Diosnö ösödo̧ Job mikwo̧ usula emawina jawa 25 - Dios Iwene

Bildad Job yöa̧laja̧ öpöjödö atadina jawa

¹ Job jejenö yöa̧liökwe, Bildadma atadinobe baikwö:

² —Isabenö okobe deinö inesö la'aka tjuluwo̧ma Diosda, isabenö okobe deinö yetjabo jö̧tja̧lökwema, jo̧bada. Diosda juluwo̧obetjö, mölejȩ ju̧kwadö angeledöma Diosnö yebabinö omukwatö, ölakwabikwawökönö tju̧ju̧kwobe.

³ Isabenö inesö la'aka luwo̧ Diosma, iteda ömöayedö ölakwabikwawadöma, ba̧ja̧dakwawökenanö tjö̧ba̧jȩkwachobe, isabenö juluwo̧obetjö̧. Ju'wibi yöta̧la, isabenö dejatinö juluwo̧obetjö, iteda dewi̧ma, bö̧jȩ ba̧kwemeachibanö dejatobe.

⁴ —Isabenö yöta̧laja̧danö jo̧be Job, jo̧kwajabetjö̧ baikwö abebö cha̧ja̧kwakwö: Bö̧jȩ jojodötjö, bakwo̧bi Dios öba a'otjö wene jwibo̧ ö̧jenaji̧? Bö̧jȩ ya̧dö tjeminawö̧tjö, bakwo̧bi bakwainö otiwo̧ ö̧jenaji̧?

⁵ Deobe Job, baikwö yötawa: Diosma inesö dewinö jo̧, ja̧danö jo̧ba öba a'otjö, yö̧te jawo̧bi, si̧li̧'idöbi dejatöködödanö ichejekwadö, jö̧tö?

⁶ Ja̧ jawa omukwatö, bö̧je jojodö Dios öba a'otjö mikwawadö tjö̧jenaji̧? Mikwawöködö yelösöda, Dios öba a'otjö sule sa̧dö tji̧mikwawöködanö mikwawaöködö bö̧jȩ jojodöma, —jö̧ba̧lö yöa̧linobe Bildadma, Jobnö.