Diosnö ösödo̧ Job mikwo̧ usula emawina jawa 21 - Dios Iwene

Zofar yöa̧liökwe, Job atadina jawa

¹ Zofar jejenö yöa̧liökwe, Jobma atadinobe baikwö:

^2-3 —Chömöledö, isabenö cho̧'wo ösöwachibanö pjakataduwobö jö̧ka̧laduwitjö̧ma, teada̧lönö yöta̧li̧ kwa̧ja̧kwaduwobö atebaduwakwö. Jau chömöledö, ja̧da atebaduwakwö, baikwö yöta̧la: Yöta̧li̧ a̧ja̧kwö, ötjönö oköbaduwobö jö̧ka̧laduwijayonö, abönö kwo̧'woduwi 'dibachibö kwiteada̧laduwobö atebaduwakwö, yöba̧lö katatenanö baibanö, ja̧danö jemi ikenama wene jwiinö ötjönö oköbaduwobö ja̧kobe.

⁴ —Chömöledö, budekwö yöta̧li̧ma, bö̧je jojo usula chemawinö weobetjö̧, budekwö yöta̧lobeji̧? Kwöwaisaduwa, Diosda usula chemawobö wei̧tjö, budekwö yöba̧lo̧sa. Ja̧danö , –Kwo̧'wo 'dibachibö 'wi̧inö kwöjo, –jö̧ba̧lö weköbaduwi̧ atadö, baikwö abebö cha̧ja̧kwaduwakwö: Tajawedö cho̧'wo 'dibachibö 'wi̧inö chö̧jobö chömöledö?

⁵ Usula chemawi̧ kwedaduwökenaji̧? Isabenö usula chemawi̧danö usula emawadöma, 'wii̧nö jö̧kö̧dö chömöledö. Usula emawö chö̧ji̧ edö, kwöbajaleduwi jalaka baibanö kwedaduwobö jo̧be chömöledö, ja̧danö kwömamunö kwaa mu'dökwö, 'wi̧inö kwö̧baduwobö jo̧be.

⁶ Jau chömöledö, isabenö yetjaibanö baledökwesa, ötjöbi chöbaledi̧ jawa omukwatö, jwiinö yebabinö jo̧sa, yebabinö omukwatö tjö̧bawo̧sa.

Sulabedöma Dios juluwanö lȩebököwö̧, jö̧ba̧lö Job yöa̧lina jawa

⁷ Tupakwö yöa̧linobe Jobma: —Ötjönö baledi̧ omukwatö, baikwö abebö cha̧ja̧kwobe: Sulabedöma, tajawedö lekwe möle wene jwiinö tjuju̧kwobeda? Tajawedö ajayitjö bajalekwönönö juluwadö babibö, wene jwiinö damö batjibobeda sulabedöma?

⁸ Jau, jobadö tjöba a'otjö tji̧tji̧mu otiwanö tjö̧dapeachobe edadö, ja̧danö tjö̧'dö̧dö tjö̧dapeachobebi wene jwiinö edadö.

⁹ Wene jwiinö ju̧kwadö tjejubiyanö, ja̧danö sulabedötjijayonö, otiwanö Dios lȩebö̧kö̧wö̧ tjö̧jobe.

¹⁰ Tja̧jwi̧mubi ja̧danö, tjajwi pakayaso̧ma otiwanö wene jwiinö itji̧kwo̧, ja̧danö tja̧jwi̧mu pakayadö metu'wo babibadöma, waekwökönö otiwanö tjitji̧munö emadö.

¹¹ —Isabenö wene jwiinö tjuju̧kwobe sulabedöma, tji̧tji̧mu a̧petube labebö tjalewobö webadö, ja̧danö wene jwiinö jelobetenia ö'öbakwawö alewadö, ja̧danö tjo̧'wo ösöwanö baile döbadö.

¹² Musica jawa tamborilbi, arpabi ökwi̧ a̧ja̧kwö, tjo̧'wo ösöwanö lo̧badö, ja̧danö tjo̧'wo ösöwachibanö flauta ökwöi̧ a̧ja̧kwadö.

¹³ Okobe jwiinö tjö̧ji̧ma, nöinö juna̧lö ju̧kwadö, ja̧danö bajaliyanö damö waekwö, ö'wö batjibenanö baibanö, wene jwiinö ölakabikwawökönö ju̧kwadö, jobadö sulabedöma.

¹⁴ —Jejenö wene jwiinö tju̧ju̧kwobetjö̧, Diosnö yöba̧ladö, –Dö̧jelö labebi Dios, ökwö weköbi̧ da̧ja̧kwoböma öpöjödadösa.

¹⁵ Dedemi Okobe Jwiinö Juluwo̧ Dios wei̧ a̧ja̧kwö, jo̧banö dösödoböma jwibadösa, ida̧ökö okobe jwiinö dösödi̧ juna̧ladösa. Diosnö ösödö, jo̧banö adebitjö̧ma, babe dujuna̧litjö bajalekwönönö dujuna̧lenaji̧? Dujuna̧lökena, dedemi mikwawökena, Diosnö ösödö dö̧jobö, –jö̧ba̧lö Diosnö öpöjödö yöba̧ladö, jobadö sulabedöma.

¹⁶ Jobadöma Diosnö öpöjödö omukwatadö, –Otiwanö dujuna̧li̧ma, Diostjö ichökö ji̧, ökwödöda jawa, –jö̧ba̧lö. Jo̧kwaijayonö ja̧maökö, otiwanö tjujuna̧li̧ma idöda jawamaökö, Diostjöda ichi̧. Jo̧kwajabetjö̧ ötjöma la'akatjöda jobadö tjomukwati̧danö omukwatö̧kö̧sa, ötjöma isabenö Diosnö ösödö omukwato̧sa, —jö̧ba̧lö yöa̧linobe Jobma.

Sulabedöma usula emawöködö nöinöma, jö̧ba̧lö Job yöa̧lina jawa

¹⁷ Tupakwö yöa̧linobe Jobma: —Yöka̧laduwajabe, –Sulabedöma nöinö usula emawadö, –jö̧ba̧lö, jo̧kwajabetjö̧ baikwö abebö cha̧ja̧kwaduwakwö: Sulabedö tjitea dȩjuwa'yuma, dokwa nöinö tiibobeda? Ja̧danö söbebö loawa jawa, dokwa nöinö baledobeda jobadönö? Ja̧danö dokwa nöinö jobadönö dameakwö ja̧nö, usula tjemawobö weobeda Diosma?

¹⁸ Jobadöma isa'ye, jwa̧le'epjo e'ewa'yedanö, trigo jawa sula'wo labinö jalachö e'ewa'wodanö isabenö tjichejekwobeji̧? Kwöwaisaduwa chömöledö, ja̧maökö, jö̧tö?

¹⁹ —Ja̧danö yöka̧laduwobe, –Diosma sulabedönöda lȩebököjayonö, jobadönö lȩebo jö̧a̧li̧ jawa ko̧ko̧dö lödo̧, tupakwönönö labinö tji̧tji̧mu tupadanö jojodönö lȩebakobetjö̧, –jö̧ba̧lö. Jo̧kwaijayonö baikwö yötawaduwakwö chömöledö, itji̧mu tupadanö jojodönömaökö, sulabenö ja̧bo̧nöda Dios lȩebobö jo̧be chömöledö, lȩebökwe, –Sulabenö ja̧ti̧ökwe, ötjönö lȩbȩbo̧ Diosma, –jö̧ba̧lö öwaisachibakobetjö̧.

²⁰ Jau, idödabi tjöbajalenö, Dios jobadönö söbebö lobö lȩebi̧ jawa tjedobö jo̧be, idödabi Okobe Jwiinö Juluwo̧ Dios dameakwö lȩebi̧tjö tjemawobö jo̧be, tji̧tji̧mudamaökö.

²¹ Jau chömöledö, sulabo̧ma iteda itji̧mu tupadanö jojodönö omukwatö̧kö̧, –Usula tjemawapji jö̧ba̧lö sulabenö ja̧toko, –jö̧ba̧löma. Jejenö omukwatöködö chömöledö, sule ina 'yatja̧layi baledi̧ jawada omukwatadö, ö'wö batjibaja̧ ikena baledi̧ma mikwawokobe jobadönö, isabenö sulabenö ja̧badöda balekwa mikwa lȩekwa tjemawobö jo̧be.

²² —Bakwo̧bi ö̧jobeji̧, Diosnö ba̧ja̧do̧ma? Ayayitjö bajalekwönönö Dios waisakwawa jawa öwaisachibakobetjö̧, bakwo̧bi Diosnö öba̧ja̧denaji̧? Kwöwaisaduwa chömöledö, Diosda inesö juluwadönö lȩekwa yöbawo̧ma chömöledö, bakwo̧bi jo̧banö ba̧ja̧do̧ma deobe yelösöda, —jö̧ba̧lö yöa̧linobe Jobma.

Okobe deinö bakweminö ö'wö babibadö, jö̧ba̧lö Job yöa̧lina jawa

^23-24 Tupakwö yöa̧linobe Jobma: —Bakwo̧ itea otiwanö juna̧lo̧, u̧kwa otiwanö kwo̧, iwe'iju otiwo̧, ina me'dawö̧kö̧ wene jwiinö jo̧ma ö'wö baibena.

²⁵ Ja̧danö jelo̧, o̧'wo tjobekwö usula emawö jo̧, la'akatjöda söi̧ kwakwawa kwinö̧kö̧bi ö'wö baibena.

²⁶ Jobadö du̧ju̧tajanö baikwö yöta̧la, ina 'yatja̧layi, wainö tjö̧jinajayonö, ö'wö batjibaja̧ okobe, bakweminö nijiso̧pjanö tjo̧tja̧wö̧, ja̧danö bakweminö sa̧döma tjiteba'iju tjukwakwawö̧, —jö̧ba̧lö yöa̧linobe Jobma.

Ökwödöma sulabenö omöna jawa yöba̧ladöja, jö̧ba̧lö Job ömöledönö yöa̧lina jawa

²⁷ Tupakwö yöa̧linobe Jobma: —Ökwödö kwomukwataduwi̧ chöwaisa chömöledö, ötjönö suli̧ kwöwaedaduwobö omukwatö kwujunaduwi̧ma.

²⁸ Ökwödöma yöba̧ladöja, –Juluwadötjö sulabedö tjö̧jinejubiyama, söbebö lotjinemi, sulabedö tjö̧jinemima jwiinö söbebö loawemida jo̧be, –jö̧ba̧lö yöka̧laduwobe.

²⁹ Jejenö yöka̧laduwi̧ma, wajwibö yöba̧ladöja chömöledö, la'akatjöda jelobetjö kwebachö ȩwa̧jadönö tjedaja̧ abebö kwa̧ja̧kwinaduwökiji̧? Jobadö tjedaja̧ yötjawi̧ la'akatjöda kwa̧ja̧kwinaduwökiji̧?

³⁰ Tjedaja̧ baikwö yöbawadö, –Nöinö wene baledenama, sulabedöma wenetjö ji̧badö, Dios dameakwö lȩebenama, wene jwiinö Dios lȩebi̧tjö döbibajadö, –jö̧ba̧lö yötjawobe.

³¹ —Jau chömöledö, sulabenö ja̧tji̧jayonö, bakwo̧bi jamatö, –Sulabenö ja̧köba, –jö̧ba̧lö katjatiboböma webö̧kö̧, ja̧danö bakwo̧bi sulabenö ja̧tjaja̧ mikwa baibanö, balekwa mikwa usula tjemawoböma webö̧kö̧.

³² Ja̧danö bajaliyanö ö'wö babibajadö, tjiteba'iju tjo̧tjobö wobiakobe tje'ewenama, tjo̧tja̧jemi otiwanö tjöbeba̧lö te'ada̧ladö tjömöledöma.

³³ Jau chömöledö, sulabedö ö'wö batjibenama, otiwemi nijinö tjo̧tjawö̧, ja̧danö o̧tjö̧ tji̧'yenama, iteba'o abönöbi, ökömakwöbi ba̧jȩkwadö jojodöma wobiakobe teadö tji̧'yobe. Sulabedönöma, Dios juluwanö söbebö loawö̧ jö̧ka̧laduwijayonö, omöna.

³⁴ —Jejenö jo̧be chömöledö, yöka̧laduwi̧danömaökö. Ökwödöma cho̧'wo ösöwachibotö jö̧ba̧lö yöka̧laduwi̧ma, sule mikwawa jwii̧ jawada yöba̧ladöja, –Otiwanö atadadösa, –jö̧ka̧laduwijayonö, bakobe omöna yöa̧lakwawa jawada atadadöja, ja'yubebi pjabatöködöja, —jö̧ba̧lö yöa̧linobe Jobma.