, jojodö tjo̧ko̧ko̧kwenama, a̧la̧ibö budekwö atebawö̧, –Chömöledö, pjabataduwitjö, –jö̧ba̧lö.

²⁹ Jau, tebo awi̧li̧dö tjubudekwi̧danö, ja̧danö tumulu'udö tjubudekwi̧danö budekwo̧ batibajabe, jo̧dawa'ye ja̧nö jwiinö usula chemawobetjö̧.

³⁰ Jwiinö usula emawo̧sa, chi̧sȩdo̧ yȩedo̧ma, 'dolobö meökwesa, ja̧danö nia'o 'dö̧tachobetjö̧ chiwe'ijubi tubökwesa.

³¹ Isabenö usula emawö, o̧'wo tjo̧achö chö̧jobe, baikwö yöta̧la, Chitea lo̧awa jawa arpabi flauta jawabi, tjo̧'wo ösöwakwawa jawa lo̧awa ökwöo jö̧a̧lijayonö, babema bakwainö tjo'wo tjo̧achi̧ jawa, jadanö tjubudekwi jawada ökwöobe, —jö̧ba̧lö yöa̧linobe Jobma.