Diosnö ösödo̧ Job mikwo̧ usula emawina jawa 20 - Dios Iwene

Zofar Job yöa̧laja̧ öpöjödö atadina jawa

¹ Jobekwö Job yöa̧liökwe, Zofarma öpöjödö atadinobe, baikwö:

² —Job, sulabenö yöka̧laja̧ma, cho̧'wo sulachibanö yöka̧lajabe, jo̧kwajabetjö̧ isabenö juluwanö chatadobö jo̧be.

³ Jau Job, tabakwö chö̧jotö jö̧ba̧lö, sulabenö yöka̧lajabe ötjönö, ja̧danö yöka̧laja̧ okwa jawa otiwanö cha̧ja̧kwobetjö̧, isabenö otiwanö chatadobö jo̧be.

^4-5 —Kwöwaisa Job, lekwema juluwöködö sulabedöma, ja̧danö Diosnö öpöjödadö tjo̧'wo ösöwanö tjö̧ji̧ma, juluwanö 'dö̧ibajobe, jö̧tö? Jau Job, Dios ajayinö jojodönö otidajo̧, bö̧jenö tjö̧jobö weinemi baikwö bajalenö, lekwema otiwanö jö̧ködö sulabedöma, la'akatjöda.

⁶ —Jau Job, sulabedötjö inesö juluwadöbi, lekwema juluwöködö, bakwo̧ sulabo̧ma okobe deinö ju'wedötjö bajalekwönönö jwiinö juluwo̧ ö̧jitjö̧bi, yayonö juluwö̧kö̧ lekwema, sulabo̧obetjö̧.

⁷ Sulabo̧ma iteda ide'o ji̧danö babibo̧, baikwö yöta̧la, jojodö tjide'o juluwanö jwii̧nö baibi̧danö, juluwanö debö 'yo̧ sulabo̧ma, ja̧danö la'akatjöda tjeachajökakwo̧. Ja̧danö, juluwanö deiawö̧, ajayinö jo̧banö edinadöma abebö tja̧ja̧kwakwedö, –Ajayinö edajidökwema daida? –jö̧ba̧lö.

⁸ Jau, tji̧'wi̧dinö tjedinökwedanö, juluwanö deobe sulabo̧ma, ja̧danö la'akatjöda tjöbadekwajökakwo̧ jo̧banöma. Yöte tji̧'widinö tjedaja̧ juluwanö jwii̧danö, juluwanö debö 'yo̧ sulabo̧ma.

⁹ —Jau, isabenö juluwanö debö 'yo̧ sulabo̧ma, ajayinö jo̧banö edinadöma, la'akatjöda tjedökakwedö jo̧banö yemidanöma, ja̧danö iteda ömöledöbi la'akatjöda tjedökakwedö jo̧banö.

¹⁰ Ju'wibi, ajayinö jwibadötjö önaukwinobetjö̧, iteda itji̧muma jwibö tjö̧jakwedö. Ajayinö tjabe'do iteatjö nöinö tjujuna̧lijayonö, jwibadönö tjiyobö ja̧kobe, tjabe'do nöinö ujuna̧lina jawa jwibadönö tjetjatajobö ja̧kobe, sulabo̧ itji̧muma.

¹¹ —Baikwö yöta̧la sulabo̧nö, Jo̧bama ina pöe waekwökönö, juluwo̧ ö̧jijayonö, ina juluwo̧ ö̧jemi ja'ötjö debö i̧'yakwo̧, ja̧danö ö'wö babibajo̧, nijinö tjo̧tjajökwe nijiso̧pja̧nö ö̧bakwo̧.

¹² —Baikwö wanedö yötawa sulabo̧ öji̧ma: Jojodö söi̧ kwakwawa kwanö, 'dȩtjawobö tjösödi̧danö, sulabo̧ma jwiinö sulabenö ja̧awa 'diinö do̧a̧lobö ösödo̧.

¹³ 'Diinö do̧ba̧lö, sulabenö ja̧i̧ kaatibobö öpöjödo̧ sulabo̧ma, bi̧ya chösöda, otiwa jö̧ba̧lö.

¹⁴ Jo̧kwaijayonö, –Otiwa, chösöda, –jö̧a̧lijayonö, isabenö jo̧banö suli̧ waedi̧, baikwö wanedö yötawa: –Söi̧ kwakwawa kwo̧sa, –jö̧a̧lijayonö, ukwaja̧ma ukwa'wo okwa balewachibobedanö ichejekwa, niekwa, a̧ko̧'dö nibadö tjomadeba baibanö balewachobedanö ichejekwa.

¹⁵ —Jau, baikwö wanedö yötawa, nöinö mikwawi̧ jawa ö̧ka̧tijayonö, ukwaja̧ etekwawakobe, Diosma ukwa'wotjö etekwawobö weakwo̧.

¹⁶ Otiwi̧ kwo̧sa jö̧a̧lijayonö, a̧ko̧'nö tjomadebada 'dȩbo̧ sulabo̧ma, ja̧danö inesö nibo̧ a̧ko'da yö̧ökwe ö'wö baibakwo̧ ichejekwa.

¹⁷ —Otiwobe ja̧nö, nöinö ujuna̧lijayonö, o̧'wo ösöwanö ö̧jobö jwibo̧ sulabo̧ma, baikwö yötawa: Inesö otiwödö ö'öbö, inesö tjösödi̧ jawa ji̧ ojwe ö'öbö ö̧jijayonö, o̧'wo ösöwanö ö̧joböma jwibo̧ sulabo̧ma.

¹⁸ Nöinö itea emajo̧, tea luwo̧ baibanö ö̧jijayonö, o̧'wo ösöwanö ujuna̧lobö jwibo̧ sulabo̧ma, emaja̧ tjeatajobö ja̧akobe, baikwö yötawa:

¹⁹ Usula jojodö usula tjemawinö weinobetjö̧, ja̧danö jwibadönö pjabatökönö ö̧jinobetjö̧, ja̧danö otidinökeju 'döebinobetjö̧, o̧'wo ösöwanö ujuna̧lobö jwibo̧, tjebatajöda tjeatajakwo̧.

²⁰ —La'akatjöda o̧'wo ösöwanö ö̧jökakwo̧ sulabo̧ma, nöinö ujuna̧litjö̧bi, la'akatjöda, –Tjo̧wita, –jö̧a̧lökakwo̧, jwaikwöda tupakwönönö ujuna̧lotö jö̧ba̧lö isakwakwo̧.

²¹ Jwaikwöda okobe jwiinö ujuna̧lotö jö̧ba̧lö isakwo̧ sulabo̧ma, ja̧danö jejenö ja̧bö ö̧jobetjö̧, ö̧ji̧ma waekwakobe, otiwanö ujuna̧lökakwo̧ lekwema.

²² Nöinö ununa̧lijayonö, o̧'wo tjo̧bekwö, –Ötjöwe, –jö̧ba̧lö o̧'wo tjo̧ekwakwo̧, nöinö ujuna̧lemi ja'ötjö, wene baibökwe, jwiinö o̧'wo tjo̧bekwö usula emawö ö̧jakwo̧.

²³ Jau, omeawinö ukwemi ja'ötjö, Dios inesö ödameakwi̧ i̧sȩbö lȩebakobe, ukwemi ja'ötjö, ojwiyo o̧bi̧danö inesö labi̧ jawa jo̧ba sulabo̧nö lȩebakobe Diosma.

^24-25 —Dios jejenö lȩebiökwe, döibajobö jö̧a̧lakwo̧ sulabo̧ma, jo̧kwaijayonö waekwakobe, baikwö wanedö yötawa: 'Dii jawakwö tjölakwabikwawelö döibajijayonö, broncetjö otikwa nayunu 'bötjakwo̧, okwejewa söibenanö. Jejenö 'bötjiökwe, nayunu 'yeawenama, bajalema okwejewasobutjö salöakobe, jwiinö yebabinö ö̧ji̧binö.

²⁶ —Okobe jwiinö iteaja̧ma, jwiinö baibakobe, ja̧danö inesö ubinö ökwöla, Diosda weinola ökwölama, jo̧banö juwö loakobe, jo̧banöbi, itji̧mutjö ina 'ya̧baladönöbi.

²⁷ Ayayinö otiwo̧danö ichejekwinajayonö, okobe deinö mölejenö ju̧kwadöbi, bö̧jenö ju̧kwadöbi jo̧banö yöbawö tji̧sȩbakwedö, –Isabenö bitema sulabo̧, –jö̧ba̧lö.

²⁸ —Jau Job, Dios lȩebakwa̧ möle baibenama, isabenö labinö lȩebakwo̧ sulabedönö, ojwe otiwatibö söbebö loi̧danö, tjejubi, okobe jwiinö tjiteaja̧bi jwienanö baibanö söbebö loakwo̧.

²⁹ Jejenö baledakobe sulabedönöma Job, Diosda omudawö ujuninobe, jobekwö jobadönö baledobö, sulabenö ja̧tjaja̧ mikwa baibanö. Isabenö iya̧da jawa tjemakwedö, —jö̧ba̧lö Jobnö yöa̧linobe Zofarma, isabenö Dios öba a'otjö sulabo̧ja, jö̧ba̧lö.