Diosnö ösödo̧ Job mikwo̧ usula emawina jawa 27 - Dios Iwene

Sulabenö ja̧tinokobetjö̧, sulabenö ja̧binasa jö̧ba̧lö omöna yöta̧lökakwo̧sa, jö̧ba̧lö Job yöa̧lina jawa

¹ Jobma yemidanö yöa̧linobe ömöledönö, baikwö:

² —Okobe Jwiinö Juluwo̧ Diosma, iteda öba a'otjö wene jwibo̧ chö̧ji̧ma yöbawö̧kö̧, ja̧danö cho̧'wo sulachibanö webo̧ Diosma. Döwaisa, usula chemawinö webo̧ Diosma isabenö jo̧, ja̧danö jo̧ba öba a'o ja̧nö, isabenö yötawaduwakwö,

³ ina 'yaba̧lo̧ ja̧nö, Dios cho̧'wo chemobö weayi,

⁴ la'akatjöda omöna yöta̧lökakwo̧sa, chinenenö la'akatjöda omöna jawa yöta̧lökakwo̧sa.

⁵ —Jau chömöledö, –Jweinö yöbawadöja, isabenö sulabenö ja̧bo̧sa, –jö̧ba̧lö yöta̧litjö̧ma, omöna jawa yöta̧lena, ja̧danö jobekwö omöna yöta̧lobö jwibo̧sa. Isabenö Dios öba a'otjö wene jwibo̧sa chömöledö, jo̧kwajabetjö̧ ö'wö batibenanö kabatö, jwaikwöda i̧ya̧da wene jweinö yöta̧lakwo̧sa.

⁶ Jau, isabenö sulabenö ja̧bö chö̧jinatjö̧ma, chomajadenö chöwaiso jö̧ta̧lena, ja̧danö chomajade ötjönö yöawena ichejekwa, –Sulabenö ja̧binaja, –jö̧ba̧lö. Jo̧kwaijayonö jobekwö yöawökö chomajadema, jo̧kwajabetjö̧ ba̧kwelöjatebö 'diinö ja̧nö yöta̧lakwo̧sa, isabenö Dios wei̧ otiwanö a̧ja̧kwö jo̧sa, jö̧ba̧lö.

⁷ —Chöpöjojodönö baikwö yöta̧la, ju'wedö sulabedönö lȩebi̧danö, chöpöjojodönöbi Dios lȩebobö chösöda. Iteda wei̧ a̧ja̧kwöködönö lȩebi̧danö, ötjönö metjibotö jö̧ba̧lö a̧la̧ibadönö lȩebobö chösöda.

⁸ Jau chömöledö, Dios jo̧banö öpöjödadönö lȩbebö, jobadötjö ja̧kwawa 'döebenama, –Tupakwö otiwanö dö̧jakwedösa, –jö̧ba̧lö ösödö tjiteada̧lobö jȩnaji̧?

⁹ –Ötjöwe, wene baledi̧tjö, pjabatitjö, –Jwötjeba̧liökwe, Dios a̧ja̧kwö pjaatenaji̧? Kwöwaisaduwa, ja̧maökö.

¹⁰ —Ju'wibi yöta̧laduwakwö, isabenö Diosnö öpöjödadöma, Okobe Jwiinö Juluwo̧ Dios otidi̧ edö tjo̧'wo ösöwachibanö edöködö, jö̧tö? Ja̧danö kabatökönö, ba̧kwelöjatebö Diosnö abebö jwöböködö, jö̧tö? Ötjöma jejenöchokobe chömöledö, isabenö Diosnö ösödo̧sa chömöledö.

¹¹ —Otiwanö yötawi̧ kwa̧ja̧kwaduwo chömöledö, ja̧danö ötjöma Dios ujulu jawa ökwödönö chö̧ba̧ja̧dakwo̧sa. Ju'wi jaye toja̧lökönö, okobe jwiinö Okobe Jwiinö Juluwo̧ Dios jawa labebö lobö chö̧ba̧jadakwo̧sa.

¹² Jau chömöledö, yötawakwa̧ jawa ida̧ökö kwedaduwajabe, ja̧danö edajadö, ida̧ökö otiwanö Diosnö kwöwaisachibaduwo jö̧ka̧laduwajabe, chömöledö. Tajawedö waisachibökönö, jwaikwöda mikwawa jwii̧ jawada ina yöka̧laduwobeda? Isabenö babe yötawakwa̧ jawa kwa̧ja̧kwaduwo chömöledö, bajaliyanö otiwanö kwöwaisachibaduwakwobetjö̧.

¹³ —Baikwö yötawaduwakwö chömöledö, Okobe Jwiinö Juluwo̧ Dios sulabedönö lȩebakwa̧ma, tjömöledönö suli̧ waedadönö Dios lȩebakwa̧ jawa yötawaduwakwö:

¹⁴ Sulabo̧ i̧tji̧mu tjö̧ba̧jȩkwachijayonö, otiwanö wene jwiinö tjö̧joböma ba̧jȩkwachöködö, ju'wedö kwabö lotjakwawö̧ batjibanö ba̧jȩkwachadö chömöledö. Isabenö wene jwiinö tjö̧jökakwedö sulabo̧ itji̧mu tupadanö jojodöma chömöledö, ba̧kwelöjatebö a̧wi̧chi̧ tjöbö tjö̧jakwedö.

¹⁵ Ja̧danö jo̧ba itji̧mutjö kwabö lotjököwö̧, ja̧danö a̧wi̧chi̧tjö ji̧badöma, inesö tjö'wöchi̧tjö debö tji̧'yakwedö, ja̧danö debö tji̧'yiawö, tjilekwamu wobekwö tjujunibawö̧ma, tjubudekwökakwedö, –Otiwanö debö tji̧'yajabe, –jö̧ba̧lö.

¹⁶ —Ja̧danö sulabo̧ma nijiso̧pja ba̧jȩkwi̧danö nöinö plata jawa emijayonö, ja̧danö lete'o ba̧jȩkwi̧danö mö japopo baibanö nöinö kamijisi emijayonö,

¹⁷ waekwakobe, emina jawama iteda ömöledöma tjujuna̧lökakwedö. Jau, iteda emina kamijisima, Dios wei̧ a̧ja̧kwadöda 'dutjawakwedö, ja̧danö wene jwibadöda, ujuna̧lina plata jawa 'da̧'yö tjemakwedö.

¹⁸ —Jau chömöledö, sulabo̧ ö̧ji̧ma, baikwö wanedö yötawa, otiwanö omukwatö 'dieju otidö̧kö̧, awöka acha'ba juluwanö otidi̧danö, ja̧danö yöte teada̧lo̧ juluwanö löwöte otidi̧danö, 'waejuda otido̧ sulabo̧ma.

¹⁹ Jo̧kwajabetjö̧, nöinö juna̧lo̧ abobö öbamatijayonö, a̧la̧ibenama ida̧ökö jwibo̧ baibajabe sulabo̧ma, yȩayi wiluenama, nöinö ujuna̧linama ida̧ökö jwiinö baibajabe.

²⁰ —Isabenö wene baledökwe sulabo̧nö, ojwe okwatibi̧danö yeabikwawa jawa jo̧banö okwatibobedanö ichejekwa, yöte ja'ö jwa̧le'epjo labinö dobibö jo̧banö e'ewibobedanö ichejekwa.

²¹ Jau, jwa̧lȩ'epjo jawo̧ laebobekwösapjo jo̧banö e'ewobedanö ichejekwa, debö 'yo̧ baibanö, ajayinö ö̧jinelö jo̧banö jwodatö loobedanö ichejekwa.

²² Jau chömöledö, jwa̧lȩ'epjoma, lȩlöjinö edökönö jo̧banö mebibö doibakobedanö ichejekwa, ja̧danö döibajotö jö̧ba̧lö, labinö juluwanö ö'öbakwawo̧, sulabo̧ma.

²³ Jejenö döibajotö jö̧ba̧lö ö'öakwawijayonö, jwa̧lȩ'epjoma jo̧banö oakobe ichejekwa, ja̧danö jo̧banö so̧wia̧lakobe ichejekwa, –Döibakwawa jwibo̧ja, —jö̧ba̧lö wanedö yöa̧linobe Jobma.