Diosnö ösödo̧ Job mikwo̧ usula emawina jawa 28 - Dios Iwene

Job tupakwö yöa̧lina jawa

¹ Tupakwö yöa̧linobe Jobma: —Isabenö nöinö otidö tjöbadekwajobö waisadö jojodöma baikwö yöta̧la: Niji okwa sobö tjotidobe, plata jawa niji okwatjö tjemobö, ja̧danö oro otikwemibi tjujuna̧lobe, bakwai̧ oloda baibanö tjotidobö.

² Ja̧danö 'dii̧ jawama, niji okwatjö emadö, ja̧danö inawiya tubedadö, cobre tobebö tjemobe.

³ Jau, ja̧ jaye tjemotö jö̧ba̧lö, inesö yȩa'wo jȩmi, niji okwa sobadö. Dȩju̧wa'yunö dejatö, jwiinö okwa isakwadö, baikwö yöta̧la:

⁴ Jojodö deobe, ju'wedö kwetjachokobema, jwiinö okwa batjibanö laju sobadö, ja̧danö a̧la̧chi'bonö jwibachö, bakwachobebi, bakwachobebi wi'yubö, okwa jwibachadö.

^5-6 —Jau, nijima kwakwawa pokwö wa̧jemi, jo̧kwajayonö ju'wibi niji okwa ju'wi jaye jȩmi, nöinö mikwawawa zafirosbi, orobi. Niji okwa söbibajadö, ökwölanö inawiya 'dabö, ja̧ jaye tjemobö waisadö jojodöma.

^7-8 Tebonö ju̧kwadö wajwitjelö, ja̧ jawa otidö tjemobö waisadö. Jobe 'ya̧kwawama manama, öwawököma, pjibolema jobe ya̧kwawama wajwibo̧, ja̧danö bolema la'akatjöda edinököma. Ja̧danö tebonö ju̧kwadö juluwadöbi, didibabi la'akatjöda kwetjachinököma, jobe 'ya̧kwawama manama.

⁹ Jo̧kwaijayonö, yayonö jojodöma jobe ju'wedö wajwitjobe ichibö, inawa 'diawa 'dabö otidadö. Mösa'o la'aka ichibanö, mösa'o la'aka jawa sobadö, tjösödi̧ jawa tjemakobetjö̧.

¹⁰ —Jau, isabenö nöinö isakwö badekwajadö jojodöma, inawiya ö'wejenö, inawiya 'dalö sobö mana tjotidobe, ja̧danö okobe jwiinö jobetjö emawa nöinö mikwawi̧ jawa tjedajabe.

¹¹ Ja̧danö ju'wibi ojwe delö laebobejö jö̧ba̧lö, la'aka isakwö badekwajadö jojodöma, okobe jwiinö ja̧jayö tojö junawa jawa, jojodöma tjöwaisachibanö tjidejatajabe ichejekwa.

¹² —Okobe jwiinö ja̧jaye isakwö tjöbadekwajobö waisadö bö̧jȩ jojodöma, jo̧kwaijayonö waisanö omukwatakwawa la'aka tjöbadekwajoböma wajwibadö, –Inesö okwa jawa waisachibakwawelöma, daijö? –jö̧ba̧lö.

¹³ Jau chömöledö, waisanö omukwatakwawa waisachibakwawelö wajwibadö jojodöma, 'yaba̧ladö tjö̧jelö tjisakwemi badekwajöködö.

¹⁴ Ja̧danö inesö jwaibalawama, –Chöjelömaökö, –ja̧danö ju'wi jwaibalawabi, –Chö̧jelömaökö waisanö omukwatakwawa waisachibakwawelöma, –jö̧ba̧lö yöawobedanö ichejekwa.

¹⁵ —Ju'wibi, balada midö waisanö omukwatakwawa tjemobö jwiobe, bakwai̧ oro tjimiditjö̧bi, nöinö plata nönajadö tjimiditjö̧bi,

¹⁶ Ofirtjö emawa oro nönajadö tjimiditjö̧bi, nöinö mikwawawa onicebi, zafirobi tjimiditjöbi, yayonö waisanö omukwatakwawa midö tjemobö jwibadö.

¹⁷ Jau chömöledö, isabenö jwiinö mikwawi̧ waisanö omukwatakwawama, orotjöbi, diamantetjöbi, inesö nöinö mikwawi̧ orotjö otikwayu mikwawi̧tjöbi bajalekwönönö mikwawi̧, waisanö omukwatakwawama.

¹⁸ Ju'wi mikwawi̧ jawaja? Coralnöbi, Jaspenöbi midö tjemobö jȩnaji̧? La'akatjöda jwiobe. Waisanö omukwatakwawa tjöwaisachiboböma, okobe jwiinö ja̧jayetjö bajalekwönönö mikwawi̧, perlatjöbi,

¹⁹ Etiopia nijitjö emawa topaciotjöbi, inesö bakwai̧ orotjöbi jwiinö bajalekwönönö mikwawi̧, la'akatjöda ja̧jaye midö, waisanö omukwatakwawa midö tjemoböma jwiobe, la'akatjöda.

²⁰ —Jo̧kwajabetjö̧ chömöledö, isabenö waisanö omukwatakwawama, delö ichobeda? Okwa jawa waisachibakwawelöma, delöda?

²¹ Okobe deinö 'yaba̧ladö tjisakwemi, öwawökö, tjedapji jö̧ba̧lö Dios tojö ujuninobetjö̧, ja̧danö pji̧yu̧bi tjedapji jö̧ba̧lö, tojö ujuninobe.

²² Debö 'yi̧nadö tju̧ju̧kwemi ju̧kwadöbi wajwibadö, delö ichobejö jö̧ba̧lö, –Ja'yubenö yötja̧li̧ da̧ja̧kwinajayonö, isabenö waisanö omukwatakwawa la'akama wajwibadösa, –jö̧ba̧lö yöba̧ladö, debö 'yi̧nadö tju̧ju̧kwemi ju̧kwadöma.

²³ —Jo̧kwaijayonö, okobe deinö ju'wedö wajwitjonö, Diosda waiso̧ chömöledö, jo̧bama waiso̧, isabenö waisanö omukwatakwawa waisachibakwawelöma.

²⁴ Jau chömöledö, Diosma okobe jwiinö edo̧, baikwö yöta̧la: Diosma okobe jwiinö mölȩjȩ teebe ji̧ edo̧, bö̧je bajalebi ichibanö.

^25-26 Diosda omudawö juninama jwa̧le'epjo dokwa buluwanö jwa̧le'ewo jö̧ba̧lö, jo̧bada omudawö juninama, jwaibalawa dokwa da̧kwobe okwatibo jö̧ba̧lö. Jo̧bada omudawö juninama, ojwiyo dokwa nöinö ojwiyo o̧bo jö̧ba̧lö, ja̧danö jo̧bada omudawö juninama, jwa̧le'epjo doibakwa̧ma, dena doibakwojobö jö̧ba̧lö. Diosda ja̧ jawa omudawö juninama chömöledö, ja̧danö ja̧ omudawö ujunenama,

²⁷ ju'wibi waisanö omukwatakwawa ba̧ja̧dö edinobe, dokwa nöinö mikwawo jö̧ba̧lö. Jau chömöledö, waisanö omukwatakwawa mikwawi̧ nönö edinobe ichejekwa, dokwa nöinö mikwawo jö̧ba̧lö, ja̧danö otiwanö edajo̧,

²⁸ bö̧jȩ jojodönö yöawinobe baikwö: –Isabenö waisanö omukwatakwawa waisadöma, Isabenö Jo̧ Diosnö yebabinö omukwatö ösödadöda, ja̧danö isabenö waisanö omukwatakwawa okwa jawa waisachibadöma, sulabenö ja̧awa öpöjödö kabatibadöda, –jö̧ba̧lö yöawinobe Diosma, —Job yöa̧linobe.