Diosnö ösödo̧ Job mikwo̧ usula emawina jawa 2 - Dios Iwene

Awetja yemidanö Job usula emawobö ja̧ina wene

¹ Ja̧danö, jemi ikenama, ju'wi möle Dios ömöayedö angeledö yemidanö Isabenö Jo̧ Dios öba a'o tjo̧ko̧ko̧kwinobe, tjuluwo̧ öba a'o tjo̧ko̧ko̧kwobö, ja̧danö Awetjabi yemidanö jobadökwö ichinobe, jo̧babi Isabenö Jo öba a'o ichibobö.

² Ja̧danö, ichibiökwe, Isabenö Jo̧ma abebö a̧ja̧kwinobe Awetjanö, —Detjö kwichaja̧da? —jö̧ba̧lö. Ja̧danö aebökwe, —Bö̧je ba̧kwemeachibanö kwetachajabe, bö̧jetjö baledi̧ jawa eda̧lö, ja̧danö jelobebi, jelobebi kwebachajo̧ chichajabe, —jö̧ba̧lö atadinobe Awetjama.

³ Atadökwe, Isabenö Jo̧ma Awetjanö abebö a̧ja̧kwinobe: —Jobe bö̧jȩ kwebachö kwö̧jonö, chömöayo̧ Jobnö edö kwomukwataji̧? Bö̧jȩ ba̧kwemeachibanö ju̧kwadötjö, bakwo̧bi Jobdanöbo̧ma deobe, jö̧tö? Jau, Jobma isabenö otiwanö wene jwibo̧, Dios ösödi̧danö ja̧bö jo̧, ja̧danö Diosnö yebabinö ösödö, suli̧ jawa öpöjödö kabatibo̧, –Suli̧, Dios öpöjödi̧, –jö̧ba̧lö, jö̧tö? Ja̧danö, Job sulabenö ja̧inököjayonö, jo̧banö söbebö lotobö akebijatö, ja̧danö akebinadanö, jo̧banö söbebö lotijatö, jo̧kwaijayonö yayonö jwaikwöda otiwanö ja̧bö jo̧ Jobma, ötjönö ösödö. Öpöjödakwo̧ yöka̧linajayonö, jwaikwöda 'diinö janö, otiwanö ösödö jo̧ Jobma, jö̧tö? —jö̧ba̧lö abebö a̧ja̧kwinobe Awetjanö.

⁴ Abebö a̧ja̧kwökwe, —Ja̧maökö, ina jo̧banö tjöbeba̧lö pjakatobetjö̧, ina ökwönö ösödo̧ Jobma. Jau, idöda tjö̧ji jawada mikwawobe bö̧je jojodönö, ja̧danö okobe jwiinö tjujuna̧li̧ iyö lotjena, idöda otiwanö tjö̧jakobetjö̧. Ja̧danö, iteda ina usula emawökönö ö̧jobetjö̧, ina ökwönö ösödo̧ Jobma.

⁵ Jo̧kwaijayonö, iwe'ijubi, iteba'obi usula emawobö weköbitjö̧ma, jenada isabenö ökwönö öpöjödakwo̧ Jobma, ja̧danö ökwönö öpöjödö, kwöba a'otjö sulabenö yöawakwo̧, –Diosma sulabo̧, chöpöjödökwe, –jö̧ba̧lö. Ökwönö ösödi̧ma, okwa jawamaökö, sule wamenöda ösödo̧ Jobma, —jö̧ba̧lö atadinobe Awetjama.

⁶ Atadökwe, Isabenö Jo̧ma yöa̧linobe: —Yöka̧lajadanö wamenöda ösödojobö kwedo. Iteba'onö usula emawinö ja̧köbobö wetakwo, jo̧kwaijayonö jo̧banö kwabö loköboböma wetökö, —jö̧ba̧lö yöa̧linobe Isabenö Jo̧ma, Awetjanö.

⁷ Weökwe, Awetjama Isabenö Jo̧ öjelö laebinobe, ja̧danö labebajo̧, Job jwiinö usula emawobö ja̧inobe. Job iteba'o ba̧kwemeachibanö inesö nii̧ wale'debiya samobö weinobe, uutjö ömasapiya baibanö.

⁸ Jejenö ja̧iökwe, jwiinö usula emawinobe Jobma. Ja̧danö, usula emawö, i̧sa̧yu 'daekwa̧yu ja'yuwayu eminobe, ja̧danö emajo̧, jobe ba̧nö, kabatökönö dȩyu̧kwi̧ma ikelawinobe. Ja̧danö, —Jwiinö o̧'wo tjo̧acho̧sa, —jö̧ba̧lö, ökwölaso̧pja jȩna ö̧binobe Jobma.

⁹ Jejenö usula emawö ö̧jioko, Job ilekwoma dameakwö yöja̧linobe jilekwenö, —Tajawedö ina jwaikwöda Diosnö kwösödobeda? Bejenö usula kwemawinö weobetjö̧, jo̧banö öpöjödö, –Sulabenö ja̧bo̧ Diosma, –jö̧ba̧lö yöka̧lo, ja̧danö yöba̧lajo̧ ö'wö bakibo. Jau Job, tupakwö Diosnö kwösödobö jwiobe, jo̧banö öpöjödö kakatibo, —jö̧ba̧lö yöja̧lökwe,

¹⁰ Jobma ilekwonö atadinobe, —Sulabenö yöka̧la chilekwo. Jejenö yöba̧lö, ya̧dö wajwibadö yötja̧lidanö yöba̧lujuja chilekwo, baikwö yötawa: Dios ökwödönö otiwa jawa iyenama, demobö ösödadösa, otiwa jö̧ba̧lö, jö̧tö? Ja̧danö, Dios otiwa jawa iyi̧tjö demobö ji̧tjö̧ma, Dios suli̧ jawa iyi̧tjöbi demobö jwienaji̧? Isabenö Dios suli̧ jawa iyi̧tjöbi öpöjödökönö demobö jo̧be chilekwo, —jö̧ba̧lö atadinobe Jobma. Ja̧danö, okobe jwiinö ja̧ usula emawinö baledi̧ jawa baledonö, sulabenö yöa̧linokobe Jobma, ina jwaikwöda Diosnö ösödö ö̧jinobe.

Job ömöledö ujuluwachibanö pjatjatobö tjichina jawa

¹¹ Job ömöledötjö ju'wedö tjö̧jinobe, Teman niji jojo Elifaz mikwo̧bi, Suah niji jojo Bildad mikwo̧bi, Namat niji jojo Zofar mikwo̧bi. Jobadöma tja̧ja̧kwinobe, inesö suli̧ Jobnö baledina jawama, ja̧danö a̧ja̧kwajadö, tjömöledöso̧ o̧'wo ösöwachibanö pjatjatobö tjomukwatinobe. Ja̧danö, tjitebokwena nijitjö ichö, jobadö wamedukwama bakobe Job ö̧jobekwö tjichinobe, Job ujuluwachibanö pjatjatobö.

¹² Ja̧danö, ichibö, ja'yubenö ödötjö Jobnö tjedenama, wainö ichejekwiawö̧ jo̧banö wajwitjökwedanö ichejekwinobe, jwiinö usulaso̧ ö̧jobetjö̧. Ja̧danö ichibö, o̧'wo tjo̧achö labinö tjubudekwinobe, ja̧danö tjö̧ka̧misi kȩ'ekwö lotjinobe, ja̧danö nijiso̧pja tjuubiyanö tjöwanawinobe, —Dömöledöso̧ Jobnö jwiinö o̧'wo tjo̧achadösa, —jö̧ba̧lö.

¹³ Ja̧danö, jobe tjömöledöso̧ Jobkwö nijinö tjö̧binobe, jelemutjö dötölataja mölebi, yö̧tebi. Ja̧danö jwiinö usula emawö ö̧jiawö̧, yöba̧lökönö, 'wiinö ba̧nöda jo̧bakwö nijinö tjö̧binobe.