Diosnö ösödo̧ Job mikwo̧ usula emawina jawa 23 - Dios Iwene

Elifaz sulabenö yöa̧liökwe Job atadina jawa

¹ Elifaz jejenö yöa̧liökwe, Jobma atadinobe, baikwö:

² —Babe mölȩbi ina öpöjödachibö, cho̧'wo suli̧nö yöba̧lo̧sa, ja̧danö –Akö, –jö̧ba̧lö chubudekwijayonö, ina jwaikwöda usula chemawinö webo̧ Diosma.

³ —Ötjöwe! Dios ö̧jemi chöwaisitjö̧ma, ja̧danö jo̧ba öba a'o chichibobö ji̧tjö̧ma, otiwo jö̧a̧lena, baikwö yöta̧la:

⁴ Dios öba a'o ichibö, ötjönö baledi̧ jawa labebö lobö yötawena, –Otiwanö weköbi̧ a̧ja̧kwö chö̧jijayonö, usula emawo̧sa̧, lȩkebobö jwiijayonö, lȩkebi̧tjö emawo̧sa, –jö̧ba̧lö labebö lobö yötawena.

⁵ Ikenama, labebö lobajo̧, Dios atadakwa̧ cha̧ja̧kwena, labebö lobö atadi̧tjö, –Tajawedöjö, –jö̧ba̧lö otiwanö a̧ja̧kwö chöwaisachibena.

⁶ —Jau chömöledö, Dios öba a'o chichibobö ji̧tjö̧ma, dameakwö, iteda ujulunö söbebö loökena Diosma, lȩlöjinö edö, otiwanö labebö lobö yötawi̧ a̧ja̧kwena,

⁷ ja̧danö a̧ja̧kwajo̧, inesö lȩekwa luwo̧ Diosma yöawena, –Isabenö wene jwibo̧ Jobma, –jö̧ba̧lö, ja̧danö yöawi̧tjö̧, la'akatjöda lȩebi̧tjö chemawobö jwiena. Jau chömöledö, isabenö Dios wei̧ a̧ja̧kwö jo̧sa, jo̧kwajabetjö̧ Dios öba a'o ichibö yötawitjö̧ma, isabenö otiwanö a̧ja̧kwena.

⁸ —Isabenö Dios öba a'o ichibö yötawobö jo̧be chömöledö, jo̧kwaijayonö waekwobe, öba a'o chichibobö chöbadekwajokobetjö̧. Jau, chabönökwö Dios ö̧jemi chisakwitjö̧ma, deobe, ja̧danö chökömakwö isakwö chi̧'yitjö̧bi, chöbadekwajokobe.

⁹ Ja̧danö wajwitobekwöchobekwö iteda ujulu i̧sȩbö otidijayonö, jo̧banö chedökö, ja̧danö tjebachajö chöwaisobekwöchobe i̧'iytjö̧bi, jo̧banö chedökö, öba a'o chichibobö jö̧ta̧li̧ma waekwobe.

¹⁰ —Jo̧kwaijayonö Diosnö chedököjayonö, okobe jwiinö kwetachi̧tenia edö waiso̧ Diosma. Jo̧kwajabetjö̧, otiwanö ja̧bö chö̧jojobö, sulabenö ja̧bö chö̧jojobö jö̧ba̧lö ötjönö badedö editjö̧ma, bakwai̧ oro öwawi̧danö öwawena, isabenö Dios wei̧ a̧ja̧kwö jo̧sa̧, jö̧ba̧lö.

¹¹ —Jau, isabenö Dios wei̧ a̧ja̧kwö jo̧sa, baikwö wanedö yötawa: Okobe jwiinö Dios kweachi̧tenia, jwaikwöda teada̧lönö ökömanö lubo̧sa, jo̧ba i̧'yaja̧ mananöda kwebacho̧sa, jelobekwö jalachibökönö.

¹² Isabenö Dios wei̧ a̧ja̧kwö jo̧sa, jwaikwöda jo̧ba wei̧ ja̧bö jo̧sa, wainö ja̧bökönö. Isabenö Dios yöawi̧ ösödö jo̧sa, a̧wi̧chi̧ tjöbö chö̧ji̧tjö̧bi, yayonö chu̧kwa kwakwawa chukwobö chösödi̧tjö̧ bajalekwönönö, Dios yöawi̧da cha̧ja̧kwobö ösödo̧sa, –Kwakwawa mikwawi̧tjö bajalekwönönö mikwawi̧ma, Dios yöawi̧da, –jö̧ba̧lö.

¹³ —Jo̧kwaijayonö, Dios wei̧ a̧ja̧kwö chö̧jijayonö, yayonö usula chemawinö webo̧ Diosma. Balewö lobö̧kö̧ Diosma, ja̧danö bakwo̧bi Diosnö webo̧ma deobe, –Omukwatö kwujunaja̧ kabatibi, –jö̧ba̧lö webo̧ma. Iteda omukwati̧danö ja̧bö jo̧ Diosma, iteda ösödi̧danö.

¹⁴ Ja̧danö, –Job usula emawinö wetakwo̧sa, –jö̧ba̧lajo̧, jwaikwöda jö̧a̧li̧danö usula chemawinö webo̧. Ju'wibi, chedemi ju'wi jawabi tupakwönönö usula chemawinö weakwa̧ omukwatö ujunajena,

¹⁵ jokwajabetjö̧ jwiinö yebabinö jo̧sa, ötjöwe, jö̧ba̧lö. Jau, ja̧ omukwatö, Dios öba a'o ja̧nö, jwiinö yebabinö jo̧sa, –Ayayitjö bajalekwönönö isabenö usula chemawena, –jö̧ba̧lö̧.

^16-17 —Jau chömöledö, isabenö chomajadenö chime'dawenanö baibanö, yetaibanö weajabe Diosma. Isabenö Okobe Jwiinö Juluwo̧ma, jwiinö yetaibanö ja̧ajabe, ja̧danö inesö yȩa'wo chö̧jobö weajabe. Jo̧kwaijayonö, inesö yȩa'wo chö̧jijayonö, yȩi̧ma yebabö̧kö̧sa, sule Diosnöda jwiinö yebabinö omukwato̧sa, Ayö, tupakwönönö usula chemawinö weena, —jö̧ba̧lö yöa̧linobe Jobma.