Diosnö ösödo̧ Job mikwo̧ usula emawina jawa 24 - Dios Iwene

Juluwanö lȩbȩbö̧kö̧ Diosma, sulabedönö, jö̧ba̧lö Job yöa̧lina jawa

¹ Tupakwö yöa̧linobe Jobma: —Tajawedö sulabedönö lȩebakwa̧ möle omudawö ujunokobeda Okobe Jwiinö juluwo̧ Diosma? Jo̧banö ösödadö, –Ökwödönö pjabatö, döpöjojodönö lȩkebo, –jö̧ba̧lö, lekwe möle tjiteada̧lijayonö, tajawedö juluwanö lȩebokobeda?

² Sulabedö ju'wedönö sulabenö ja̧tji̧ma baikwö yöta̧la: Ju'wedö tjitea niji tjönaukwotö jö̧ba̧lö, niji ö'öbö i̧sȩkwi̧ jawa pjolatö junadö, ja̧danö ju'wedö tja̧jwi̧mu obejadönö naukwö, idöda tja̧jwi̧mukwö junadö.

³ Ja̧danö löyödö tja̧jwi̧mu buludönö a'dewö lobadö, ja̧danö tjilekwamunö wobekwinadö tjajwi pakayanö sulabenö 'dölanadö, –Kwumusidi kwimidenanö baibanö 'dötebakwö, –jö̧ba̧lö.

⁴ Ja̧danö usulasedönö pjatjato jö̧tja̧lijayonö, pjabatökönö manatjö a'dewö lobadö, okobe deinö usulasedö bakobe tju̧ju̧kwawenanö baibanö.

⁵ Jejenö balediawö̧, jwiinö usula emawadö usulasedöma. Tebonö ju̧kwadö bu̧ludö kwakwawa ja'yuwemi tju̧kwa isakwö tjö̧ji̧danö, labinö otidö tjukwakwa̧ isakwadö usulasedöma, sulabedö sulabenö ja̧tji̧awö̧, jojodö deobetjöda idöbi, tji̧tji̧mubi tjukwakwa̧ kwakwawa isakwö ju̧kwadö.

⁶ —Sulabedö sulabenö ja̧tjiawö̧, isabenö usula emawadö usulasedöma, ju'wedö tjöbatjiju waji̧ tjemaja̧ ikenama, batjo sula'wo isakwö otidadö, u'yu̧kwaja̧tjö emö tjukwobö, ja̧danö sulabedö tjöbatjo ubasayu kwebachö isakwadö, ji̧baja̧tjö emö tjukwakobetjö̧.

⁷ Tjökamiji̧do̧bi jwibö, yö̧te baledibanö tja̧do̧ jwibö abadö, tiyuwijayonö, usula emawö, sabana'wo jwaawa'wo jwibö, usula emawadö.

⁸ Tjejubi jwitjobetjö̧, mösa'ijutjö ojwiyo o̧benama, usula emawö 'bȩkwadö, ja̧danö tjeju jwibö ja̧nö, tiyuwiawö̧ inawanö wo̧batadö.

⁹ —Sulabedöma isabenö sulabenö usula tjemawinö ja̧badö usulasedönö. Jilekwenö wobekwinuju jitji̧nö o̧do'bi̧ jojwonöbi, jitji̧nö 'döbebö emadö, –Sule kwumusidi kwimiditjö̧da kwitji̧nö tjetatocha, –jö̧ba̧lö.

¹⁰ Ju'wibi, usulasedönö pjabatökönö, tja̧do̧ jwibö kwetjachobö webadö, ja̧danö trigo 'witjaja̧ 'ditja̧ta'mu tje'ewobö wetjijayonö, kwakwawa iyökönö a̧wi̧chi̧ tjötjobö webadö.

¹¹ Ja̧danö olivo o̧tesobu otikwejunö usulasedönö olivo o̧te tjotidobö webadö, ja̧danö ubasobu ja̧takwö tjotidobö webadö, jo̧kwaijayonö ojwiyo o̧ti̧ tjötjijayonö, ja'yubebi tjowoböma weböködö.

¹² Comunidadnö ja̧nö, usulasedöma, –Akö, –jö̧ba̧lö usula emawö budekwadö, ja̧danö kwatjajawö̧ma, usula emawö Diosnö pjaatobö budekwadö, jo̧kwaijayonö yayonö sulabedönö lȩbebö̧kö̧ Diosma, –Sulabenö ja̧köbaduwa, –jö̧ba̧lö.

¹³ —Jobadö sulabedönö baikwö wanedö yötawa: Jobadöma möle dewi̧ öpöjojodödanö ichejekwadö, möle jawa mananö kwetjachobö öpöjödadö. Yö̧te sulabenö ja̧tjotö jö̧ba̧lö, möle jawa manatjö labebadö.

¹⁴ Jau, ina yȩayi, jojodönö kwabawö lobo̧ma a̧la̧ibö usulasedönöbi, jwibadönöbi kwabö lobo̧, yöte naukwabo̧ ju̧kwawinö kweachi̧danö kwebachadö jobadö sulabedöma.

¹⁵ Ju'wedö tjilekwamukwö sulabenö ja̧badöbi yö̧te ösödadö, yö̧te juluwanö baibobö teada̧ladö, ja̧danö tjöba mu'dukwadö, –Bakwo̧bi ötjönö wajwiena, –jö̧ba̧lö.

¹⁶ Naukwabidöbi möle öpöjödö, yöteda ösödadö, yö̧tema ju'wedö tjejubiya tebachö naukwabidö, jo̧kwiajayonö mölema labebökönö idöda tjejubiyanö ju̧kwadö.

¹⁷ Okobe deinö jobadöma möle öpöjödadö. Jobadö yetjabi̧ma, yȩa'wo okwa ji̧maökö, yetjabi̧ma möle dewi̧, jojodö sulabenö ja̧tji̧ tjedapji jö̧ba̧lö.

¹⁸ —Jejenö ji̧jayonö, ökwödöma yöka̧laduwobe, –Ojwe buluwawa itjei'wo juluwanö isuwö loidanö, juluwanö Dios söbebö loawö̧ sulabedönöma. Jobadönö lȩbebö, tjitea nijibi suli̧ waedo̧, bakwo̧bi tjöbatjo ubasayubebi tji̧'yökenanö baibanö.

¹⁹ Jau, ojwiyo o̧bökönö, tubachibena tiyuwi̧ jawa ojwiyo 'diatakwawa juluwanö tubetjö ojwiyoda baibi̧danö, ja̧jaye baledakobe sulabedönö, jobadöma debi babibö, wobadö tjuju̧kwemibe tji̧'yakwedö.

²⁰ Ja̧danö, juluwanö debi batjibiawö̧, okobe deinö juluwanö tjo̧'wo jwitjibakwedö jobadönö, idöda tjojo'dodöbi juluwanö tji̧tji̧mu sulabedönö tjo̧'wo jwitjibakobe. Jau, towi juluwanö jubö lotji̧danö, juluwanö ö'wö babibö, sa̧dö tjukwakwawö̧ batjibakwedö sulabedöma, –jö̧ba̧lö yöka̧laduwobe, jo̧kwaijayonö juluwanö lȩebö̧kö̧wö̧.

²¹ —Isabenö sulabenö ja̧badö jobadöma. Jobadöma metu'wo batjibobö jwibadö tji̧tji̧mu debadönö sulabenö ja̧badö, ja̧danö tjilekwamu wobekwinadönö pjabatöködö.

²² Jo̧kwaiökwe, isabenö iteda ujulu i̧sȩbö, sulabedönö lȩebakwo̧. Jau chömöledö, Dios jobadönö lȩebobö a̧la̧ibenama, sulabedötjö inesö juluwadönöbi lȩebakwo̧, ja̧danö lȩebenama, Diostjö tjö̧jibobö jwitjakwedö, isabenö debö tji̧'yakwedö.

²³ Ajayinö otiwanö wene jwiinö tjö̧jobö Dios weinajayonö, isabenö jobadö tjö̧ji̧ eda̧lo̧ Diosma, otiwanö ja̧tjojobö, sulabenö ja̧tjojobö jö̧ba̧lö.

²⁴ —Ja̧danö ajayinöma ja'yubenö lekwe juluwadö batjibanö katjekwinajayonö, o̧bukwobeda lekwajabetjö debö tji̧'yakwedö. Jobadönö meatö loakwo̧ Diosma, ju'wedö mikwawöködödanö batjibanö, ja̧danö wanedö yötawa, trigosacho 'witji̧danö, jo̧badönö ko̧ko̧dibö 'wibö loakobe.

²⁵ Isabenö yötawaduwakwö chömöledö, yöta̧laja̧danö jo̧be. Yöta̧laja̧ a̧ja̧kwö, –Omöna yöba̧lo̧ Jobma, –jö̧ba̧lö kwomukwataduwitjö̧ma, omöna yöta̧laja̧ma diyajö jö̧ba̧lö kwi̧sȩbaduwo. Chedemi bakwo̧bi deobe, –Jobma omöna yöba̧lo̧, yöa̧li̧ma mikwawökö ji̧, –jö̧ba̧lö i̧sȩbakwo̧ma, isabenö jweinö yöta̧lobetjö̧, —jö̧ba̧lö yöa̧linobe Jobma.