Diosnö ösödo̧ Job mikwo̧ usula emawina jawa 3 - Dios Iwene

Job usula emawö yöa̧lina jawa

¹ Jemi ikenama, jelemutjö dötölataja mölebiya 'wi̧inö ba̧jo̧, bajalianö yöa̧linobe Jobma. Iteda ojo'do jo̧banö jemina möle öpöjödö yöa̧linobe Jobma, jemina mölema inesö suli̧ möle jö̧ba̧lö.

² Baikwö laebobe Job yöa̧linama:

³ —Ötjönö jemina möle söbebö lotjinatjö̧ma, otiwo jö̧a̧lena, ja̧danö chojo'do metu'wo bajibina yö̧tebi söbebö lotjinatjö̧ma, otiwo jö̧a̧lena.

⁴ Ja̧ möle inesö yȩa'wo ji̧ möle baibinatjö̧ma, otiwo jö̧a̧lena, ja̧danö mölejebe jo̧ Dios ja̧ möle o̧'wo jwiibinatjö̧ma, otiwo jö̧alena, ja̧danö möle jawo̧ ja̧ möle idejatinökötjö̧ma, otiwo jö̧a̧lena.

⁵ Ja̧ möle dewachökönö, inesö jwiinö yȩa'woda li̧natjö̧ma, otiwo jö̧a̧lena, ojwiyo'wo jwiinö yȩa'wo li̧natjöma, jojodö jwiinö yetjaibanö yȩa'wo li̧natjö̧ma otiwo jö̧a̧lena.

⁶ Chojo'do metu'wo bajibina yö̧tebi ja̧danö. Inesö yȩa'wo ja̧ yö̧te ö̧katibinatjö̧ma, otiwo jö̧a̧linena. Ja̧ möle o̧ba wȩyukwöjatjö söbebö lotjobö chösöda, ja̧danö ja̧wo̧ wȩyukwöjatjö söbebö lotjobö chösöda.

⁷ Jwiinö chöpöjödobe chojo'do metu'wo bajibina yö̧te, la'akatjöda ja̧ yö̧te metu'wo bajiboböma chöpöjöda, ja̧danö la'akatjöda ja yö̧te, –Otiwanö jitji̧nö jemajabe, –jö̧ba̧lö tjo̧'wo ösöwachibanö jwötjeba̧loböma chöpöjöda.

⁸ Mea boawa waisadö, inesö labo̧ jwaibalawanö jo̧ Leviatan ötjabökwenö tjiwiludobö waisadö mea bobadö ja̧ chojo'do jemina möle suli̧ waedö mea botjobö chösöda, jwiinö chöpöjödi̧ möle ja̧ mölema.

⁹ Si̧li̧'idö ja̧ möle dewachakwa̧ abönö dejatadö si̧li̧'idö tjidejatinökötjö̧ma, otiwo jö̧a̧lena. Ja̧ möle dewacho jö̧a̧lena, dewachinökötjö̧ma, otiwo jö̧a̧lena, ja̧ möle yȩayi la'akatjöda dewachinökötjö̧ma, otiwo jö̧a̧lena.

¹⁰ Jobekwö öpöjödö chomukwatobe ja̧ möle, chojo'do metu'wo bajibina mölema. Jau, chojo'do metu'wo bajibapji jö̧ba̧lö tjöeba̧linokobe ja̧ mölema, jadanö jejenö tjöeba̧lokobetjö̧, chojo'doma ötjönö jeminobe, ja̧danö babema bi̧ya inesö suli̧ jawa chöbaledobe.

¹¹ Ötjöwe, ötjönö jemenama, tajawedö jenada ö'wö batibinököjö? Jimetu'wo jemenama, tajawedö debö chi̧'yinököjö?

¹² Chojo'do ötjönö jemenama, tajawedö ötjönö ösödö juyu̧kijunö jöwana̧linajö, ja̧danö tajawedö chojo'do jo̧do'bi̧ chowobö jojwinajö?

¹³ ¡Ötjöwe! Jejenö jösödinökötjö̧ma, jemaja̧ ikena ö'wö batibo jö̧ta̧linobe, chabibobedanö jenada ö'wö babibö, wene jwiinö chö̧bo jö̧ta̧linobe.

¹⁴ Jau, ö'wö batibinatjö̧ma, damötjö ji̧nadö la'aka luwedökwöbi, tjömöayedö waisanö tjomukwatobö pjabatadökwöbi wene jwiinö chabo jö̧ta̧lena, inesö otiweju babe ida̧ökö suli̧ waekwinejunö ju̧kwinadö la'aka luwedökwö chabo jö̧ta̧lena.

¹⁵ Ja̧danö ö'wö batibinatjö̧ma, luwedö, tjejunö nöinö orobi platabi ju̧na̧linadökwö, chabo jö̧ta̧lena, wene jwiinö.

¹⁶ Ötjöwe, chojo'do jukwa'wo okwa ina chö̧jayi tajawedö ö'wö batibinököjö, dewi̧ tjedakwa̧ abönö, tjukwa'wo okwatjö tjemu ö'wö batjibi̧danö, tajawedö ö'wö batibinököjö?

¹⁷ Jau, isabenö ö'wö batibinatjö̧ma, otiwo jö̧a̧linena, baikwö yötawa: Inesö sulabedöma suli̧ tjöwaedokobe ö'wö babibö abadönöma, ja̧danö 'diinö otidinadö ö'wö babibadöma, otidökönö ö'wachö tjabobe.

¹⁸ Ja̧danö ka̧lena bi̧nadöma, ö'wö babibajadö wene jwiinö tjabobe, ja̧danö ö'wö babibajadö tjömöayedöbinadöma, aba̧lö tjuluwedö 'diinö wetja̧li tja̧ja̧kwokobe.

¹⁹ Ö'wö batjibaja̧ ikenama, luwedöbinadöbi, jo̧kwadabedöbinadöbi bakwaibebö tjö̧jobe, ja̧danö tjömöayedöbinadöma, tjuluwedö wetjö̧kö̧wö̧ batjibanö tjö̧jobe. Isabenö ö'wö batibinatjö̧ma otiwo jö̧a̧linena, ötjöwe!

²⁰ Ötjöwe, inesö usula emawadöma, tajawedö ö'wö babibökönö, ina dewi̧ tjedobö weobejö? Ja̧danö tjo̧'wo luwo̧nö usula emawadönö, tajawedö ina 'yatja̧lobö weobejö?

²¹ Jobadöjayedöma ö'wö batjibobö jwiinö ösödadö, –Woawa ichowe, –jö̧ba̧lö, jo̧kwaijayonö ichökö woawama. Jobadöma inesö nöinö mikwawi̧ jawa tjöbadekwajobö sobö isakwadö tjisakwi̧tjö̧ bajalekwönönö ö'wö batjibobö isakwadö,

²² ja̧danö ö'wö batjibenama, jwiinö tjo̧'wo ösöwachibanö ö'wö babibadö, –Bajaliyanö otiwanö ö'wö batibajabe, –jö̧ba̧lö. Tajawedö jobadöjayedö ina 'yatja̧lobö weobejö?

²³ Tupakwö tji̧'yakwa̧ wajwibö le'dewadöma, tji̧'yakwa̧ jwiinö Dios pje'datö loinawö̧ma, tajawedö ina 'yatja̧lobö weobejö?

²⁴ Ötjöwe, jobadöjayo̧ chö̧jobe ötjöma. Kwakwawa chukwo jö̧ta̧lenama, kwökönö budekwöda chö̧jobe, ja̧danö ojwiyo toi̧danö, kabatökönö, –Akö, –jö̧ba̧lö usula emawö jwötobe.

²⁵ Jau, yetabina jawama ötjönö baledajabe, inesö yebabinö chomukwatinama usula chemawinö baledobe.

²⁶ Babema ja'yubebi wene jwiinö jö̧kö̧sa, 'wiinö chö̧joböma jwiobe. Jau, wene jwiinö chö'wachoböma jwibo̧sa, jwaikwöda wene baledöda jo̧sa, —jö̧ba̧lö usula emawö jö̧a̧linobe Jobma.