Diosnö ösödo̧ Job mikwo̧ usula emawina jawa 26 - Dios Iwene

Job iteda ömöledönö obö atadina jawa

¹ Bildadbi, ju'wedö ömöledöbi jejenö yötja̧liökwe, yötja̧laja̧ öpöjödö, obö yöa̧linobe Jobma, baikwö:

² —Ayö, nöinö pjabatadöja, tjujulu jwibadönöma, otiwanö iteda ujulu jwibo̧nö ö̧jibobö pjakataduwajabe.

³ Ayö, öwaetjöda okobe jwiinö kwöwaisaduwi̧ i̧sȩbö, waisanö omukwatakwawa wajwibo̧nö, otiwanö öwaisachibobö yökawaduwajabe.

⁴ Tida jejenö waisanö yökawaduwobö pjaatinajö? Ti o̧'wo luwo̧ ökwödönö ö̧ba̧ja̧dinajö, inesö waisakwawa ji̧ jawa jejenö yöka̧laduwakobetjö̧? –jö̧ba̧lö iteda ömöledönö obö yöa̧linobe Jobma, Mikwa jwii̧ jawada yöba̧ladöja, jö̧ba̧lö.

Diosma isabenö juluwo̧ jö̧ba̧lö Job yöa̧lina jawa

⁵ Tupakwö yöa̧linobe Jobma: —Isabenö okobe deinö yetjaibanö juluwo̧ Diosma. Jwiinö juluwiawö̧, ida̧ökö debö 'yi̧nadöbi yebabinö tjö̧bawadö, jwaibalawa teebe tju̧ju̧kwemi ja̧nö, Diosnö yebabinö tjö̧bawadö.

⁶ Jau, debö 'yi̧nadö tju̧ju̧kwemibi edö waiso̧ Diosma, ju'wedö debö 'yi̧nadö tju̧ju̧kwemi tjedököjayonö, tjöekwi̧ma ja'yubebi jwiobe, jobe debö 'yi̧nadö tjuju̧kwemibi Dios edapji jö̧ba̧lö. Isabenö okobe jwiinö edo̧ Diosma.

⁷ Isabenö juluwo̧ Diosma, baikwö yötawa: Anukwemi jwiijayonö, Diosma mölejȩ u'dakwöchobe bajalenö debatö nöno̧, ja̧danö bö̧je la'aka jwiijayonö, yayonö 'diinö otido̧.

⁸ Ja̧danö, ojwiyo ko̧ko̧dö 'di̧batö ojwiyo'wo böa'wonö ano̧, ja̧danö yelösöda nöinö ojwiyo a̧ji̧jayonö, kȩachibökö'wo, di̧ataja̧ ojwiyoma.

⁹ Ju'wibi, yö̧te jawo̧ nöbo̧ dejatenabi, ojwiyo'wonö debatö tjöbebo̧, yö̧te jawo̧ öwawapji jö̧ba̧lö.

¹⁰ Ju'wibi dewi̧ bakwachobebi, yei̧ bakwachobebi jwaibalawanö wȩyudö lödo̧, dena yȩojobö, dena dewojobö jö̧ba̧lö webo̧ma jo̧bada.

¹¹ —Isabenö jwiinö juluwo̧ Diosma, ödameakwenama, mölȩjȩ la'aka labinö yö̧a̧lobedanö ichejekwa, ja̧danö a̧ja̧kwö mölȩjȩ la'akama yebabinö tjö̧awobedanö ichejekwa.

^12-13 Iteda inesö ujulunö pjuenama, okobe jwiinö ojwiyo o'wiju pjubö lobo̧, mölejȩ 'dawökö̧jȩ baibanö, ja̧danö iteda inesö ujulunö, jwaibalawa buluwi̧ma yöachibobö webo̧. Isabenö waiso̧ juluwo̧obetjö̧, inesö labo̧ jwaibalawanö jo̧ Rahab ötjabökwenö ujuluwinobe, ja̧danö öba a'otjö döibajobö jö̧a̧lenama, döibapji jö̧ba̧lö iteda ujulunö dobö loinobe.

¹⁴ —Jobekwö wamenöda yötawaduwakwö Dios inesö ujuluma, wanedö yötawa, tjo'omanö sewoba̧lö yötja̧li̧danö, iteda ujulutjö sule ja'yubeda i̧sȩbajabe. Jau chömöledö, böba ökwöi̧ da̧ja̧kwenama, –Ayö, Dios inesö ujuluma, dokwa nöinö juluwo̧jö, –jö̧ba̧lö a̧ja̧kwö omukwatadösa, isabenö ujuluma ja'önöda döwaisobetjö̧, —jö̧ba̧lö yöa̧linobe Jobma.